1. Ni bata oku Yehova ari kukwasa abahereza beye abari kugumizamu kumuramya kusingura ebigezo ebi bari kubugana?

 BIBULI negamba ku ebiro ebi turimu ari ‘ebiro ebigumire kwehanganira.’ (2 Tim 3:1) Oyihireho ebizibu by’omuri eyi nsi ebi abantu bona bari kubugana, Abahamya ba Yehova nibahiganisibwa kandi bahakanisibwa. Ni enki ekiri kubasa kutukwasa kugumizamu kuramya Yehova n’obu twakuba turi kubugana ebyo bizibu? Ekintu kimwe ekiri kubasa kutukwasa ni okumanya ku Yehova ari ‘Ruhanga ohurire.’—Yer 10:10; 2 Tim 1:12.

2. Ni buha buryo obu Yehova ari Ruhanga ohurire?

² Yehova ni Ruhanga owabuzima ori kutukwasa omu bigezo ebi turi kubugana, kandi ori kurondesa oburyo bw’okutukwasamu. (2 Bus 16:9; Zab 23:4) Twamureba nka Ruhanga ohurire nikitukwasa kusingura ebigezo ebi turi kubugana. Reba oku Omugabe Dawudi yakikozire.

3. Ni enki eki Dawudi yabire ari kwenda kumanyisa obu yagambira ku ‘Yehova ari Ruhanga ohurire’?

³ Dawudi akaba namanya Yehova kandi akaba namuronderaho obuyambi. Obu abangi beye babire bari kumuhiganisa harimu n’Omugabe Sawulo, Dawudi akashaba Yehova obuyambi. (Zab 18:6) Bwanyima Ruhanga ku yagarukiremu eshara ya Dawudi rero akamucungura, akagamba ati: ‘Yehova n’ohurire!’ (Zab 18:46) Ni enki ki Dawudi yabire ari kwenda kumanyisa? Dawudi akaba ari kwenda kumanyisa ku Yehova ari Ruhanga ohurire, kandi ori kuba ayetegwire kukwasa abahereza beye. Ebyahikire ahari Dawudi bikatuma yamanya ku Ruhanga ari ohurire, ku ari kumanya ebyabire biri kumubaho, kandi byatuma yakizaho kumaririra kukorera Yehova n’okumuhimbisa.—Zab 18:28, 29, 49.

4. Ni bata oku kiri kutugasira twareba Yehova nka Ruhanga ohurire?

⁴ Twamanya ku Yehova ari Ruhanga ohurire kandi ku ari  kubasa kutukwasa, nibituma twamukorera twine amani. Nibituha amani g’okwehanganire abigezo ebi turi kubugana n’ag’okugumizamu kumukorera omu murimo gweye. Nambwenu nibutuma twamaririra kuguma twine obunywani burungi na we.

RUHANGA OHURIRE NAYIJA KUKUGUMYA

5. Ni enki ekiri kutuha amani twabugana ebizibu? (Abafilipi 4:13)

⁵ Nitwija kutunga amani g’okwehanganira ekigezo cona eki twakubugana, cakuba kihango ninga kice twaguma kwijuka ku Yehova ari Ruhanga oruhire kandi ku ari kuba ayetegwire kutukwasa. Tihine ekigezo eki turi kubasa kubugana na co ekiri kubasa kurema Ruhanga witu. Ni Ruhanga Rukirabona, kandi nabasa kutuha amani g’okwehangana. (Shoma omu Bafilipi 4:13.) Obwe rero ebi nibituha obumanzi bw’okwehanganira ebigezo ebi turi kurabamu. Ku turi kwerebera oku Ruhanga ari kutukwasa omu bigezo ebyorobi nibituhamiza ku arije n’okutukwasa omu bigezo ebigumire.

6. Ni biha bintu ebyahikire ahari Dawudi obu yabire acari omwana bikatuma yakizaho kwesiga Yehova?

⁶ Reba ebyahikire ahari Dawudi emirundi ibiri ebyatumire yakizaho kwesiga Yehova. Obu Dawudi yabire ari acari muto ari omurisa w’entama, edubu n’entare bikenda kutwara entama z’ishe. Ebyo ku byabire nibibaho, Dawudi akaba nagira obumanzi bw’okurwanisa ezo nyamishwa kandi akiza entama. Konka, taragambire ku yabire nabikora ahabw’amani geye. Akaba namanya ku Yehova ariwe owabire namukwasa. (1 Sam 17:​34-37) Dawudi tarebirwe ebyo bintu ebyamubireho. Ku yabire natecereza ahari ebyo bintu ebyamubireho, bikaba nibituma yayesiga ku Ruhanga ohurire yabire arije kumuha amani omu biro by’omu misho.

7. Ni bata oku okwiriza oku Dawudi yabire ayine kwamukwasize obu yabire ari kurwana na Goliyati?

⁷ Bwanyima obu Dawudi yabire acari omwana, akaza omu kampu y’amahe g’Abisirayeli. Akashanga ago mahe ‘gatinire munonga’ ahabw’ekikaka c’Abafilisitiya ekiri kwetwa Goliyati owabire ayijire kujuma Abisirayeli. (1 Sam 17:10, 11) Abasirikare bakaba batinire ahabw’okureba oku ogo mushija yabire ari kwingana n’ebi yabire ari kubagambira. (1 Sam 17:24, 25) Konka Dawudi we, akaba ari kureba ebintu omu bundi buryo. Dawudi akaba ari kumanya ku Goliyati yabire atari kujuma amahe ga Isirayeli kusha ahobwe ku yabire ari kujuma ‘amahe ga Ruhanga ohurire.’ (1 Sam 17:26) Dawudi akaba ari kutecereza ahari Yehova. Dawudi akaba nayesiga ku Ruhanga owamukwasize obu yabire ari omurisa yabire arije n’okumukwasa omuri ezo mbera. Kandi mazima Ruhanga akamukwasa Dawudi yagwana na Goliyati yamusinga!—1 Sam 17:45-51.

8. Ni bata oku turi kubasa kuta Yehova omu mwanya g’okubanza twabugana ebizibu? (Nambwenu reba ekishushani.)

⁸ N’itwe nitubasa kuguma turi kusingura ebigezo twaguma kwijuka ku Ruhanga ohurire ari kuba ayetegwire kutukwasa. (Zab 118:6) Nitubasa kukizaho kwesiga Yehova twashwijuma ebi yatukorire omu bwire bwa kare. Nitubasa kushoma enkuru z’omuri Bibuli eziri kwereka oku Yehova yakwasize abahereza beye. (Isa 37:17, 33-37) Nambwenu nobasa kushoma enkuru z’aha rubuga rwitu rwa jw.org eziri kwereka oku Yehova yagenzire ari kukwasa benetata na banyanyazi b’omuri obu bwire. Nambwenu ekindi nobasa kugenda ori kwijuka oku Yehova yagenzire ari kukukwasa. Nobasa kuhurira hatine ekintu ekiri kutangaza eki Yehova yakukorire nk’eki yakorire Dawudi. Konka eki oshemerire kumanya ni oku hine  ebintu birungi ebi Yehova yakukorire! Akakwikiririza kugira obunywani na we. (Yoh 6:44) Ahabw’obuyambi bweye na hati ocari omu mazima. Mbehi tori kubaza kumushaba kukukwasa kwijuka eshara ezi yakugarukiremu, obuyambi obu yakuhire omu bwire obuhikire n’oku yakukwasize kuraba omu mbera ezigumire? Watecereza aha bintu nk’ebyo nibibasa kukukwasa kukizaho kwesiga ku Yehova arije kugumizamu kukukwasa.

9. Ni bata oku tushemerire kureba ebizibu ebi turi kurabamu? (Emigani 27:11)

⁹ Twareba Yehova nka Ruhanga ohurire, nikitukwasakureba ebigezo ebi turi kubugana omu buryo obuhikire. Bata shi? Nibituma twatandika kureba ebigezo ebi turi kubugana nk’ekirego eki Sitane ari kututaho. Sitane nagamba ku twaba turi omu bizibu, turi kubasa kusigaho Yehova. (Yob 1:10, 11; Shoma omu Migani 27:11.) Konka twaguma turi abesigwa ahari Yehova, n’obu twakuba turi omuri ebyo bigezo, nituba twayereka ku turi kukunda Yehova kandi ku Sitane ari omubihi. Mbehi abategeki bari kukuhiganisa, oyine ebizibu by’akasente, abantu tibari kukuhurikiza waba ori omu murimo g’okuburira ninga shi ori kubugana ekindi kigezo? Caba kiri kisyoya, guma oyijuke ku ebyo bigezo ari byo ebiri kukuha oburyo bwokushemeza omutima gwa Yehova. Nambwenu guma oyijuke ku Yehova atari kubasa kwikiriza ngu ogezibwe ebi otari kubasa kwehanganira. (1 Kor 10:13) Nayija kukuha amani g’okubyehanganira.

RUHANGA OHURIRE NAYIJA KUKUHEMBA

10. Ni enki eki Ruhanga ohurire ari kukorera abari kumuramya?

¹⁰ Yehova naha ebihembo abari kugumizamu kumuramya. (Heb 11:6) Natuha obusinge n’okumarwa hati kandi nayija kutuha amagara agatahwaho omu biro by’omu misho. Nitubasa kwesigira kimwe ku Yehova ayine ecetengo n’amani g’okutuhemba. Kandi ebyo nibituma twagumizamu kumuha ebirungi kukira ebindi omu kubaho kwitu, nk’oku abahereza beye b’omu bwire bwa kare bakikozire. Eco ni co eki Timoteyo yakozire omu kinyigana c’okubanza.—Heb 6:10-12.

11. Ni enki ecakwasize Timoteyo kukora n’amani omu kibina? (1 Timoteyo 4:10)

 ¹¹ Shoma omuri 1 Timoteyo 4:10. Timoteyo akaba nayesigira kimwe Ruhanga ohurire. Ni yo nshonga yabire nakora n’amani omurimo gweye. Ni bata oku yakikozire? Entumwa Pawulo akamugambira ngu abe omwegesa murungi omu murimo g’okuburira n’omu kibina. Nambwenu Pawulo akamugambira ku ashemerire kubera ec’okureberaho kirungi Abakristo bagenzi beye harimu abato n’abakuru. Akahebwa emirimo egumire harimu okuha obuhabuzi oburimu rukundo ababire bari kubwetenga. (1 Tim 4:11-16; 2 Tim 4:1-5) Timoteyo akaba ari kwesiga ku n’obu abandi babire batari kubasa kureba ebi ari kukora ninga kumusima, Yehova yabire arije kumuha ekihembo.—Rom 2:6, 7.

12. Ni enki ekiri kukwasa abazehe kukora n’amani omurimo gwabo? (Nambwenu reba ekishushani.)

¹² Omuri obu bwire abazehe nibabasa kwesiga ku Yehova ari kureba emirimo mirungi eyi bari kukora nk’ey’omuhendo. Oyihireho omurimo ogu abazehe bari kukora g’okurisa entama n’okwegesa n’okuburira, abingi nibayamba omu by’obwombeki n’okuyamba abahikirweho n’ebihikirizi. Abandi nibayamba omu mitwe eri kutayayire abarwire ninga shi omuri za komiti eziri kukwasa abarwire. Abazehe abari kwekwatanisa omuri eyo mirimo nibamanya ku ekibina kitari ec’abantu ahobwe ku kiri eca Yehova. Ebyo nibituma bakora emirimo yabo n’omutima gwabo gona kandi besigira kimwe ku Ruhanga arije kubahemba.—Kol 3:23, 24.

13. Yehova nayehurira ata ahabw’amani agu buri omwe ari kutaho omu murimo gweye?

¹³ Abantu bona tiko oku bari kubasa kuba abazehe. Konka twena hine eki turi kubasa kuha Yehova. Ruhanga witu nashemererwa yareba turi kukora cona eki turi kubasa ngu tumuhereze. Nareba esente ezi turi kuhayo z’okushagika omurimo g’okuburira oguri kukorwa omu nsi yona n’obu zakuba ziri nce  munonga. Nashemererwa twataho amani ngu tusingure enshoni ezi turi kuba twine, tukatanga ekitecerezo omu nterane kandi nayesima twayehuza enshobe z’abandi tukabasaasira. N’obu wakuba ori kuhurira ku hariho ebi otari kubasa kukora ahabw’embera ezi orimu, yesige ku Yehova ari kureba ebi ori kubasa kukora nk’eby’omuhendo. Nakukunda ahabw’ebyo bintu ebi ori kumukorera kandi nayija kukuhemba.—Luk 21:1-4.

GUMA HIHI YA RUHANGA OHURIRE

14. Ni bata oku kuguma twine obunywani burungi na Yehova kiri kutukwasa kuguma turi abesigwa? (Nambwenu reba ekishushani.)

¹⁴ Twaba twine obunywani burungi na Yehova, nikitworobera kuguma turi abesigwa ahari we. Eco ni co ecabire ahari Yosefu. Akangira kimwe kukora ekikorwa c’obushambani. Akaba ayine obunywani burungi na Ruhanga kandi akaba atari kwenda kumugwisa kubi. (Kut 39:9) Kugira ngu tugire obunywani burungi na Yehova tushemerire kukwata obwire bw’okumushaba kandi tukeyegesa Ekigambo ceye. Ebyo twabikora obunywani obu twine na we nibwija kukizaho kweyongera. Kimwe na Yosefu, twaba twine obunywani burungi na Yehova titurije kukora ekintu cona ekirije kukushasha.—Yak 4:8.

15. Ni riha shomo eri turi kwegera aha byahikire aha Bisirayeli omu butayo? (Abaheburayo 3:12)

¹⁵ Abari kwebwa ku Yehova ari Ruhanga ohurire, nikiborobera kumurugaho. Tecereza aha byabire ah’Abisirayeli obu babire bari omu butayo. Bakaba nibamanya ku Yehova yabire ariho, konka bakatandika kubanganisa yaba yabire arije ubafaho omu bi babire bari kwetenga. Bakahika n’aha kwebuza ngu: ‘Mbehi Yehova ari ahagati omuri itwe, ninga tariho?’ (Kur 17:2, 7) Bwanyima bakija kugomera Ruhanga. Ni amazima titushemerire kutoreza eco cokureberaho kibi cabo c’okugomera Ruhanga ahobwe kishemerire kuturabura.—Shoma omu Baheburayo 3:12.

16. Ni enki ekiri kubasa kugeza okwikiriza kwitu?

¹⁶ Embera z’omuri eyi nsi nizibasa kutuma catugumira kuguma turi banywani ba Yehova.  Abingi nibagamba ku Ruhanga atariho. Akingi hine n’abari kugamba ku korobera ebi Ruhanga ari kutushaba bitari kubasa kutuma twagira amagara marungi omu kubaho kwitu. Ebyo byabaho nibibasa kugesa okwikiriza kwitu. Twatandika kutecereza ku Ruhanga atariho, nitubasa kutandika kubanganisa yaba ari kubasa kutukwasa omu kubaho kwitu. Omuhandiki wa Zaburi ya 73 obumwe na we akaba nayehurira basyoya. Akaba nareba abamwehinguririze bari kugomera ebiragiro bya Ruhanga, konka batunga okushemererwa omu kubaho kwabo. Ebyo bikatuma yatandika kureba okuhereza Ruhanga bitine mugasho.—Zab 73:11-13.

17. Ni enki ekiri kubasa kutukwasa kuguma twine obunywani burungi na Yehova?

¹⁷ Ni enki ecakwasize ogo muhandiki wa zaburi kuhindura eyo mitecerereze? Akatecereza aha byabire birije kuhika aha barekire kwesiga Yehova. (Zab 73:18, 19, 27) Nambwenu akatecereza aha migisha eri kuruga omu kuhereza Ruhanga. (Zab 73:24) N’itwe nitubasa kutecereza aha migisha eyi Yehova yatuhire. Nitubasa kutecereza oku amagara gitu gabire garije kuba gari kuri tutaramanyire Yehova ngu tumuhereze. Eco twakikora nikija kutuma twagumizamu kuba abesigwa kandi tuhike n’aha kugamba nk’oku omuhandiki wa zaburi yagambire ngu: ‘Ekirungi ahari inye n’okuhika hihi Ruhanga.’—Zab 73:28.

18. Ahabw’enki turi kwesiga ku turije kusingura ebizibu ebi turije kubugana na byo omu biro by’omu misho?

¹⁸ Nitwija kusingura ebigezo byona ebi turije kubugana omuri obu bwire bw’aha muheru, ahabw’okuba turi kumanya ku turi ‘kuhereza Ruhanga witu ohurire ow’amazima.’ (1 Tes 1:9) Ruhanga witu ohurire nitumanya ku ari kubasa kukwasa abari kumuramya. Eco nitukimanya ahabw’okuba turi kumanya oku yakwasize abahereza beye b’omu bwire bwa kare n’oku ari kutukwasa omuri obu bwire. Juba aha nihija kubaho okubonabona kwingi omu nsi. Konka omuri obwo bwire titurije kuba turi twenka. (Isa 41:10) Twena nitwija ‘kugamba tutari kubanganisa tuti: Yehova ni we muyambi wange tinditina.’—Heb 13:5, 6.