1. Ahabw’enki Abanyababuloni batangarire omuhanuzi Daniyeli?

 OMUHANUZI Daniyeli akaba acari muto obu Abanyababuloni bamutwire nk’omusibe omuri Babuloni ahabire hari hare y’owabo. Konka abategeki bakakunda Daniyeli. Bakareba ‘oku ari kushusha n’ecemerero ceye,’ bareba ku yabire ‘atine akamogo,’ ‘ari murungi, ayine obwenge’ ku yabire ari kuruga omu ka egumire. (1 Sam 16:7) Eco kikatuma Abanyababuloni baza kumwegesa kugira ngu ayije kukorera omu nju y’omugabe.​—Dan 1:3, 4, 6.

2. Ni bata oku Yehova yabire nareba Daniyeli? (Ezekiyeli 14:14)

² Yehova akaba nakunda Daniyeli, atari ahabw’oku yabire ari kurebeka ninga ahabw’omwanya ogu yabire ayine omu bugabe, ahobwe ni ahabw’oku yashaziremu kubaho. Daniyeli nabasa kuba yabire ayine emyaka nka 20, obu Yehova yagambire ku yabire ari nka Nowa na Yobu, abashija ababire bine obunywani burungi na Ruhanga. (Kut 5:32; 6:9, 10; Yob 42:16, 17; shoma omuri Ezekiyeli 14:14.) Kandi Yehova akagumizamu kukunda Daniyeli omu kubaho kweye kona.​—Dan 10:11, 19.

3. Ni enki eki twaza kushwijuma omuri eki kicweka?

³ Omuri eki kicweka, twaza kushwijuma emitwarize ibiri ya Daniyeli eyatumire Yehova yamureba nk’ow’omuhendo. Twaza kutandika turi kureba buri mutwarize, kandi turebe n’obwire obu yagwerekire. Twaza n’okureba ecakwasize Daniyeli kwereka eyo mitwarize. Bwanyima, nitureba oku turi kubasa kumutoreza. N’obu eki kicweka kiri kukwata aha bacari bato, twena nitubasa kugira eki twayegera aha cokureberaho ca Daniyeli.

4. Ni bata oku Daniyeli yayerekire obumanzi? Gamba ecokureberaho.

⁴ Abantu abine obumanzi obumwe nibagira obwoba, konka tiburi kubazibira kukora ekihikire. Daniyeli akaba ari omusigazi  ori kwereka obumanzi munonga. Reba oburyo bubiri obu yayerekiremu obumanzi. Aha murundi g’okubanza, akabwereka obu habire hahwire emyaka ibiri Abanyababuloni bacwecerize Yerusalemu. Obwo bwire, Omugabe Nebukadeneza wa Babuloni akarota ekiroto c’ekishushani kihango. Akagamba ku yabire arayite abanyabwenge beye bona, harimu na Daniyeli, baba batamugambire eki yabire arosire kandi bakakishoborora. (Dan 2:3-5) Daniyeli akahika nagira eki yakora, ahakuba akaba ari kumanya ku na we yabire ari kubasa kwitwa. ‘Akaza ow’omugabe, yamushaba kumuha obwire, obu arizireho kumushobororera amakuru g’eco kiroto.’ (Dan 2:16) Eco kikaba nikishaba obumanzi n’okwikiriza. Bibuli teri kugamba ku hine obundi bwire obu Daniyeli yabire yashoborwireho ebiroto. Akagambira bagenzi beye abu Abanyababuloni babire bahire amazina, ari bo Seduraka, Misaki na Abedenego ‘kushaba Ruhanga ow’omu iguru kubagirira embabazi akabashururira eco kigambo.’ (Dan 2:18) Yehova akagarukamu eshara zabo. Akakwasa Daniyeli, yashoborora ekiroto ca Nebukadeneza. Eco kikatuma Daniyeli na bagenzi beye barokoka.

5. Ni kiha kindi kigezo eki Daniyeli yabugine kikamushaba kwereka obumanzi?

⁵ Hahwire obwire buce Daniyeli amazire kushoborora ekiroto c’ekishushani kihango, akashuba yabugana ekindi kigezo ecamushabire kwereka obumanzi. Nebukadeneza akashuba yarota ekindi kiroto ekiri kutinisa. Omuri eco kiroto akarebamu ekiti kihango kandi kiringwa. Daniyeli akereka obumanzi yashobororera omugabe eco kiroto, yamugambira ku yabire arabe omushazi kandi akamara obwire atari kutegeka. (Dan 4:25) Obwo butumwa bukaba buri kubasa kushasha omugabe kituma yayita Daniyeli. Konka Daniyeli akereka obumanzi yamushobororera ebintu byona.

6. Ni enki ecakwasize Daniyeli kwereka obumanzi?

⁶ Ni enki ecakwasize Daniyeli kwereka obumanzi? Mazima obu Daniyeli yabire acari muto, akaba yayegire aha cokureberaho c’ishe na nyina. Hatariho okubanganisa bakaba bari korobera ebiragiro ebi Yehova yabire ahire abazire b’Abisirayeli kandi begesa omwana wabo Ekigambo ca Ruhanga. (Bir 6:6-9) Daniyeli akaba namanya ebiragiro ikumi ebi Ruhanga yahire Abisirayeli, kandi  nambwenu ari n’okumanya ebi Abisirayeli babire bashemerire kurya n’ebi babire batashemerire kurya. b (Lev 11:4-8; Dan 1:8, 11-13) Nambwenu Daniyeli akega amateka g’abahereza ba Ruhanga kandi akaba namanya ebyabire biri kubahikaho baremwa kugendera aha misinge ya Yehova. (Dan 9:10, 11) Ebyo bintu byona ebyahikire ahari Daniyeli bikatuma yayesiga ku Yehova na bamarayika beye abine amani babire bari kumukwasa.​—Dan 2:19-24; 10:12, 18, 19.

7. Ni kiha kindi kintu ecakwasize Daniyeli kwereka obumanzi? (Nambwenu reba ekishushani.)

⁷ Daniyeli akaba yayegire ebihandiko by’abahanuzi ba Ruhanga, harimu n’obuhanuzi bwa Yeremiya. Oku Daniyeli yagenzire ari kubwega, kikatuma yareba ku obwire obu Abayudaya babire baramare omuri Babuloni bwabire buri hihi kuhwa. (Dan 9:2) Hatariho okubanganisa, okwerebera obuhanuzi bw’omuri Bibuli buri kuhikirira, nikibasa kuba catumire Daniyeli yakizaho kwesiga Yehova, kandi abari kwesiga Ruhanga nibagira obumanzi bwingi. (Geranisa n’Abaroma 8:31, 32, 37-39.) Ekiri kukira byona, burijo Daniyeli akaba nashaba Ishe w’omu iguru Yehova. (Dan 6:10) Akaba namugambira enshobe zeye kandi amugambira oku ari kwehurira. Nambwenu Daniyeli akaba namushaba obuyambi. (Dan 9:4, 5, 19) Ahakuba na we yabire ari omuntu nk’itwe, tarazirwe ayine obumanzi. Ahobwe, akagira ogo mutwarize birabire omu kweyegesa, kushaba n’okwesiga Yehova.

8. Ni enki ekiri kubasa kutukwasa kugira obumanzi?

⁸ Ni enki eki tushemerire kukora ngu tugire obumanzi? N’obu abazire bitu bari kubasa kutukwasa kugira obumanzi, tituri kubasa kuba emanzi ngu ni ahabw’okuba na bo bari emanzi. Okwemanyiza kugira obumanzi ni nk’okwega ekintu kisya. Oburyo bumwe bw’okwegamu ekintu kisya ni okureba omwegesa ari kukikora, rero omutoreza. Omu buryo nk’obwe, nitwega kugira obumanzi turi kwetegereza oku abandi babwerekire kandi tukabatoreza. Mbwenu shi, ni enki eki twayegera ahari Daniyeli? N’itwe tushemerire kukizaho kumanya Ekigambo ca Ruhanga. Tushemerire kugira obunywani burungi na Yehova turi kumugambisa burijo kandi tumugambire byona ebituri aha mutima. Nambwenu tushemerire kwesiga Yehova, turi kwikiriza ku arije kutukwasa. Ku turakore ebyo byona, okwikiriza kwitu ku kuragezibwe, nitwija kugira obumanzi.

9. Ni bata oku turi kugasirwa twagira obumanzi?

⁹ Nitugasirwa omu buryo bwingi twagira obumanzi. Reba ecokureberaho ca Ben. Omu ishomero eri yabire nayegeramu omuri Jamani, buri omwe akaba nayikiriza ku ebintu byabireho biri kuruga omu bindi kandi batari kwikiriza enkuru eziri kugamba aha kuhangwa eziri omuri Bibuli. Izoba rimwe, Ben akahebwa omugisha g’okuza omu misho g’abegi bagenzi beye ngu abashobororere enshonga ari kwikiriza ku amagara gahangirwe. Akashoborora ebi ari kwikiriza ayine obumanzi. Ni enki ecarugiremu? Ben akagamba ati: “Omwegesa wange akatega amatu ayetonzire, kandi yanshaba kumuha kopi y’ebi nayegesaho, rero yabiha buri omwe omu bu turi kwega hamwe.” Abu bari kwega hamwe bakabikwata bata? Beni akagumizamu ari kugira ati: “Abingi omu bu twabire turi kwega hamwe bakabishoborocerwa, kandi babyakira n’okushemererwa.” Ecokureberaho ca Ben nicereka ku abantu bari kuha ekitinisa abari kugira obumanzi. Kandi ebyo nibibasa kutuma abantu abine emitima  mirungi bayenda kumanya Yehova. Obwe rero, tushemerire kwereka obumanzi.

10. Ekigambo obwesigwa nikimanyisa ki?

¹⁰ Ekigambo c’omuri Bibuli c’Oruheburayo ekiri kuhindurwamu ngu “obwesigwa,” ninga “rukundo etari kuhemuka,” nibikunda kukoresibwa biri kumanyisa rukundo eyi Yehova ari kukunda abahereza beye. Nambwenu eco kigambo nikikoresibwa kiri kumanyisa rukundo eri ahagati y’abahereza ba Ruhanga. (2 Sam 9:6, 7) Obwe rero oku obwire buri kuhwa, obwesigwa bwitu nibugenda buri kweyongera. Reba oku Daniyeli yeyerekire ku eco kiri amazima.

11. Ni bata oku obwesigwa ba Daniyeli bwagezibwe obu yabire ari omu za bukuru? (Reba ekishushani c’aha kishembeso.)

¹¹ Daniyeli akabugana ebigezo byingi ebyagerize obwesigwa bweye ahari Yehova. Konka ekigezo ekiri kukira byona ni ecamubireho ari omu myaka ya za 90. Omuri obwo bwire Babuloni ekaba netegekwa na Dariyo, omugabe w’Abamedi n’Abaperesi. Abategeki b’omu bugabe bwa Dariyo bakaba nibanga Daniyeli kandi batari kuha ekitinisa Ruhanga owu yabire ari kuramya. Obwe rero bakaronda oburyo bw’okumwitisa. Bakataho ekiragiro ecabire kiratume Daniyeli yayereka yaba ari omwesigwa ahari Ruhanga ninga aha mugabe. Eco kiragiro kikaba kiri kuragira Daniyeli kwereka ku ari omwesigwa aha mugabe kandi na we akemereza kushaba Yehova kumara ebiro 30. Daniyeli akanga kuhemukira Yehova. Eco kikatuma bamunaga omu kina c’entare. Konka Yehova akahemba Daniyeli ahabw’obwesigwa bweye ari kubumba eminwa y’entare. (Dan 6:12-15, 20-22) Ni bata oku turi kubasa kuba abesigwa ahari Yehova nk’oku Daniyeli yakikozire?

12. Ni bata oku Daniyeli yayerekire ku ari omwesigwa ahari Yehova?

¹² Nk’oku twaba tukigambireho, rukundo egumire ni yo eri kutuma twaba abesigwa. Daniyeli akaguma ari omwesigwa ahari Yehova ahakuba akaba namukunda munonga. Hatariho okubanganisa Daniyeli akagira eyo rukundo ku yatecerize aha mitwarize ya Yehova n’oku yabire ari kuyereka. (Dan 9:4) Nambwenu Daniyeli akatecereza aha birungi ebi Yehova yamukorire n’ebi yabire akorire abahereza beye.​—Dan 2:20-23; 9:15, 16.

13. (a) Ni biha bigezo ebiri kugeza obwesigwa by’abacari bato? Gamba ecokureberaho. (Nambwenu reba ekishushani.) (b) Nk’oku biri kwerekwa omuri vidiyo, ni bata oku ori kubasa kugarukamu bakubuza yaba Abahamya ba Yehova bari kushagika obutinganyi?

 ¹³ Kimwe na Daniyeli, abacari bato betorwirwe n’abantu abatari kuha Yehova n’emisinge yeye ekitinisa. Abantu nk’abo nibanga omuntu wena ori kwereka ku ari kukunda Ruhanga. Abamwe nibagezaho kunyuzura abacari bato kugira ngu batagumizamu kuba abesigwa ahari Ruhanga. Reba ebyahikire aha musigazi ori kwetwa Graeme, otwire omuri Ositareliya. Obwesigwa bweye bukagezibwa munonga obu yabire ari omu mashomero makuru. Omwegesa akabuza abegi oku bari kubasa kwehurira munywani wabo yabagambira ku ari omutinganyi. Ogo mwegesa akabagambira ku abari kubasa kushagika ogo mutinganyi ashemerire kwemerara aha rubaju rumwe, rero abatari kubasa kumushagika bakaza aha rundi rubaju. Graeme akagamba ati: “Abu twabire turi kwega hamwe bakashagika obutinganyi oyihireho nyowe n’ondijo Muhamya.” Ebyabireho bwanyima bikageza obwesigwa bwa Graeme. Akagira ati: “Ba begi n’omwegesa bakamara eshaha yona eyi twamazire turi kwega bari kutushecerera kandi bari kutujuma. Nkagezaho kubashorororera omu muringo murungi ebi ndi kwikiriza, konka bakaba batari kwenda kubihurikiza.” Ebyo bikagira ziha ngaruka aha bwesigwa bwa Graeme? Akagamba ati: “N’obu cabire kitorobi kuhurira oku abu turi kwega hamwe babire bari kunjuma, konka nkashemererwa munonga ahakuba nagumizemu kuba omwesigwa ahari Yehova kandi nkarwanirira ebi ndi kwikiriza.” c

14. Ni buha buryo bumwe obu turi kubasa kugumyamu obwesigwa bwitu ahari Yehova?

¹⁴ Nitubasa kugumya obwesigwa bwitu ahari Yehova twakizaho kumukunda nk’oku Daniyeli yakikozire. Nitubasa kugira eyo rukundo twayega ebiri kukwata aha mitwarize yeye. Ecokureberaho: Nitubasa kwegera aha bintu ebi yahangire. (Rom 1:20) Waba ori kwenda kukizaho kukunda Yehova n’okumuha ekitinisa, nobasa kushoma ebicweka ebiri aha mutwe oguri kugira ngu “Mbehi bikahangwa?” ninga shi oreba za vidiyo. Nambwenu nobasa kushoma akatabo akari kugira ngu Mbehi amagara gakahangwa (Was Life Created?) n’akari kugira ngu Obukomoko bw’amagara—Ebibuzo bitano ebiri kubuzibwa (The Origin of Life—Five Questions Worth Asking). Reba eki omunyanyazi ori kwetwa Esther w’omuri Denimaka yagambire ahari otwo tutabo. Akagamba ati: “Ebiri kugambwamu ni birungi munonga. Otwo tutabo tituri kukugambira ebi oshemerire kwikiriza, ahobwe nitukuha ebihamya rero oyeshariramu.” Ben, owu tugambireho, akagamba ati: “Ebihandikiremu bikahamya okwikiriza kwange. Bikampamiza ku Ruhanga ari we owahangire amagara.” Ku orimara kwega otwo tutabo, noyija kwikiriza ebigambo by’omuri Bibuli ebiri kugira ngu: “Yehova Ruhanga witu, oshemerire kuhimbisibwa n’okuhebwa ekitinisa n’obushoborozi, ahabw’okuba ni iwe owahangire byona.”​—Kush 4:11. d

15. Ni buha bundi buryo obu turi kubasa kugumyamu obunywani obu twine na Yehova?

¹⁵ Obundi buryo obu turi kubasa kugumywamu rukundo eyi turi kukunda Yehova ni okutecereza aha Mwana weye, ari we Yesu. Eco ni co eki omunyanyazi ori kwetwa Samira, otwire omuri Jamani yakozire. Akagamba ati: “Nkakizaho kumanya Yehova birabire ahari Yesu.” Obu Samira yabire acari muto, kikaba  nikimugumira kwehuriza enyehurira za Yehova. Konka akashoborocerwa ku Yesu yabire ayine enyehurira. Akongeraho ati: “Nkakunda Yesu ahakuba yabire ari kukunda abantu bona kandi ari kukunda abana. Oku yabire ari kukizaho kumanya byingi ahari Yesu ni ko yakirizeho kukunda Yehova. Ahabw’enki? Akagamba ati: “Mporampora nkagenda ndi kushoborocerwa ku Yesu yatorize Ishe omu bwijwire. Bine byingi ebi bari kubuganiraho. Nkija kumanya ku ari yo enshonga eyatumire Yehova yatuma Yesu omu nsi kugira ngu corobere abantu kukizaho kumanya ge Yehova.” (Yoh 14:9) Waba ori kwenda kukizaho kukunda Yehova, oshemerire kukwata obwire oburi kumara bw’okwega ahari Yesu. Ku orakikore basyoya, rukundo eyi ori kukunda Yehova n’obwesigwa obu omwinire nibyija kweyongera.

16. Ni bata oku turi kugasirwa twaba abesigwa? (Zaburi 18:25; Mika 6:8)

¹⁶ Abantu b’abesigwa burijo nibagira abanywani abahamire. (Rusi 1:14-17) Nambwenu abari kuba abesigwa ahari Yehova, nibahurira bine obusinge bw’omu mutima kandi bine okumarwa. Ahabw’enki? Ahabw’okuba Yehova naraganisa ku arije kuba omwesigwa ahabari kumubera abesigwa. (Shoma omuri Zaburi ya 18:25; Mika 6:8.) N’iwe kitecerezeho: Omuhangi Rukirabona nayenda kugira obunywani bugumire n’itwe! Kandi yaba munywani witu, tihine ekigezo ninga abari kutuhiganisa n’obu rwakuba orufu ebiri kubasa kututanisa n’eyo rukundo. (Dan 12:13; Luk 20:37, 38; Rom 8:38, 39) Mazima ni ec’omugasho kutoreza Daniyeli tukagumizamu kuba abesigwa ahari Yehova!

17-18. Ni kiha kindi kintu eki turi kubasa kwegera ahari Daniyeli?

¹⁷ Omuri eki kicweka twashwijuma emitwarize ibiri eyi Daniyeli yayerekire. Konka hariho ebindi byingi ebi turi kubasa kumwegeraho. Ecokureberaho: Yehova akatuma Daniyeli yayorekwa kandi yarota ebiroto. Nambwenu akamuha obushoborozi bw’okushoborora obutumwa bw’omu buhanuzi. Obwingi omuri obwo buhanuzi bukahikirira. Obundi bwo nibugamba ebintu ebirije kubaho omu biro eby’omu misho ebirije kugira engaruka ahari buri muntu wena ori omu nsi.

¹⁸ Omu kicweka ekiri kukurataho, nitwija kushwijuma obuhanuzi bubiri obu Daniyeli yahandikire. Okubushoborocerwa nikija kutukwasa twena, abato n’abakuru, kukora ensharamu ndungi omuri obu bwire. Obwo buhanuzi nibwija kutuma twakizaho kugira obumanzi n’okuba abesigwa omu bwire obu turi kwetegura ebizibu ebi turije kubugana omu biro eby’omu misho.