1. Ni bata oku abantu bingi bari kwakira obuhabuzi bw’obwenge oburi omuri Bibuli? (Emigani 1:20, 21)

 OMU mahanga mingi, tukaba nitukira kureba ababurizi b’Obukama bari omu mihanda bari kuha ebitabo abantu bona abu babona. Mbehi warayekwatanisize omuri obwo buryo bw’okuburira? Yaba warabwekwatanisizemu, hatariho okubanganisa watecereza aha bigambo ebiri kushemeza ebiri omu kitabo c’Emigani ebiri kugamba ku obwenge buri kweta nibwamuriza omu muhanda kugira ngu abantu bahurire obuhabuzi bwabwo. (Shoma omu Migani 1:20, 21.) Bibuli n’ebitabo byitu birimu “obwenge obwa buzima,” ni okugamba obwenge bwa Yehova. Obwo bwenge ni bwo abantu bashemerire kuhurira kugira ngu batere entambwe y’okubanza y’okubahisya aha magara. Nitushemererwa hagira owayakira ekitabo kitu. Konka bona ti ko bari kubyakira. Abantu abamwe tibari kwenda kumanya eki Bibuli eri kugamba. Abandi nibatushecerera. Nibatecereza ku Bibuli yarugire aha murembe. Konka nambwenu, abandi nibagamba kubi aha nyegesa za Bibuli z’eby’emicwe, bari kugamba ku abari kuzigenderaho bari abantu babi kandi ku bari kucwera abandi emanja. Konka, Yehova nagumizamu kuha abantu bona omugisha g’okuhurira obwenge obwa buzima. Omu buha buryo?

2. Ni bata oku turi kuhebwa obwenge obwa buzima omuri obu bwire, konka shi ni enki eki abantu abamwe bashaziremu kukora?

² Oburyo bumwe obu Yehova ari kukoresa akatuma obwenge obwa buzima bwahurirwa ni Ekigambo ceye, ari co Bibuli. Hihi buri omwe nabasa kubona eco kitabo. Kandi shi ebitabo  byitu ebyegamire ahari Bibuli? Nitusima Yehova ahakuba nibiboneka omu ndimi eziri kurenga ahari 1,000. Abari kuhurira, ni okugamba kushoma n’okuta omu nkora ebi bari kwega, nibagasirwa. Konka, abantu bingi nibasharamu kwehuzya obwo bwenge. Baba bine ensharamu z’okukora, nibasharamu kukora ebi emitina yabo yabagambira, ninga shi babuza abandi bantu. Nambwenu nibabasa kutujoga ahakuba twashaziremu korobera ebi Bibuli eri kugamba. Eki kicweka caza kutwereka enshonga ahabw’enki abantu bari kutwaza basyoya. Reka tubanze turebe oku turi kubasa kugira obwenge obu Yehova ari kutuha.

3. Obwenge obwa buzima nibutwariramu enki?

³ Obwenge ni obushoborozi bw’okukoresa ebi turi kumanya omu kukora ensharamu ndungi. Konka, obwenge obwa buzima nibukira ahari eco. Bibuli negira eti: “Okutina Yehova ni bwo butandikiro bw’obwenge, n’okumanya ori kwera ni ko kwetegereza.” (Emi 9:10) Obwe rero twaba twine ensharamu y’okugasho y’okukora, tushemerire kugikora turi kukuratira emitekatecere ya Yehova, ni okugamba “okumanya Ori kwera.” Eco nitubasa kukikora turi kucondoza omuri Bibuli n’omu bitabo byitu ebyegamire ahari Bibuli. Twakikora, nituba turi kwereka obwenge obwa buzima.​—Emi 2:5-7.

4. Ahabw’enki Yehova ari we wenka ori kubasa kutuha obwenge obwa buzima?

⁴ Yehova ni we wenka ori kubasa kutuha obwenge obwa buzima. (Rom 16:27) Ahabw’enki ari we soko y’obwenge? Ecokubanza: Ni we Muhangi; namanya ge ebyahangirwe byeye. (Zab 104:24) Eca kabiri: Ebi Yehova ari kukora byona birimu obwenge. (Rom 11:33) Eca kashatu: Obuhabuzi bwa Yehova burijo nibugasira abari kubuta omu nkora. (Emi 2:10-12) Twaba turi kwenda kugira obwenge obwa buzima, tushemerire kwikiririza amazima g’omuri Bibuli gakatuhabura twaza kukora ensharamu ninga shi haza kugira ekintu cona eki twakora.

5. Ni enki ekiri kubaho abantu bayanga kwikiriza ku Yehova ari wenka soko y’obwenge obwa buzima?

⁵ Abantu bingi abu turi kubugana omu murimo g’okuburira nibemera ku ebintu byona ebiri omu nsi byakozire ge kandi ku biri birungi, konka bagira ngu tihariho Muhangi. Abandi abu turi kubugana nibagamba ku bari kwikiriza Ruhanga, konka bareba Bibuli nk’eyarugire aha murenge, rero basharamu kwekorera ebyabo. Ni enki ecarugiremu? Mbwenu shi ensi ni omwanya murungi ahakuba abantu bari kukuratira obwenge obwabo omu mwanya g’okukuratira obwa Ruhanga? Mbehi bine okushemererwa ninga shi bine amasiko g’ebiro by’omu misho? Ebi turi kwerebera biri kubaho nibituhamiza amazima g’ebigambo ebiri kugira ngu: “Tihariho bwenge, ninga okwetegereza, n’obu yakuba enama ebiri kubasa kurwanisa Yehova.” (Emi 21:30) Mazima eco kishemerire kutuhiga kuguma turi kushaba Yehova kugira ngu atuhe obwenge obwa buzima! Ekiri kushasha, abantu abingi tibari kukikora. Ahabw’enki?

6. Tukuratize ebiri omu Migani 1:22-25, ni baha abari kwita amatu ngu batahurira obwenge obwa buzima?

⁶ Abantu bingi nibita amatu obwenge obwa buzima bwaba “buri kwetera omu muhanda.” Tukuratize ebiri kugambwa omuri Bibuli, hariho abantu b’emiringo ishatu abari kwanga obwenge, ari bo “abatine bwenge,” “abasheki,” n’“abashema.” (Shoma omu Migani  1:22-25.) Reka tukizeho kushwijuma emitwarize eri kutuma abo bantu bayanga kuhurira obwenge bwa Ruhanga, kandi reka turebe oku turi kubasa kwerinda eyo mitwarize.

7. Ahabw’enki abamwe bari kusharamu kuguma “batine bwenge”?

⁷ “Abatine bwenge” ni abantu abari kwikiriza ebintu byona ebi bahurira kandi okubabiha corobi. (Emi 14:15) Nitukunda kubugana abantu nk’abo omu murimo g’okuburira. Ecokureberaho: Tecereza aha bantu bingi abari kuhabisibwa n’abebembezi b’amadini n’ab’eby’obutegeki. Abamwe nikibagwisa kubi ku bari kumanya ngu abo bebembezi bakababiha. Konka abari kugambwa omu Migani 1:22 nibasharamu kuguma bari kuhabisibwa ahakuba nibakikunda. (Yer 5:31) Nibakunda kukora ebi bari kweyendera kandi tibari kwenda kwega ebi Bibuli eri kugamba ninga shi kugendera aha misinge yayo. Abingi bari nk’omunyadini omwe w’omuri Quebec, omuri Kanada, owagambire Omuhamya owamutayayire ati: “Yaba omupadiri yatuhabize, eyo ni enshobe yeye, ti eyitu!” Mazima tituri kwenda kutoreza abantu abari kuguma bahabisibwe bari kubyenda!—Emi 1:32; 27:12.

8. Ni enki ekirije kutuma twaba abantu abine obwenge?

⁸ Bibuli netuhiga kutaba abantu abatine bwenge ahobwe tukaba “bakuru omu bushoborozi [bwitu] bw’okutecereza.” (1 Kor 14:20) Nitugira obwenge twata omu nkora emisinge y’omuri Bibuli omu kubaho kwitu. Mporampora, nitwerebera oku eyo misinge eri kutukwasa kwerinda ebizibu kandi tukora ensharamu ndungi. Nikiba kirungi twayeshwijuma. Twaba twamara obwire turi kwega Bibuli kandi turi kwekwatanisa omu nterane, nitubasa kwebuza enshonga ahabw’enki tutari kutera entambwe y’okweha Yehova n’okubatizibwa. Mbwenu shi twaba twabatizibwe, turi kukora entunguka omu kuburira n’okwegesa obutumwa burungi? Mbehi ensharamu zitu nizereka ku turi kukuratiza emisinge ya Bibuli? Mbehi nitwereka emitwarize y’Abakristo omu ku turi kutwariza abandi? Twareba hine ahu tushemerire kukora entunguka, tushemerire kutecereza munonga aha bi Yehova ari kutwijusya ebiri ‘kuha obwenge otabwine.’​—Zab 19:7.

9. Ni bata oku “abasheki” bari kwereka ku bari kwanga obwenge ?

⁹ Abantu ba kabiri abari kwanga kuhurira obwenge bwa Ruhanga ni “abasheki.” Hine obu turi kubugana abantu nk’abo omu murimo g’okuburira. Nibakunda kushecerera abandi. (Zab 123:4) Bibuli ekaba yagambire ku omu biro by’aha muheru, habire harije kubaho abasheki bingi. (2 Pet 3:3, 4) Nk’oku bakwe ba Loti bakikozire, abantu abamwe b’omuri obu bwire tibari kuta omutima aha kurabura oku Ruhanga ari kutuha. (Kut 19:14) Abantu bingi nibashecerera abari kukuratiza emisinge ya Bibuli. Ekiri kuhiga abo basheki ni “okwetenga kwabo ok’okutatina Ruhanga.” (Yud 7, 17, 18) Mazima oku Bibuli eri kushoborora abasheki nibibugana n’abahakani hamwe n’abandi bantu abari kwanga Yehova!

10. Nk’oku biri kugambwa omuri Zaburi 1:1, ni bata oku turi kubasa kwerinda kuba nk’abasheki?

¹⁰ Ni bata oku turi kubasa kwerinda kuba nk’abasheki? Oburyo bumwe ni okwerinda kwekwatanisa n’abantu abari kugamba kubi aha bandi. (Shoma omuri Zaburi ya 1:1.) Eco nikimanyisa ku tushemerire kwerinda kuhurikiza ninga shi kushoma ekintu cona c’abahakani. Nitumanya ngu twaba tutabire misho, nitubasa kugira omutwarize g’okugamba kubi aha bandi kandi tutandike kubanganisa ahari Yehova n’aha buhabuzi obu turi kuhebwa n’ekitongore ceye. Kugira ngu  tubyerinde, tushemerire kwebuza: ‘Mbehi ninkunda kuronda enshobe omu bari kutwebembera?’ Twagira eki twakora juba kugira ngu tweyihemu eyo mitwarize, nitushemeza Yehova.​—Emi 3:34, 35.

11. Ni bata oku “abashema” bari kureba emisinge ya Yehova y’eby’emicwe?

¹¹ Abantu ba kashatu abari kwanga obwenge ni “abashema.” Ni abashema ahakuba nibanga kubaho bari kukuratiza emisinge ya Ruhanga y’eby’emicwe. Nibakora eki emitima yabo yabagambira. (Emi 12:15) Abantu nk’abo nibanga Yehova, we burugo bw’obwenge. (Zab 53:1) Twababugana omu murimo g’okuburira, nibatugambira kubi ahabw’okubaho turi kuha emisinge y’omuri Bibuli ekitinisa. Konka tihine kintu kirungi eki bari kubasa kiutugambira. Bibuli negira eti: “Aha mushema, obwenge obwa buzima buri hare munonga; tihine ki ari kubasa kugambira omu irembo.” (Emi 24:7) Abashema tibine kigambo kirungi na kimwe eki bari kubasa kutugambira. Tikiri kututangaza kuba Yehova ari kuturabura ngu ‘turuge aha mushema’!—Emi 14:7.

12. Ni enki ekirije kutukwasa kwerinda kuba nk’abashema?

¹² Itwe tituri nk’abantu abari kwanga obuhabuzi bwa Ruhanga ahakuba nitutaho amani ngu tukunde emitecerereze yeye harimu n’emisinge yeye y’eby’emicwe. Nitubasa kongera eyo rukundo turi kugeranisa ebiri kuruga omu koroba n’okugoma. Gezaho kwetegereza ebizibu ebi abantu bari kweretera ahakuba bari kwanga kuhurikiza obuhabuzi bwa Yehova. Bwanyima oyetegereze amagara marungi agu oyine ahabw’okorobera Ruhanga.​—Zab 32:8, 10.

13. Mbehi Yehova natugema korobera obuhabuzi bweye?

¹³ Yehova naha abantu bona omugisha g’okuhurikiza obwenge, konka ti ari kugema omuntu n’omwe kubworobera. Konka natugambira engaruka eziri kuhika aha bantu abari kwanga kuhurikiza obwenge bweye. (Emi 1:29-32) Abari kusharamu kugomera Yehova nibija “kuririra ebyana by’emitwarize yabo.” Bwanyima y’obwire, ebi bari kukora nibaretera obusaasi n’ebizibu kandi bije kuhwerecerera. Konka, abari kuhurikiza obwenge bwa Yehova kandi bakabuta omu bikorwa, nabaraganisa ati: “Wena ori kumpurira aryatura buhoro, agume agaramisirize, atine kabi aku ari kutina.”​—Emi 1:33.

14-15. Ni enki eki turi kwegera omu Migani 4:23?

¹⁴ Twata omu bikorwa obwenge bwa Ruhanga, burijo nitugasirwa. Nk’oku twamara kushwijuma, Yehova naha abantu bona omugisha g’okuhurira obuhabuzi bweye oburimu obwenge. Ecokureberaho: Akoresize ekitabo c’Emigani, natuha obuhabuzi oburije kutuma twagira amagara marungi twabworobera. Reka tushwijume buna omuri bwo.

¹⁵ Rinda omutima gwawe gw’akamanyiso. Bibuli negira eti: “Rinda omutima gwawe  okukira ebindi byona ebi ori kurinda, ahakuba ni go gurugwamu esoko z’amagara.” (Emi 4:23) Tecereza aha bi tushemerire kukora kugira ngu turinde omutima gwitu ogushangirwe. Tushemerire kurya ebyokurya birungi, tukamanyiza omubiri, kandi tukerinda engesho mbi. Ni co turi kukora kugira ngu turinde omutima gwitu gw’akamanyiso. Tushemerire kwegaburira Ekigambo ca Ruhanga burizoba. Nitutegurira enterane, tuzizamu kandi tuzekwatanisamu. Nituguma twine amani turi kwekwatanisa omu murimo g’okuburira. Kandi nitwerinda engesho mbi turi kweyihaho ekintu cona ekiri kubasa kushisha emitecerereze yitu, nk’eby’okweshemeza bibi n’abanywani babi.

16. Ahabw’enki obuhabuzi oburi omu Migani 23:4, 5 buri obw’omugasho omuri obu bwire?

¹⁶ Guma omarwe n’ebi oyine. Bibuli netuhabura eti: ‘Otarigwa ah’iguru norondesa itungo. Warigumyaho amizho, niribura ahabw’okuba ahonaho nirigira amapapa, riguruka nk’empungu eri kuza ah’iguru.’ (Emi 23:4, 5) Obutungi tiburi kugumaho. N’obundi, abagiga n’abacene bona nibemereza omutima ahabw’esente. Eco nikikira kutuma batwaza omu buryo oburi kushisha izina ryabo, abanywani babo, n’amagara gabo. (Emi 28:20; 1 Tim 6:9, 10) Konka obwenge nibutukwasa kugira emitecerereze eringanire aha sente. Eyo mitecerereze neturinda kugira omururu kandi kituma twamarwa kandi tugire okushemererwa.​—Mub 7:12.

17. Ni bata oku turi kubasa kugira “orurimi rw’omunyabwenge,” nk’oku biri kugambwa omu Migani 12:18?

¹⁷ Guma otecereze otakagambire. Twaba tutabire misho, nitubasa kushisha byingi ahabw’ebigambo byitu. Bibuli negira eti: “Hariho orahukiriza ebigambo ebiri kucumita nka rurara, konka orurimi rw’omunyabwenge rutamba.” (Emi 12:18) Nituguma twine abanywani twayerinda kugambura enshobe z’abandi. (Emi 20:19) Kugira ngu ebigambo byitu bibe ebiri kukiza omu mwanya g’okushisha, tushemerire kwijuzya omutima gwitu obwenge bw’omu Kigambo ca Ruhanga. (Luk 6:45) Twatecereza aha bi Bibuli eri kugamba, ebigambo byitu nibibasa  kuba nk’“esoko y’obwenge” oburi kuruhura abandi.​—Emi 18:4.

18. Ni bata oku okuta omu bikorwa ebiri omu Migani 24:6 kiri kubasa kutukwasa omu murimo g’okuburira?

¹⁸ Guma okuratire obuhabuzi. Bibuli netuha obu buhabuzi bw’omugasho: “Oshemerire kuhurura noyebemberwa obwenge; kandi ahu abahi b’obwenge bingi bari, habaho obusinguzi.” (Emi 24:6) Tecereza oku okukuratiza ogu musinge kiri kutukwasa omu murimo g’okuburira n’okwegesa. Omu mwanya g’okukora omurimo oku turi kubyeyendera, nitugezaho kukuratiza obuhabuzi obu twahibwe. Nitutungira obuhabuzi omu nterane, ahu abanyabwenge abamanyirire bari kutanga za toku ezegamire ahari Bibuli n’ebyokureberaho by’okutumanyiza. Nambwenu, ekitongore ca Yehova nikituha ebikoreso birungi, harimu ebitabo na za vidiyo ebiri kukwasa abantu bingi kushoborocerwa Bibuli. Mbehi ori kwega kukoresa ge ebyo bikoreso?

19. Obwenge obu Yehova ari kutuha nibutuma wayehurira ota? (Emigani 3:13-18)

¹⁹ Shoma omu Migani 3:13-18. Mazima nitusima ahabw’obuhabuzi bw’obwenge obu turi kutunga omu Kigambo ca Ruhanga! Ni nkahe ahu tukabire turi kuri tutine obwo bwenge? Omuri eki kicweka, twashwijuma bumwe omu buhabuzi bw’obwenge oburi omu kitabo c’Emigani. Ni amazima, Yehova akatuha obuhabuzi burungi omu Byahandikirwe byona. Nimureke burijo tugume turi kuta omu bikorwa obuhabuzi bw’obwenge obu Yehova ari kutuha. Oburyo obu ensi eri kurebamu obwo bwenge ti ec’omugasho ahari itwe; nitwesigwa ku ‘abari kuhamya [obwenge] bari kwetwa abahirirwe.’