1. Ni enki eki tushemerire kukora kugira ngu twije kuhonoka ekiro ca Yehova?

 BIBULI ku eri kugamba ‘ekiro ca Yehova,’ n’eba eri kwenda kugamba obwire obu Yehova aricwera emanja abangi beye kandi akarokora abahereza beye. Omu bwire bwa kare, hine obu Yehova yacwerire abantu emanja. (Isa 13:1, 6; Ezek 13:5; Zef 1:8) Omu bwire bwitu, ‘ekiro ca Yehova’ nikija kutandikira aha kutahirirwa kwa Babuloni orurembo rukuru, rero kije kuhendera n’orutaro rwa Haramagedoni. Kugira ngu twije kuhonoka eco ‘kiro,’ nitushabwa kwetegura hati. Yesu taregesize ku tushemerire kwetegura ‘okubonabona kwingi’ kusha, ahobwe akanagamba ku tushemerire kugumizamu kukwetegura.​—Mat 24:21; Luk 12:40.

2. Ahabw’enki turi kubasa kugasirwa n’ebaruha ya 1 Abatesalonika?

² Omu baruha y’okubanza eyi Pawulo yahandikire Abatesalonika, akahumecerwa yakoresa ebyokureberaho byingi, kugira ngu akwase Abakristo kugumizamu kwetegura ekiro ca Yehova eki aricwereraho abantu orubanja. Pawulo akaba namanya ku ekiro ca Yehova cabire kitarahike kiri kwija obwo bwire. (2 Tes 2:1-3) Konka na bwe, akahiga abo Bakristo kugumizamu kwetegura eco kiro, nk’ahu kirayije nyensakare kandi n’itwe nitubasa kukuratiza obwo buhabuzi. Reka tushwijume oku yashoborwire ebi bintu bishatu: (1) oku ekiro ca Yehova kiriyija, (2) abatarije kuhonoka eco kiro, n’ (3) oku turi kubasa kwetegura ngu tuhonoke.

3. Ni bata oku ekiro ca Yehova kirije kwija nk’omushuma wa nyekiro? (Nambwenu reba ekishushani.)

³ ‘Nk’omushuma wa nyekiro.’ (1 Tes 5:2) Eco ni ecokureberaho c’okubanza eki yakoresize ari kushoborora oku ekiro ca Yehova kirije kwija. Abashuma nibakira kukora jubajuba kandi bija omu mwirima kugira ngu beshereke. Ekiro ca Yehova na co kiryayija kitungurine kandi kiryatungura abantu bingi. Nangwa n’Abakristo nibabasa kwija kutungurwa n’oku ebyo bintu byabaho jubajuba. Konka itwe titurije kucwecerezibwa nk’ababi.

4. Ni bata oku ekiro ca Yehova kirije kuba nk’oku ebisha biri kukwata omukazi?

 ⁴ ‘Nk’oku ebisha biri kukwata omukazi ori kwenda kuzara.’ (1 Tes 5:3) Omuzire naba atari kumanya obwire obuhikire obu arikwatirwaho n’ebisha. Konka tari kubanganisa yaba birije kwija. Ku biri kubaho, ebisha nibyija bitungurine, byija biri kushasha, kandi tibikayemerera. Ni co kimwe, tituri kumanya ekiro n’eshaha eyi ekiro ca Yehova kiriyijiraho. Konka, nitwikiriza tutari kubanganisa ku ekiro ca Yehova kirije kwija, kandi ku Ruhanga aricwera ababi orubanja omu buryo butungurine.

5. Ni bata oku okubonabona kwingi kurije kuba nk’oku buri kushesha?

⁵ Nk’oku buri kushesha. Ecokureberaho ca kashatu eki Pawulo yagambire na co nikigendana n’oku abashuma bari kwiba nyekiro. Konka obu bwo, Pawulo akagereranisa ekiro ca Yehova, n’oku biri kugenda bwaza kushesha. (1 Tes 5:4) Abashuma abari kwija kwiba nyekiro nibabasa kuhuga bebwa kureba oku obwire buri kwiruka. Omushana g’omukasheshe nigubasa kubakwata, rero kituma abarinzi babakwata. Okubonabona kwingi na ko nikwija kutungura abantu abari nk’abashuma, abari kuhugira omu mirimo yabo n’ebikorwa ebitari kushemeza Ruhanga. Itwe tituri nka bo, kandi nitubasa kugumizamu kwetegura turi kureka ebikorwa n’emitwarize ebitari kushemeza Ruhanga, ahobwe tukurata ‘ebirungi byona, okuhikirira n’amazima.’ (Efe 5:8-12) Bwanyima, Pawulo akakoresa ebyokureberaho ebiri nk’ebyo kugira ngu ayereke abantu abatarije kuhonoka.

6. Ni bata oku abantu bingi bagwejegire? (1 Abatesalonika 5:6, 7)

⁶ ‘Abagwejegire.’ (Shoma omu 1 Batesalonika 5:6, 7.) Pawulo akagereranisa abantu abatarije kuhonoka ekiro ca Yehova n’abantu  abagwejegire. Tibari kubasa kumanya ebiri kubera aha rubaju rwabo ninga ngu bamanye oku obwire buri kugenda. Obwe rero, tibari kubasa kumanya ebintu by’omugasho ebiri kubaho ninga ngu bigire eki byabegesa. Abantu bingi b’omuri obu bwire bagwejegire omu buryo bw’omwika. (Rom 11:8) Tibari kufa aha bintu ebiri kwereka ku turi omu ‘biro by’aha muheru’ kandi ku okubonabona kwingi kuri hihi. Habaho ebintu ebigumire omu nsi, abantu abamwe nihika bari kwereka ku bari kwenda kumanya obutumwa bw’Obukama. Konka abingi omuri bo, nibahungira omu mwanya g’okuguma bari misho. Nangwa na bamwe abari kwikiriza ku ekiro c’orubanja kiribaho, nibatecereza ku kicari hare. (2 Pet 3:3, 4) Konka itwe nitumanya ku obuhabuzi oburi kutushaba kuguma turi misho, buri kukizaho kuba obw’omugasho, oku obwire buri kugenda nibuhwayo.

7. Ni bata oku abatarije kuhonoka ekiro ca Yehova bari kugereranisibwa n’abasinzi?

⁷ ‘Abasinzi.’ Entumwa Pawulo akagereranisa abantu abatarije kuhonoka ekiro ca Yehova n’abasinzi. Abasinzi tibari kukwata n’amani ebiri kubaho kandi kugira ngu bakore esharamu, nikibakwata obwire buringwa. Ni co kimwe, n’ababi tibari kufa kuhurira okurabura kwa Ruhanga. Nibasharamu kukora ebikorwa ebirije kutuma bacwecerezibwa. Konka, Abakristo nibashabwa kurinda ebitecerezo byabo kandi baguma bari misho. (1 Tes 5:6) Omunyabwenge omwe omu bya Bibuli, akashoborora ku okugira ebitecerezo birungi, kiri kumanyisa okuguma oturize kandi eco nikituma wabasa kukora ensharamu ndungi. Ahabw’enki turi kushabwa kuguma tuturize? Ni ahabw’okuba turi kushabwa kwerinda kwejwanga omu by’obutegeki n’ebindi bizibu ebiri kubaho omu nsi. Oku ekiro ca Yehava kiri kukizaho kuhika hihi ni ko turi kugemwa kwekwatanisa omuri ebyo bizibu. Konka nambwenu, titushemerire kwemereza omutima munonga turi kwebuza oku birije kutugendecera. Omwika gwa Ruhanga nigwija kutukwasa kuguma tuturize, kuguma tuhamire omu bitekateko, n’okukora ensharamu ndungi.​—Luk 12:11, 12.

8. Ni bata oku ebiri omu 1 Batesalonika 5:8 biri kutwereka emitwarize eri kubasa kutukwasa kuguma turi misho kandi twine emitekatecere mirungi? (Nambwenu reba ekishushani.)

⁸ ‘Tujware ecoma c’okwekingiza omu kifuba. . . n’engofira.’ Pawulo akatugereranisa n’abasirikare abetegwire kurwana kandi abajwarire orugamba. (Shoma omu 1 Batesalonika 5:8.) Omusirikare murungi, burijo naba ayetegwire kuza aha rugamba. Ni co kimwe n’itwe. Nituguma twetegwire ekiro ca Yehova turi kujwara ecoma c’okwekingiza omu kifuba, ari co okwikiriza na rukundo, kandi tujwara engofira, ari go masiko. Eyo mitwarize nebasa kutukwasa munonga.

9. Ni bata oku okwikiriza kuri kuturinda?

⁹ Ecoma ekiri kukingira ekifuba nikirinda omutima g’omusirikare. N’itwe okwikiriza na rukundo nibirinda omutima gwitu gw’ekigereraniso. Nibibasa kutukwasa kugumizamu kuhereza Ruhanga n’okukuratira Yesu. Okwikiriza nikutuhamiza ku Yehova arije kutuhemba twagumizamu kumurondesa n’omutima gwitu gona. (Heb 11:6) Nikutuma twagumizamu korobera Omwebembezi witu Yesu, n’obu cakuba kigumire. Nitubasa kugumya okwikiriza kwitu turi kushwijuma ebyokureberaho by’abantu b’omuri obu bwire abagumizemu kuba abesigwa n’obu babire bari kuhiganisibwa ninga shi bine ebizibu by’akasente. Kandi nitubasa kwerinda kukunda obutungi turi kutoreza abantu abayorobize embera kugira bate eby’Obukama omu mwanya g’okubanza. b

10. Ni bata oku rukundo eyi turi kukunda Ruhanga n’abatahi eri kutukwasa kwehangana?

 ¹⁰ Nabwenu rukundo netukwasa kuguma turi misho kandi tugira ebitecerezo birungi. (Mat 22:37-39) Rukundo eyi turi kukunda Ruhanga netukwasa kwehangana omu murimo g’okuburira n’obu twakuba turi kubugana ebizibu. (2 Tim 1:7, 8) Rukundo eyi turi kukunda bagenzi bitu netukwasa kugumizamu kuburira omuri teritori zitu, n’obu twakuba turi kukoresa esimu ninga amabaruha. Tituri kuhwa amani, ahobwe nitwesiga ku izoba rimwe abatahi bitu na bo barije kuhinduka bakatandika kukora ebirungi.​—Ezek 18:27, 28.

11. Ni bata oku kwereka rukundo Abakristo bagenzi bitu kiri kubasa kutukwasa? (1 Abatesalonika 5:11)

¹¹ Rukundo eyi turi kukunda abatahi netwariramu n’eyi turi kukunda Abakristo bagenzi bitu. Nitwerekana eyo rukundo turi ‘kugumyana kandi turi kombekana.’ (Shoma omu 1 Batesalonika 5:11.) Nk’oku abasirikare bari kukorera hamwe aha rugamba, n’itwe tushemerire kugumyana. Ni amazima, omusirikare nabasa kuhutazibwa na mugenzi weye baba bari aha rugamba. Konka eco tikiri kutuma yayehorera. Omu buryo nk’obwe tituri kubikira enzika benetata na banyanyazi ninga ngu twehorere. (1 Tes 5:13, 15) Nambwenu nitubasa kwereka rukundo turi kuha ekitinisa benetata abari kwebembera omu kibina. (1 Tes 5:12) Obu Pawulo yahandikire eyo baruha, ekibina c’Abatesalonika kikaba kitakamazire n’omwaka. Abashija ababire bari kwebembera eco kibina, nibabasa kuba babire batamanyirire kandi bari kukora enshobe. Konka nabwo, bakaba bashemerire kuhebwa ekitinisa. Oku turi kukizaho kuhika hihi y’okubonabona kwingi, nitubasa kugenda turi kukizaho kushabwa korobera abazehe b’ekibina kukira oku turi kukikora hati. Nitubasa kwija kutatunga obuhabuzi bw’ahari ofisi yitu nkuru, n’ahari beteli; obwe rero ni ecomugasho munonga kwemanyiza kukunda n’okuha ekitinisa abazehe bitu omuri obu bwire. Oku byakuba biri kona, nimureke tumaririre kutata omutima aha kutahikirira kwabo, ahobwe tugute aha ku Yehova na Kristo bari kwebembera abo bashija b’abesigwa.

12. Ni bata oku amasiko gitu gari kurinda ebitecerezo byitu?

¹² Nk’oku engofira eri kurinda omutwe g’omusirikare, amasiko gitu na go nigarinda  ebitecerezo byitu. Amasiko gitu gaba gahamire, nitureba ku ebintu by’ensi biri busha. (Fil 3:8) Amasiko nigatukwasa kuguma tuhamire kandi tuturize. Ebyo ni byo ebyahikire aha mushija n’omukazi abari kwetwa Wallace na Laurinda, abari kukorera omuri Afrika. Omu sande ishatu kusha buri omwe omuri bo akafisa omuzire. Ahabw’endwara ya COVID-19, bakaba batari kubasa kugaruka owabo ngu bayambe ab’omu maka gabo. Wallace akahandika ati: “Amasiko gakankwasa kubatecerezaho, konka tinata omutima aha biro byabo bya bwanyima, ahobwe natecereza aha bwire obu barije kuba bari omu nsi ensya. Ago masiko gakatuma natuza kandi nabasa kwehanganira obusaasi oburi kuretwa n’okufisa.”

13. Ni enki eki turi kubasa kukora kugira ngu tutunge omwika oguri kwera?

¹³ ‘Otaraza omwika.’ (1 Tes 5:19) Pawulo akagamba ku omwika oguri kwera guri kutukoreramu. Ku turagwikiririze gukatukoreramu, nitwija kugira ekihika n’amani g’okukora omurimo gwa Yehova. (Rom 12:11) Ni enki eki turi kubasa kukora kugira ngu tutunge omwika oguri kwera? Nitubasa kugushaba birabire omu kushaba, tweyegesa Ekigambo ca Ruhanga, kandi twekwatanisa n’ekitongore ecebembirwe n’omwika gweye. Eco twakikora nikija kutuma twakizaho kwereka ‘ebyana by’omwika oguri kwera.’​—Gal 5:22, 23.

14. Ni enki eki tushemerire kwerinda twaba turi kwenda kugumizamu kutunga omwika gwa Ruhanga? (Nambwenu reba ekishushani.)

¹⁴ Ruhanga yamara kutuha omwika oguri kwera, nituba tushemerire kwerinda ekintu cona ekiri kubasa kutuma ‘gwarara.’ Ruhanga naha omwika gweye kusha abantu abine ebitecerezo birungi n’emicwe mirungi. Tarije kugumizamu kutuha omwika gweye twagumizamu kugira ebitecerezo bibi kandi tukakora ebi ari kwanga. (1 Tes 4:7, 8) Kugira ngu tugumizemu kutunga omwika oguri kwera, nambwenu tushemerire kwerinda kugaya ‘eby’abahanuzi.’ (1 Tes 5:20) ‘Ebyabahanuzi’ ebiri kugambwa hanuya, ni obutumwa obu turi kuhebwa n’omwika oguri kwera, harimo obukwatirine n’ekiro ca Yehova hamwe n’oburi kugamba aha bwire obu turimu. Titushemerire kwehuza eco kiro omu bitecerezo  byitu, turi kutecereza ku Haramagedoni eriyija tutacari omu nsi. Omu mwanya gw’eco, nimureke tugumizemu kukirahusya n’okukita omu bwenge bwitu turi kugumizamu kukora ebirungi kandi turi kuguma tuhugire omu bikorwa ‘okweha Ruhanga” buri zoba.​—2 Pet 3:11, 12.

15. Ni bata oku turi kubasa kwerinda amazima agatahikire, n’okubihabisibwa n’ebishuba bya badayimoni? (1 Abatesalonika 5:21)

¹⁵ Juba aha, abari kurwanisa Ruhanga nibija kuranga ku hariho ‘obusinge n’oburinzi!’ (1 Tes 5:3) Ebishuba bya ba dayimoni nibyija kukizaho kweyongera, kandi bihabise abantu bingi. (Kush 16:13, 14) Kandi shi itwe? Itwe titurije kuhabisibwa, ‘twageza byona.’ (Shoma omu 1 Batesalonika 5:21.) Ekigambo c’Orugirika ekiri kumanyisa ngu ‘kugeza’ kinine obuzare n’okushwijuma ebyoma by’omuhendo. Obwe rero, tushemerire kugeza ebi turi kushoma n’ebi turi kuhurira kugira ngu tumanye yaba biri amazima. Eco ni co eki Abatesalonika babire bashemerire kukora, kandi n’itwe ni co eki tushemerire kukora ahakuba okubonabona kwingi kuri hihi. Omu mwanya g’okwikiriza buri kintu cona eki twahurira, tushemerire kukoresa obushoborozi bwitu bw’okutecereza, tugereranisa ebi turi kushoma n’ebi turi kuhurira n’ebi Bibuli n’ekitongore ca Yehova biri kugamba. Eco twakikora titurije kubihabisibwa n’ebishuba bya ba dayimoni.​—Emi 14:15; 1 Tim 4:1.

16. Ni gaha masiko agu twine, kandi shi nigatuma twamarira kukora ki?

¹⁶ Omu bwire bw’okubonabona kwingi Ruhanga nayija kurokora abahereza beye bari hamwe nk’omutwe. Konka, buri omwe omuri itwe tari kumanya ekiramubeho nyensakare. (Yak 4:14) N’obu twakuba turije kuba tucariho omu bwire bw’okubonabona kwingi ninga shi twafire, nitwija kuhebwa ekihembo c’amagara agatahwaho twagumizamu kuba abesigwa. Abashukirweho omwika nibija kuba na Kristo omu igiru. Ab’ezindi ntama nibija kutura omuri paradiso omu nsi. Twena tushemerire kuta omutima aha masiko gitu kandi tuguma twetegwire ekiro ca Yehova!