EKICWEKA C’OKWEGA 38
Imwe abacari bato nimubasa kugira amagara agine okushemererwa?
‘Okwetegereza kuzakurinda.’—EMI 2:11.
ECESHONGORO CA 135 Okuhiga kwa Yehova: “Mwana Wangye, Gira Obwengye”
OMU BIGAMBO BIGUFU a
1. Ni ziha mbera zigumire ezi Yehowashi, Uziya na Yosiya babugine?
OKAYEHURIRA ota obire omugabe w’abahereza ba Ruhanga ocari muto? Ni bata oku wakukoresa amani gawe n’obushoborozi bwawe? Bibuli netugambira abacari bato bingi ababire abagabe ba Buyudaya. Ecokureberaho: Yehowashi akaba ayine emyaka 7, Uziya ayine emyaka 16, kandi Yosiya ayine emyaka 8. Tecereza oku babire nibehurira! N’obu byabire bitaborobire, bakatunga obuyambi obwabakwasize kusingura ebizibu kandi bakakora ebintu birungi.
2. Ahabw’enki tushemerire kushwijuma ecokureberaho ca Yehowashi, Uziya na Yosiya?
2 N’obu tutari abagabe ninga abagabekazi, nitubasa kwegera amashomo ahari abo bagabe bashatu. Bakakora ensharamu ndungi konka nambwenu bakora ensharamu mbi. Ecokureberaho cabo caza kutwereka oku tushemerire kutorana abanywani barungi, kuguma turi abacurezi n’oku tushemerire kugumizamu kurondera obuyambi ahari Yehova.
TORANA ABANYWANI BARUNGI
Nitubasa kukuratiza ecokureberaho ca Yehowashi, turi kuhurikiza obuhabuzi bw’abanywani barungi omuri obu bwire (Reba paragurafu ya 3, 7) c
3. Ni bata oku Omugabe Yehowashi yabire nayakira obuhabuzi obu omutambi mukuru Yehoyada yabire namuha?
3 Yegera aha nsharamu ndungi ezi Yehowashi yakozire. Obu omugabe Yehowashi yabire acari muto, akakora ensharamu ndungi. N’obu yabire atine ishe, akagendera aha buhabuzi bw’Omutambi mukuru Yehoyada. Ogo mutambi akaba nahabura Yehowashi nk’omwana weye owu yayezarire. Eco kikatuma Yehowashi yasharamu kuhereza Yehova n’okwebembera okuramya okw’amazima. Nambwenu Yehowashi akataho entebekania y’okushuba kombeka hekalu ya Yehova.—2 Bus 24:1, 2, 4, 13, 14.
4. Ni bata oku turi kubasa kugasirwa twakunda ebiragiro bya Yehova kandi tukabyorobera? (Emigani 2:1, 10-12)
4 Yaba omuzire wawe ninga ondijo muntu bari kukukwasa kukunda Yehova n’okugendera aha misinge yeye, mazima ori kutunga ekiconco c’omuhendo. (Shoma omu Migani 2:1, 10-12.) Abazire nibabasa kwegesa omu buryo bwingi. Reba oku ishe w’omunyanyazi ori kwetwa Katya yamukwasize kukora ensharamu ndungi. Burizoba ishe ku yabire namutwara aha ishomero akaba nabanza yaganira na we aha cahandikirwe c’izoba. Akagamba ati: “Ebyo biganiro bikaba nibinkwasa kwehanganira embera zigumire ezi nabire nimbugana na zo eryo zoba.” Mbwenu shi okakora ki obuhabuzi obwegamire ahari Bibuli obu abazire bawe bari kukuha bwaba buri kurebeka nk’oburi kukwima obugabe bwawe? Ni enki ekiri kubasa kukukwasa korobera obuhabuzi bwabo? Omunyanyazi ori kwetwa Anastasia nayijuka oku abazire beye babire nibamushobororera enshonga bamuteraho ebiragiro nanka. Akagamba ati: “Eco kikaba nikituma nayorobera ebiragiro atari ahabw’okugemwa ahobwe mbikora ndi kumanya ku ari nye owu biri kurinda.”
5. Ebikorwa byawe nibituma abazire bawe na Yehova bayehurira bata? (Emigani 22:6; 23:15, 24, 25)
5 Wayorobera obuhabuzi bw’omuri Bibuli obu abazire bawe bari kukuha nikibashemeza. Kandi ekiri kukira byona noyija kushemeza Ruhanga kandi ogire obunywani obuhamire na we. (Shoma omu Migani 22:6; 23:15, 24, 25.) Mbehi eco tikishemerire kutuma twatoreza ecokureberaho ca Yehowashi obu yabire acari muto?
6. Ni buha buhabuzi obu Yehowashi yatandikire kuhurikiza kandi shi ni enki ecarugiremu? (2 Obusinge 24:17, 18)
6 Yegera aha nshobe ezi Yehowashi yakozire. Bwanyima y’okufa kwa Yehoyada, Yehowashi akatorana abanywani babi. (Shoma omu 2 Obusinge 24:17,18.) Akasharamu kuhurikiza abanyiginya b’omuruganda rwa Yuda ababire batari kukunda Yehova. N’iwe noyikiriza ku Yehowashi yabire ashemerire kuberinda ahabw’okuba babire bari kukora ebitahikire. (Emi 1:10) Omu mwanya gw’eco akahurikiza abo banywani beye babi. Kandi muzara wa Yehowashi ori kwetwa Zekariya ku yagerizeho kumuhabura, akamwitisa. (2 Bus 24:20, 21; Mat 23:35) Akakora ekikorwa c’obushema kandi byamugiraho engaruka! Yehowashi akatandika ge, konka ekiri kushasha akahika aho yaba omuhakani kandi yaba omwitani. Ebyo bikahendera abagaragwa beye ari bo abamweyitira. (2 Bus 24:22-25) Tecereza oku amagara geye gabire garije kuba kuri yagumizemu kuhurikiza Yehova n’okuhurikiza abari kumukunda! Ni gaha mashomo agu turi kubasa kumwegeraho?
7. Ni baha banywani abu oshemerire kutorana? (Nambwenu reba ekishushani.)
7 Ishomo rimwe eri turi kubasa kwegera aha shobi eyi Yehowashi yakozire, ni oku tushemerire kutorana abanywani barungi abaratume twaba abantu barungi, ni okugamba abanywani abari kukunda Yehova kandi abari kwenda kumushemeza. Titushemerire kuronda abanywani abu turi kwingana na bo kusha. Yijuka ku Yehowashi yabire ari muto munonga ahari Yehoyada. Waza kutorana abanywani guma oyebuze ngu: ‘Mbehi bazatuma okwikiriza kwange kwahama? Mbehi nibampiga kugendera aha misinge ya Ruhanga? Mbehi nibakira kugamba aha bya Yehova n’amazima geye g’omuhendo? Mbehi nibereka ku bari korobera emisinge ya Ruhanga? Mbehi nibangambira ebi ndi kwenda kuhurira kusha ninga nibampabura nakora ebitahikire?’ (Emi 27:5, 6, 17) Tugambisize amazima, banywani bawe baba batari kukunda Yehova, tihine eki bari kubasa kukugasira. Konka yaba banywani bawe bari kukunda Yehovan bahamireho ahakuba nibija kukugirira omugasho!—Emi 13:20.
8. Twaba turi kukoresa embuga z’okuganiriraho, ni enki eki tushemerire kutecerezaho munonga?
8 Embuga z’okuganiriraho ni oburyo burungi obu turi kubasa kukoresa turi kugambana n’abanywani bitu n’abanyabuzare bitu. Konka abantu bingi nibakoresa obu buryo bari kuratira abandi ebintu ebi baguzire, bataho ebishushani naza vidiyo z’ebi baguzire ninga ebi bakozire. Yaba ori kukoresa embuga z’okuganiriraho guma oyebuze ngu: ‘Mbehi entego yange ni ey’okuratira abandi? Mbehi nimba ndi kwenda ngu ngumye abandi, ninga ni okugira ngu bampimbise? Mbehi abu ndi kuganira na bo ninyikiriza ngu bahindure emitecerereze yange, ebigambo ninga ebikorwa byange omu buryo obutari burungi?’ Mwenetata Nathan Knorr, owabire ari omu Kakiko k’Abarisa akatuha obu buhabuzi: “Wayenda kushemeza abantu, nohendera hatine nomwe owu oshemize. Konka washemeza Yehova noyija kushemeza n’abantu bona abari kumukunda.”
TUSHEMERIRE KUGUMA TURI ABACUREZI
9. Ni enki eki Yehova yakwasize Uziya kukora? (2 Obusinge 26:1-5)
9 Toreza ensharamu ndungi ezi Uziya yakozire. Obu Uziya yabire acari muto akaba nayecureza. Akega kukora ‘ebiri kusimwa Ruhanga.’ Kandi Yehova akaguma namuha emigisha omu myaka eri kurenga 68. (Shoma omu 2 Businge 26:1-5.) Uziya akasingura amahe mingi g’abangi ba Isirayeri kandi yagumya amahe ga Yerusalemu. (2 Bus 26:6-15) Mazima Uziya kikaba nikimushemeza kureba oku Ruhanga yabire ari kumukwasa kuhika ahari ebyo.—Mub 3:12, 13.
10. Ni biha bintu ebyahikire ahari Uziya?
10 Yegera aha sharamu mbi ezi Uziya yakozire. Omugabe Uziya akaba amanyirire kuhabura abandi. Eco kikatuma yahurira ku ari kubasa kukora ebi ari kweyendera. Izoba rimwe Uziya akataha omuri Hekalu ya Yehova, kandi ahabw’amaryo akagezaho koterera omubavu aha coterero kandi ebyo abagabe bakaba batikirizibwe kubikora. (2 Bus 26:16-18) Omutambi mukuru Azariya akagezaho kuhabura Uziya konka Uziya akagira ekiniga kingi. Ekiri kushasha, Uziya taragumizemu kuba omwesigwa kandi Yehova akamuteza ebibembe. (2 Bus 26:19-21) Tecereza oku amagara geye gabire garije kuba kuri yagumizemu kuba omucurezi!
Omu mwanya g’okwerata ahabw’ebi twahikireho, tushemerire kuhimbisa Yehova ori kutuma twabihikaho (Reba paragurafu ya 11) d
11. Ni enki ekiri kubasa kutukwasa kumanya yaba turi abacurezi? (Nambwenu reba ekishushani.)
11 Uziya ku yagizire obushoborozi akebwa ku Yehova ari we owabire namuha amani, n’obusinguzi. Ni enki eki biri kutwegesa? Tushemerire kuguma kwijuka ku emigisha eyi turi kutunga ari Yehova ori kuyituha. Omu mwanya g’okwetungura ahabw’ebi tuhikireho tushemerire kuhimbisa Yehova. b (1 Kor 4:7) Tushemerire kwecureza tukamanya ku turi abantu abatahikirire kandi ku turi kwetenga okuhanwa. Mwenetata ori omu myaka yaza 60 akahandika ati: “Nkega kutetekatekaho ekirenga. Ku ndi kutunga obuhabuzi ahabw’enshobe ezi ndi kukora obumwenabumwe tindi kucweka entege ahobwe ahobwe ningezaho kukora ebihikire.” Mazima ku turi kutina Yehova kandi tukagumizamu kwecureza nituhika aha birungi.—Emi 22:4.
GUMIZAMU KURONDESA YEHOVA
12. Ni bata oku Yosiya yarondesize Yehova obu yabire acari muto? (2 Obusinge 34:1-3)
12 Toreza ensharamu ndungi ezi Yosiya yakozire. Yosiya akaba ari omunyeto obu yatandikire kurondesa Yehova. Akaba ari kwenda kumanya Yehova n’okukora ebi ari kwenda. Konka bikaba bitamworobire. Akaba ashemerire kushagika okuramya kw’amazima n’obu okuramya kwebishuba kwabire kukanyire. Kandi eco ni co eki yakozire! Yosiya atakahikize emyaka 20, akatandika kwiha okuramya kw’ebishuba omu ihanga.—Shoma omu 2 Businge 34:1-3.
13. Ni bata oku kweha Yehova biri kubasa kukukwasa?
13 N’obu wakuba ocari muto, nobasa kutoreza Yosiya orondesa Yehova kandi oyega n’emitwarize yeye. Ebyo nibyija kutuma wamweha. Ni bata oku okweha Yehova birije kukukwasa omu kubaho kwawe? Luke, owabatizibwe ayine emyaka 14, akagamba ati: “Kwiha hati ninyija kuta okuhereza Yehova omu mwanya g’okubanza kandi ngezeho kukora ebiri kumushemeza.” (Mar 12:30) Mazima noyija kutunga emigisha n’iwe wagira ecetengo nk’eceye!
14. Tanga ebyokureberaho ebiri kwereka oku abacari bato bamwe batorize Omugabe Yosiya.
14 Ni biha bizibu ebi orije kubugana nk’omuhereza wa Yehova ocari muto? Johan, owabatizibwe ayine emyaka 12, akagamba oku abegi bagenzi beye babire bari kumugema kuresa etabi. Ecakwasize Johan kusingura oko kugemwa, ni okutecereza aha ngaruka eyi okuresa biri kugira aha magara geye n’aha bunywani bweye na Yehova. Rachel, owabatizibwe ayine emyaka 14, akashoborora ecamukwasize kwehanganira ebigezo ebi yabire ari kubugana ah’ishomero. Akagamba ati: “Ningezaho kutecereza aha bintu by’omwika. Ecokureberaho: Ishomo ry’amateka nirinyijusa enkuru y’omuri Bibuli ninga obuhanuzi. Nambwenu ku ndi kuganira n’abandi nibinyijusa ecahandikirwe c’omugasho eki ndi kubasa kubagambira.” Nobasa kubugana ebizibu ebiri kutana n’ebi Omugabe Yosiya yabugine, konka nobasa kugira obwenge kandi oba omwesigwa nka we. Wagezaho kwehanganira ebizibu ebi ori kubugana ocari muto, nibyija kukuyamba kwehanganira ebi orije kubugana wakuzire.
15. Ni enki ecakwasize Yosiya kuhereza Yehova omu bwesigwa? (2 Obusinge 34:14, 18-21)
15 Omugabe Yosiya ku yakuzire akatandika kongera kombeka hekalu ya Ruhanga. Obu babire bari omuri ogo murimo bakabona ‘ekitabo c’ebiragiro ca Yehova ecahandikirwe na Musa.’ Omugabe ku yahurire kiri kushomwa akahika nagira eki yakora yakuratiza ebirimu. (Shoma omu 2 Businge 34:14, 18-21.) Mbehi n’iwe noshoma Bibuli burizoba? Mbehi yaba ori kugezaho, oko kushoma nikukushemeza? Mbehi norondesa enyiriri eziri kubasa kukukwasa? Luke, owu tugambireho, nahandika omu katabo keye enshonga nkuru ezi yashoma. Mbehi n’iwe tori kubasa kumutoreza ori kuhandika enyiriri zimwe ezakukwasa ninga shi enshonga ezi wakunda? Oku orikizaho kumanya ebiri omuri Bibuli n’okubikunda ni ko orikizaho n’okwenda kukorera Yehova. Kandi nk’oku Omugabe Yosiya yakikozire niwe noyija korobera ebiri omu Kigambo ca Ruhanga rero ogire eki wakora.
16. Ahabw’enki Yosiya yakozire enshobe y’amani kandi shi ni enki eki biri kutwegesa?
16 Yegera aha sharamu mbi ezi Yosiya yakozire. Obu Yosiya yabire ayine emyaka nka 39 akakora enshobe eyatumire yafa. Akeyesiga omu mwanya g’okushaba Yehova obuyambi. (2 Bus 35:20-25) Ni enki eki biri kutwegesa? Oku twakuba turi kwingana kona n’emyaka eyi twamwara turi kweyegesa Bibuli oku yakuba eri kwingana kona, tushemerire kugumizamu kurondesa Yehova. Eco nikitwariramu okumushaba obuhabuzi burijo, okweyegesa Ekigambo ceye n’okuhurikiza obuhabuzi bw’Abakristo abakuzire omu buryo bw’omwika. Ku turakore ebyo bintu titurije kukora enshobe z’amani kandi nitwija kukizaho kushemererwa.—Yak 1:25.
IMWE ABACARI BATO NIMUBASA KUGIRA AMAGARA AGINE OKUSHEMERERWA
17. Ni gaha mashomo agu turi kwegera aha bagabe bashatu ba Buyudaya?
17 Emyaka y’obunyeto nibwo bwire bw’okukoramu ebintu ebiri kushemeza. Ebyahikire ahari Yehowashi, Uziya na Yosiya nibyereka ku abacari bato bari kubasa kukora ensharamu ndungi kandi bakashemeza Yehova. Konka nk’oku twakireba na bo bakakora enshobe ezabarugiremu ebizibu. Konka nitubasa kwegera aha birungi ebi bakozire kandi twerinda enshobe ezi bakozire. Ku turakikore nitwija kutunga amagara agine okushemererwa.
Dawudi akaba munywani wa Yehova obu yabire acari muto. Yehova akamwikiriza kandi yatunga okushemererwa (Reba paragurafu ya 18)
18. Ni biha byokureberaho by’omuri Bibuli ebiri kwereka ku ori kubasa kutunga okushemererwa omu kubaho kwawe? (Nambwenu reba ekishushani.)
18 Omu Byahandikirwe harimu ezindi nkuru nyingi z’abacari bato abagizire obunywani burungi na Yehova, akabikiriza kandi bakatunga okushemererwa. Dawudi akaba ari omwe omuri bo. Obu yabire acari muto, akasharamu kuhereza Ruhanga kandi yija kuba omugabe w’omwesigwa. Hine obu yabire nakora enshobe konka Ruhanga aguma ari kumwikiriza. (1 Bag 3:6; 9:4, 5; 14:8) Ku ori kweyegesa enkuru ya Dawudi nikikugumya kandi oguma kuhereza Yehova omu bwesigwa. Nambwenu nobasa kweyegesa aha cokureberaho ca Mariko ninga Timoteyo. Noyija kwerebera oku bagumizemu kuhereza Yehova obu babire bacari bato Ruhanga akabikiriza kandi bakatunga okushemererwa.
19. Ni gaha magara agu ori kubasa kugira?
19 Oku ori kukoresa amagara gawe hati ni co ekiri kutuma wayija kutunga amagara agine okushemererwa omu biro by’omu misho. Ku orayerinde kweyesiga, ahobwe okasharamu kwesiga Yehova nayija kukukwasa kukora ensharamu ndungi. (Emi 20:24) Nobasa kutunga okushemererwa n’amagara agine ekigendererwa. Yijuka ku ebi ori kukora Yehova ari kubireba nk’eby’omuhendo. Mazima tihariho obundi buryo burungi bw’okukoresamu amagara gawe, oburi kukira okukorera Isho w’omu iguru!
ECESHONGORO CA 144 Guma Nooreeba Ekiconco!
a Imwe abacari bato Yehova namanya ku muri kubugana ebintu ebiri kubasa kugeza rukundo eyi muri kumukunda. Ni bata oku muri kubasa kukora ensharamu ndungi mukashemeza Sho w’omu iguru? Twaza kushwijuma ecokureberaho c’abojo bashatu ababire abagabe ba Yuda. Reba eki ori kubasa kwegera aha nsharamu zabo.
b Reba akashanduku akari kugira ngu: “Yerinde ebintu ebiri kubasa kwereka ku ori kwerata” aha rubuga rwa jw.org omu kicweka ekri kugira ngu “Kuba Ruranganwa aha mbuga z’okuganiriraho bikwinire guha mugasho?”
