1. Tukuratize ebiri omuri 1 Petero 5:2, ni guha murimo g’omugasho ogu abazehe bari kwesimira kukora?

 ABAZEHE b’Abakristo bakahebwa omurimo g’omutano g’okufa aha ntama za Yehova z’omuhendo. Abo bashija abari kwehayo nibesimira ekiconco eki bahirwe c’okuhereza benetata na banyanyazi, kandi nibakora namani kugira ngu babe ‘abarisa ababitireho omutima.’ (Yer 23:4; Shoma omuri 1 Petero 5:2.) Mazima tushemerire kwereka ku nitusima ahabw’abo bashija abu twine omu kibina!

2. Ni biha bizibu ebi abazehe bamwe bari kubugana?

² Abazehe baba bari kuhikiriza emirimo yabo nibabugana ebizibu byingi. Kimwe omuri ebyo bizibu ni oku bari kuba bashemerire kukora n’amani kugira ngu babase kufa aha b’omu kibina. Omuzehe w’omuri Amerika ori kwetwa Tony, akareba ku yabire ashemerire kukizaho kweyorobya obu yahirwe emirimo myingi y’okukora. Akagira ati: “COVID-19 ku yatandikire, nkahebwa emirimo myingi y’okutebekanisa oku enterane n’omurimo g’okuburira byabire birakorwe. Konka n’obu nabire nyine ebyo bintu byona by’okukora hine n’ebindi bintu byingi ebi nabire nshemerire kukora. Mporampora entebekanisa yange y’okushoma Bibuli, okweyegesa n’okushaba ekatandika kucendera.” Omuzehe w’omuri Kosovo ori kwetwa Ilir, we akabugana ekizibu ekiri kutana n’eco. Obu yabire ari omu kacweka akarimu orutaro, akarebera ku cabire kigumire kukuratiza obuhabuzi bw’ekitongore kitu. Akagira ati: “Obumanzi bwange bukagezibwa obu ofisi yampire omurimo g’okufa ahari benetata na banyanyazi ababire bari omu kacweka karimu akabi kingi. Nkahurira nagira obwoba kandi nkaba nindeba obwo buhabuzi butari kukora mazima.” Omumishonari w’omuri Asia ori kwetwa Tim, akareba ku cabire kigumire kugumizamu kukora ebintu byona ebi yabire nashabwa kukora burizoba. Akagamba ati: “Hariho obu nabire nimpurira nduhire omu bwenge n’omunyehurira.” Ni enki ekiri kubasa kukwasa abazehe abari kuraba omu mbera nk’ezo?

3. Ni bata oku buri omwe ari kubasa kugasirwa yashwijuma ecokureberaho c’omuramuzi Gideyoni?

 ³ Abazehe nibabasa kwegera aha cokureberaho c’omuramuzi Gideyoni. (Heb 6:12; 11:32) Akaba ayine omurimo g’okurinda n’okurisa abahereza ba Ruhanga. (Bar 2:16; 1 Bus 17:6) Kimwe na Gideyoni abazehe bakahebwa omurimo g’okufa aha bahereza ba Ruhanga omuri obu bwire obugumire. (Byak 20:28; 2 Tim 3:1) Nitubasa kwegera aha kweyorobya, obucurezi n’okoroba ebi Gideyoni yayerekire. Okwehangana kweye kukagezibwa obu yabire nahikiriza omurimo gweye. Twaba turi abazehe ninga tutari bo, twena nitubasa kwereka ku nitusima ahabw’ebi bari kutukorera. Nitubasa kushagika omurimo gw’amani ogu abo bashija abakuzire omu by’omwika bari kukora.​—Heb 13:17.

4. Ni bata oku Gideyoni yayerekire okweyorobya n’okwecureza?

⁴ Gideyoni akaba ari omushija ori kweyorobya kandi w’omucurezi. b Marayika wa Yehova kuyagambire Gideyoni ku ari we owabire arayihe ihanga rya Isirayeli omu mikono y’Abamidiyani eryabire ryine amani, ogo mushija w’omucurezi akagarukamu ati: ‘Reba, ab’omuryango gwitu n’aboro okukira bona ab’omu ruganda rwa Manase, kandi omu nju ya tata ni inye muto.’ (Bar 6:15) Akaba nayehurira nk’otarije kuhikiriza ogo murimo konka Yehova we akaba namanya ku yabire arije kubibasa. Yehova akakwasa Gideyoni yahikiriza ogo murimo.

5. Ni bata oku omuzehe ori kweyorobya kandi w’omucurezi ari kubasa kugezibwa?

⁵ Abazehe nibakora cona eki bari kubasa kugira ngu bereke ku bari kweyorobya kandi ku ni abacurezi omuri byona. (Mik 6:8; Byak 20:18, 19) Tibari kurengesereza omu bi babasize ninga shi omu kuhikiriza emirimo yabo. Nambwenu tibari kurengesereza omu kwecwera orubanja ahabw’enshobe zabo. Konka nambwenu omuzehe nabasa kubugana ebigezo. Ecokureberaho: Nabasa kwikiriza emirimo myingi konka bwanyima areba ku kigumire kuyihikiriza yona. Ninga shi nabasa kugambwaho kubi ahabw’okutahikiriza ge emirimo ninga bamuhimbisa munonga ahabw’eyi ari kukora ge. Ni bata oku abazehe bari kubasa kwegera ahari Gideyoni baraba omu mbera nk’ezo?

6. Ni enki eki abazehe bari kubasa kwegera aha kweyorobya kwa Gideyoni? (Nambwenu reba ekishushani.)

 ⁶ Guma oshabe obuyambi. Omuntu ori kweyorobya naba ari kumanya ku obushoborozi bweye bwine obugarukiro. Gideyoni akaba nayeyorobya birabire omu kushaba abandi obuyambi. (Bar 6:27, 35; 7:24) Abazehe b’abanyabwenge na bo nibakora basyoya. Tony, owu tugambireho akashoborora ati: “Ahabw’embera ezi nakuriremu, ninkira kwikiriza emirimo yona eyi nahebwa nangwa n’eyi ntabasize. Obwe rero nkasharamu ku turayeyegese aha kintu c’okweyorobya omu kuramya kw’eka kandi nareka omukazi wange yagira eki yakigambaho. Nambwenu nkareba vidiyo eri aha rubuga rwitu rwa jw.org eyine omutwe oguri kugira ngu: “Guma omanyize abandi, obesige, kandi obahe emirimo nk’oku Yesu yabire nakikora.” Tony akatandika kushaba abandi ngu bamukwase omu bi ari kukora. Ni enki ecarugiremu? Tony akagamba ati: “Emirimo y’omu kibina negenda ge kandi nanye nkatunga obwire oburi kumara bw’okwefaho omu by’omwika.”

7. Ni bata oku abazehe bari kubasa kutoreza Gideyoni bagambwaho kubi? (Yakobo 3:13)

⁷ Guma otwaze ge hagira owakugambaho kubi. Ekindi kigezo ekiri kuhika aha bazehe ni okubagambaho kubi. Nambwenu ecokureberaho ca Gideyoni nikibasa kubayamba. N’obu yabire ari kumanya ku atahikirire akatwariza ge Abefurayimu abamugambireho kubi. (Bar 8:1-3) Gideyoni tarabagarukiremu n’ekiniga. Akereka obucurezi ari kutega amatu ebi babire nibamugambira kandi eco kikatuma batuza. Abazehe b’abanyabwenge nibatoreza Gideyoni bari kuhurikiza betonzire abari kubagambaho kubi kandi babagarukamu omu muringo murungi. (Shoma omuri Yakobo 3:13.) Eco nikituma baretaho obusinge omu kibina.

8. Ni bata oku abazehe bari kubasa kutwaza basimwa n’abantu? Gamba ecokureberaho.

⁸ Guma ohise Yehova ekitinisa omu mwanya g’okubanza. Obu Gideyoni yahimbisibwe ahabw’okusingura Abamidiyani, akahesa Yehova ekitinisa omu mwanya g’okuceha. (Bar 8:22, 23) Ni bata oku abazehe bari kubasa kutoreza Gideyoni? Nibaba bashemerire kwereka ku ebi bakora ari Yehova owabakwasa. (1 Kor 4:6, 7) Ecokureberaho: Omuzehe yasimwa ahabw’obushoborozi bweye bw’okwegesa nabasa kugamba ku yabyihire omu Kigambo ca Ruhanga ninga shi ebi ekitongore ca Yehova catwegesize. Obumwe abazehe nibaba bashemerire kutecereza yaba ebi bari kwegesa biri kutuma abantu bata omutima ahari Ruhanga omu mwanya g’okuguta ahari bo. Reba ecokureberaho c’omuzehe omanyirire ori kwetwa Timothy. Obu Timothy yabire acaba omuzehe akaba namanya kutanga ge za toku. Akagamba ati: “Nkaba nimanya kutandika za toku kurungi kandi nkoresa ebyokureberaho. Ebyo bikaba nibituma nasimwa n’abantu munonga. Ekiri kushasha ni oku abantu babire nibata omutima ahari nye omu mwanya g’okuguta ahari Bibuli n’ahari Yehova.” Obwire bukahika Timothy yareba kuyabire ashemerire kugira ebi yahindura aha buryo bweye bw’okwegesa kugira ngu ayerinde kwehimbisa. (Emi 27:21) Ni enki ecarugiremu? Akashoborora ati: “Eco kikatuma abantu abatari kushushana batandika kungambira oku toku ezi ndi kutanga ziri kubakwasa kwehanganira ebizibu n’ebigezo ebi bari kubugana kandi zibakwasa kukizaho kuba banywani ba Yehova. Ebyo bikaba nibinshemeza okukira oku babire nibansima omu mwanya g’okusima Yehova.”

9. Ni bata oku okoroba n’obumanzi bya Gideyoni ‘byagezibwe? (Nambwenu reba ekishushani.)

⁹ Gideyoni ku yabire omuramuzi, okoroba kweye n’obumanzi bweye bikagezibwa. Akahebwa omurimo ogwabire gotorobi g’okushenya itambiro rya Bayari eryabire riri ow’ishe. (Bar 6:25, 26) Bwanyima Gideyoni ku yamazire  kubuganisiza hamwe amahe geye, akashabwa kugacendeza emirundi ibiri. (Bar 7:2-7) Aha muheru akashabwa kuza kurwanisa abangi beye omu kampu buri nyekiro.​—Bar 7:9-11.

10. Ni bata oku okoroba kw’abazehe kuri kubasa kugezibwa?

¹⁰ Abazehe burijo bashemerire ‘kuba betegwire koroba.’ (Yak 3:17) Omuzehe ori koroba burijo nakuratiza eki ebyahandikirwe biri kugamba kandi agendera aha buhabuzi bw’ekitongore ca Ruhanga. Ebyo nibutuma yateraho abandi ecokureberaho kirungi. Konka na mbwo okoroba kweye nikubasa kugezibwa. Ecokureberaho: Hine obu kiri kubasa kumugumira korobera obuhabuzi bwona obu yahebwa. Obumwe nabasa kwebuza yaba obuhabuzi obu yahebwa buhikire ninga shi buri obw’obwenge. Nambwenu, nabasa kushabwa kukora omurimo oguri kubasa kuta amagara geye omu kabi. Ni bata oku abazehe bari kubasa kutoreza okoroba kwa Gideyoni omu mbera nk’ezo?

11. Ni enki ekiri kubasa kukwasa abazehe koroba?

¹¹ Guma ohurikize obuhabuzi oyetonzire kandi obute omu bikorwa. Ruhanga akagambira Gideyoni oku yabire arashenye itambiro ry’ishe, yamugambira ahu yabire arayombeke erya Yehova n’ebitambo ebi yabire aratambe. Gideyoni tarabanganisize ahari obwo buhabuzi ahobwe akahika ari kubukuratiza. Omuri obu bwire, abazehe nibahebwa obuhabuzi n’ekitongore ca Yehova birabire omu mabaruha, ebirango n’omu buhabuzi obukwatirine n’eby’omwika hamwe n’eby’omubiri. Mazima nitukunda abazehe ahabw’okukuratiza obuhabuzi bwa kitewokurasi omu bwesigwa. Ebyo nibituma ekibina cona cagasirwa.​—Zab 119:112.

12. Ni bata oku abazehe bari kubasa kukuratiza obuhabuzi oburi omu Baheburayo 13:17 habaho empinduka z’ebya kitewokirasi?

¹² Guma obe oyetegwire kugira ebi wahindura. Oyijuke ku Yehova yashabire Gideyoni kucendeza amahe geye 99 ahari igana. (Bar 7:8) Nabasa kuba yayeburize ngu: ‘Mbehi eki kintu caba kiri kwetengwa? Mbehi nikija kukora?’ Konka na bwo Gideyoni akabyorobera. Abazehe b’omuri obu bwire nabo nibatoreza Gideyoni bari korobera obuhabuzi bwa kitewokurasi. (Shoma omu Baheburayo 13:17.) Ecokureberaho, omu mwaka gwa 2014 Akakiko k’Abarisa kakagira ebi kahindura aha sente eziri kukoresibwa omu kombeka Amaju g’Obukama hamwe n’ebyombeko by’ebiterane. (2 Kor 8:12-14) Ebibina tibicayihura amabanja agu byabire nibiba byine. Omu mwanya gw’eco ebibina bikaba nibihayo ebiconco kugira ngu omurimo g’obwombeki gukorwe ahu gwabire gucenirwe n’obu ekibina cakuba kiri kuhayo esente nce. Obu José yahurire ezo mpinduka akabanganisa yaba zabire zirije kukora ari kutekereza ati: ‘Mazima tihine Enju y’Obukama erishuba kombekwa. Ebi bakora tibibagaho.’ Ni enki ecakwasize José kushagika obwo buhabuzi? Akagamba ati: “Ebigambo by’omu Migani 3:5, 6 bikanyijusa kwesiga Yehova. Kandi ebyarugiremu bikantangaza! Tukombeka Amaju g’Obukama mingi kandi twayega kutanga omu  buryo obutari kushushana kugira ngu n’abatari kubasa kweyombecera batungireho omugisha.”

13. (a) Ni enki eki Gidiyoni yabire ari kwesiga? (b) Ni bata oku abazehe bari kubasa kutoreza Gidiyoni? (Nambwenu reba ekishushani.)

¹³ Kora n’amani ebi Yehova ari kwenda. N’obu omurimo gwa Gideyoni gwabire guri kutinisa kandi gurimu akabi, akorobera Yehova. (Bar 9:17) Gideyoni ku yamazire kutunga ekihamya ekiri kuruga ahari Yehova kikatuma yayikiriza atari kubanganisa ku Ruhanga yabire arije kumukwasa nk’oku yarinzire abahereza beye. Abazehe abatwire omu tucweka otu omurimo gwitu gwazibirwemu nibatoreza Gideyoni. Nibebembera n’obumanzi enterane n’omurimo g’okuburira n’obu bakuba bari kubasa kusibwa, kubuzibwa, kuferwa emirimo yabo n’okukorerwa ebikorwa by’obugomi. c Omu bwire bw’okubonabona kwingi abazehe nibija kwereka obumanzi bari korobera obuhabuzi obu barije kuhebwa n’obu bwakuba buri kurebwa nk’oburi kubaretera akabi. Obwo buhabuzi nibubasa kwija kuba buri kutwariramu okuburira obutumwa oburi kugeranisibwa n’obutumwa bw’orubare, n’oku turije kurokoka okutahirirwa kwa Gogi wa Magogi.​—Ezek 38:18; Kush 16:21.

14. Ni bata oku okwehangana kwa Gideyoni kwagezibwe?

¹⁴ Omurimo gwa Gideyoni g’oburamuzi gukaba nigushaba amani mingi. Obu Abamidiyani bahungire buri nyekiro bari kuruga aha rugamba, Gidiyoni akabakurata yabahisa omu kibaya ca Zerera hihi y’omugera gwa Yorudaniyo ahari kubasa kuba habire hehinguririzibwe n’ebibira. (Bar 7:22) Mbehi Gideyoni akagarukira ahari Yorudani? Ingaha! N’obu yabire aruhire we n’abashija 300 bakayambuka bagumizamu kurwanisa abangi babo. Eco kikatuma bakwata Abamidiyani kandi babasingura.​—Bar 8:4-12.

15. Ni ryari obu okwehangana k’omuzehe kuri kubasa kugezibwa?

¹⁵ Obumwe omuzehe nabasa kuhurira aruhire omu mubiri, omu bwenge, ninga omu nyehurira  ahabw’emirimo y’okufa aha kibina n’aha ka yeye. Omu mbera nk’ezo ni bata oku abazehe bari kubasa kutoreza Gideyoni?

16-17. Ni enki ecakwasize Gidiyoni kwehangana, kandi shi abazehe nibabasa kwesiga ki? (Isaya 40:28-31) (Nambwenu reba ekishushani.)

¹⁶ Yesige otari kubanganisa ku Yehova arije kukuha amani. Gideyoni akaba nayesiga ku Yehova arije kumuha amani kandi ku yabire atarije kumusigaho. (Bar 6:14, 34) Izoba rimwe Gideyoni n’abashija beye bakiruka aha bagabe babiri b’Abamidiyani n’obu abo bagabe bari kubasa kuba babire bari aha ngamira. (Bar 8:12, 21) Konka Ruhanga akabakwasa babakwata kandi basinga. Abazehe na bo bashemerire kwesiga Yehova we ‘otari kubasa kuremwa n’obu kwakuba okuruha.’ Nayija kubaha amani omu bwire obu gari kwetengwa.​—Shoma omuri Isaya 40:28-31.

¹⁷ Reba ebyahikire ahari Matthew, omwe omubagizire komiti eri kuyamba abarwirwe. Ni enki ecamukwasize kwehangana? Matthew akagamba ati: “Nkerebera ku ebigambo ebiri omu Bafilipi 4:13 biri amazima. Emirundi myingi ku ndi kuhurira nduhire, ninshaba Yehova ndi kumweshengereza kugira ngu ampe amani g’omubiri n’ag’omu nyehurira kugira ngu mbase kuyamba benetata na banyanyazi. Omuri obwo bwire nimpurira Yehova yampa omwika oguri kwera, ngarurwamu amani kandi binkwasa kwehangana.” Nka Gideyoni, abazehe bitu abu turi kukunda nibabasa kubugana ebizibu baba bari kurisa entama. Obwe rero, nibaba bashemerire kumanya ahu obushoborozi bwabo buri kugarukira omu by’omubiri n’omuby’enyehurira kandi bakora babuganisize n’obwo bushoborozi. Nibabasa kwesiga ku Yehova arije kuhurira okushaba kwabo, akabakwasa kandi akabaha amani g’okwehangana.​—Zab 116:1; Fil 2:13.

18. Twareba ku ni bata oku abazehe bashemerire kutoreza Gideyoni?

¹⁸ Abazehe nibabasa kwegera byingi ahari Gideyoni. Abazehe bashemerire kweyorobya kandi bakecureza omu mirimo yona eyi bari kukora n’omu ku bari kugarukamu abari kubagambaho kubi n’abari kubahimbisa. Bashemerire kukizaho koroba n’okwereka obumanzi, namunonga omuri obu bwire obu eyi nsi eri hihi kuhwaho. Kandi bashemerire kugumizamu kwijuka n’okwesiga ku oku embera ezi bakurabamu zakuba ziri kona Ruhanga arije kubaha amani. Hatariho okubanganisa nitwesimira munonga abo barisa abari kukora n’amani kandi ‘nitubaha ekitinisa.’​—Fil 2:29.