EKICWEKA C’OKWEGA 31
Muhame, mutatengesibwa!
‘Muhame, mureke kunyiganyigibwa.’—1 KOR 15:58.
ECESHONGORO CA 122 Muhame, Mutatengyetsibwa!
EMPINYE a
1-2. Ni bata oku Omukristo ari kubasa kuba nk’enju ndigwa? (1 Abakorinto 15:58)
OMU mwaka gwa 1978, ecombeko kiringwa munonga kikombekwa omu tawuni ya Tokyo omuri Japani. Abakirebire bakebuza yaba cabire kirije kugumaho ahabw’okuba omuri eyo tawuni hakaba hari kukunda kubamu emisisa. Mbwenu shi ni riha ibanga eri eco combeko cabire kine? Abombeki bakacombeka kigumire munonga kandi kitari kubasa kushenyuka ahabw’omusisa. Abakristo na bo bari nk’eco combeko. Omuri buha buryo?
2 Omukristo naba ashemerire kugumizamu kuringaniza aha bikwatirine n’emisinge yeye n’aha kubuganisa n’embera. Ashemerire kuguma ahamire kandi atari kutengesibwa byahika aha korobera Yehova n’emisinge yeye. (Shoma omu 1 Bakorinto 15:58.) Naba ‘ayetegwire koroba’ kandi tari kuronda orwekwaso. Konka nambwenu naba ashemerire ‘kuringaniza’ byaba biri kwetengwa. (Yak 3:17) Omukristo ori kumanya kuringaniza, nikimukwasa kwerinda kugumya ebintu munonga. Omuri eki kicweka twaza kushwijuma oku turi kubasa kuba abantu abari kuruga ah’izima. Nambwenu twaza kushwijuma ebintu bitano ebi Sitane ari kukoresa kugira ngu atume tutaguma tuhamire kandi twege n’oku turi kubasa kubyerinda.
NI BATA OKU TURI KUBASA KUGUMA TUHAMIRE?
3. Ni biha biragiro ebi Omuhiwebiragiro Mukuru yatuhire ebiri omu Byakozirwe 15:28, 29?
3 Ahabw’okuba Yehova ari Omuhiwebiragiro Mukuru nakora cona ekiri kubasika kugira ngu abahereza beye babishoborocerwe ge. (Isa 33:22) Ecokureberaho: Akakiko k’Abarisa k’omu kinyigana c’okubanza kakereka oburyo bushatu obu Abakristo bashemerire kuguma bahamiremu: (1) bari kwerinda kuramya ebishushani ahobwe baramya Yehova kusha, (2) bari kuha ekitinisa eshagama, kandi (3) bari kugendera aha misinge ya Yehova y’okwerinda obushambani. (Shoma omu Byakozirwe 15:28, 29.) Ni bata oku Abakristo b’omuri obu bwire bari kubasa kuguma bahamire omuri ebyo bintu bishatu?
4. Ni bata oku turi kubasa kuramya Yehova wenka? (Okushururwa 4:11)
4 Nitwerinda kuramya ebishushani turamya Yehova wenka. Akaragira Abisirayeli ku babire bashemerire kumuramya wenka. (Bir 5:6-10) Kandi obu Sitane yagerize Yesu, Yesu akamugambira ku tushemerire kuramya Yehova wenka. (Mat 4:8-10) Obwe rero, titushemerire kuramya ebishushani by’amadini. Nambwenu tituri kuramya abantu bakuba abebembezi b’amadini abategeki ninga ba ruranganwa omu mizano n’omu by’okweshemeza turi kubakwata nka ba ruhanga. Tushemerire kuhamira aha rubaju rwa Yehova kandi tuhamira aha ‘muhangi w’ebintu byona’ wenka.—Shoma omu Kushururwa 4:11.
5. Ahabw’enki turi korobera ekiragiro ca Yehova ekiri kukwata aha magara n’eshagama?
5 Nitworobera ebiragiro bya Yehova ebiri kukwata aha magara n’eshagama. Ahabw’enki? Ni ahabw’okuba Yehova akagamba ku eshagama eri kugeranisa amagara kandi ku ni ekiconco c’omuhendo eki yatuhire. (Lev 17:14) Yehova ku yayikiririze abantu ngu barye enyama z’enyamishwa akabazibira kurya eshagama. (Kut 9:4) Akashuba yabigarukamu obu yahire Abisirayeli ebiragiro bya Musa. (Lev 17:10) Kandi akahabura Akakiko k’Abarisa k’omukinyigana c’okubanza kuragira Abakristo bona ‘kwerinda eshagama.’ (Byak 15:28, 29) N’itwe nituhama tworobera eco kiragiro twaba turi kusharamu oburyo bw’okutambirwa. b
6. Ni enki eki tushemerire kukora kugira ngu tworobere ebiragiro bya Yehova by’okwerinda obushambani?
6 Nitworobera ebiragiro bya Yehova ebikwatirine n’okwerinda obushambani. (Heb 13:4) Pawulo akakoresa engambo y’ekigeraniso yatuha obuhabuzi bw’‘okwita’ eby’ensi ebiri omu ngingo zitu, ni okugamba ebyetengo bibi by’omubiri. Nitwerinda kureba ninga shi kukora ekintu eki ari co cona ekiri kubasa kutuma twagwa omu kibi c’obushambani. (Kol 3:5; Yob 31:1) Twabugana ekigezo nituhika turi kwerinda ebitecerezo ninga shi ebikorwa ebiri kubasa kushisha obunywani bwitu na Ruhanga.
7. Ni enki eki tushemerire kumaririra kukora kandi shi ahabw’enki?
7 Yehova nayenda ngu ‘tumworobere tubyihire aha mutima.’ (Rom 6:17) Obuhabuzi obu ari kutuha burijo nibutugasira kandi tituri kubasa kubuhinduraho na kace. (Isa 48:17, 18; 1 Kor 6:9, 10) Nitumaririra kushemeza Yehova kandi twereka emitwarize nk’ey’omuhandiki wa zaburi owagambire ngu: ‘Ntire omutima gwange aha korobera ebiragiro byawe ebi watireho, ebiro byona okuhisya aha muheru.’ (Zab 119:112) Konka Sitane nayenda kutucwa entege. Ni gaha magezi agu ari kukoresa?
NI BATA OKU SITANE ARI KUGEZAHO KUTUCWA ENTEGE?
8. Ni bata oku Sitane ari kukoresa okuhiganisibwa omu kutucwa entege?
8 Okuhiganisibwa. Sitane nakoresa ebitero by’aha mubiri n’eby’omu nyehurira kugira ngu atucwe entege. Naba ari kwenda kutunshocobera kugira ngu ashishe obunywani bwitu na Yehova. (1 Pet 5:8) Abakristo b’omu kinyigana c’okubanza bakatinatinisibwa, baterwa enkoni kandi bayitwa ahabw’okuba babire bamaririre kuguma bari abesigwa. (Byak 5:27, 28, 40; 7:54-60) Sitane acakoresa okuhiganisibwa n’omuri obu bwire. Eco nitukirebera aha ku benetata b’omuri Burusiya n’ab’omu gandi mahanga bari kutwarizibwa kubi, n’okuhiganisibwa okuri kubasa kutuhikaho.
9. Gamba ecokureberaho ekiri kwereka oku turi kubasa kwerinda amagezi g’okutugemesereza.
9 Okugemeserezibwa. Okongera aha kuhiganisibwa nambwenu Sitane nakoresa ‘amagezi’. (Efe 6:11) Reba ecokureberaho ca mwenetata ori kwetwa Bob owatwirwe omu irwariro ari kwenda kubagwa. Akagambira badokita ku oku byakugenda kona hatariho embera eziri kubasa kutuma yayikiriza kuterwa eshagama. Omudokita owabire ari kwenda kumubaga akikiriza eyo nsharamu yeye. Konka omu kiro ecabandize okubagwa kwa Bob ondijo mudokita akamutayayira ab’omu ka yeye bamara kutaha. Akagambira Bob ku babire bataramutere eshagama konka ku babire baragite hihi kugira ngu bije kugikoresa byayetengwa. Ogo mudokita akaba ari kutecereza ku Bob yabire ari kubasa kuhindura ensharamu yeye ahabw’okuba ab’omu ka yeye babire batariho. Konka Bob akahamira aha nsharamu yeye ari kugamba ku atari kubasa kwikiriza kuterwa eshagama oku byakugenda kona.
10. Ahabw’enki emitecerereze y’abantu eri kubasa kutugiraho engaruka mbi? (1 Abakorinto 3:19, 20)
10 Emitecerereze y’abantu. Twareba ebintu nk’oku abantu bari kubireba nibibasa kutuma twayehuzya emisinge ya Yehova. (Shoma omu 1 Bakorinto 3:19, 20.) ‘Obwenge bw’egi nsi’ nibutuma abantu bagomera Ruhanga. Abakristo bace b’omu kibina ca Perugamo n’ab’omuca Suwatira bakagira emitecerereze y’abantu ababire babetorwire y’okuramya ebishushani n’okukora ebikorwa by’obushambani. Yesu akabaha obuhabuzi obutarabire aha rubaju ahabw’okwikiriza ebyo bikorwa by’obushambani. (Kush 2:14, 20) N’itwe omuri obu bwire abantu nibabasa kutugema kureba ebintu nk’oku bari kubireba. Abanyabuzare bitu n’abanywani bitu nibabasa kutubihabiha kandi batuhiga kwehuza emisinge ya Yehova. Ecokureberaho: Nibabasa kutugambira ku kitine nshonga kukora ebikorwa by’obushambani kandi batugambira ku emisinge ya Bibuli eyi turi kukuratiza etacari aha murembe.
11. Kugira ngu tugume tuhamire ni enki eki tushemerire kwerinda?
11 Hine obu turi kubasa kutecereza ku obuhabuzi obu Yehova ari kutuha butari kumara. Nambwenu nitubasa n’okugezibwa ‘kurenga aha byahandikirwe.’ (1 Kor 4:6) Eco ni co eki abebembezi b’omu bwire bwa Yesu babire bari kukora. Bakaba nibeyongereraho ebiragiro byabo, kandi ebyo bikaba nibibera rubanda omutwaro. (Mat 23:4) Yehova natuha obuhabuzi oburi kuhurirwa ge birabire omu Kigambo ceye n’aha kitongore ceye. Nituba tutashemerire kongera aha biragiro ebi ari kutuha. (Emi 3:5-7) Obwe rero titushemerire kurenga aha bihandikire omuri Bibuli ninga shi kuteraho Abakristo bagenzi bitu ebiragiro aha bizibu byabo bwite.
12. Ni bata oku Sitane ari kukoresa oburyarya obutine mugasho?
12 Oburyarya. Sitane nakoresa oburyarya obutine mugasho n’eby’okubanza by’omuri egi nsi omu kuhabisa abantu n’omu kubacwamu ebicweka. (Kol 2:8) Omu kinyigana c’okubanza ebyo bikaba biri kutwariramu za filozofiya ezegamire aha bitecerezo by’abantu, enyegesa z’Abayudaya ezitari omu byahandikirwe n’enyegesa eri kugamba ku Abakristo bashemerire kugumizamu kugendera aha biragiro bya Musa. Ebyo bikaba biri oburyarya ahabw’okuba bikaba nibituma abantu batata omutima aha burugo bw’obwenge obwa buzima, ni okugamba Yehova. Omuri obu bwire, Sitane nakoresa ebinyamakuru n’embuga z’okuganiriraho omu kujanjaza ebishuba n’amakuru agatahikire agari kugambwa n’abategeki. Eco tukacerebera omu bwire bw’ecorezo ca COVID-19. Abahamya ba Yehova abahurikize obuhabuzi obu twahirwe n’ekitongore kitu kikabarinda kwemereza omutima okwabire nikuhika aha bantu ababire nibahurikiza amakuru agatahikire.—Mat 24:45.
13. Ahabw’enki tushemerire kwerinda ebiri kutuhuzya?
13 Ebiri kutuhuzya. Tushemerire kuguma kufa aha ‘bintu by’omugasho kukira ebindi.’ (Fil 1:9, 10) Ebiri kutuhuzya nibibasa kututwarira obwire bwitu bituma tutafa aha bintu ebitwinire omugasho. Ebintu ebishangirwe nk’okurya, okunywa , okweshemeza, n’emirimo nibibasa kutuhuzya twaba ari byo twata omu mwanya g’okubanza. (Luk 21:34, 35) Nambwenu nitukira kuhurira amakuru agari kukwata aha by’okwesharinga n’aha by’obutegeki. Titushemerire kwikiriza ngu ebiganiro nk’ebyo bitushishire obwire. Twaba tutakikozire nitubasa kutandika kugwera orubaju omu bitecerezo byitu n’omu mutima gwitu. Sitane nakoresa oburyo nk’obwe obu twagamba ah’iguru kugira ngu atume twacweka entege tureke kukora ebirungi. Reka turebe oku turi kubasa kwerinda ago magezi geye tukaguma tuhamire.
NI BATA OKU TURI KUBASA KUGUMA TUHAMIRE?
Kugira ngu ogume ohamire guma otekecereze aha kweha Yehova kwawe n’okubatizibwa, oyeyegese ekigambo ca Ruhanga kandi okitecerezeho, ogire omutima oguhamire kandi oyesige Yehova (Reba paragurafu ya 14-18)
14. Ni kiha kintu ekiri kubasa kutukwasa kugumizamu tuhamire aha rubaju rwa Yehova?
14 Guma otecereze aha ku wayehire Yehova n’aha kubatizibwa kwawe. Okatera ezo ntabwe ahabw’okuba okaba ori kwenda kuguma aha rubaju rwa Yehova. Guma otecereze aha nshonga ezatumire wayikiriza ku wabona amazima. Okamanya amazima agari kukwata ahari Yehova kandi wagumizamu kumuha ekitinisa n’okumukunda nka Sho w’omu iguru. Eco kikatuma wagira okwikiriza kandi catuma wayehana. Okamaririra kwerinda kukora ebibi kandi wamaririra kubaho ori kukora ebi Ruhanga ari kwenda. Okahumurizibwa n’okumanya ku Ruhanga ari kusaasira abyihire aha mutima. (Zab 32:1, 2) Okatandika kwekwatanisa omu nterane kandi watandika n’okugambira abandi ebintu birungi ebi wayegire. Ahakuba wayehire Yehova kandi okabatizibwa, hati orimu kugendera omu muhanda oguri kutasya aha magara kandi okamaririra kugugumamu.—Mat 7:13, 14.
15. Ni bata oku turi kugasirwa twayeyegesa kandi tukatecereza ahabi twayega?
15 Guma oyeyegese Ekigambo ca Ruhanga kandi okitecerezeho. Nk’oku ekiti kiri kuguma kihamire caba kine emizi miringwa, nitubasa kuguma tuhamire okwikiriza kwitu kwaba kusingire emizi omu Kigambo ca Ruhanga. Oku ekiti kiri kukura ni ko n’emizi yaco eri kuhika hare kandi eba myingi. Ku turi kweyegesa kandi tukatecereza aha bi twayega nitugumya okwikiriza kwitu kandi kituhamiza ku oburyo obu Ruhanga ari kukoramu ebintu aribwo obuhikire. (Kol 2:6, 7) Guma otecereze aha ku Yehova yagenzire ari kuhabura abahereza beye b’omu bwire bwa kare kandi ari kubarinda. Ecokureberaho: Ezekiyeli akakuratana ayetonzire obu marayika yabire ari kupima hekalu eyi yabwine omu korekwa. Oko korekwa kukagumya Ezekiyeli kandi nikutwegesa amashomo g’omugasho aha bikwatirine n’oku turi kubasa kugumizamu kugendera aha misinge ya Yehova eri kukwata aha kuramya okwa amazima. (Ezek 40:1-4; 43:10-12) N’itwe nibitugasira twayeyegesa ebintu bigumire by’omu Kigambo ca Ruhanga kandi tukabitecerezaho.
16. Ni bata oku omutima guhamire gwarinzire Bob? (Zaburi 112:7)
16 Gira omutima oguhamire. Omugabe Dawudi akagamba aha ku yabire arije kuhamira ahari Yehova ari kweshongora ati: ‘Omutima gwange gugumire ayi Ruhanga.’ (Zab 57:7) N’itwe nitubasa kugira omutima gugumire turi kwesigira kimwe Yehova. (Shoma omuri Zaburi ya 112:7.) Reba oku ebyo byakwasize Bob owu tugambireho. Ku bamugambire ngu eshagama baza kuyita hihi kugira ngu bije kuyimutera cayetegwa akahika ari kubagarukamu ku bagiresire yabire arahike ari kuruga omuri eryo rwariro. Bwanyima Bob akagamba ngu: “Nkaba maririre kuteziringa kandi ebyo bikatuma ntayemereza omutima.”
Twagira okwikiriza kugumire nikibasa kutuma twaguma tuhamire omu bigezo byona ebi turi kubasa kubugana oku byakuba biri kona (Reba paragurafu ya 17)
17. Ni enki eki turi kwegera aha byahikire ahari Bob? (Nambwenu reba ekishushani.)
17 Bob akaguma ahamire ahabw’okuba yakozire ensharamu mbere y’okuza aha irwariro. Ecokubanza, akaba ayine ecetengo c’okushemeza Yehova. Ecakabiri, akaba yashomire ayetonzire aha ki Bibuli n’ebitabo byitu ebyegamire ahari Bibuli biri kugamba aha bikwatirine n’amagara n’eshagama. Ecakashatu, akaba ari kwesiga ku kukuratiza obuhabuzi bwa Yehova biri kuturetera emigisha etari kuhwaho. N’itwe nitubasa kuguma twine omutima oguhamire omu bigezo ebi twakuba turi kubugana byona.
Baraki n’abashija beye bari kwiruka aha basirikare ba Sisera bine obumanzi (Reba paragurafu ya 18)
18. Ecokureberaho ca Baraki nikitwewgesa ki aha bikwatirine n’okwesiga Yehova? (Reba ekishushani c’aha kishembeso.)
18 Guma oyesige Yehova. Reba oku Baraki yasingwire ahabw’okwesiga Yehova. N’obu omu ihanga rya Isirayeli habire hatarimu amahe agari kumara kandi batine ebirwaniso, Yehova akashaba Baraki kuza kurwanisa omukuru wamahe ga Abanyakanani ori kwetwa Sisera owabire oyine amahe gagumire. (Bar 5:8) Omuhanuzi kazi Debora akashaba Baraki kuza kubuganira na Sisera omu kibaya owabire ayine ebigari by’orutaro 900. N’obu cabire kiragumire baraki kurwana n’abantu ababire bine ebyo bikoreso n’ebyo bigari, akoroba. Abo basirikare ku bashumire omushozi gwa Tabora Yehova akagwisa enjura nyingi eyarugire omu iguru. Ebigare bya Sisera bikatobera omu byondo rero Yehova yatuma Baraki yasingura. (Bag 4:1-7, 10, 13-16) Ni co kimwe Yehova nayija kutuma twasingura twamwesiga kandi tukorobera obuhabuzi obu turi kuhebwa n’abu ari kukoresa.—Bir 31:6.
MARIRIRA KUGUMA OHAMIRE
19. Ahabw’enki ori kwenda kuguma ohamire?
19 Nitwija kushabwa kuguma kutaho amani kugira ngu tugume tuhamire omu bwire bwona obu tucari omuri egi nsi mbi. (1 Tim 6:11, 12; 2 Pet 3:17) Nimureke tumaririre kwerinda kutengesibwa n’okuhiganisibwa, okugemeserezibwa, ebitecerezo by’abantu, oburyarya, n’ebiri kutuhuzya. (Efe 4:14) Omu mwanya gw’eco, nimureke tugume tuhamire turi kuramya Yehova wenka kandi turi korobera ebiragiro byeye. Konka obumwe nituba tushemerire kuringaniza. Omu kicweka ekiri kukurataho, nitwija kureba oku Yehova na Yesu bari ecokureberaho ekihikire aha bikwatirine n’okuringaniza.
ECESHONGORO CA 129 Nitwija Kugumizamu Nitugumisiriza
a Kwiha omu bwire bwa Adamu na Eva, Sitane akagezaho kuta omu bantu ekitecerezo c’oku bari kubasa kweshariramu ekirugi n’ekibi. Nayenda ngu tugire emitecerereze nk’eyo aha bikwatirine n’ebiragiro bya Yehova n’aha buhabuzi obu turi kuhebwa birabire omu kitongore. Eki kicweka caza kutukwasa kumanya oku turi kubasa kwerinda omwika gw’egi nsi ya Sitane g’okwetegeka kandi kitukwase kuguma tuhamire aha rubaju rwa Yehova.
b Kugira ngu omanye oku Omukristo ari kubasa korobera ekiragiro ca Ruhanga ekikwatirine n’eshagama, reba ishomo rya 39 omu kitabo Shemerererwa amagara ebiro byona!