1. Ni gaha mazima agu wayegire ku watandikire kwega Bibuli?

 MBEHI noyijuka obu watandikire kwega Bibuli? Nikibasa kuba cakutungwire kumanya ku Ruhanga ayine izina. Ninga shi nikibasa kuba cakushemize ku wamanyire ngu Ruhanga tari koceza abantu omu muriro ogutari kurara. Nobasa kuba washemerirwe ku wamanyire ngu noyija kubugana abakundwa bawe abafire omuri paradiso.

2. Okongera aha kwega amazima g’omuri Bibuli, ni ziha zindi ntunguka ezi wakozire? (Abefeso 5:1, 2)

² Oku wakirizeho kwega Ekigambo ca Ruhanga, ni ko rukundo eyi ori kukunda Yehova yakirizeho kweyongera. Eyo rukundo ni yo eyatumire wayenda kuta omu bikorwa ebi ori kwega. Okakora ensharamu ndungi ezegamire aha misinge y’omuri Bibuli. Okaboneza emitwarize n’emicwe yawe, ahabw’okuba wabire ori kwenda kushemeza Ruhanga. Nk’oku omwana ari kutoreza omuzire oyine rukundo, n’iwe okatoreza Sho w’omu iguru.​—Shoma omu Befeso 5:1, 2.

3. Ni biha bibuzo ebi turi kubasa kwebuza?

³ Nitubasa kwebuza ngu: ‘Mbehi rukundo eyi nyine hati nekira eyi nabire nyine ncaba Omukristo? Mbehi kwiha nabatizibwa, ebikorwa byange n’emitekatecere yange bikakizaho kuba nk’ebya Yehova, na munonga ndi kwereka rukundo benetata na banyanyazi?’ Yaba ‘rukundo yawe y’omu kubanza’ hine oku yafukiriremu, otahwa amani. Ekintu nk’eco kikahika aha Bakristo b’omu kinyigana c’okubanza. Yesu tarabihireho emikono kandi n’itwe tarije kuyitwihaho. (Kush 2:4, 7) Namanya ku turi kubasa kushuba kugira rukundo nk’eyi twabire twine omu kubanza tucamanya amazima.

4. Ni enki eki twaza kushwijuma omuri eki kicweka?

⁴ Eki kicweka caza kutukwasa kumanya oku turi kubasa kugumizamu kongera rukundo eyi turi kukunda Yehova n’abandi. Bwanyima, nitwija kureba emigisha eyi turije kutunga n’erije kuhika aha bandi twakizaho kukundana.

5-6. Ni biha bizibu ebi entumwa Pawulo yabugine omu murimo g’okuburira, konka shi ni enki ecamuhigire kugumizamu kuhereza Yehova?

⁵ N’obu Pawulo yabire ari kushemerererwa omurimo gwa Yehova, akaba nabugana ebizibu byingi. Pawulo akaba nakora engendo ndingwa kandi okukora engendo nk’ezo omuri obwo bwire bikaba bitorobi. Omu ngendo ezi Pawulo yabire nakora, obumwe akaba nabuganira ‘akabi omu mizi’ kandi abugana n’‘abambuzi.’ Nambwenu emirundi myingi ababire bari kumuhakanisa bakaba nibamutera. (2 Kor 11:23-27) Kandi Abakristo bagenzi ba Pawulo ti ko burijo babire bari kumwereka ku nibamusima ahabw’amani agu yabire nataho kugira ngu abakwase.​—2 Kor 10:10; Fil 4:15.

⁶ Ni enki ecakwasize Pawulo kugumizamu ari kukora omurimo gwa Yehova? Pawulo akamanya byingi ebiri kukwata aha mitwarize ya Yehova birabire omu Kigambo ceye n’aha bi yabire narabamu. Eco kikatuma Pawulo yayesiga ku Yehova Ruhanga yabire ari kumukunda. (Rom 8:38, 39; Efe 2:4, 5) Kandi na we akaba nakunda Yehova munonga. Pawulo akereka ku nakunda Yehova ‘ari kugumizamu kuhereza abari kwera.’​—Heb 6:10.

7. Ni buha buryo bumwe obu turi kubasa kongeramu rukundo eyi turi kukunda Yehova?

⁷ Nitubasa kongera rukundo eyi turi kukunda Ruhanga turi kukizaho kweyegesa Ekigambo ceye. Waba ori kushoma Bibuli gezaho kutecereza aha ki ebi washoma biri kukwegesa ahari Yehova. Yebuze ngu: ‘Eyi nkuru nenyegesa ki ahari rukundo eyi Yehova ari kunkunda? Ni ziha nshonga ezi narebamu eziri kumpiga kukunda Yehova?’

8. Ni bata oku eshara eri kubasa kutukwasa kongera rukundo eyi turi kukunda Ruhanga?

⁸ Obundi buryo obu turi kubasa kongeramu rukundo eyi turi kukunda Yehova ni okumwigurira omutima gwitu burijo birabire omu shara. (Zab 25:4, 5) Yehova na we nayija kugarukamu eshara zitu. (1 Yoh 3:21, 22) Omunyanyazi w’omuri Asia ori kwetwa Khanh, akagamba ati: “Rukundo eyi ndi kukunda Yehova ekatandikira aha kumumanya. Konka nkakizaho kumukunda oku nagenzire ndi kureba oku ari kugarukamu eshara zange. Ebyo bikatuma nayenda kukora ebiri kumushemeza.” b

9. Ni bata oku Timoteyo yabire ari kwereka ku ari kukora entunguka omu kwereka rukundo?

⁹ Bwanyima y’emyaka myingi Pawulo amazire kuba Omukristo, akabugana n’omusigazi murungi ori kwetwa Timoteyo. Timoteyo akaba nakunda Yehova n’abantu. Pawulo akagambira Abafilipi ati: ‘Ahakuba tinyine ondijo nkawe [Timoteyo] orita omutima munonga aha byanyu.’ (Fil 2:20) Pawulo akaba atari kugamba aha bushoborozi bwa Timoteyo bw’okutebekanisa ebintu ninga shi obw’okugambira omu misho g’abantu, ahobwe akaba ari kugamba ahari rukundo eyi Timoteyo yabire ari kukunda benetata na banyanyazi. Hatariho okubanganisa ebibina ebi Timoteyo yabire natayayira bikaba nibimutegereza n’ekihika.​—1 Kor 4:17.

10. Rukundo eyi Anna n’omushija weye babire binire benetata na banyanyazi ekatuma bakora ki?

¹⁰ N’itwe tushemerire kuronda oburyo bw’okuyambamu Abakristo bagenzi bitu. (Heb 13:16) Reba ecokureberaho ca munyanyazi Anna, owu twagambireho omu kicweka ecabandirize eki. Bwanyima y’ihunga ry’amani, we n’omushija weye bakaza kutayayira eka y’Abahamya ba Yehova bashanga enju yabo yashambukire. Kandi ebyo bikatuma ebijwaro byabo byona byasisikara. Anna akagamba ati:  “Tukatwara ebijwaro byabo twabyoza, kandi twabibagarurira bigorwire kandi bizingire ge. Ahari itwe ako kakaba kari kurebeka nk’akantu akorobi, konka bikatuma twagirana obunywani obugumire obu tucayinine na hati.” Rukundo eyi Anna n’omushija babire binire benetata na banyanyazi ekatuma babayamba.​—1 Yoh 3:17, 18.

11. (a) Ni bata oku amani agu turi kutaho ngu twereke abandi rukundo gari kubagasira? (b) Tukuratize ebiri kugambwa omu Migani 19:17, Yehova natureba ata twayereka abandi rukundo?

¹¹ Ku turi kwereka abandi rukundo n’embabazi, nibyereka ku turi kutaho amani ngu tutoreze ebikorwa n’emitecerereze bya Yehova. Kandi ebyo nibituma bayesimira ebikorwa ebi turi kubakorera omu buryo obu tutakayehuriza. Khanh, owu tugambireho akagamba ku acayijuka abamukwasize. Akagamba ati: “Mazima ninsima munonga abanyanyazi bona abankwasize omu murimo g’okuburira. Bakaba nibampa ka rifuti omu motoka, bantwara kuza kurya na bo, kandi banshendekeza bampisa omu ka. Nkamanya ku byabire nibibashaba amani mingi. Kandi bakaba nibabikora ahabwa rukundo.” Konka ti ko oku abantu bona bari kutusima ahabw’ebi turi kukora. Khanh akagamba aha bamuyambire ari kugira ati: “Nimba ndi kuhurira ndi kwenda kubihura aha bw’ebi bankorire, konka tindi kumanya ahu bona batwire. Konka Yehova nahamanya, kandi nintura ndi kumushaba ngu abanyihurire.” Ebi Khanh yagambire bihikire. Yehova nareba nangwa n’akakorwa kace karungi aku turi kukorera abandi. Nakareba nk’ekiconco c’omuhendo kandi akareba nk’ibanja eri arije kushashura.​—Shoma omu Migani 19:17.

12. Ni bata oku benetata bari kubasa kwereka rukundo ab’omu? (Nambwenu reba ekishushani.)

¹² Yaba ori mwenetata, ni bata oku ori  kubasa kwereka abandi ku nobakunda ori kubakwasa? Mwenetata ocari muto ori kwetwa Jordan akabuza omuzehe eki ari kubasa kukora kugira ngu akore byingi omu kibina. Ogo muzehe akabanza kumusima ahabw’entunguka ezi yabire yakozire, rero bwanyima yamuha obuhabuzi oburi kubasa kumukwasa kongera aha bi ari kukora. Ecokureberaho: Akashaba Jordan kuguma kuhika aha nterane bucari kare kugira ngu abase kwakura abandi, kuguma kwekwatanisa omu nterane, kuburira burijo ari hamwe n’omutwe gweye g’okuburira, n’okuronda ebintu ebi ari kubasa kukora kugira ngu ayambe abandi. Jordan ku yatire omu bikorwa obwo buhabuzi, akamanya ebintu byingi kandi yakizaho kukunda benetata na banyanyazi. Jordan akamanya ku mwenetata yaba omuhereza w’ekibina, kitari kumanyisa ngu ni bwo obu yatandika kuhereza abandi ahobwe ku ari kugumizamu kubahereza.​—1 Tim 3:8-10, 13.

13. Ni bata oku rukundo yatumire mwenetata yashuba kuba omuzehe?

¹³ Kandi shi yaba otacari omuhereza w’ekibina ninga omuzehe w’ekibina? Na bwo Yehova nayijuka ebi wamukorerire omu bwire bwa kare na rukundo eyatumire wamukorera. (1 Kor 15:58) Nambwenu nareba rukundo eyi ocagumizamu kwereka. Mwenetata ori kwetwa Christian akashasha munonga ahabaw’okumwiha aha buzehe. Akagamba ati: “Nkasharamu kukora cona eki nabire ndi kubasa kugira ngu nkorere Yehova ahabwa rukundo, yakuba nyine obujunanizibwa ninga ntabwine.” Bwanyima y’obwire, akashuba yaba omuzehe. Akagamba ati: “Nkaba nimpurira ntari kwenda kushuba kuba omuzehe, konka ahabw’okuba Yehova yangirire embabazi, ari kunyikiririza kushuba kuba omuzehe, nkabyikiriza ahabwa rukundo eyi ndi kumukunda n’eyi ndi kukunda benetata na banyanyazi.”

14. Ni enki eki wayegera aha bi munyanyazi w’omuri Jeworujiya yagambire?

 ¹⁴ Nambwenu abahereza ba Yehova nibaba bashemerire kwereka rukundo n’abatahi babo. (Mat 22:37-39) Ecokureberaho: Omunyanyazi w’omuri Jeworujiya ori kwetwa Elena, akagamba ati: “Ekintu c’okubanza ecatumire nakora omurimo g’okuburira, ni rukundo eyi ndi kukunda Yehova. Konka oku rukundo eyi ndi kukunda Tata w’omu iguru yakirizeho kweyongera ni ko na rukundo eyi ndi kukunda abantu yakirizeho kweyongera. Nkagezaho kutecereza aha bizibu ebi bari kubugana, n’ebi ndi kubasa kubegesa bikabahika aha mutima. Burijo oku nabire ndi kubitecerezaho ni ko oku nabire nimpurira ndi kwenda kubakwasa.”​—Rom 10:13-15.

15-16. Nk’oku biri kwerekwa omu kishushani, ni eha migisha eri kuruga omu kwereka abandi rukundo?

¹⁵ Ku turi kwereka rukundo benetata na banyanyazi, ti bo abari kugasirwa bonka. Ecorezo ca COVID-19 ku catandikire, mwenetata ori kwetwa Paolo n’omukazi weye bakakwasa abanyanyazi bingi abakuzire kumanya oku bari kubasa kukoresa ebyoma byabo by’obwenge omu kuburira. Omunyanyazi omwe owu cabire kiri kugumira kukoresa esimu yeye, akahika aho yabibasa. Akabasa kukoresa eco coma omu kutumira abanyabuzare beye omu Kijusyo. Makumimukaga omuri bo, bakekwatanisa bakoresize oburyo bwa vidiyo! Ogo munyanyazi n’abanyabuzare beye bakagasirwa  ahabw’amani agu Paolo n’omukazi weye batireho. Bwanyima, ogo munyanyazi akahandikira Paolo ari kumugambira ati: “Mukakora munonga kwegesa abakuzire. Tindiyebwa oku Yehova yatufireho n’amani ganyu agu mwatireho.”

¹⁶ Enkuru nk’ezo z’ebyabireho, zikegesa Paolo ishomo ry’omugasho. Zikamwijusa ku rukundo eri kukira munonga obumanyi ninga obushoborozi obu omuntu ari kuba ayine. Akagamba ati: “Nkaba ndi omureberezi ori kutayayira ebibina. Omuri obu bwire, nkamanya ku n’obu ababurizi bari kubasa kwebwa toku ezi nabahire batari kubasa kwebwa ebintu ebi nabakorire.”

17. Ni oha ondijo ori kugasirwa twayereka rukundo?

¹⁷ Twayereka abandi rukundo, n’itwe nitugasirwa omu buryo obu tutari kutecereza. Ebyo ni byo ebyahikire ahari Jonathan, otwire omuri Niyuzilandi. Izoba rimwe buri Orwamukaga omu ihangwe kandi hariho omushana mwingi, akareba omupayoniya ari kuburira aha muhanda. Jonathan akasharamu kuguma kukorana n’ogo mupayoniya buri Rwamukaga omu ihangwe. Akaba atari kumanya oku eyo nsharamu eyi yakozire yabire erije kumugirira omugasho. Jonathan akagamba ati: “Ngambisize amazima, omuri obwo bwire nkaba ntari kukunda omurimo g’okuburira. Konka oku nagenzire ndi kuhurira oburyo obu ogo mupayoniya yabire ari kwegesamu, n’okureba ebi yabire ari kuhikaho omu murimo, kikatuma nanye nakunda omurimo g’okuburira. Nambwenu nkatunga omunywani owankwasize kukura omu by’omwika, kwesimira omurimo g’okuburira, n’okuhika hihi ya Yehova.”

18. Ni enki eki Yehova ari kutushaba kukora?

¹⁸ Yehova nayenda ngu rukundo eyi turi kumukunda n’eyi turi kukunda abandi ekizeho kweyongera. Nk’oku twamara kukireba, nitubasa kongera rukundo eyi turi kukunda Yehova turi kushoma Ekigambo ceye, turi kukitecerezaho kandi turi kumushaba burijo. Nitubasa kongera rukundo eyi turi kukunda benetata na banyanyazi birabire omu kubayamba omu bikorwa. Oku rukundo yitu erikizaho kweyongera ni ko turikizaho kuhika hihi ya Yehova kandi tukunde eka yitu y’eby’omwika. Mazima nitwija kwesimira obwo bunywani ebiro byona!