1. Ni enki eki Dawudi yageranisize na Yehova, nk’oku biri kugambwa omuri Zaburi ya 18:46?

 TURI omu nsi erimu ebizibu ebiri kutuma amagara gatugumira, ninga bihindurira kimwe amagara gitu. Konka ekirungi ni oku turi kubasa kurondera ahari Yehova Ruhanga witu obuyambi! Ekicweka ecabandirize eki kikatwegesa oku Yehova ari Ruhanga ohurire, kandi ku burijo ari kuba ayetegwire kutukwasa. Ku turi kutunga obuyambi bweye nikituhamiza kimwe ku ‘Yehova ari Ruhanga ohurire!’ (Shoma omuri Zaburi ya 18:46.) Konka Dawudi kuyamazire kugamba ebyo bigambo nambwenu akagamba ku Ruhanga ‘ari orukiri rweye.’ Ahabw’enki yageranisize Yehova Ruhanga ohurire n’orukiri?

2. Ahabw’enki tushemerire kwega ebigambo ebi Dawudi yagambire ebiri kugamba ku Yehova ari ‘orukiri rweye’?

² Omuri eki kicweka, twaza kushwijuma enshonga ahabw’enki Yehova ari kwetwa orukiri, n’eki biri kutwegesa ahari we. Nambwenu twaza kwega oku turi kubasa kumureba nk’orukiri rwitu. Bwanyima nitwija kushwijuma oburyo obu turi kubasa kutorezamu emitwarize ya Yehova eri nk’orukiri.

ENSHONGA AHABW’ENKI YEHOVA ARI ORUKIRI

3. Ahabw’enki Bibuli eri kukira kukoresa ekigambo ‘orukiri’? (Reba ekishushani c’aha kishembeso.)

³ Bibuli negeranisa Yehova n’“orukiri” kugira ngu etukwase kushoborocerwa emwe omu mitwarize yeye. Omuri za zaburi z’okuhimbisa Yehova, nihagamba ku ari orukiri. Omurundi g’okubanza ogu Bibuli yageranisize Yehova n’ “orukiri” ni omu Biragiro 32:4. Omu shara eyi Hana yashabire, akagamba ku ‘hatariho rukiri ori nka Ruhanga witu.’ (1 Sam 2:2) Habakuki akagamba ku ‘Ruhanga ari we rukiri rweye.’ (Hab 1:12) Omuhandiki wa Zaburi ya 73 akagamba ku Ruhanga ari we ‘rukiri oru omutima gweye guhungiraho.’ (Zab 73:26) Nambwenu Yehova akegambaho ku ari orukiri. (Isa 44:8) Reka tushwijume emicwe eri kutuma Yehova yaba nk’orukiri kandi tushwijume n’okuturi kubasa kugira Yehova ‘orukiri rwitu.’—Bir 32:31.

4. Ni bata oku Yehova ari obuhungiro bwitu? (Zaburi 94:22)

 ⁴ Yehova ni obuhungiro bwitu. Nk’oku omuntu ari kubasa kweshereka ihunga aha rukiri ruhango, ni ko na Yehova ari kuturinda twahika omu mbera eziri kubasa kuta amagara gitu omu kabi. (Shoma omuri Zaburi ya 94:22.) Naturinda ebintu ebiri kubasa kutuhisaho akabi k’ebiro byona. Kandi naturaganisa n’ebiri kukira ahari ebyo ari kutugambira ku arije kuturinda ekintu cona ekiri kubasa kutuma twabura obusinge n’oburinzi.—Ezek 34:25, 26.

5. Ni bata oku turi kubasa kuhindura Yehova orukiri oru turi khungiramu?

⁵ Oburyo bumwe obu turi kubasa kugira Yehova Obuhungiro bwitu, ni okumushaba. Ku turi kushaba Yehova natuha ‘obusinge bwa Ruhanga’ oburi kurinda emitima yitu n’ebitecerezo byitu. (Fil 4:6, 7) Reka tushwijume ebyahikire ahari mwenetata Artem owabire asibirwe ahabw’okwikiriza kweye. Emirundi myingi omupolisi ori kucondoza akaba namutwariza kubi kandi amutinatinisa. Artem akagamba ati: “Nkaba ninshasha munonga ogo mupolisi ku yabire natwariza kubi. Burijo nkaba ninshaba Yehova. Nkaba nimushaba ngu ampe obusinge bw’omu mutima n’obwenge. Ebi ogo mupolisi yabire nankorera tihine eki byahikireho. . . . Ahabw’obuyambi bwa Yehova nkaba ndi nk’oyesherekire enyima y’orukiri ruhango.”

6. Ahabw’enki burijo tushemerire kurondera ahari Yehova obuyambi? (Isaya 26:3, 4)

⁶ Yehova nayesigwa. Nk’oku orukiri rutari kubasa kunyiganyigibwa, Yehova na we burijo naba ayetegwire kutuyamba. Nitubasa kumwesiga ahakuba ni ‘orukiri orutahwaho.’ (Shoma omuri Isaya 26:3, 4.) Burijo nahikiriza ebi ari kuturaganisa, ahurira eshara zitu kandi natuha obuyambi obu turi kwetenga. Nambwenu nitubasa kumuronderaho obuyambi ahakuba ni omwesigwa aha bari kumuhereza. (2 Sam 22:26) Tariyebwa ebi turi kumukorera kandi burijo natuha emigisha.—Heb 6:10; 11:6.

7. Ni eha migisha eyi turije kutunga twagumizamu kurondera ahari Yehova obuyambi? (Nambwenu reba ekishushani.)

⁷ Nitugira Yehova orukiri rwitu twamwesigira kimwe. Nitwesiga ku twamworobera n’omu bwire obugumire, birije kutugasira. (Isa 48:17, 18) Kandi ku turi kureba oku ari kutukwasa nitukizaho kumwesiga. Nibyija kutuma twayetegura ebizibu ebi Yehova wenka ari we ori kubasa kutukwasa kubirabamu. Burijo ku turi kuhikwaho n’embera ezi tutari kubasa kugira eki twazikoraho, nitwerebera ku Yehova ari we owu tushemerire kuronderaho obuyambi wenka. Vladimir akagamba ti: “Obwire obu namazire nsibirwe bukambera obwire burungi munonga bw’okugira obunywani burungi na Ruhanga. Nkega kukizaho kwesigira kimwe Yehova ahabw’okuba nabire ndi nyenka kandi hatine eki nabire ndi kubasa kukora aha mbera ezi nabire ndi kurabamu.”

8. (a) Ahabw’enki turi kubasa kugamba ku Yehova ahamire? (b) Ni bata oku turi kugasirwa ku turi kuhindura Ruhanga obuhungiro bwitu? (Zaburi 62:6, 7)

⁸ Yehova ahamire. Nk’oku orukiri ruri kuba ruhamire, Yehova na we ni ko oku ari kuba ahamire kandi tari kubasa kutengesibwa. Emitwarize yeye n’ebigendererwa byeye tibiri kubasa  kuhinduka. (Mal 3:6) Obu Adamu na Eva bamugomire obu babire bari omuri Edeni, tarahindukire. Nk’oku entumwa Pawulo yakihandikire, Yehova ‘tari kubasa kuhinduka. (2 Tim 2:13) Eco nikimanyisa ku ekintu cona ekiri kubasa kukuhikaho ninga ebi abandi bari kubasa kukora, bitari kubasa kuhindura emitwarize ya Yehova, ekigendererwa ceye, ninga emisinge yeye. Ku turi kwesiga Ruhanga witu otari kuhinduka, nitubasa kumuronderaho okucungurwa n’obuyambi omu bwire bw’ebizibu.—Shoma omuri Zaburi ya 62:6, 7.

9. Ni enki eki turi kubasa kwegera aha byahikire ahari Tatyana?

⁹ Ku turi kutecereza aha mitwarize ya Yehova n’aha kigendererwa eki ayinire abantu, nibituma twakizaho kumwesiga nk’orukiri rwitu. Eco twakikora nikibasa kutukwasa kuguma tuturize omu nyehurira n’omu bwire obu twine ebizibu. (Zab 16:8) Ebyo ni byo ebyahikire ahari munyanyazi ori kwetwa Tatyana, owabire asibirwe omu kaju ka wenka ahabw’okwikiriza kweye. Akagamba ati: “Nkeshanga ndi nyenka. Omu kubanza bikaba bitorobi. Bikaba nibituma burijo nahurira ndi nk’ocwekire entege.” Konka akatandika kutecereza ahari Yehova n’aha kigendererwa ceye, rero yareba ku kiri ec’omugasho kwehanganira eco kizibu. Eco kikamukwasa kutuma yatuza n’okutunga amani g’okumukwasa kuguma ayine okwikiriza. Akongeraho ati: “Okushoborocerwa enshonga ahabw’enki ebyo byabire biri kumpikaho, bikankwasa kumanya ku nahikire omuri zo mbera ahabw’okwikiriza Yehova. Ebyo bikatuma nayerinda kwetecerezaho ekirenga.”

10. Ni bata oku Yehova ari kubasa kuba orukiri rwitu hati?

¹⁰ Juba aha nitwija kuraba omu bigezo ebirije kutushaba kwesiga Yehova kukira kare hona. Obu ni bwo bwire obu tushemerire kukizaho kwesiga ku arije kutuha ebi turi kwetenga kugira ngu twehangane. Ni bata oku turi kubasa kukikora? Guma oshome enkuru z’omuri Bibuli, oshwijume n’eby’okureberaho by’abahereza ba Yehova b’omuri obu bwire. Guma otecereza aha ku Yehova yayerekire emitwarize yeye eri nk’ey’orukiri, kugira ngu akwase abahereza beye. Guma otecereze oyetonzire ahari ezo nkuru. Wakikora basyoya nikija kutuma wayija kureba Yehova nk’orukiri rwawe.

TOREZA EMITWARIZE YA YEHOVA ERI NK’ORUKIRI

11. Ahabw’enki tushemerire kutoreza emicwe ya Yehova eri nk’orukiri? (Nambwenu reba akashanduku akari kugira ngu. “Entego eyi benetata abacari bato bari kubasa kweteraho.”)

¹¹ Ttwashwijuma oku Yehova ari nk’orukiri. Hati reka tushwijume emitwarize yeye eri nk’orukiri. Twakizaho kutoreza emitwarize ya Yehova eri nk’orukiri, nikija kutuma twagumya benetata na banyanyazi. Ecokureberaho: Yesu akaha Simoni izina Kefa (eriri kuhindurwamu ngu “Petero”), ekiri kumanyisa “orukiri.” (Yoh 1:42) Eco kikaba kiri kumanyisa ku Petero yabire arije kugumya ekibina kandi akakihumuriza. Abazehe b’ekibina Bibuli nebageranisa  n’ahantu ‘ah’okwekinga omuyaga.’ Eco nikimanyisa oburyo obu bari kurindamu ekibina. (Isa 32:2) Konka ekibina nikigasirwa benetata na banyanyazi bona bayereka emitwarize ya Yehova eri nk’orukiri.—Efe 5:1.

12. Gamba oburyo obu turi kubasa kubera abandi obuhungiro bwabo.

¹² Ba obuhungiro bwa benetata na banyanyazi. Obumwe nitubasa kuba obuhungiro bwa benetata na banyanyazi bahikwaho n’ebihikirizi ninga entaro. Ahabw’okuba embera z’omu ‘biro by’aha muheru’ ziri kweyongera kuba mbi, hatariho okubanganisa nitutunga oburyo bw’okuyambayambana. (2 Tim 3:1) Nambwenu nitubasa kuba obuhungiro bwa benetata na banyanyazi omu by’omwika n’omunyehurira. Oburyo bumwe obu turi kubasa kukikoramu ni okubakira ge aha Nju y’Obukama n’okutuma omu kibina habamu obumwe. Tutwire omu nsi erimu ebizibu byingi. Obwe rero benetata na banyanyazi ku bari kwija omu nterane, nituba turi kwenda ngu bahurire bakunzirwe, kandi bahurire bine oburinzi.

13. Ni buha buryo obu abazehe bari kubasa kuba obuhungiro bw’abagizire ekibina? (Nambwenu reba ekishushani.)

¹³ Abazehe nibabasa kuba obuhungiro bw’abagizire ekibina, abine ebibuzo bishangirwe by’omuri eyi nsi n’eby’omu buryo bw’omwika. Benetata ku bari kubugana ebihikirizi ninga oburwire, abazehe nibakwata ey’okubanza kugira ngu babahe obuyambi obu bari kwetenga. Nambwenu nibabakwasa omu buryo bw’omwika. Benetata na banyanyazi nibahurira bahumurizibwa bashaba obuyambi omuzehe owu bari kumanya ku nagamba omu muringo gw’embabazi, ku nabahurikiza kandi ku nagezaho kwehuriza oku bari kwehurira. Emitwarize nk’eyo nebasa kutuma benetata bahurira bakunzirwe kandi kiborobera kukuratiza obuhabuzi bw’omuri Bibuli obu ogo muzehe ari kubaha.—1 Tes 2:7, 8, 11.

14. Ni bata oku turi kubasa kwereka ku turi kwesigwa?

 ¹⁴ Guma obe omwesigwa. Nituba turi kwenda ngu abandi besige ku turi kubasa kubakwasa, namunonga baba bari omu bizibu. (Emi 17:17) Mbwenu shi ni enki eki turi kubasa kukora kugira ngu abandi baturebe basyo? Nitubasa kutaho amani tutoreza emitwarize ya Ruhanga, nk’okuhikiriza ebi twaraganisize abandi, turi n’okugendera aha bwire. (Mat 5:37) Nambwenu nitubasa kubaha obuyambi obu bari kwetenga. Nambwenu nitubasa kureba yaba turi kuhikiriza emirimo eyi turi kuhebwa tukuratize obuhabuzi obu twatungire.

15. Ni bata oku ekibina kiri kugasirwa abazehe baba bari abesigwa?

¹⁵ Abazehe abari kwesigwa nibagasira ekibina. Bata shi? Ababurizi ku bari kumanya ngu nibabasa kutunga obuyambi oburi kuruga aha bazehe omu bwire bwona obu bari kubwetenga, nibahurira bahumurizibwa, ecokureberaho babushaba omureberezi w’omutwe g’okuburira. Nambwenu ababurizi nibahurira bari kukundwa, ku bari kumanya ngu abazehe bine ekihika c’okubakwasa. Kandi abazehe ku bari kutanga obuhabuzi obwegamire ahari Bibuli n’ebitabo by’omwambari w’omwesigwa, omu  mwanya g’okubutanga bakuratize ebitecerezo byabo, benetata na banyanyazi nibabesiga. Benetata na banyanyazi nibesiga omuzehe ori kubika ibanga kandi akahikiriza ebi ari kuraganisa abandi.

16. Ni bata oku kiri kutugasira kandi kikagasira abandi twaba tuhamire?

¹⁶ Guma ohamire. Ku turi kukora ensharamu tukuratize emisinge ya Bibuli nitubera abandi ecokureberaho kirungi. Oku turi kugenda nitukizaho kugira okwikiriza n’obumanyi, ni ko turi nokukizaho kuhamira omu mazima. Tiruri kutwarwatwarwa n’enyegesa z’ebishuba n’emitecerereze y’eyi nsi. (Efe 4:14; Yak 1:6-8) Ahakuba turi kwesiga Yehova n’ebiraganiso byeye, nibituma twatuza twahurira amakuru mabi. (Zab 112:7, 8) Nambwenu nibituma twabasa kukwasa abari kubugana ebigezo.—1 Tes 3:2, 3.

17. Ni enki ekiri kubasa kukwasa abazehe kubera abandi ecokureberaho kirungi?

¹⁷ Abazehe bashemerire kuba bine emicwe mirungi, bari kuringaniza, bari kugendera aha ntebekanisa kandi bari kuta omu kacwero. Abo bashija ni ecokureberaho kirungi aha bandi kandi nibagumya ekibina bari ‘kuhamira aha kigambo c’okwesigwa.’ (Tit 1:9; 1 Tim 3:1-3) Abazehe ku bari kubera abandi ecokureberaho kirungi kandi bakabakwasa n’omu buryo bw’omwika, nibikwasa ababurizi kwija omu nterane burijo, kwekwatanisa omu murimo g’okuburira n’okweyegesa Bibuli. Benetata na banyanyazi ku bari kubugana ebintu ebiri kubasa kubemereza omutima, abazehe nibabakwasa kwehangana n’okuta omutima ahari Yehova n’ebiraganiso byeye.

18. Ahabw’enki tushemerire kuhimbisa Yehova n’okukizaho kuba banywani beye? (Nambwenu reba akashanduku akari kugira ngu: “Ebiri kubasa kukukwasa kuba munywani wa Yehova.”)

¹⁸ Obu twamara kushwijuma emitwarize ya Yehova eri kutangaza, nitubasa kugamba nk’oku Omugabe Dawudi yagambire ari kugira ati: ‘Yehova orukiri rwange ahimbisibwe.’ (Zab 144:1) Yehova azagumizamu kuba Ruhanga owu turi kubasa kwesiga. N’obu twakukura, nitubasa kwesiga ku ari kubasa kutukwasa kugumizamu kuba banywani beye rero tutunge enshonga y’okugamba ngu: ‘Ni we rukiri rwange.’—Zab 92:14, 15.