EKICWEKA C’OKWEGA 37
Guma orondere obuyambi ahari Yehova nka Samusoni
‘Ayi Yehova Ruhanga, ninkweshengereza nyijuka, ompe amani.’—BAR 16:28.
ECESHONGORO CA 30 Taata, Ruhanga Kandi Munywani Wangye
OMU BIGAMBO BIGUFU a
1-2. Ahabw’enki enkuru ya Samusoni eshemerire kutushemeza?
NI ENKI ekiri kukwija omu mutwe wahurira izina Samusoni? Nobasa kuhika ori kutecereza omushija w’amani mingi munonga. Kandi ni ko kiri. Konka Samusoni akakora ensharamu eyatumire yagira obusaasi. Konka na bwo, Yehova akata omutima aha bwesigwa obu Samusoni yamazire emyaka myingi ari kwereka, kandi yabita omuri Bibuli kugira ngu bitugasire.
2 Yehova akakoresa Samusoni kugira ngu ahikirize ebintu byingi ari kuyamba abantu abu yatorine, ari bo Abisirayeli. Hahwire ebinyigana byingi Samusoni afire, Yehova akahumecera entumwa Pawulo yata izina rya Samusoni omu bantu ababire bine okwikiriza kuhamire. (Heb 11:32-34) Ecokureberaho ca Samusoni nikibasa kutugumya. Akarondera obuyambi ahari Yehova n’omu bwire obu yabire ari kuraba omu mbera zigumire. Reka turebe oku ebyahikire ahari Samusoni biri kubasa kutugumya n’amashomo agu turi kubasa kwegera aha cokureberaho ceye.
SAMUSONI AKABA NAYESIGA YEHOVA
3. Ni guha murimo ogu Samusoni yatungire?
3 Omu bwire obu Samusoni yazarirwemu, Abafilisitiya bakaba bari kutegeka ihanga rya Isirayeli kandi bari kubatwariza kubi. (Bar 13:1) Obutegeki bwabo bubi bukatuma Abisirayeli babonabona munonga. Yehova akatorana Samusoni kugira ngu ‘ajune Abisirayeli omu mikono y’Abafilisitiya.’ (Bar 13:5) Mazima ogo gukaba guri omurimo ogutorobi! Kugira ngu Samusoni ahikirize ogo murimo ogwabire gutorobi, akaba ashemerire kurondera obuyambi ahari Yehova.
Samusoni akaba nayesiga Yehova kandi akaba nabuganisa n’embera. Akakoresa eki yabwire hihi yeye omu kuhikiriza eki Ruhanga ari kwenda (Reba paragurafu ya 4-5)
4. Ni bata oku Yehova yakwasize Samusoni omu kusingura Abafilisitiya? (Abaramuzi 15:14-16)
4 Reba ecokureberaho ekiri kwereka oku Samusoni yayesigire Yehova kandi akesiga obuyambi obu yamuhire. Izoba rimwe, amahe g’Abafilisitiya gakaza kukwata Samusoni omuri Lehi, kandi ebihamya nibyereka ku habire hari omuri Buyudaya. Abashija b’omuri Buyudaya bakaba batinire munonga basharamu kuhayo Samusoni omu mikono y’abangi babo. Bakabohesa Samusoni emirunga bamutwarira Abafilisitiya. (Bar 15:9-13) Konka, ‘omwika gwa Yehova gukamwijaho n’amani’ yacwa eyo mirunga. Bwanyima ‘akagwa ah’igufwa ry’omushaya gw’endogoya,’ yarikwata, yarikoresa omu kwita Abafilisitiya 1,000!—Shoma omu Baramuzi 15:14-16.
5. Kuba Samusoni yakoresize igufa ry’omushaya gw’endogoya nicereka kita ku yabire ari kwesigira kimwe Yehova?
5 Ahabw’enki Samusoni yakoresize igufa ry’omushaya gw’endogoya? Ti co ekikoreso eki abantu babire bari kukoresa bari kurwana! Hatariho okubanganisa, Samusoni akaba namanya ku Yehova ari we owabire namukwasa, ku atari ekikoreso eki yakoresize. Ogo mushija w’omwesigwa akakoresa cona eki yabwine hihi yeye omu kuhikiriza eki Yehova ari kwenda. Mazima, ahakuba Samusoni yabire ari kwesiga Yehova akahika ahari byingi!
6. Ni enki eki turi kwegera ahari Samusoni omu bwire obu turi kuba twine emirimo omu kibina?
6 N’itwe Yehova nabasa kutuha amani tuhikiriza emirimo eri kurebeka nk’etorobi. Eco Ruhanga nabasa kukikora omu buryo obu tutari kutecereza. Obwe rero, guma oyesige ku Yehova owahire Samusoni amani arije kukukwasa kukora ebi ari kwenda, ahakuba noyija kuba ori kumuronderaho obuyambi.—Emi 16:3.
7. Ni kiha cokureberaho ekiri kwereka omugasho g’okurondera obuyambi ahari Yehova?
7 Benetata na banyanyazi bingi abayekwatanisize omu kombeka amaju g’ekitongore bakereka ku nibesiga Yehova. Omu bwire bwa kare, benetata bakaba nibakunda kombeka amaju masya g’Obukama n’ebindi byombeko. Konka bwanyima, abagizire ekitongore ca Yehova bakakizaho kweyongera rero twagira ebi twahinduramu. Benetata abine obujunanizibwa bakarondera ahari Yehova obuhabuzi, bagezaho kukoresa oburyo busya, harimu okugura amaju n’okugahunduza. Robert owamara emyaka myingi ari kombeka Amaju g’Obukama omu nsi yona akagamba ati: “Omu kubanza abamwe kikabagumira kumanyira obwo oburyo busya.” Akagumizamu ari kugamba ati: “Bikaba nibitanira kimwe n’ebi twabire twamara emyaka myingi turi kukora. Konka abo benetata bakaba betegwire kugenda n’empinduka kandi ebihamya nibyereka ku Yehova ari kuha emigisha ezo mpinduka.” Eki ni ecokureberaho kimwe ekiri kwereka oku Yehova ari kuhabura abahereza beye omu kuhikiriza ebi ari kwenda. Burijo, twena tushemerire kuguma turi kwebuza ngu: ‘Mbehi ndimu kurondera ahari Yehova obuhabuzi kandi ngenda n’empinduka eziri kubaho omu murimo ogu ndi kumukorera?’
SAMUSONI AKAKORESA GE EBI YEHOVA ARI KUTUHA
8. Ni enki eki Samusoni yakozire izoba rimwe obu yagizire iriho?
8 Nobasa kuba washomireho ezindi nkuru eziri kwereka oku Samusoni yakozire ebintu ebiri kutangaza. Izoba rimwe akatagagura entare kandi yayita abashija 30 omu tawuni y’Abafilisitiya ya Ashikeloni. (Bar 14:5, 6, 19) Samusoni akaba namanya ku yabire atari kubasa kukora ebyo bintu Yehova atamukwasize. Eco kikarebeka obu izoba rimwe yayitirwe iriho bwanyima y’okwita Abafilisitiya 1,000. Ni enki eki yakozire? Omu mwanya g’okwerwanaho, akashaba Yehova obuyambi.—Bar 15:18.
9. Ni bata oku Yehova yagarukiremu okutaka kwa Samusoni? (Abaramuzi 15:19)
9 Yehova akagarukamu okutaka kwa Samusoni ari kumuha amizi g’omugera omu buryo bw’ecokutangaza. Ku yamazire kuganywa, ‘omutima gukamugaruka omu nda, yagarurwamu amani.’ (Shoma omu Baramuzi 15:19) Ogo mugera nigubasa kuba gwabire gucariho obu omuhanuzi Samweli yahumekirwe akahandika ekitabo c’Abaramuzi. Abisirayeli ku babire nibareba ogo mugera kikaba nikibijusa ku abahereza ba Yehova bamuronderaho obuyambi ari kububaha omu bwire obuhikire.
Samusoni akatunga amani ku yamazire kunywa amizi agu Yehova yamuhire. N’itwe twakoresa ge ebi Yehova yatuhire, nituhama omu by’omwika (Reba paragurafu ya 10)
10. Mbehi okurondera obuyambi ahari Yehova nikitwariramu enki? (Nambwenu reba ekishushani.)
10 N’itwe ebiconco ninga obushoborozi ebi twakuba twine byona ninga shi hine ebi twahikireho omu murimo gwa Yehova, tushemerire kumuronderaho obuhabuzi. Tushemerire kwijuka ku turi kubasa kuhika aha bintu byingi twarondera obuyambi ahari Yehova. Nk’oku Samusoni yatungire amani ku yanywire amizi agu Yehova yamuhire, n’itwe nitubasa kuhama omu buryo bw’omwika twakoresa ge ebintu byona ebi Yehova ari kutuha.—Mat 11:28.
11. Ni bata oku turi kubasa kukoresa ge ebi Yehova ari kutuha? Gamba ecokureberaho.
11 Reba ecokureberaho ca mwenetata omwe w’omuri Burusiya orikwetwa Aleksey, ori kuhiganisibwa munonga. Ni enki ecamukwasize kwehangana omuri ezo mbera ezigumire? We n’omukazi weye bakagira entebekanisa ndungi y’eby’omwika. Akagamba ati: “Nkagezaho kuguma nyine entebekanisa ndungi y’okweyegesa Bibuli n’okuyishoma burizoba. Buri kasheshe nyowe n’omukazi wange nitushwijuma ecahandikirwe ca burizoba turi hamwe kandi tushabire hamwe.” Eco nikitwegesa ki? Omu mwanya g’okweyesiga, tushemerire kurondera obuyambi ahari Yehova. Ni bata oku turi kubasa kukikora? Nitubasa kukikora turi kugumya okwikiriza kwitu birabire omu kugira entebekanisa ndungi y’okweyegesa Bibuli n’okwekwatanisa omu bindi bikorwa bya kitewokurasi. Yehova na we nayija kukuha emigisha ahabw’amani agu ori kutaho kugira ngu omukorere. Akaha Samusoni amani kandi n’iwe buzima nayija kugakuha.
SAMUSONI TARACWEKIRE ENTEGE
12. Ni eha nsharamu mbi eyi Samusoni yakozire, kandi shi ekaba netanira nkahe n’eyi yabire yakozire?
12 Samusoni akaba atahikirire nk’itwe, obwe rero obumwe akaba nakora ensharamu mbi. Ensharamu emwe eyi yakozire ekamugiraho engaruka mbi munonga. Samusoni ku yamazire obwire buce ari omuramuzi ‘akakundana n’omukazi w’omu kibaya ca Soreki owabire nayetwa Delila.’ (Bar 16:4) Konka, Samusoni akaba yatasine n’omukazi w’Omufilisitiya, ahakuba ekaba eri ‘enama ya Yehova’ kugira ngu ‘abone oburyo bw’okurwanisa Abafilisitiya.’ Bwanyima, Samusoni akatura omu nju ya maraya omu tawuni y’Abafilisitiya ya Gaza. Ahari eryo zoba Ruhanga akaha Samusoni amani g’okukura enzingi z’orurembo omu kurwanisa eyo tawuni. (Bar 14:1-4; 16:1-3) Konka ebyo bikaba biri kutana n’oku yakunzire Delila ahakuba we nabasa kuba yabire ari Omwisirayeli.
13. Ni bata oku Delila yatumire Samusoni yagwa omu kabi?
13 Delila akikiriza esente nyingi ezi Abafilisitiya bamuhire kugira ngu agambanire Samusoni. Mbwenu shi rukundo eyi yabire ari kukunda Delila ni yo eyamuhumize amisho atamanye eki Delila yabire ariho? Oku byakuba biri kona, Delila akaguma ari kugema Samusoni ngu amugambire oburugo bw’amani geye, kandi akahika aho yabimugambira. Ekiri kushasha, akikiriza kuza omu mbera ezatumire yaferwa amani geye kandi yamara obwire Yehova atari kumwikiriza.—Bar 16:16-20.
14. Ni ziha ngaruka ezahikire ahari Samusoni ahabw’okwesiga Delila?
14 Samusoni akahikwaho n’engaruka mbi ahabw’okwesiga Delila omu mwanya g’okwesiga Yehova. Abafilisitiya bakakwata Samusoni bamwihamu amisho. Akasibirwa omuri Gaza ahu yabire yashwarize abantu baho, rero bamuhindura busha. Bwanyima bakareta Samusoni aha bugenyi obu babire bine. Nambwenu bakatambira ebitambo ruhanga wabo w’ebishuba ori kwetwa Dagoni bari kutecereza ku ari we owabire ahireyo Samusoni omu mikono yabo. Bakiha Samusoni omu kihome bamureta omuri eyo mbaga kugira ngu ‘abazanire.’—Bar 16:21-25.
Yehova akaha Samusoni amani g’okurwanisa Abafilisitiya (Reba paragurafu ya 15)
15. Ni bata oku Samusoni yayerekire ku yashuba kurondera aha Yehova obuyambi? (Abaramuzi 16:28-30) (Reba ekishushani c’aha kishembeso.)
15 Samusoni akakora enshobe y’amani, konka taracwekire entege. Akarondesa oburyo bw’okuhikiriza omurimo ogu Ruhanga yabire amuhire g’okurwanisa Abafilisitiya. (Shoma omu Baramuzi 16:28-30.) Samusoni akashaba Yehova ati: ‘[Reka] mpore Abafilisitiya.’ Ruhanga akagarukamu eshara ya Samusoni yashuba yamuha amani. Eco kikatuma Samusoni yasingura Abafilisitiya abu yabire atakasinguragaho kwiha yabaho.
16. Ni enki eki turi kubasa kwegera aha nshobe ya Samusoni?
16 N’obu Samusoni yahikirweho n’engaruka mbi ahabw’enshobe eyi yakozire, tararekire kugumizamu kukora ebi Yehova ari kwenda. N’obu twakukora enshobe bakatuhana ninga shi tukaferwa emirimo y’omu kibina, titushemerire kuhwamu amani. Ogume oyijuke ku Yehova atari kutuhemukaho. (Zab 103:8-10) N’obu twakuba twakozire enshobe, na bwo Yehova nagumizamu kutukoresa nk’oku yakoresize Samusoni.
Samusoni akashasha ahabw’enshobe eyi yakozire, konka taracwekire entege, kandi n’itwe ni co eki tushemerire kukora (Reba paragurafu ya 17-18)
17-18. Ni bata oku ecokureberaho ca Michael cakugumya? (Nambwenu reba ekishushani.)
17 Reba ebyahikire ahari mwenetata ocari muto ori kwetwa Michael. Akaba ahugire omu bikorwa bya kitewokurasi ari omuhereza w’ekibina kandi ari omupayoniya w’obwire bwona. Ekiri kushasha, akakora enshobe eyatumire yayihwa ahari eyo mirimo y’ekibina. Akagamba ati: “Omu kubanza nkaba nintura mpugire omu murimo gwa Yehova. Konka omu kanya nk’ak’okuhumbya erisho nkashusha nk’owatomera ekisika c’amatafari. Nkaba ntari kutecereza ku Yehova yabire arije kunsigaho, konka nkaba ninyebuza yaba nabire ndashube kugira obunywani burungi na we kandi ayongera kunkoresa nk’oku yabire nankoresa.”
18 Ekirungi ni oku Michael ataracwekire entege. Akongeraho ati: “Nkata omutima aha kongera kugira obunywani burungi na Yehova birabire omu kushaba burijo, kweyegesa n’okutecereza aha bi nayega.” Bwanyima y’obwire, Michael akashuba yatunga emirimo omu kibina. Hati ni omuzehe w’ekibina kandi ni omupayoniya w’obwire bwona. Akagamba ati: “Obuyambi obu natungire namunonga obu abazehe bampire, bukankwasa kureba ku Yehova acankunda. Hati nimbasa kukorera Yehova nyine omuntuw’omunda otari kuncwera orubanja. Ebyambireho bikanyegesa ku Yehova ari kusaasira omuntu wena ori kwehana abyihire aha mutima.” N’itwe nitubasa kwesiga ku Yehova arije kutukoresa kandi akatuha emigisha n’obu twakukora enshobe konka tukazitereza kandi tukagumizamu kurondera obuyambi ahari Yehova.—Zab 86:5; Emi 28:13.
19. Ni bata oku ecokureberaho ca Samusoni cakugaruramu amani?
19 Omuri eki kicweka, twashwijuma ebintu bice ebyahikire ahari Samusoni. Akaba atahikirire; konka taracwekire entege, na bwanyima y’okukora enshobe na Delila. Kandi Yehova na we taramusigireho. Ruhanga akashuba yakoresa Samusoni omu kukora ebintu by’amani. Yehova akaguma ari kumureba nk’omushija oyine okwikiriza kandi yamuhandikisa omu bashija b’abesigwa abari kugambwa omu Baheburayo ekicweka ca 11. Nikitushemeza kumanya ku turi kukorera Tata witu w’omu iguru oyine rukundo, ori kutuha amani na munonga omu bwire obu turi kugetenga. Nk’oku Samusoni yakikozire, nimureke tugume tutakire Yehova tuti: ‘Ninkweshengereza, nyijuka, ompe amani.’—Bar 16:28.
ECESHONGORO CA 3 Amaani Gaitu, Amatsiko Gaitu, Obwesigye Bwaitu
a Samusoni ni izina ry’omuri Bibuli eriri kumanywa n’abantu bingi, nangwa n’abatari kumanya byingi aha Byahandikirwe. Enkuru yeye nekunda kugambwa omu mizano, ebyeshongoro n’omuri za filimu. Konka ebyamuhikireho ti enkuru eri kushemeza kusha. Nitubasa kwegera byingi ahari ogo mushija owabire ayine okwikiriza.
