1. Ahabw’enki kiri ec’obwenge kwetegura?

 KWETEGURA nibirokora amagara. Ecokureberaho: Ku hari kubaho ekihikirizi, abantu abacetegwire bucari kare nibarokoka kandi bakwasa n’abandi. Ekitongore ekiri kufa aha bantu c’omuri Bungereza kikabigambaho kiri kugira kiti: “Okwetegura ge nikirokora amagara.”

2. Ahabw’enki tushemerire kwetegurira okubonabona kwingi? (Matayo 24:44)

² ‘Okubonabona kwingi’ kuryayija kutungurine. (Mat 24:21) Konka okubonabona kwingi ko tikuri n’ebindi bihikirizi, ahakuba ko tikurije kutungura abantu bona. Hahwa emyaka eri kuhika aha 2,000, Yesu arabwire abakurasi beye kuguma betegwire. (Shoma omuri Matayo 24:44.) Twaba twetegwire, nikija kutworobera kuraba omuri ezo mbera zigumire kandi tukwase n’abandi kukikora.—Luk 21:36.

3. Ni bata oku okwehangana, esaasi na rukundo biri kutukwasa kwetegura okubonabona kwingi?

³ Reba emicwe ishatu eri kubasa kutukwasa kwetegura okubonabona kwingi. Ni enki eki turije kukora ku turishabwa kuburira obutumwa bw’orubanja kandi abantu bari kutuhakanisa? (Kush 16:21) Nitwija kwetenga okwehangana kugira ngu tworobere Yehova, turi kwesiga ku arije kuturinda. Ni enki eki turije kukora benetata na banyanyazi ku bariferwa ebintu byabo? (Hab 3:17, 18) Nitwija kwetenga kubereka esaasi tukabaha ebi bacenire. Ni enki eki turije kukora ku turimara obwire tutwire na benetata na banyanyazi ahabw’okutahirirwa kw’amahanga ageterine? (Ezek 38:10-12) Nitwija kwetenga rukundo egumire kugira ngu tuyambayambane kuraba omuri ezo mbera ezigumire.

4. Ni enki eki Bibuli eri kugamba aha bikwatirine n’okukizaho kwehangana, kwereka esaasi n’okugira rukundo?

 ⁴ Ekigambo ca Ruhanga nikitugambira ngu tukizeho kwehangana, kugira esaasi na rukundo. Omuri Luka 21:19 nihagira ngu: ‘Omu kwehangana ni mwo murijunira amagara ganyu.’ Omu Bakolosayi 3:12 nihagira ngu: ‘Mujware omutima gw’esaasi.’ Kandi omu 1 Batesalonika 4:9, 10 nihagira ngu: ‘Imwe ahabwanyu mukegesibwa Ruhanga okukundana. Konka nitubehanangiriza, benetata, mugume mweyongere kukundana.’ Yesu akagambira ebyo byahandikirwe byona abegi beye ababire bashangirwe bari kwehangana, bari kwereka esaasi, kandi bine rukundo. Konka, bakaba bashemerire kugumizamu kwereka eyo micwe. N’itwe ni co eki tushemerire kukora. Twaza kushwijuma oku Abakristo b’omu kinyigana c’okubanza bayerekire eyo micwe. Bwanyima, nitureba oku turi kubasa kutoreza abo Bakristo kugira ngu twetegure okubonabona kwingi.

5. Ni enki ecakwasize Abakristo b’omu kinyigana c’okubanza kwehanganira ebigezo?

⁵ Abakristo b’omu kinyigana c’okubanza bakaba bari kwetenga okwehangana. (Heb 10:36) Bakaba nibabugana n’ebizibu ebiri kuhika aha bantu bona hamwe n’okuhiganisibwa. Abingi omuri bo bakaba nibahiganisibwa n’abebembezi b’amadini n’abategeki b’Abaroma, kandi nambwenu bahiganisibwa n’ab’omu maka gabo. (Mat 10:21) Kandi omu kibina, hine obu babire bashemerire kurwanisa enyegesa z’ebishuba z’abahakani, ezabire ziri kucwamu abantu ebicweka. (Byak 20:29, 30) Konka, abo Bakristo bakabyehanganira. (Kush 2:3) Bakabyehanganira bata? Bakatecereza aha byokureberaho by’omu Byahandikirwe by’abantu abayehanganire, nka Yobu. (Yak 5:10, 11) Bakashaba Yehova amani g’okwehangana. (Byak 4:29-31) Kandi bakata omutima aha birungi ebiri kuruga omu kwehangana kwabo.—Byak 5:41.

6. Ni enki eki wayegera aha ki Merita yakozire akehanganira okuhiganisibwa?

⁶ N’itwe nitubasa kwehangana twayeyegesa ebyokureberaho by’abantu abayehanganire ebiri Kigambo ca Ruhanga n’omu bitabo byitu kandi tubitecerezeho. Eco ni co eki Merita, omunyanyazi w’omuri Alubaniya yakozire kandi kikamukwasa kwehanganira ab’omu ka yeye ababire bari kumuhakanisa. Akagamba ati: “Kikankora aha mutima ku nayegire enkuru y’omuri Bibuli ya Yobu. Akabonabona munonga atari kumanya enshonga, konka akagamba ati: ‘Okuhisya obu ndifa, tindireka kuguma ndi omwesigwa!’ (Yob 27:5) Nkashanga nyowe ntarabonabwine nka Yobu, ahakuba nyowe nkaba ndi kumanya enshonga ndi kubonabona.”

7. Ni enki eki tushemerire kwega kukora n’obu twakuba tutari kubugana ebigezo omuri obu bwire?

⁷ Nambwenu nitubasa kukizaho kwehangana burijo twaguma kugambira Yehova ebintu byona ebitwemerize omutima. (Fil 4:6; 1 Tes 5:17) Nobasa kuba otari kubugana ebigezo omuri obu bwire. Konka nabwo, oshemerire kurondera obuhabuzi ahari Yehova wahurira ogwirwe kubi, oshobirwe ninga shi oyemerize omutima. Omuri obu bwire waguma kurondera ahari Ruhanga obuyambi bw’okukukwasa omu bizibu bice ebi ori kubugana, tikirije kukugumira kukikora ku oribugana ebigumire omu biro by’omu misho. Noyija kwesiga ku ari kumanya obwire obu arakukwasemu n’oku arakukwase.—Zab 27:1, 3.

8. Ni bata oku ecokureberaho ca Mira kiri kwereka ku kwehanganira ebigezo omuri obu bwire kirije kutukwasa omu biro eby’omu misho? (Yakobo 1:2-4) (Nambwenu reba ekishushani.)

⁸ Twayehanganira ebigezo omuri obu bwire, nitwija n’okwehanganira okubonabona  kwingi. (Rom 5:3) Ahabw’enki turi kugamba tusyoya? Benetata abingi bakerebera ku ekigezo cona eki bari kwehanganira kiri kubakwasa kwehanganira n’ekiri kukurataho. Okwehangana nikugumya okwikiriza kwabo, bakizaho kwesiga ku Yehova ari kuba ayetegwire kubakwasa. Oko kwikiriza ni ko okuri kubakwasa kwehanganira n’ebindi bigezo ebi bari kubugana. (Shoma omuri Yakobo 1:2-4.) Omupayoniya w’omuri Alubaniya ori kwetwa Mira, akerebera ku ebizibu ebi yayehanganire byamukwasize kugumizamu kwehangana. Akagamba ku hine obu ari kutecereza ngu ni we wenka oyine ebizibu byingi. Konka bwanyima nayijuka ebintu byona ebi Yehova yamukorire omu myaka 20, rero ayegambira ati: ‘Gumizamu kwesiga Yehova. Otayikiriza ngu emyaka yona eyi wamara n’ebizibu byona ebi Yehova yakukwasize kwehanganira bife busha.’ N’iwe nobasa kutecereza oku Yehova yakukwasize kwehangana. Guma oyesige ku ari kureba oku ori kwehanganira buri kigezo cona eki ori kubugana na co kandi nayija kubikuhembera. (Mat 5:10-12) Okubonabona kwingi ku kuritandika, noyija kuba wayegire kwehangana kandi noyija kumaririra kugumizamu ori kwehangana.

9. Ni bata oku ekibina c’omuri Antiyokiya ya Siriya cayerekire esaasi?

⁹ Reba ecabireho obu Abakristo b’omuri Buyudaya babugine n’ekizibu c’enjara. Ab’omu kibina c’omuri Antiyokiya ya Siriya ku babihurire, bakagirira esaasi benetata na banyanyazi b’omuri Buyudaya. Konka nambwenu bakagira eki bakora. ‘Bakamaririra, buri muntu nk’oku yabasize, kohereza eby’okuyamba benetata ababire batwire Buyudaya.’ (Byak 11:27-30) N’obu benetata b’omuri Buyudaya babire batwire hare, Abakristo b’omuri Antiyokiya bakaba bamaririre kubakwasa.—1 Yoh 3:17, 18.

10. Ni buha buryo obu turi kubasa kwerekamu esaasi Abakristo bagenzi bitu abahikirweho ebihikirizi? (Nambwenu reba ekishushani.)

¹⁰ N’itwe nitubasa kwereka esaasi omuri obu bwire twamanya ku hine Abakristo bagenzi bitu abahikirweho n’ebihikirizi. Nitubasa kubuza abazehe yaba turi kubasa kuza kuyamba, tutanga esente z’okuyamba omurimo oguri kukorwa omu nsi yona, ninga shi tushabira abahikirweho ebihikirizi. b (Emi 17:17) Ecokureberaho: Omu mwaka gwa 2020, za komiti z’okuyamba abahikirweho ebihikirizi eziri kukira ahari 950 omu nsi yona zikatebwaho kugira ngu ziyambe abahikirweho n’egaruka z’ecorezo ca COVID-19. Abari kukora omuri ezo komiti z’okuyamba abahikirweho ebihikirizi nitubasima munonga. Benetata na banyanyazi abari kuzikoramu nibahigwa na rukundo batwarira abahikirweho ebihikirizi eby’okubayamba by’omubiri, babafaho omu by’omwika kandi hine n’obu bari kuhunduza ninga shi bombeka amaju gabo n’Enju z’Obukama.—Geranisa na 2 Abakorinto 8:1-4.

11. Ni bata oku ebikorwa byitu by’esaasi biri kuhimbisa Tata witu ow’omu iguru?

¹¹ Twayereka esaasi abahikirweho n’ebihikirizi, abandi nibabireba. Ecokureberaho: Omu mwaka gwa 2019, omuyaga gw’amani ogwayesirwe Dorian gukashenya Enju y’Obukama ya Bahamas. Benetata ku babire bari kuhunduza eyo nju, bakashaba omwombeki otari Omuhamya wa Yehova ngu ababarire ebiri kwetengwa. Akabagambira ati: “Ninyenda kutanga . . . Ebikoreso n’abakozi. . . . Nyowe ninyenda kuyamba ekitongore canyu. Kikankora aha mutima kureba oku muri kufa ahari bagenzi banyu.” Abantu bingi omu nsi tibari kumanya Abahamya ba Yehova. Konka  abingi omuri bo nibareba ebi Abahamya ba Yehova bari kukora. Mazima twine omugisha g’okumanya ku ebikorwa byitu by’esaasi biri kubasa kutuma abantu bayenda kuba banywani ba Yehova we ‘mutungi w’embabazi’!—Efe 2:4.

12. Ni bata oku okugira esaasi omuri obu bwire kiri kutukwasa kwetegura okubonabona kwingi? (Okushururwa 13:16, 17)

¹² Ahabw’enki turije kwetenga kwereka esaasi omu bwire bw’okubonabona kwingi? Bibuli neyereka ku abariyanga kwekwatanisa omu by’obutegeki bw’egi nsi barije kubugana ebizibu, hati n’omu bwire bw’okubonabona kwingi. (Shoma omu Kushururwa 13:16, 17.) Benetata na banyanyazi nibija kwetenga obuyambi omu bi bacenire. Nimureke omu bwire obu Omugabe witu Kristo Yesu arije kucwa emanja, ashange turi kwereka esaasi kandi atwete ‘tuhungure Obukama.’—Mat 25:34-40.

13. Nk’oku biri omu Baroma 15:7, ni bata oku Abakristo b’omu kinyigana c’okubanza bayerekine rukundo?

¹³ Rukundo ni ko kamanyiso akabire kari kwereka Abakristo b’omu kinyigana c’okubanza. Konka shi kikaba nikiborobera kwereka rukundo? Reba ebyahikire aha Bakristo b’omu kibina c’omuri Roma. Abamwe omuri bo bakaba batari abayudaya abakuzire bari korobera ebiragiro bya Musa, kandi abandi bari abanyamahanga abakurire omu mbera ezitari kushushana. Abakristo bamwe bakaba bari abagaragwa, abandi bataribo kandi abandi bari bakama b’abagaragwa. Ni bata oku abo Bakristo bayerekine rukundo n’obu bakurire omu mbera ezitari kushushana? Entumwa Pawulo akabagambire ngu ‘bakirane.’ (Shoma omu Baroma 15:7.) Ni enki eki yabire ari kumanyisa? Ekigambo ekiri kuhindurwamu ngu “kwakira” nikimanyisa kukwata ge omuntu ori kumwakira ge omu ka, ninga shi ori kumworeka abanywani. Ecokureberaho: Pawulo akagambira Filemoni oku yabire arayakire Onesimo omugaragwa owabire ari kuhunga ati: ‘Omwakire ge.’ (Film 17) Kandi Purisikila na Akura bakakira Apolo, owabire ari kumanya ebintu bice ebiri kukwata aha Bakristo ‘bari kumutwara owabo.’ (Byak 18:26) Omu mwanya g’okwikiriza ngu ebi batanireho bitume bayecwamu ebicweka, bakakirana ge.

14. Ni bata oku Anna n’omushija weye bayerekire rukundo?

¹⁴ N’itwe nitubasa kwereka rukundo benetata na banyanyazi ngu babe banywani bitu. Eco nikija kutuma na bo batwereka rukundo. (2 Kor 6:11-13) Reba ebyahikire ahari Anna n’omushija weye. Bwanyima y’okumara obwire buce batandikire omurimo gwabo musya g’obumishonari omu burengerwizoba bwa Afurika, ecorezo ca COVID-19 kikatandika. Bakaba batari kubasa kubugana ab’omu kibina ca bo kisya amisho aha gandi. Ni bata oku bayerekire ab’omu kibina rukundo? Bakakoresa oburyo bwa vidiyo bari kuganira na benetata na banyanyazi kandi babagambira ku bari kwendera kimwe kubamanya ge. Benetata na banyanyazi bikabakora aha mutima kandi na bo baguma bari kubaterera kandi bari kubahandikira obutumwa. Ahabw’enki ogo mushija n’omukazi batireho amani? Anna akagamba ati: “Ebikorwa bya rukundo ebi batwerekire nyowe n’ab’omu ka yange omu bwire burungi n’omu bwire bubi bikankora aha mutima byatuma nanye nayenda kukwasa abandi.”

15. Ni enki eki wayegera aha c’okureberaho ca Vanessa aha bikwatirine n’okukunda benetata na banyanyazi bona? (Nambwenu reba ekishushani.)

¹⁵ Abingi omuri itwe turi omu bibina ebirimu benetata na banyanyazi abakurire omu mbera ezitari kushushana kandi bine emicwe etari kushushana. Nitubasa kukizaho kubereka rukundo bona turi kuta omutima aha micwe yabo  mirungi. Omunyanyazi ori kwetwa Vanessa, ori kukorera omurimo omuri Niyuzilandi, kikaba nikimugumira kugira obunywani n’ab’omu kibina ceye. Konka bwanyima akasharamu kumarana obwire n’ababire bine emicwe eri kumugwisa kubi. Eco kikatuma yabarebamu emicwe eyatumire Yehova yabakunda. Akagamba ati: “Kwiha omushija wange yaba omureberezi ori kutayayira ebibina, nitubugana na benetata na banyanyazi bingi abine emicwe etari kushushana kandi nikinyorobera kugirana obunywani na bo. Hati ninkunda abantu abine emicwe etari kushushana. Kandi na Yehova ni co ari kukunda ahakuba akatubuganisiza omu muryango gweye ogurimu abantu b’emiringo yona.” Twayega kureba abandi nk’oku Yehova ari kubareba, nituba twayereka ku nitubakunda.—2 Kor 8:24.

16. Ahabw’enki rukundo erije kwetengwa munonga omu bwire bw’okubonabona kwingi? (Nambwenu reba ekishushani.)

¹⁶ Nitwija kwetenga rukundo omu bwire bw’okubonabona kwingi. Mbwenu shi okubonabona kwingi ku kuritandika, ni nkahe ahu turije kwiha oburinzi? Reba eki Yehova yagambire abantu ngu bakore obu Babuloni y’omu bwire bwa kare yabire eri kwenda kucwecerezibwa. Akagamba ati: ‘Imwe bantu bange mwe, ni mwije mutahe omu bishenge byanyu, mube mwekingirinemu akanya kace, okuhisya ahu ekiniga kirahwere.’ (Isa 26:20) Oku kiri kurebeka, ebyo bigambo nibikwata n’ahabarije kuraba omu kubonabona kwingi. ‘Ebishenge’ nibibasa kuba biri kumanyisa ebibina byitu. Omu bwire bw’okubonabona kwingi, nitwija kutunga oburinzi obu Yehova ari kuturaganisa turi kuguma twine obumwe n’Abakristo bagenzi bitu. Obwe rero, tushemerire kutaho amani hati, tukerinda kwanga benetata na banyanyazi, ahobwe tukabakunda. Eco nikija kurokora amagara gitu!

17. Ni enki eki turije kubasa kukora omu kubonabona kwingi twayetegura hati?

¹⁷ ‘Izoba rya Yehova’ niryija kushasha abantu. (Zef 1:14, 15) Nangwa n’abahereza ba Yehova nibija kubugana embera zigumire. Konka ku turayetegure hati, nitwija kubirabamu tuturize kandi tukwase abandi. Nitwija kwehanganira ekigezo cona eki turije kubugana. Abakristo bagenzi bitu ku baribonabona, nitwija kukora cona eki turi kubasa tubahumurize turi kubereka esaasi kandi turi kubaha ebi bari kwetenga. Nambwenu, nitwija kuhamira ahari benetata na banyanyazi, abu turi kukunda. Yehova na we nayija kutuhemba ari kutuha ekiconco c’amagara agatahwaho omu nsi erije kuba etarimu obusaasi n’okubonabona.​—Isa 65:17.