• “Nkatecereza ku omushija wange yabire ari kukira kukora ebikorwa by’obushambani.”

• “Nkahurira nahemukirwa, nahurira ntabonire kandi nahurira ntine omugasho.”

• “Tindabasize kugira owu nabigambira. Nkashashira omu mutima kusha.”

• “Nkatecereza ngu Yehova tari kumfaho.”

Ebyo byokureberaho nibyereka oku omukazi ari kushasha munonga omushija weye yareba ponogurafi. Yaba yagenzire ari kukikora bwesherece omu bwire bw’amezi mingi ninga emyaka myingi, omukazi nabasa kuhurira atari kubasa kushuba kumwesiga. Omukazi omwe akagamba ati: “Ogu nomushija wa muringo ki? Hona shi tihine ebindi bintu ebi ari kunshereka?”

Eki kicweka kikategurirwa abakazi abine abashija abari kureba ponogurafi. a Nikigamba aha misinge y’omuri Bibuli eri kubahumuriza, ebahamiza ku Yehova ayetegwire kubakwasa, kandi emisinge eri omuri eki kicweka neyija kutuma bagira obusinge bw’omu mutima kandi bagumizemu kuba banywani ba Yehova. b

Nobu otari kubasa kumanya ebintu byona ebi omushija wawe ari kukora, hariho ebintu ebi ori kubasa kukora bituma wagira obusinge bw’omumutima. Reka tushwijume ebyo bintu.

Yerinde kwecwera orubanja. Omukazi nabasa kutecereza ku kuba omushija weye ari kureba ponogurafi ari enshobe yeye. Alice c akehurira atabonire. Akebuza ngu: “Ahabw’enki omushija wange ari kwesimira kureba abandi bakazi omu mwanya g’okundeba?” Abakazi bamwe nebecwera orubanja bari kutecereza ku aribo abari kutuma ebintu byakizaho kushamba. Danielle akagamba ati: “Ahabw’okugira ekiniga kingi, nkahurira ku ninye owabire waza kushenya eka yitu.”

Yaba ori kwehurira baso guma oyijuke ku Yehova atari iwe owu arije kubuza ebi omushija wawe ari kukora. Omuri Yakobo 1:14 nihagira ngu: ‘Konka omuntu wena ayohibwa, yabihwabihwa okwetenga kweye, kwamwosyosya.’ (Rom 14:12;  Fil 2:12) Omu mwanya g’okwecwera orubanja guma oyijuke ku Yehova ari kureba obwesigwa bwawe nk’obw’omuhendo.​—2 Bus 16:9.

Omukazi nabasa kutecereza ku omushija weye ari kureba ponogurafi ahabw’okuba atabonire. Konka tiko oku kiri. Abanyabwenge nibagamba ku okureba ponogurafi biri kutuma omuntu yagira ebyetengo bibi by’obushambani ebiri kutuma atamarwa n’omukazi weye.

Guma oyerinde kwemereza omutima munonga. Catherine akagamba ku okutecereza aha ku omushija weye yabire ari kureba ponogurafi munonga cabire kiri kumumara amani. Frances akagamba ati: “Ninyemereza omutima munonga ku ndi kubura aho omushija wange ari. Nikituma nayemereza omutima izoba ryona.” Abandi bakazi bakagamba ku biri kubashwaza omu kibina haba harimu benetata ninga abanyanyazi abari kumanya ekizibu eki abashija babo bine. Konka abandi bakagamba ku bari kuhurira bari ahabw’okuba nibatecereza ku hatariho omuntu n’omwe orikumanya embera ezi barimu.

Okugira enyehurira nk’ezo ni ebishangirwe. Konka ku ori kubitecerezaho munonga nikituma wakizaho kwemereza omutima. Gezaho kuguma otire omutima aha bunywani bwawe na Yehova. Eco nikija kukukwasa kwehangana.​—Zab 62:2; Efe  6:10.

Nikibasa kukugasira washoma enkuru z’omuri Bibuli kandi okazitecerezaho z’abakazi ababire bine ebizibu konka bakashaba Yehova akabahumuriza. Burijo ti ko oku yabire ari kubihiraho ebizibu ebi babire bine, konka akaba nabaha obusinge. Ecokureberaho: Hana akaba ayine obusaasi bw’omu mutima ahabw’embera ezi yabire arimu. Konka ‘kuyagumizemu kushaba Yehova’, akagira obusinge n’obu yabire atari kumanya oku ekizibu ceye cabire kirarugeho.​—1 Sam 1:10, 12, 18; 2 Kor 1:3, 4.

Rondera obuyambi aha bazehe b’ekibina. Nibabasa kuba ‘nk’aho okwekingaho omuyaga, n’obwegamo bw’ihunga.’ (Isa 32:2) Nibabasa n’okukugambira omunyanyazi owu ori kubasa kuganira na we okamugambira ebizibu ebi oyine akakuhumuriza.​—Emi 17:17.

Mbehi nobasa kukwasa omushija wawe kusingura engesho eyi ayine y’okureba ponogurafi? Yego mazina nobasa kukikora. Bibuli neyereka ku omu bikwatirine n’okurwanisa ebizibu ninga shi omwangi oyine amani, ‘babiri bari kukira omwe.’ (Mub 4:9-12) Abanyabwenge bakereka ku omuntu yakwasa owu batasine kurwanisa engesho y’okureba ponogurafi hari kurugamu ebirungi kandi kituma bashuba kwesigana.

 Konka kucweka aha ngesho y’okureba ponogurafi nikija kurugirira aha mani agu owu mwatasine ari kutaho kugira ngu agicwekeho. Mbehi akashaba Yehova ngu amuhe amani kandi yarondera obuyambi aha bazehe? (2 Kor 4:7; Yak 5:14, 15) Mbehi nagezaho kwerinda ebintu ebiri kubasa kutuma yashuba kubugana ecokigezo, nk’okweteraho emipaka yaba ari kukoresa esimu kandi ayerinda n’ekintu ekiri kubasa kutuma yagezibwa? (Emi 27:12) Mbehi naba ari kwenda ngu omukwase kandi nakugambira ebintu byona atari kukushereka? Caba kiri kisyoya, nobasa kumukwasa.

Ni bata oku ori kubasa kumukwasa? Reba ecokureberaho. Felicia akatasana na Ethan, owabire nakunda kureba ponogurafi obu yabire acari muto. Nicorobera Ethan kugambira Felicia oku ari kwehurira yahurira yagira ecetengo c’okureba ponogurafi. Ethan akashoborora ati: “Ningambira omukazi wange byona ntari kumushereka. Nankwasa kweteraho obugarukiro kandi burijo ambuza oku ndi. Nambwenu nankwasa kucendeza obwire obu ndi kumara ndi kukoresa intaneti.” Ni amazima Felicia nahurira yashasha ahabw’okuba Ethan ari kukunda kureba ponogurafi. Konka akagamba ati: “Ekiniga n’obusaasi ebi ndi kuba nyine tibiri kubasa kumukwasa kubicwekaho. Ku turi kumara kubiganiraho naba ayetegwire kunkwasa kwehanganira obusaasi obu ndi kuba nyine.”

Ebyo biganiro ebi bari kuganira tibiri kukwasa omushija kucweka aha ngesho y’okureba ponogurafi kusha ahobwe nibikwasa n’omukazi kushuba kumwesiga. Kandi n’obundi omushija ku ari kuba ayetegwire kugambira omukazi weye obweremwa bweye, ebi ari kwenda kukora, n’ahu ari kwenda kuza, nikituma omukazi yakizaho kumwesiga ahabwokuba ari kuba ari kumanya ku atari kumushereka.

Mbehi niwe noyikiriza ku ori kubasa kukwasa omushija wawe omuri obwo buryo? Caba kiri kisyoya, mbehi timuri kubasa kushoma kandi mukaganirira hamwe eki kicweka? Entego eyi omushija wawe ari kuba ayine ni ey’okucweka aha ngesho y’okureba ponogurafi kandi akakuha enshonga eziri kutuma washuba kumwesiga. Omu mwanya g’okumwitirwa ekiniga ahabw’okumugambira eco kizibu, ashemerire kushoborocerwa oku biri kukugiraho engaruka. Entego yawe eshemerire kuba ey’okumukwasa kucweka ahari eyo ngesho kandi omuha omugisha g’okwereka ku ari omwesigwa ahari we. Mwena nimuba mushemerire kumanya enshonga eziri kutuma abantu bareba ponogurafi n’oku omuntu ari kubasa kusingura eyo ngesho. d

Watina ngu wenda ekiganiro canyu nikibasa kurugamu  entongani, nobasa kushaba obuyambi omuzehe owu mwena muri kweshanjuraho kugira ngu ayije kuba ariho mwaba muri kubiganiraho. Guma oyijuke ku na bwanyima y’okucweka aha ngesho y’okureba ponogurafi kiri kubasa kutwara obwire buringwa kugira ngu owu mwatasine ashube kukwesiga. Konka ebyo bitari kucwa entege. Guma ofe n’ahatuntu tuce oturi kwereka ku obunywani bwanyu buri kugaruka kugira entunguka. Guma oyesige ku wagumizamu kutegereza n’okwehangana eka yanyu erije kushuba kuhama.​—Mub 7:8; 1 Kor 13:4.

Mbwenu shi omushija wawe yashuba kureba ponogurafi, nikimanyisa ku atari kwehana kandi ku atari kwegarukaho? Ingaha. Namunonga yaba yabire embata nabasa kurwanisa eyo ngesho omu kubaho kweye kona. Nabasa kushuba kuyireba n’obu yakuba amazire emyaka myingi abicwekireho. Kugira ngu areke kugireba, naba ashemerire kugumizamu kwerinda ebintu byona ebiri kubasa kutuma yashuba kugwa omuri ogo mutego n’obu yakuba ari kureba ari nk’owayicwekireho. (Emi 28:14; Mat 5:29; 1 Kor 10:12) Naba ashemerire kugumizamu ‘kuhindurwa musya omu bwenge bweye’ kandi agumizamu ‘kwanga ebibi’ harimu ponogurafi n’ebindi bikorwa by’oburofa ecokureberaho nk’okwekinisa. (Efe 4:23; Zab 97:10; Rom 12:9) Mbehi nayenda kukora cona eki ari kubasa kugira ngu abicwekeho? Caba kiri kisyoya nayija kuhika aho abirugireho kimwe. e

Konka shi okakora ki yaba owu mwatasine atari kwendera kimwe kucweka ahari eyo ngesho? Nibihurirwa ku obumwe ori kubasa kuhurira wahemukirwe kandi ohurira oyine ekiniga. Gira obusinge bw’omumutima ori kubireka omu mikono ya Yehova. (1 Pet 5:7) Gumuzamu kugira obunywani na Yehova birabire omu kweyegesa, kushaba, n’okutecereza aha bi ori kushoma. Wakikora basyoya, yesige otari kubanganisa ku na we arije kukuhika hihi. Nk’oku omuri Isaya 57:15 hari kubigamba, ‘naba hihi y’abine omutima oguri kwehana kandi b’abacurezi’ ari kwenda ngu bashube kutunga okushemererwa. Gezaho kuba Omukristo murungi. Rondera obuyambi aha bazehe b’ekibina. Kandi guma oyine amasiko ku izoba rimwe omushija wawe arije kukora empinduka abyihire aha mutima.​—Rom 2:4; 2 Pet 3:9.