Ingaha. Ebi Dawudi yahandikire bikaba bitarimu okurengesereza kandi ni amazima.

Reba ebiri omuri orwo runyiriri n’ezindi eziri kushushana na rwo: “Ndyayeshongora eby’okuhimbisa izina ryawe ebiro byona, nkahikiriza obwire bwona ebi naraganisize nimpiga.” “Ndyakuhimbisa, Mukama Ruhanga wange, n’omutima gwange gona, mpe izina ryawe ekitinisa ebiro byona.” “Ndyasima izina ryawe ebiro byona.”​—Zab 61:8; 86:12; 145:1, 2.

Dawudi akaba atari kurengesereza, ari kutecereza ku yabire atarije kufa. Akaba namanya ku Yehova yabire acwerire abantu orubanja ahabw’ecicumuro, kandi akaba namanya ku ari omusisi. (Kut 3:3, 17-19; Zab 51:4, 5) Akaba namanya ku n’abashija b’abesigwa abu Ruhanga yabire ari kwemera nka Aburahamu, Isaka na Yakobo bafire. Kandi akaba namanya ku yabire arije kufa. (Zab 37:25; 39:4) Konka ebigambo byeye ebiri omuri Zaburi ya 61:8 nibyereka ecetengo ceye c’okuhimbisa Ruhanga ebiro byona, ebi yabire arije kumara acariho.​—2 Sam 7:12.

Dawudi akahandika bimwe omu byamubireho kare, nk’oku turi kubireba omu biri omuri Zaburi ya 18, 51, na 52. Omuri Zaburi ya 23, Dawudi akagamba ku Yehova ari nk’omurisa ori kureberera entama zeye, akazirisa kandi akazirinda. Dawudi akaba ari omurisa nk’ogo. Kandi akaba ari kwenda kukorera Ruhanga ‘ebiro byona by’amagara geye.’​—Zab 23:6.

Nambwenu yijuka ku Yehova ari we owahumekire Dawudi akahandika ebigambo byeye. Ebi yahandikire harimu obuhanuzi oburi kukwata aha bintu ebyabire birije kubaho omu biro eby’omu misho. Ecokureberaho: Omuri Zaburi ya 110, Dawudi akagamba aha bwire obu Mukama weye yabire arije ‘kusitama aha rubaju rwa buryo bwa [Ruhanga]’ omu iguru kandi akahebwa obushoborozi bwona. Obushoborozi bw’okukora ki? Bw’okusingura abangi ba Ruhanga n’okucwera emanja amahanga.” Dawudi akaba ari ishenkuru wa Mesiya, owabire arije kutegecera omu iguru kandi owabire orije kuba’omutambi ebiro byona.’ (Zab 110:1-6) Yesu akagamba ku obuhanuzi oburi omuri Zaburi ya 110 bwabire buri kumugambaho kandi ku bwabire burije kuhikirira omu biro by’omu misho.​—Mat 22:41-45.

Mazima, Dawudi akahumecerwa yahandika aha bwire bweye n’obwire bw’omu misho obu yabire arije kuzoka akesimira kuhimbisa Yehova ebiro byona. Eco nikituma twareba ku ebiri omuri Zaburi ya 37:10, 11, 29 biri kugamba aha mbera ezabireho omu bwire bwa Isirayeli ya kare, n’embera ezirije kubaho mu biro eby’omu misho omu nsi yona obu Ruhanga arihikiriza ebiraganiso byeye.​—Reba paragurafu ya 8 omu kicweka ekiri kugira ngu: “Noyija kuba nanye omuri Paradiso” omuri egi magazini.

Obwe rero, ebiri omuri Zaburi ya 61:8 n’ebindi byahandikirwe nibyereka ku Dawudi yabire ari kwenda kuhimbisa Yehova omuri Isirayeli ya kare kuhisya aha kufa. Kandi nibigamba aha bi Dawudi arije kukora omu biro by’omu misho obu Yehova arije kumuzora.