1. Ni kiha cetengo c’eby’omwika eki twine, kandi shi ni nkahe ahu kiri kubuganira n’okushemererwa?

 OKUSHEMERERWA okwa buzima ti nyehurira z’omu mutima eziri kumara akire kace zikashuba zikagenda. Omuntu nabasa kuguma azine ebiro by’amagara geye byona. Bata shi? Yesu akabishoborora omuri toku yeye y’aha rushozi ati: “Bine omugisha aboro omu mutima, ahabw’okuba abo Obukama bw’omu iguru ni obwabo.” (Mat 5:3) Yesu akaba namanya ku abantu bahangirwe bine ecetengo kingi c’okumanya Omuhangi wabo Yehova n’okumuramya. Eco ni co eki turi kwetenga. Ahakuba Yehova ari “Ruhanga ori kushemererwa,” abari kumuhereza na bo nibabasa kushemererwa.​—1 Tim 1:11.

2-3. (a) Tukuratize ebi Yesu yagambire, ni baha bandi bantu abari kubasa kutunga okushemererwa? (b) Ni enki eki twaza kushwijuma omuri eki kicweka, kandi shi ahabw’enki kiri kwetengwa?

² Mbehi nitubasa kushemererwa twaba tutine ebizibu kusha? Ingaha. Omuri toku ya Yesu, akagambamu ekintu ekiri kutangaza. Akagamba ku “abari kurira” ahabw’okushasha ahabw’ebibi byabo ninga ahabw’embera mbi ezi barimu bari kubasa kushemererwa. Nambwenu ni co Yesu yagambireho aha “bari kuhigwa ahabw’okuhikirira” ninga shi abari “kushecererwa” ahabw’okuba abakurasi ba Kristo. (Mat 5:4, 10, 11) Mbwenu shi mazima nikibasika kita kutunga okushemererwa kandi ori omuri ezo mbera?

³ Yesu akaba atari kutwegesa ku turi kubasa kutunga okushemererwa twaba turi omu mbera ndungi kusha, ahobwe ku turi kubasa kushemererwa twahaza enjara yitu y’eby’omwika kandi tukagira obunywani burungi na Ruhanga. (Yak 4:8) Ebyo nitubasa kubihikaho tuta? Omuri eki kicweka, twaza kushwijuma  entambwe ishatu eziri kutukwasa kutunga okushemererwa okwa buzima.

4. Ni eha ntambwe y’okubanza eri kubasa kutuma twatunga okushemererwa okwa buzima? (Zaburi 1:1-3)

⁴ ENTAMBWE YA 1: Kugira ngu tutunge okushemererwa okwa buzima, tushemerire kwegaburira ebyokurya by’omwika. Abantu n’enyamishwa nibaba bashemerire kwegaburira ebyokurya ebishangirwe kugira ngu babeho. Konka abantu ni bo bonka abari kubasa kwegaburira ebyokurya by’omwika. Kandi mazima nitubyetenga. Ni yo nshonga Yesu yagambire ati: “Omuntu tatungwa by’okurya byonka, kureka n’ekigambo cona ekiruga omu kanwa ka Ruhanga.” (Mat 4:4) Obwe rero, titushemerire kumara izoba ryona tutegaburire ebyokurya by’omu Kigambo ca Ruhanga c’omuhendo, Bibuli. Omuhandiki wa zaburi akagira ati: ‘Ayine omugisha omuntu oshemerererwa ebiragiro bya Yehova, kandi ebyo biragiro ni byo ari kutekatekaho nyomushana na nyekiro.’​—Shoma omuri Zaburi ya 1:1-3.

5-6. (a) Ni enki eki turi kubasa kwega omuri Bibuli? (b) Ni bata oku okushoma Bibuli kiri kubasa kutukwasa?

⁵ Yehova natuha obutumwa oburi kutwereka oku turi kubasa kubaho twine amagara marungi akoresize Bibuli. Nitwegamu ekigendererwa eki atwinire. Nitwega oku turi kubasa kugira obunywani burungi na we n’oku turi kubasa kusaasirwa ebibi byitu. Kandi nitwega aha masiko g’omutano agu ari kuturaganisa omu biro by’omu misho. (Yer 29:11) Ago mazima agu turi kwega omuri Bibuli nigatuma twatunga okushemererwa okwa buzima!

 ⁶ Nambwenu nk’oku turi kukimanya, Bibuli erimu obuhabuzi bw’okutukwasa omu kubaho kwitu. Twakuratira obwo buhabuzi, nitubasa kutunga okushemererwa. Obwe rero wahurira ocwekire entege ahabw’ebizibu, ogire obwire bw’okushoma Ekigambo ca Yehova n’okukitekatekaho. Yesu akagira ati: “Abine omugisha, ni abari kuhurira ekigambo ca Ruhanga, bakacorobera!”​—Luk 11:28.

7. Ni enki eki ori kubasa kukora kugira ngu onurirwe n’ebi ori kushoma omu Kigambo ca Ruhanga?

⁷ Waba ori kushoma Ekigambo ca Ruhanga, yetware kugira ngu ohurire obunuzi bw’ebi ori kushoma. Ecokureberaho: Mbehi warahikirweho n’ezi mbera? Reka tugire ngu omuntu yakutecera ebyokurya ebi ori kukunda. Konka ahakuba ori aha bwira ninga shi oyine ebintu ebikuhugize, wabirya ori kwehuta tiwahurira obunuzi bwabyo. Ku wamara kurya, washanga wabirya n’obwira kandi ku waba oshemerire kubirya oyetonzire kugira ngu ohurire obunuzi bwabyo. Mbwenu shi warashomireho Bibuli omu buryo nk’obwe rero okaremwa kuhurira obutumwa oburimu? Obwe rero, guma oyetonde kugira ngu onurirwe ebi ori kushoma omu Kigambo ca Ruhanga; gezaho kutera akashushani, ohurire amaraka, kandi otecereze aha bi ori kushoma. Ku orakore ebyo bintu noyija kukizaho kushemererwa.

8. Ni bata oku “omwambari ow’omwesigwa kandi ow’omunyabwenge” ari kuhikiriza omurimo gweye? (Nambwenu reba obugambo bw’ahaasi.)

⁸ Yesu akatorana “omwambari ow’omwesigwa kandi ow’omunyabwenge” kugira ngu atugaburire ebyokurya by’omwika omu bwire buhikire, kandi mazima ni co ari kukora. * (Mat 24:45) Ebyahandikirwe ebiri kwera ni byo birungo by’okubanza ebi omwambari ow’omwesigwa ari kutuhereza. (1 Tes 2:13) Ebyo byokurya by’omwika nibitukwasa kumanya emitecerereze ya Yehova eri omuri Bibuli. Ni yo nshonga turi kushoma Omunara g’Omurinzi na Musisimuke! N’ebicweka byaha rubuga rwa jw.org. Nitutegura enterane z’ahagati y’esande n’ez’aha sande. Kandi nitureba ebiganiro bya buri kwezi by’aha tivi ya JW^® byaba biriho. Twakoresa ge byo byokurya by’omwika nikija kutukwasa kutera endijo ntambwe eri kubasa kutukwasa kutunga okushemererwa okwa buzima.

9. Ni eha ntambwe ya kabiri ari kubasa kutuma twatunga okushemererwa okwa buzima?

⁹ ENTAMBWE YA 2: Kugira ngu tutunge okushemererwa okwa buzima, tushemerire kubaho turi kugendera aha misinge ya Yehova. Omuhandiki wa zaburi akahandika ati: “Ayine omugisha omuntu wena ori kutina Yehova, akagendera omu mihanda yeye.” (Zab 128:1) Okutina Yehova nikimanyisa okumuha ekitinisa kingi, kikatuma twayerinda kukora ekintu cona eki ari kwanga. (Emi 16:6) Obwe rero, tushemerire kugumizamu turi kukuratiza emisinge ya Ruhanga y’ekirungi n’ekibi nk’oku biri omuri Bibuli. (2 Kor 7:1) Nitwija kushemererwa twakora ebintu ebi Yehova ari kukunda kandi tukareka ebi ari kwanga.​—Zab 37:27; 97:10; Rom 12:9.

10. Tukuratize ebiri omu Baroma 12:2, ni enki eki tushemerire kukora?

¹⁰ Shoma omu Baroma 12:2. Omuntu nabasa kuba ari kumanya ngu Yehova ayine obugabe bw’okututeraho emisinge y’ekirungi n’ekibi, konka ashemerire n’okorobera eyo misinge. Ecokureberaho: Omuntu nabasa kuba ari kumanya ku gavumenti eyine obugabe bw’okutaho ebiragiro by’omu muhanda.  Konka nobasa kushanga atari kwenda korobera ebyo biragiro. Eco kituma yavuga munonga. Nitwereka omu bikorwa ngu nitwesiga ku okukuratiza emisinge ya Yehova ari bwo buryo burungi bw’okubaho. (Emi 12:28) Dawudi akehurira basoya; ni yo nshonga yagambire ahari Yehova ati: “Oryanyoreka omuhanda gw’amagara, omu misho gawe hariho okushemererwa kwingi munonga; omu mukono gwawe gwa buryo harimu ebiri kushemeza ebiro byona.”​—Zab 16:11.

11-12. (a) Twaba twine ebizibu ninga shi tucwekire entege, ni enki eki tushemerire kwerinda? (b) Ni bata oku ebigambo ebiri omu Bafilipi biri kubasa kutukwasa twaba turi kutorana eby’okweshemeza?

¹¹ Twaba twine ebizibu ninga shi tucwekire entege, nituba turi kwenda kukora cona eki turi kubasa ngu tubirugemu. Eco nikihuririnkana, konka tushemerire kwerinda kukora ekintu eki Yehova ari kwanga.​—Efe 5:10-12, 15-17.

¹² Omu baruha eyi entumwa Pawulo yahandikire Abakristo b’omuri Filipi, akabahiga kugumizamu kutecereza aha bintu “ebihikire, . . . ebishemire, . . . ebiri kusimwa, [n’] ebirungi.” (Shoma omu Bafilipi 4:8.) N’obu Pawulo yabire atari kugamba aha by’okweshemeza, ebi yahandikire nibikwata aha by’okweshemeza ebi turi kutorana. Guma ogezeho kukora eki: Waguma kushoma ekigambo “ebintu” omuri orwo runyiriri, omu mwanya gwaco ogume otemu ebigambo “ebyeshongoro,” “vidiyo,” “ebitabo,” ninga shi “emizano ya vidiyo.” Wakora eco nikija kukukwasa kumanya ebi Ruhanga ari kwikiriza n’ebi atari kwikiriza. Nitwenda ngu tubeho turi kukuratiza emisinge ya Yehova ey’ah’iguru. (Zab 119:1-3) Bwanyima nitwija kugira omuntuwomunda murungi kandi kitukwase kutera endijo ntambwe eri kubasa kutukwasa kutunga okushemererwa okwa buzima.​—Byak 23:1.

13. Ni eha ntambwe ya kashatu eri kubasa kutuma twatunga okushemererwa okwa buzima? (Yohana 4:23, 24)

¹³ ENTAMBWE YA 3: Guma ote okuramya Yehova omu mwanya g’okubanza omu kubaho kwawe. Ahakuba Yehova ari Omuhangi witu, ni we tushemerire kuramya. (Kush 4:11; 14:6, 7) Ni yo nshonga tushemerire kumuramya omu muringo ogu ari kwikiriza kandi tubita omu mwanya g’okubanza, ni okugamba “omu mwika n’omu mazima.” (Shoma omuri Yohana 4:23, 24.) Nitwenda ngu omwika gwa Ruhanga oguri kwera gwebembere okuramya kwitu kugira ngu kubugane n’amazima agari omu Kigambo ceye. Okuramya kwitu kushemerire kuza omu kwanya g’okubanza n’obu twakuba tutwire ahu omurimo gwitu gwayemerezibwe. Hati, benetata na banyanyazi abari kurenga ahari 100 bakasibwa ahakuba bari Abahamya ba Yehova. * N’obu kirabe kiri kisoya nibagumizamu kushaba, n’okugambira abandi ebya Ruhanga n’Obukama bweye kandi babikora bashemerirwe. Twashecererwa ninga shi tukahiganisibwa, nitubasa kutunga okushemererwa ahabw’okumanya ku Yehova ari hamwe n’itwe kandi ku arije kutuha ebihembo.​— Yak 1:12; 1 Pet 4:14.

14. Ni enki ecahikire ahari mwenetata ocari muto w’omuri Tajikisitani, kandi ahabw’enki?

¹⁴ Enkuru z’ebyabireho nizereka ku entambwe ishatu ezi twamara kureba ziri kubasa kutuma twatunga okushemererwa okwa buzima, embera zona ezi twakuba turimu. Reba ebyahikire ahari Jovidon Bobojonov, oyine  emyaka 19 w’omuri Tajikisitani, owayangire kuza omu kisirikare. Aha kiro ca 4 Okwikumi, 2019, akihwa omu k a, yamara amezi mingi asibirwe kandi bamutwariza nk’enkozi y’ebibi. Oko kutwarizibwa kubi kukahurirwa n’amahanga mingi. Bakamutera bari kumugema ngu aze omu mahe kandi ajware yunifomu y’amahe. Bwanyima y’ebyo, akacwerwa orubanja rero yatwarwa omu kampu kuhisya obu purezidenti w’ihanga yashabire embabazi kandi akaragira ngu bamurekure. N’obu Jovidon yarabire omuri ebyo bizibu, akaguma ari omwesigwa kandi yaguma ayine okushemererwa. Ahabw’enki? Ahabw’okuba akaba nayegaburira omu by’omwika.

15. Ni bata oku Jovidon yabire nayegaburira ebyokurya by’omwika obu yabire ari omu kihome?

¹⁵ Obu Jovidon yabire ari omu kihome, akaba nayegaburira ebyokurya by’omwika, n’obu yabire atine Bibuli n’ebitabo byitu. Mbwenu shi akakikora ata? Benetata b’omu kacweka bakaba nibamutwarira ebyokurya, rero bahandika aha buvera ecahandikirwe ca burizoba. Eco kikaba nikituma yabasa kushoma Bibuli kandi akagitecerezaho burizoba. Ku yarugire omu kihome, akahabura abatakagezibwe, ari kugira ati: “Ni ec’omugasho kukoresa obusinge obu mwine omu kukizaho kumanya Yehova muri kushoma Ekigambo ceye n’ebitabo byitu.”

16. Ni enki eki Jovidon yabire nataho omutima?

 ¹⁶ Mwenetata akaba nakuratiza emisinge ya Yehova. Omu mwanya g’okuta omutima aha byetengo bibi n’okukora ebikorwa bibi, akaba naguta ahari Yehova n’aha bi ari kureba nk’eby’omugasho. Jovidon akaba natangarira oburungi bw’ebihangirwe bya Ruhanga. Buri kasheshe akaba nayimuka ari kuhurira oku enyonyi ziri kweshongora. Nyekiro akaba nayetegereza okwezi n’enyonyozi. Akagira ati: “Ebyo biconco ebi Yehova yatuhire bikaba nibituma nahurira nshemerirwe kandi nagarurwamu amani.” Twaba nitusima ahabw’ebyokurya by’omwika ebi Yehova ari kutuha, nitushemererwa kandi oko kushemererwa nikutuha amani g’okwehanganira ebizibu ebi turi kubugana.

17. Ni bata oku ebigambo by’omuri 1 Petero 1:6, 7 biri kukwata aha muntu ori kuraba omu mbera nk’eza Jovidon?

¹⁷ Nambwenu Jovidon akaba nata okuramya Yehova omu mwanya g’okubanza. Akaba namanya omugasho g’okuguma ari omwesigwa ahari Ruhanga ow’amazima. Yesu akagira ati: “Oramye Yehova Ruhanga wawe, obe ni we wahereza wenka.” (Luk 4:8) Abakuru b’abasirikare n’amahe bakaba bari kwenda ngu Jovidon ayehakane edini yeye. Konka akashaba munonga burizoba na buri kiro, ari kushaba Yehova ngu amukwase kutaruha n’okutehakana okwikiriza kweye. N’obu batwarize kubi Jovidon, tarahanikire. Kandi ahabw’eco eki yakozire, hati ayine okushemererwa kwingi ahakuba ayine ‘okwikiriza okugezibwe’ oku yabire atine atakasibirwe.​—Shoma omuri 1 Petero 1:6, 7.

18. Ni enki ekiri kubasa kutukwasa kuguma twine okushemererwa?

¹⁸ Yehova namanya ebi turi kwetenga kugira ngu tushemererwe. Watera entambwe ishatu eziri kutuma twatunga okushemererwa okwa buzima, noyija kuguma oyine okushemererwa n’obu wakuba ori kuraba omu bigezo. Bwanyima n’iwe n’oyija kugamba oti: “Ihanga eri Ruhanga waryo aba Yehova rihirirwe!”​—Zab 144:15.