Abazire bange bakaruga omuri Estoniya omu bwire bw’orutaro rwa II rw’ensi yona, rero bafurukira omuri Jamani kandi aho ni ho ahu nazarirwe. Ku namazire kuzarwa bakatandika kwetegura kufurukira omuri Kanada. Akaju aku twatwiremu aha murundi g’okubanza hihi y’etawuni ya Ottawa, omuri Kanada, kakaba kari akaju kace kandi turi kutura n’enkoko. Nobu twabire turi abacene munonga, tukaba nitwerira amahuri omu kasheshe.

Izoba rimwe, Abahamya ba Yehova bakashomera mama omu Kushurururwa 21:3, 4. Ku bamazire kumushomera orwo runyiriri rukamukora aha mutima yatandika kurira. Embibo z’amazima ezi bababibiremu zikatandika kukura rero mama na tata bagira entunguka bahika aha kubatizibwa.

Abazire bange bakaba batari kumanya kurungi Orujungu. Konka bakaba nibagezeho kukorera Yehova oku bari kubasa. Akingi buri rwamukaga n’omumwebazo tata yaruga omu mirimo yeye y’okucura ninga kuhesha eyi yabire nakorera omu tawuni ya Sudbury, omuri Ontario, akaba natutwara nyowe na munyanyazi wange muto ori kwetwa Sylvia, omu murimo g’okuburira. Kandi buri sande tukaba nitwegera hamwe Omunara g’Omurinzi nk’eka. Mama na tata bakatuma nakura ndi kukunda Ruhanga. Eco kikatuma nayeha Yehova omu mwaka gwa 1956 nyine emyaka ikumi. Rukundo nyingi eyi babire nibakunda Yehova ekatuma nagumizamu kuhereza Yehova omu kubaho kwange.

Ku namazire kwega, nkatandika kubugana emitego. Nkatecereza nti ku ndi ba omupayoniya tindije kutunga esente z’okunkwasa kuhika aha cetengo cange c’okuza omu ndege nkaza kurambura ensi. Nkatunga omurimo g’okucuranga ahari rediyo kandi ogo murimo nkaba ningukunda. Konka nkaba ningukora omu mwebazo kandi ebyo bikaba nibituma burijo nasiba enterane kandi nyekwatanisa n’abantu abatari kukunda Ruhanga. Bwanyima omuntuwomunda wange owamanyizibwe na Bibuli akatuma nagira eki nahindura.

Nkafurukira omuri Oshawa, Ontario. Aho ni ho ahu nabuganire na Ray Norman, munyanyazi weye Lesli, hamwe n’abandi bapayoniya. Bona bakanyesimira. Okureba okushemererwa oku babire bine kikatuma nashuba kushwijuma entego zange. Bakampiga kukora omurimo g’obupayoniya kandi nkagutandika omu Kwamwenda 1966. Nkatunga okushemererwa kandi natandika kwesimira amagara gange. Konka hariho amahinduka agabire gaza kumbaho.

Obu nabire ncari omu mashomero, nkashaba kukora ahari Beteli y’omuri Toronto, omuri Kanada. Bwanyima  obu nabire ncari omupayoniya bakanshaba kuza kukora ahari Beteli omu bwire bw’emyaka ina. Konka nkaba ninkunda Lesli, kandi nkaba ndi kutecereza ku nayikiriza kuzayo nabire ntarije kushuba kumubona. Bwanyima y’obwire, nkashaba, nasharamu kuza kukora ahari Beteli, konka nambwenu canshasha kusezera ahari Lesli.

Nkakora ahari Beteli omu imeshero kandi bwanyima nakora omu by’obuhandiki. Bwanyima y’obwire Lesli akaba omupayoniya w’omutano omuri Gatineau, Quebec. Nkaba ninkira kwebuza amakuru geye kandi nyebuza yaba ari bwo bwire obu nshemeire kugira eki namugambira. Mbwanyima hakabaho ekintu ecantungwire omu kubaho kwange. Ray wa munyanya wa Lesli bakamutumira kwija kukora ahari Beteli. Tukatura omu kishenge kimwe! Eco kikatuma byanyorobera kugirana obunywani na Lesli. Tukatasana aha muheru gw’emyaka ina eyi babire bampire y’okukora ahari Beteli aha kiro ca 27, Okwakabiri 1971.

Nyowe na Lesli bakatushaba kuza kukorera omu kibina ecabire kiri kukoresa orurimi rw’Orufurenci omuri Quebec. Bwanyima y’emyaka mice nkatungurwa no kuhurira bari kunshaba ngu nze kuba omureberezi ori kutayayira ebibina nyine myaka 28. Nkahurira nagira obwoba ahabw’okuba nkaba nintecereza ku nabire ntine obumanyi oburi kumara, konka ebigambo by’omuri Yeremiya 1:7, 8 bikangumya. Izoba rimwe Lesli hamwe n’ondijo mushija n’omukazi weye bakakora butandu kandi kikaba nikimugumira kuhungira. Mbwenu shi obwe tukaba turabase omurimo g’okutayayira ebibina? Konka nabwo akangambira ngu: “Mbehi Yehova yatushaba kukora ekintu tituri kuba tushemerire kugezaho kukikora?” Obwe rero tukikiriza kukora ogo murimo twashemerererwa kugukora omu bwire bw’emyaka 17.

Obu nabire ninkora omurimo g’okutayayira ebibina nkaba nintura mpugire bituma ntatunga obwire oburi kumara bw’okufa ahari Lesli. Eco kikanyegesa erindi shomo. Izoba rimwe buri Orw’okubanza omu kasheshe nkahurira aha rwigi bakomanga. Konka nkaronda omuntu namubura, ahobwe nashanga hariyo akibo akarimu ekitambaro c’aha meza, ebijuma, cizi ninga foromaje, omugati, ecupa rya vinyo, ekirahure n’akapapura akahandikireho ngu: “Twara omukazi wawe kweshemeza.” Eryo rikambera ezoba rirungi. Konka, nkashobororera Lesli ku nabire nyine toku ezi nabire nshemerire kutegura, rero ku twabire tutarazeyo. Akabyikiriza konka akashasha. Ku nabire nsitami aha ntebe omuntu w’omunda wange akatandika kuncwera orubanja. Nkatecereza aha biri omu Befeso 5:25, 28. Ebyo bigambo bikatuma natecereza aha ki Yehova ari kunshaba ni okugamba kufa aha nyehurira z’omukazi wange. Ku namazire kushaba, nkagambira Lesli ngu: “Reka tugende.” Kandi eco kikamushemeza. Tukaza aha mizi twarambura ca kitambaro c’aha meza, kandi obwo ni bwo bwire obu twashemerirwe munonga kukizaho. Kandi na za toku zange nkija kuzitegura.

Omurimo gwitu g’okutayayira ebibina gukakizaho kutushemeza ku twagire omuri British Columbia n’omuri Newfoundland. Ca kiroto cange eki nabire nyine c’okutambura kikahikirira. Nkaba nyine ecetengo c’okwega ishomero rya Gileyadi, konka nambwenu nkaba  ntine ecetengo c’okuba omumishonari. Nkaba ndi kuteketeka ku abamishonari bari abantu b’omutano kandi ku nyowe ntijwize ebiri kushabwa. Ekiri kukira byona nkaba ndi kutecereza ku bari kubasa kotwohereza omu ihanga ry’omuri Afurika, ahu twabire turi kubasa kubuganira n’ecorezo c’oburwire ninga shi orutaro. Nkaba nimpurira mazirwe n’omurimo ogu nabire ninkora.

Omu mwaka gwa 1992 obu omurimo gwitu g’okuburira gwashubire kukomororwa omu mahanga g’Abasoviyeti bakatubuza yaba twabire turi kubasa kufurukira omuri Esitoniya turi abamishonari. Kikatutungura munonga konka twabita omu shara. Nambwenu tukebuza ngu, ‘mbehi yaba Yehova yatushaba kukora ekintu titushemerire kugezaho kukikora?’ Tukikiriza konka nkaba ndi kutekateka ngu, ‘tituriza omuri Afurika.’

Tukahika turi kuza omuri Esitoniyan. Bwanyima y’amezi abiri turi omuri eryo ihanga, tukashabwa kukora omurimo g’okutayayira ebibina. Tukaba nitutayayira ebibina 46 hamwe n’emitwe y’omuri Esitoniya, Lativiya, Lituwaniya, n’omu tawuni ya Kaliningrad, omuri Burusiya. Eco kikaba kiri kumanyisa ku tushemerire kwega endimi z’omuri Lativiya, Lituwaniya, n’omuri Burusiya. Konka bikaba bigumire. Abanywani bakakorwa aha mutima n’amani agu twabire turi kutaho kandi mazima bakatukwasa. Omu mwaka gwa 1999, omuri Esitoniya hakatebwayo ofisi kandi nahebwa omurimo g’okuba omuri komiti y’ofisi ndi hamwe na Toomas Edur, Lembit Reile, na Tommi Kauko.

Tukamanyana n’Abahamya bingi ababire batwirwe omuri Siberiya. Kandi n’obu babire bari kutwarizibwa kubi omu kihome kandi batanisibwe n’amaka gabo tikiratumire baba abantu babi. Bakaba nibagumizamu kutura bashemerirwe kandi bakora omurimo g’okuburira n’amani. Eco kikatukwasa kureba ku turi kubasa kugumizamu kwehangana kandi tugumizamu kushemererwa n’obu twakuba twine ebizibu.

Tukamara emyaka myingi turi kukora munonga kandi tutari kuhumura, obwe rero Lesli akatandika kuhurira aruhire munonga. Titurahikire turi kujumbura ku ebyo byabire biri ebimanyiso by’endwara y’okuruha eri kwetwa fibromyalgia. Tukareba ku twabire tushemerire kuhika turi kugaruka omuri Kanada. Ku batwesire ngu tuze ahabire hari kwegerwa ishomero omuri Patterson, New York, omuri Amerika, nkabanganisa yaba twabire tushemerire kuzayo. Konka bwanyima y’okushaba munonga tukikiriza kuzayo. Yehova akaha omugisha ensharamu yitu. Omuri eryo shomero ni ho ahu Lesli yabwine obuyambi bw’eby’obujanjabi obu yabire acenire. Eco kikatuma twayongera kukora ebikorwa byitu nk’oku bishangirwe.

Izoba rimwe buri omu mwebazo omu mwaka gwa 2008, turi omuri Esitoniya, ahari ofisi nkuru bakatuterera batubuza yaba turi kubasa kwikiriza kuza kukorea omurimo omuri Kongo. Nkahurira natina ahabw’okuba bakangambira ku nabire nshemerire kubagarukamu bitarengire aha kiro ecabire kirakurateho. Omu kubanza tindabigambire Lesli ahabw’okuba nkaba nimanya ku nabimugambira biratume yaremwa kuhungira omuri eco kiro. Konka ninye owaremirwe kuhungira ahabw’okutecereza oku byabire birije kutugendecera twahika omuri Afurika.

 Izoba eryakuratireho ku nabigambire Lesli, tukatecereza ngu: “Yehova yatushaba kuza omuri Afurika. Mbwenu shi tukamanya tuta yaba birije kuturema, kandi tutakabigerizeho?” Bwanyima y’emyaka 16 eyi twabire tumazire omuri Esitoniya, tukafurukira omuri Kongo, Kinshasa. Ahari eyo ofisi hakaba harimu obusitani kandi haturize. Ekintu c’okubanza eki Lesli yahanikire omu kishenge kitu ni aka kadi aku twabire twine obu twabire tucari omuri Kanada. Ahari ako kakadi hakaba hahandikireho ngu: “Guma oyesimire ah’ori.” Ku twamazire kubugana n’abandi benetata na banyanyazi tukareba oku babire bari kwegesa abantu Bibuli n’oku bari kushemerererwa omurimo gwabo g’obumishonari, n’itwe tukatandika kushemererwa. Ku hahwire obwire tukatunga ogundi mugisha g’okutayayira agandi mahanga 13 g’omuri Afurika. Ebyo bikatuma twamanyana n’abantu bingi abine emicwe etari kushushana kandi eri kushemeza. Obwoba obu nabire nyine kare bukahwa kandi natandika kusima Yehova ahabw’omugisha g’okuba yatwoherize kukorera omurimo omuri Afurika.

Omuri Kongo, tukashanga bari kurya ebyokurya, ecokureberaho nk’otusimba, ebi itwe twabire turi kureba tutarije kurya mazima. Konka ku twarebire benetata bari kwesimira kubirya n’itwe tukatandika kubirya kandi mazima tukabikunda.

Bikatushaba kuba abantu abakuzire omu by’omwika kandi abari kuringaniza obu twagire omu tucweka tw’omu bururwizoba ahabire hariyo emitwe y’abarwani eyabire nekira kushambanisa abakazi n’abana aha kifuba. Benetata na banyanyazi bingi b’omuri eryo hanga bakaba bari abacene. Konka amasiko g’okuzoka agu babire bine, oku babire nibakunda Yehova n’oku babire nibesiga ekitongore ceye bikatukora aha mutima. Ebyo bikatuma twashuba kweshwijuma kandi bya okwikiriza kwitu kwahama. Bamwe omuri benetata na banyanyazi bakaba bine ekizibu c’okubura aho kutura n’okufisa ebihingwa byabo. Ebyo bikatwereka ku obutungi obu twine buri obw’akire kace, konka obunywani obu twine na Yehova bwo buri obw’omugasho munonga. N’obu bari kubugana ebigezo emirundi myingi tibari kucweka entege. Emitwarize yabo ekatuhiga kwehanganira ebizubu ebi twabire turi kubugana twine obumanzi harimu n’eby’oburwire.

Bwanyima tukahikwaho n’ekindi kintu ecatutungwire. Tukashabwa kufurukira ahari ofisi ya Hong  Kong. Tukaba tutaratekatekireho kuza kukorera omuri Asia! Konka ku twayerebire omukono gwa Yehova omu yindi mirimo yona eyi twakozire, tukikiriza kuzayo. Omu mwaka gwa 2013, tukasezera banywani bitu abu turi kukunda b’omuri Afurika turi kurira ahabw’okuba twabire turi kumanya ku tutarishuba kubabona.

Ahabw’okuba etawuni ya Hong Kong yabire etwirwe n’abantu b’omu mahanga gona g’omu nsi, kikatushaba kukora empinduka z’amani, kugira ngu tubase kuhatura. Orurimi rw’orukantonizi na rwo rukatugumira kurwega. Benetata b’omuri eryo hanga bakatwakirana ekihika kandi tukesimira kurya ebyokurya byaho. Omurimo gukaba nigweyongera jubajuba konka n’ebicwero by’obutaka nabyo bikaba nibyeyongera jubajuba. Obwe rero, Akakiko k’Abarisa kakakora ensharamu y’obwenge y’okugurisa ebibanja by’ekitongore kitu. Bwanyima y’obwire buce omu 2015, tukafurukira omuri Koreya y’Amashuma ahu twagumizemu kukorera Yehova. Ahonaho tukahabuganira ekizibu c’orurimi konka n’obu tutakamanya kugamba kurungi orwo rurimi benetata na banyanyazi nibatugaruramu amani bari kutugambira ku turi kugira entunguka omu kugamba orwo rurimi rw’omuri Koreya.

Okutunga abanywani basya tiko burijo kiri kuba corobi, konka tukareba ku twakwata ey’okubanza tukabereka ku nitwakira abandi turi kumanyana n’abantu juba. Tukerebera ku benetata na banyanyazi bine ebi bari kubuganiraho byingi kukira ebi bari kutaniraho, kandi ku Yehova yatuhangire twine obushoborozi bw’okwigura emitima yitu ngu tukunde abantu bingi.​—2 Kor 6:11.

Tukerebera ku tushemerire kureba abantu nk’oku Yehova ari kubareba kandi turondesa ebihamya ebiri kwereka ku Yehova ari kutukunda birabire omu buhabuzi obu ari kutuha omu kubaho kwitu. Obwire bwona obu twabire turi kuhurira tucwekire entege ninga turi kubanganisa yaba abandi bari kutukunda, tukaba nitushuba kushoma twa kadi otu twahirwe na banywani bitu. Nambwenu tukerebera ku Yehova yabire nagarukamu eshara zitu, akatuha obuyambi n’amani agu twabire turi kwetenga.

Omuri eyo myaka, nyowe na Lesli tukareba ku kiri ec’omugasho kufanaho oku twakuba tuhugire kona. Nambwenu ku twabire nitugaruza amisho enyima tukaba nitwesheka na munonga twayijuka ebi twarabiremu omu kwega orurimi rusya. Nambwenu tukaba turi kuronda eki turi kubasa kusima Yehova eki yatukorera eryo zoba.

Mazima nkaba ntari kuhurira ku nabire ndije kuba omumishonari ninga ngu nze kutura omu rindi hanga. Konka hati ninyesimira kumanya ku ebintu byona biri kubasika ahabw’obuyambi bwa Yehova. Ebigambo ebi ndi kukira kwijuka ni eby’omuhanuzi Yeremiya ebiri kugira ngu: ‘Ayi Yehova, okambiha, nabikiriza.’ (Yer 20:7) Ni amazima akatuha emigisha myingi eyabire eri kututungura kandi ekatushemeza harimu n’ecetengo eki nabire nyine c’okugenda omu ndege. Akatuha omugisha g’okuhika ahantu hingi ahu nyowe nabire ntari kutecereza, harimu okutayayira za ofisi omu migabane itanu. Omu mirimo yona eyi nahirwe ninsima munonga Lesli ahabw’okunshagika n’okwehayo oku yayerekire.

Na hati tucagumizemu kutekateka aha wu turi kukorera n’enshonga ahabw’enki turi kumukorera. Emigisha eyi turi kutunga omuri obu bwire ni omurozo gw’ebintu ebi Yehova arije kutuha ‘ari shashanura engaro, akahazya ekintu cona ekihurire ebi kiri kwetenga.’​—Zab 145:16.