1. Ni bata oku Petero yayehurire Yesu ku yamukwasize kukwata ebyenyanja byingi?

 PETERO akaba yamara ekiro cona ari kuroba konka ari kukwata busha. Ekiri kutangaza, Yesu akamugambira ngu: ‘Mwirire ahagati y’enyanja, mutege obutimba bwanyu.’ (Luk 5:4) Petero akabanganisa ku yabire atarakwate ec’enyanja na kimwe, konka yakora eki Yesu yamuragira. Obwo butimba bukatandika kucweka ahabw’oburemezi bw’eby’enyanja byingi. Petero n’abu babire bari hamwe ku bamazire kureba eco cokutangaza, ‘bakatangara.’ Petero akagamba ati: ‘Ndugaho, Mukama wange, ahabw’okuba ndi omusisi.’ (Luk 5:6-9) Petero akanahurira atanahikire kuba ahu Yesu yabire ari.

2. Ahabw’enki tushemerire kushwijuma ecokureberaho ca Petero?

² Ebi Petero yagambire bikaba bihikire ahabw’okuba akaba ari ‘omusisi.’ Ebyahandikirwe nibigamba ku hine obu yabire nagamba ninga akakora ebintu bwanyima akefuza. Mbehi n’iwe hine obu ori kwehurira nka Petero? Mbehi hine omucwe ogu ori kwenda ngu obonezemu, ninga hine obweremwa obu ori kurwana nabwo? Yaba ari ko kiri, nobasa kutunga okuhumurizibwa wayegera aha cokureraho ca Petero. Bata shi? Tecereza ahari eki: Enshobe za Petero zikaba ziri kubasa kwihwa omuri Bibuli. Konka zikahandikwamu kugira ngu zitwegese. (2 Tim 3:16, 17) Ku turi kwega ebikwatirine n’obweremwa bwa Petero owabire ori kwehurira nk’oku turi kwehurira, nikibasa kutukwasa kureba ku Yehova atari kutwetegaho kuba abahikirire. Nayenda ngu tugumizemu turi kumukorera n’obu twakuba twine obweremwa.

3. Ahabw’enki tushemerire kwerinda kucweka entege?

 ³ Ahabw’enki tushemerire kugumizamu kukorera Yehova n’obu twakuba twine obweremwa? Ni ahakuba, oku turi kukizaho kukora ekintu ni ko turi kukizaho kukikora ge. Ecokureberaho: Omweshongozi nabasa kumara emyaka myingi ari kwemanyiza kuzana ecoma c’omuziki. Omuri obwo bwire nabasa kukora enshobe nyingi, konka ku ari kugumizamu kwemanyiza, nahika aho abimanya ge. N’obu yakuba yamanyirire kutera eco coma, nabwo obumwe na bumwe nabasa kukora enshobe. Konka nabwe, tari kucweka entege. Nagumizamu kwemanyiza kugira ngu abikwate ge. Ni co kimwe, n’obu twakuba turi kuhurira ku twasingwire obwiremwa, hine obu buri kubasa kushuba kutuhikaho. Konka nitugumizamu kukora cona eki turi kubasa kugira ngu tuhike aha ntego yitu. Twena hine obu turi kukora ninga tugamba ebintu bwanyima twefuza, konka twaba tutacwekire entege, Yehova nayija kutukwasa kugira entunguka. (1 Pet 5:10) Reka tushwijume ecokureberaho ca Petero ekiri kwereko oku yagumuzemu kukorera Yehova n’obu yabire ayine obweremwa. Esaasi ezi Yesu yamwerekire n’obu yabire ayine obweremwa, nizibasa kutukwasa kugumizamu kukorera Yehova.

4. Nk’oku biri omuri Luka 5:5-10, ni enki eki Petero yayegambireho kandi shi ni enki eki Yesu yamuhamize?

⁴ Ebyahandikirwe tibiri kugamba enshonga eyatumire Petero yagamba ku yabire ari ‘omusisi’ ninga ebibi ebi yabire ari kugamba. (Shoma omuri Luka 5:5-10.) Konka nabasa kuba yakozire enshobe z’amani. Yesu akaba nareba ku Petero yabire ayine obwoba, kandi ku ni co ecabire kiri kutuma yayerebe nk’otine mugasho. Nambwenu Yesu akaba ari kumanya ku Petero yabire arije kuguma ari omwesigwa. Obwe rero ni yo nshonga Yesu yagambire Petero ngu ‘atatina.’ Ahakuba Yesu yayesigire Petero, bikamukwasa omu kubaho kweye. Petero na murumuna weye Andereya bakasiga omurimo gwabo g’okuroba baba abakurasi ba Mesiya b’obwire bwona, kandi Yehova akabaha emigisha.—Mar 1:16-18.

5. Ni eha migisha eyi Petero yatungire ku yayikirize obutumire bwa Yesu?

⁵ Petero akahika ahari byingi obu yabire omukurasi wa Kristo. Akerebera Yesu ari kukiza abarwire, ari kubinga ba dayimoni kandi ari kuzora n’abafire. b (Mat 8:14-17; Mar 5:37, 41, 42) Nambwenu Petero akerebera okorekwa okuri kutangaza kwa Yesu ari Omugabe w’Obukama bwa Ruhanga kandi ebyo tarabyebirwe. (Mar 9:1-8; 2 Pet 1:16-18) Petero akareba  ebintu ebi yabire atarije kureba kuri atarabire omwegi wa Kristo. Mazima akashemererwa munonga ahabw’okuba atarikirize ngu enyehurira mbi zitume yaferwa eyo migisha!

6. Mbehi Petero akahika nasinga oburemezi bweye? Shoborora.

⁶ N’obu Petero yarebire ebyo bintu, na bwo akaba acayine obweremwa. Reka turebe embera zimwe eziri kubyereka. Obu Yesu yabire ari kushoborora oku yabire arije kushasha kandi akafa kugira ngu ahikirize obuhanuzi bw’omuri Bibuli, Petero akamuhabura. (Mar 8:31-33) Emirundi myingi, Petero n’ezindi ntumwa bakatera empaka aha bikwatirine n’omukuru omuri bo. (Mar 9:33, 34) Aha kiro ecabandize orufu rwa Yesu, Petero akatema okutu k’omushija. (Yoh 18:10) Omuri eco kiro, Petero akagira obwoba yayehakana emirundi ishatu ku atari kumanya munywani weye Yesu. (Mar 14:66-72) Eco kikatuma Petero yarira munonga.—Mat 26:75.

7. Ni guha mugisha ogu Petero yahirwe, Yesu ku yamazire kuzoka?

⁷ Yesu tarihire emikono ahari eyo ntumwa yeye eyabire ehweriremu kimwe amani. Yesu ku yamazire kuzoka, akaha Petero omugisha g’okumwereka ku namukunda. Yesu akaha Petero omurimo g’okurisa entama zeye. (Yoh 21:15-17) Petero akikiriza ogo murimo. Akaba ari omuri Yerusalemu ah’izoba rya Pantekote kandi akaba ari omu bantu abashukirweho omwika oguri kwera.

8. Ni eha nshobe y’amani eyi Petero yakorire Antiyokiya?

⁸ Na bwanyima, Petero ku yamazire kushukwaho omwika oguri kwera akaguma ari kwehanganira obweremwa bweye. Omu mwaka gwa 36 B.Y., Petero akaba ariho obu omunyamahanga owabire otashazirwe ori kwetwa Koluneriyo yashukirweho omwika oguri kwera ecarebekire ge ku Ruhanga atari kushorora kandi ku n’abanyamahanga babire bari kubasa kuba omu kibina c’Abakristo. (Byak 10:34, 44, 45) Bwanyima y’ebyo, Petero akatandika kurya n’abanyamahanga, eki yabire atari kubasa kukora mbere yaho. (Gal 2:12) Konka, bamwe omu Bakristo b’Abayudaya bakaba bari kureba ku cabire kitahikire kurya hamwe n’abanyamahanga. Bamwe omu babire bine eyo mitecerereze ku bayijire omuri Antiyokiya, Petero akemereza kurya hamwe n’Abakristo b’abanyamahanga ahabw’okutina kugwisa kubi Abakristo b’Abayudaya. Entumwa Pawulo ku yarebire obwo buryarya akahabura Petero omu misho ga bona. (Gal 2:13, 14) N’obu Petero yakozire eyo nshobe akagumizamu kukorera Yehova. Ni enki ecamukwasize?

9. Ni bata oku ebiri omuri Yohana 6:68, 69 biri kwereka obwesigwa bwa Petero?

⁹ Ahabw’okuba Petero yabire ari omwesigwa, tarikiririze ekintu cona ngu kitume yacwekera kimwe entege. Akereka ku ari omwesigwa obu izoba rimwe Yesu yagambire ekintu eki abegi beye bataracengire. (Shoma omuri Yohana 6:68, 69.) Omu mwanya g’okutegereza ngu bahurire eki Yesu yabire yaza kubashobororera, abingi bakareka kumukuratira. Konka Petero we akamuhamiraho. Akaba namanya ku Yesu ari we wenka oyine ‘ebigambo by’amagara agatahwaho.’

10. Ni bata oku Yesu yayerekire ku nayesiga Petero? (Nambwenu reba ekishushani.)

¹⁰ Yesu tarasigirireho Petero. Aha kiro c’aha muheru gw’amagara ga Yesu g’omu nsi, akaba ari kumanya ku Petero n’ezindi ntumwa babire baramusigeho. Yesu akaba namanya ku Petero yabire arashube kugira amani kandi akaba omwesigwa. (Luk 22:31, 32) Yesu akaba namanya ku ‘omutima guri kukunda konka ku omubiri guri omweremwa.’ (Mar 14:38) Obwe rero n’obu Petero yayehakine Yesu, taramusigireho. Yesu ku yamazire kuzoka, akeyereka  Petero kandi oku kiri kurebebeka Petero akaba ari wenka. (Mar 16:7; Luk 24:34; 1 Kor 15:5) Hatariho okubanganisa eco kikagumya eyo ntumwa eyabire ecwekire entege!

11. Ni bata oku Yesu yahamize Petero ku Yehova yabire arije kumukwasa?

¹¹ Yesu akahamiza Petero ku Yehova yabire arije kumukwasa. Yesu ku yamazire kuzoka akakorera Petero n’ezindi ntumwa ecokutangaza c’okukwata eby’enyanja byingi. (Yoh 21:4-6) Hatariho okubanganisa, eco cokutangaza kikereka Petero ku Yehova yabire arije kumuha ebi ari kwetenga by’omubiri. Nambwenu entumwa Petero nabasa kuba yahikire ari kwijuka ebigambo ebi Yesu yabagambire, ku Yehova arije kuha abari ‘kubanza kusherura Obukama’ ebi bari kwetenga. (Mat 6:33) Ebyo byona bikatuma Petero atafa aha murimo g’okuroba ahobwe yata omurimo g’okuburira omu mwanya g’okubanza. Akatanga toku ahizoba rya Pentekote y’omu mwaka gwa 33 B.Y., kandi yakwasa abantu bingi kwikiriza obutumwa burungi. (Byak 2:14, 37-41) Akakwasa Abasamariya n’abanyamahanga, kwikiriza Kristo. (Byak 8:14-17; 10:44-48) Mazima, Yehova akakoresa Petero, yareta abantu b’emiringo yona omu kibina.

12. Ni bata oku ecokureberaho ca Petero kiri kubasa kutukwasa twaba twine obweremwa obumazire obwire buringwa?

¹² Yehova nabasa kutukwasa kutacweka entege. Burijo nikiba kitorobi namunonga twaba turi kurwanisa obweremwa obumazire obwire buringwa. Hine obu obweremwa bwitu buri kuba bugumire kusinga obu Petero yabugine. Konka Yehova natuha amani g’okwerinda kucweka entege. (Zab 94:17-19) Ecokureberaho: Mwenetata omwe akamara emyaka myingi ari kukora ebikorwa by’obutinganyi mbere y’okwega amazima. Bwanyima akahika ari kureka ebyo bikorwa bibi. Konka hine obu ari kugira ebyetengo bibi. Ni enki ecamukwasize kutacweka entege? Akagamba ati: “Yehova natuha amani.” Nambwenu akongeraho ati: “Ahabw’omwika gwa Yehova nkega ku kugumizamu ndi omu muhanda gw’amazima kiri kubasika. Yehova nagumizamu kunkoresa kandi n’obu nyine obweremwa nagumizamu kumpa amani.”

13. Ni bata oku turi kubasa kutoreza ecokureberaho ca Petero, nk’oku biri kugambwa omu Byakozirwe 4:13, 29, 31? (Nambwenu reba ekishushani.)

¹³ Nk’oku twamara kukireba, Petero akakora enshobe ishatu z’amani ahabw’okuba yabire ari kutina abantu. Konka akashaba, yagira  obumanzi. (Shoma omu Byakozirwe 4:13, 29, 31.) N’itwe nitubasa kusingura obwoba. Reba ecokureberaho ca mwenetata Horst, owatwireho omu bwire bw’orutaro rwa kabiri rw’ensi yona omuri Jamani. Emirundi myingi, ah’ishomero bakaba nibamugema kugamba ngu, “Omucunguzi Hitler!” rero byahendera abigambire. Konka ku yabigambire abazire beye, omu mwanya g’okumujuma bakagumizamu kumushabira ahari Yehova ngu agumizemu kumuha obumanzi. Ahabw’obuyambi bwa Yehova, Horst akatandika kugira amani no kuhama. Bwanyima akerebera ku Yehova ‘ataramusigireho.’ c

14. Ni bata oku abarisa abine rukundo bari kukwasa abine obweremwa?

¹⁴ Yehova na Yesu tibaritusigaho. Petero ku yamazire kwehakana Yesu akaba ashemerire kukora ensharamu y’omugasho. Mbehi akaba arabirugemu ninga akaba aragumizemu kuba entumwa ya Kristo? Yesu akaba yashabire Petero ngu okwikiriza kweye kutahwaho. Yesu akagambira Petero ku yamushabire kandi ku yabire arije no kugumya benishe. (Luk 22:31, 32) Mazima Petero ku yabire ari kutecereza ahari ebyo bigambo bya Yesu, bikaba nibimugaruramu amani! Twaza kukora ensharamu y’amani Yehova nabasa kukoresa abarisa abine rukundo kugira ngu batukwasa kuguma turi abesigwa. (Efe 4:8, 11) Omurisa omazire obwire buringwa ori kwetwa Paul nagezaho kukwasa benetata na banyanyazi. Nakunda kugambira abacwekire entege kutecereza aha ku Yehova yabaresire omu mazima. Bwanyima nabahamiza ku Yehova ari kubakunda kandi ku atarije kubasigaho. Akahendera ari kugamba ati: “Nkerebera ku abantu bingi abacwekire entege Yehova akabayamba bashuba kumukorera.”

15. Ni bata oku ecokureberaho ca Petero na Horst kiri kwereka ku ebiri kugambwa omuri Matayo 6:33 biri amazima?

 ¹⁵ Nk’oku Yehova yahire Petero n’ezindi ntumwa ebi zabire ziri kwetenga by’omubiri, n’itwe nayija kubituha, twagumizamu kuta omurimo g’okuburira omu mwanya g’okubanza. (Mat 6:33) Bwanyima y’orutaro rwa II rw’ensi yona, Horst owu tugambireho, akaba omupayoniya. Akaba ari omucene munonga kandi akaba ari kubanganisa yaba yabire arije kubona eby’okumubisaho. Mbwenu shi akakora ki? Akasharamu kugeza Yehova yamara esande yona ari kwekwatanisa omu murimo g’oburira omu sande eyi babire batayayirwemu n’omureberezi. Esande ku yahwire, akatangara ku yarebire omureberezi yamuha akabahasha akarimo esente konka taramugambire owazimuha. Eyo bahasha ekaba erimo esente ezabire ziri kumara, ezabire ziramukwase kukora omurimo g’obupayoniya omu mezi mingi. Eco kiconco kikahamiza Horst ku Yehova yabire arije kumuha ebi yabire ari kwetenga by’omubiri. Bwanyima akamara amagara geye gona ari kuta eby’Obukama omu mwanya g’okubanza.—Mal 3:10.

16. Ahabw’enki tushemerire kutecereza aha cokureberaho ca Petero n’aha mabaruha geye?

¹⁶ Tecereza oku Petero yashemerirwe ahabw’okuba Yesu ataramusigireho nk’oku yabire abimushabire! Kristo akagumizamu kumanyiza Petero kugira ngu agumizemu kuba omwesigwa n’okubera abandi Bakristo ecokureberaho. Nitubasa kwegera amashomo g’omugasho omuri oko kumanyizibwa kwa Petero. Petero akahandika gamwe omuri ago mashomo omu mabaruha abiri agu yahandikire ebibina by’omu kinyigana c’okubanza. Omu kicweka ekiri kukurataho turyashwijuma ebintu bice ebiri omuri ago mabaruha turebe n’oku turi kubasa kubita omu bikorwa omuri obu bwire.