1. Ni bata oku Yehova ari kukira kugarukamu eshara z’abahereza beye?

 MBEHI waba ori kumanya ku Yehova ari kubasa kukoresa omu kugarukamu eshara z’omuntu ori kumushaba namweshengereza? Nabasa kukoresa, n’obu wakuba ori omuzehe, omuhereza w’ekibina, omupayoniya, ninga shi omuburizi. Nambwenu eco nikibasika n’obu wakuba ocari muto, okuzire, ori mwenetata ninga shi munyanyazi. Hagira owashaba Yehova obuyambi, Ruhanga nabasa kukoresa omuzehe ninga shi ondijo muhereza weye w’omwesigwa omu “kuhumuriza” ogo muntu. (Kol 4:11) Mazima nikitushemeza munonga kuhereza Yehova na benetata omu buryo nk’obwe! Eco nitubasa kukikora omu bwire bw’ecorezo, habaho ebihikirizi, ninga shi omu bwire bw’okuhiganisibwa.

2. Ahabw’enki kiri kubasa kutugumira kuyamba abandi omu bwire bw’ecorezo?

² Endwara y’ecorezo nebasa kutuma kukwasa abandi catugumira. Ecokureberaho: Nituba turi kwenda kubatayayira, konka nikibasa kuta amagara gitu omu kabi. Nitubasa kuhurira turi kwenda kutumira abine ebizibu by’esente ngu bije turye hamwe, konka oshanga eco kitari kubasika. Nitubasa kuhurira turi kwenda kuyamba abandi. Eco nikibasa kutugumira haba hariho ab’omu ka yitu abarwire, ninga shi abine ebizibu by’esente. Konka nabwo, nituba turi kwenda kukora cona eki turi kubasa ngu tukwase benetata na banyanyazi kandi eco nikishemeza Yehova. (Emi 3:27; 19:17) Mbwenu shi, tukakikora tuta?

3. Ni enki eki turi kwegera aha cokureberaho c’abazehe b’omu kibina ca Desi? (Yeremiya 23:4)

³ Eki abazehe bari kubasa kukora. Yaba ori omuzehe, gezaho kumanya entama ge. (Shoma omuri Yeremiya 23:4.) Desi, owu twagambireho omu kicweka ecabandize eki  akagamba ati: “Abazehe b’omu mutwe gwange g’okuburira, bakekwatanisa nanye omu murimo g’okuburira n’omu bindi bikorwa.” b Amani agu abo bazehe batireho, gakwasa Desi kwehangana, bwanyima y’okufisa ab’omu ka yeye ahabw’endwara ya KOVIDI-19.

4. Ni bata oku abazehe bakwasize Desi, kandi shi nibitwegesa ki?

⁴ Desi akagamba ngu: “Ahabw’okuba abazehe babire bari nka banywani bange, kikanyorobera kubagambira oku nabire ndi kwehurira n’ebi nabire ndi kutecereza.” Ni enki eki biri kwegesa abazehe? Abazehe bashemerire kufa aha ntama zitakabugine ebizibu. Guma obe munywani wabo. Yaba hariho ecorezo ekiri kutuma mutabasa kubugana, batayayire omu bundi buryo. Desi akagamba ati: “Obumwe abazehe bakaba nibanterera ninga shi bansindikira meseji; ebyahandikirwe ebi babire nibangambira bikaba nibinkora aha mutima n’obu ebimwe nabire shangirwe ndi kubimanya.”

5. Ni bata oku abazehe bari kubasa kumanya ebi benetata na banyanyazi bari kwetenga, kandi bakabayamba?

⁵ Oburyo bumwe obu ori kubasa kukoresa kugira ngu omanye ebi benetata bari kwetenga, ni okuganira na bo okoresize ebibuzo. (Emi 20:5) Mbehi bine ebyokurya ebiri kumara, emibazi, ninga shi ebindi bintu ebi bari kwetenga? Mbehi bemerize omutima ahabw’okubura omurimo ninga aho kutura? Mbehi nibetenga omuntu w’okugira ebi batuma, nk’okubaretera esente? Desi akatunga obuyambi oburi kukwatika, birabire aha Bakristo bagenzi beye. Konka nabwenu akatunga obuyambi bw’omu by’omwika n’omu nyehurira, obwamukwasize kwehanganira ebigezo, birabire aha bazehe. Akagamba ngu: “Abazehe bakashaba hamwe nanye. N’obu ntari kwijuka ge ebi bagambire omu shara, konka ninyijuka oku byangirire omugasho. Ni nkahu Yehova yabire ari kungambira ati: ‘Tori wenka.’”​—Isa 41:10, 13.

6. Ni enki eki abingi omu kibina bari kubasa kukora kugira ngu bayambe abandi? (Reba ekishushani.)

⁶ Eki abandi bari kubasa kukora. Nituba twetegire ku abazehe ari bo abashemerire kuba ecokureberaho. Konka twena Yehova natushaba kugumya abandi no kubakwasa. (Gal 6:10) Nangwa n’ekikorwa kito eki twakorera omuntu orwire, nikibasa kumushemeza. Omwana nabasa kugenda n’omuzire weye, baza kutayayira mwenetata ninga munyanyazi. Omuntu ocari muto nabasa kuza kuhahira munyanyazi okuzire. Nabwenu nobasa kweteraho entego yo kuza kutecera omuntu orwire? Ni  amazima, twaba turi omu bwire bw’ecorezo, buri omwe omu kibina naba ari kwetenga kugarurwamu amani. Konka nabwo, nitubasa kukwata obwire buce tuza kutayayira benetata na banyanyazi amisho aha gandi, ninga shi tubaterera ahari vidiyo. Kandi n’abazehe na bo, nibetenga kugarurwamo amani. Ababurizi bamwe bakagenda bari kusindikira abazehe ababire bahugire omu kuyamba abandi omu bwire bw’endwara y’ecorezo otubaruha tw’okubasima. Mazima nikiba kiri kirungi twataho amani ngu “tugumyane kandi twombekane!”​—1 Tes 5:11.

7. Ni biha bizibu ebiri kubasa kubaho hamara kubaho ekihikirizi?

⁷ Ebihikirizi nibibasa kugira engaruka aha muntu omu buryo obutungurire. Nibibasa kutuma twabura ebintu byitu, turuga omu maju gitu, ninga shi tufisa abakundwa bitu. Kandi ebyo bihikirizi nibibasa kugira engaruka ahari benetata na banyanyazi. Ni enki eki turi kubasa kukora kugira ngu tubayambe?

8. Ni enki eki abazehe n’ababembezi b’eka bari kubasa kukora kugira ngu betegure ebihikirizi?

⁸ Eki abazehe bari kubasa kukora. Imwe abazehe, mukwase benetata na banyanyazi kwetegura ekihikirizi kitakabireho. Murebe yaba ab’omu kibina bona bari kumanya ebi bari kubasa kukora kugira ngu betegure, kandi murebe yaba mwine enamba zabo z’esimu ziri aha murembe. Margaret, owu twagambireho omu kicweka ecabandize eki, akagamba ati: “Abazehe b’omu kibina kitu bakatugambira omu kiganiro c’ebi ekibina kiri kwetenga, ku omu kacweka kitu hari kubasa kubamu enkongi y’omuriro. Bakatugambira ku twahurira gavumenti yarabura, ninga shi tukareba embera zayeyongera kuba mbi, twabire tushemerire kuhika turi kuhunga.” Obwo buhabuzi bakabuhebwa omu bwire obuhikire ahabw’okuba bwanyima y’esande itano, hakabaho enkongi y’omuriro. Omu kuramya kw’eka, omwebembezi w’eka nabasa kugambira abagizire eka eki buri omwe arije kukora. Iwe n’abana bawe mwayetegura bucari kare, nimwija kugumizamu kutuza habaho ebihikirizi.

9. Ni bata oku abazehe bari kubasa kwetegura, hatakabireho ebihikirizi?

⁹ Yaba ori omwebembezi w’omutwe g’okuburira, otategereza ngu habeho ekihikirizi ngu obone kureba yaba oyine enamba z’ababurizi b’omutwe gwawe g’okuburira eziri aha murembe. Ahobwe zihandike hati kandi ogume orebe yaba zicari aha murembe. Eco nikija kutuma omu bwire bw’ekihikirizi wabasa kuterera buri muburizi kugira ngu abase kutunga obuyambi obu ari kwetenga. Hamara kubaho ekihikirizi, hika ori kubimanyisa omureberezi w’akakiko k’abarisa kugira ngu nawe ahike ari kubimanyisa omureberezi ori kutayayira ebibina. Ku hamazire kubaho enkongi y’omuriro, omureberezi ori kutayayira ebibina w’ahu Margaret atwire, akamara amashaha 36 atari kuhungira, kugira ngu akwase abazehe kuterera benetata na banyanyazi abari kurenga 450 abahungire, kugira ngu bahebwe obuyambi. (2 Kor 11:27) Eco kikatuma babasa kuyamba buri muburizi wena owabire ori kwetenga obuyambi bw’ah’okutura.

10. Ahabw’enki abazehe bari kuba bashemerire kufa aha ntama omu by’omwika? (Yohana 21:15)

¹⁰ Gumwe omu mirimo y’abazehe, ni okufa aha b’omu kibina omu by’enyehurira n’omu by’omwika. (1 Pet 5:2) Omu bwire bw’ebihikirizi, abazehe bashemerire kumanya yaba benetata na banyanyazi bari ahantu harungi, bine ebyokurya, ebyokujwara, n’ah’okutura. Konka haba hahwireho obwire habireho ekihikirizi, abarokokire nibaba bari kwetenga obuyambi bw’omu by’omwika n’omu by’enyehurira. (Shoma omuri Yohana 21:15.) Harold ori omuri Komiti ya Ofisi, kandi owabugineho na  benetata na banyanyazi bingi abahikirweho ebihikirizi, akagamba ati: “Okugaruka omu mbera nk’eza burijo, nikishaba obwire. Nangwa n’omu bwire obu watandika kutuza, nobasa kwijuka abantu abu wafisize, ebintu by’omuhendo ebi wabire oyine, ninga shi ebintu bibi ebyakuhikireho. Ebyo bintu wabyijuka nibibasa kutuma washuba kwehurira kubi. Konka ebyo ti okubura okwikiriza, ahobwe ni enyehurira eziri kuhika ahari buri omwe.”

11. Ni enki eki abine amaka bari kuba bashemerire kukora?

¹¹ Imwe abazehe, mushemerire kugumizamu kwijuka obuhabuzi oburi kugira ngu “murire n’abari kurira.” (Rom 12:15) Hine obu abarokokire bari kuba nibetenga kuhurira ku Yehova acabakunda kandi ku bacayine benetata na banyanyazi. Abazehe bashemerire kukwasa ab’omu maka kugira ngu babase kugumizamu kugira entebekanisa ndungi y’eby’omwika, harimo okushaba, okweyegesa, okuza omu nterane, n’okuburira. Nambwenu abazehe bashemerire kuhiga abazire kukwasa abana babo kuta omutima aha bintu by’omwika. Imwe abazire, mwijuse abana banyu ku Yehova ari kubakunda burijo, kandi ku ari kutura ari aha rubaju rwabo. Nambwenu mubashobororere ku hatine ekiri kubasa kubiha omu ka ya benetata na banyanyazi abari kubakunda.​—1 Pet 2:17.

12. Ni enki eki abandi bari kubasa kukora kugira bayambe abahikirweho ebihikirizi? (Reba ekishushani.)

¹² Eki abandi bari kubasa kukora. Haba hine ahabireho ebihikirizi hihi y’owanyu, buza abazehe oku ori kubasa kuyamba. Nobasa kucumbikira abarugire omu maka gabo ninga shi oyekwatanisa omu mirimo y’okubombekera. Nobasa nokoherereza ebyokurya abo baburizi ninga shi ebindi bintu ebi bari kwetenga. Ekihikirizi caba kibireho omu kacweka ka hare y’owanyu, na bwo nobasa kuyamba. Bata shi? Nobasa kubashabira. (2 Kor 1:8-11) Namwenu nobasa kubaha obuyambi bw’ebi bari kwetenga ori kuhayo ebiconco by’okushagika omurimo gwitu g’okuburira. (2 Kor 8:2-5) Yaba kiri kubasika ku wakuza kuyamba omu kandi kacweka nobasa kubuza abazehe oku ori kubasa kukikora. Ku barikweta ngu ozeyo nibija kukuha obumanyirizi oburikukwasa wahikayo, kandi omanye ebiri kwetengwa.

13. Ni biha bizibu ebi abatwire omu mahanga agu omurimo gwitu gwazibirwemu bari kubugana?

¹³ Omu mahanga agu omurimo gwitu gwazibirwemo, okuhiganisibwa nikutuma embera  zakizaho kugumira benetata na banyanyazi. Benetata b’omuri ago mahanga nibaba bacabugana ebizibu by’esente, oburwire ninga shi kufisa. Konka ahabw’okuba omurimo gwitu guri kuba guzibirwe, abazehe nikibagumira kutayayira benetata na banyanyazi kugira ngu babagaruremu amani. Eco ni co ecahikire ahari Andrei, owu twagambireho omu kicweka ecabandize eki. Omunyanyazi w’omu mutwe gweye g’okuburira akaba ayine ebizibu by’esente. Bwanyima akakora butandu ari omu motoka. Akaba ari kwetenga esente z’okumutwara ah’irwariro ahakuba yabire atacabasa kukora. N’obu omurimo gwabire guzibirwe kandi ari omu bwire bw’ecorezo, benetata bakakora cona eki babire bari kubasa kugira ngu bamukwase, kandi Yehova akaba nabireba.

14. Ni bata oku abazehe bari kubasa kututeraho ecokureberaho kirungi aha bikwatirine n’okwesiga Yehova?

¹⁴ Eki abazehe bari kubasa kukora. Andrei akashaba kandi yakora ebi yabire ari kubasa. Ni bata oku Yehova yamugarukiremu? Akamukwasa birabire ahari benetata ababire bine obugabe bw’okutambura. Abamwe bakamukwasa kuza ah’irwariro. Abandi bo bakamuha esente zo kumuyamba. Yehova akatuma bakora ebi babire bari kubasa, kandi yabaha emigisha ahabw’amani agu batireho n’obumanzi obu bayerekire. (Heb 13:16) Imwe abazehe, mwaba mwine emirimo myingi, mugume mushabe abandi obuyambi. (Yer 36:5, 6) Ekiri kukira byona mugume mwesige Yehova. Nabasa kubakwasa kuha benetata na banyanyazi ebi bari kwetenga.

15. Ni bata oku turi kubasa kurinda obumwe bwitu omu bwire bw’okuhiganisibwa?

¹⁵ Eki abandi bari kubasa kukora. Omurimo gwitu gwayemerezibwa, nitubasa kutebwa omu mitwe mice. Obwe rero nikiba kiri ecomugasho gugumizamu kugira obumwe ahagati yitu. Tushemerire kurwanisa Sitani, titushemerire kurwanisa Abakristo bagenzi bitu. Guma ogezeho kwehuza enshobi za benetata na banyanyazi, ninga shi ohike ori kutereza ebizibu ebiri ahagati yanyu. (Emi 19:11; Efe 4:26) Gume obe ow’okubanza omu kuyamba abandi. (Tit 3:14) Obuyambi obu abandi bahire munyanyazi bukakwasa ab’omu mutwe gweye g’okuburira bona. Kikatuma bakizaho kukundana munonga.​—Zab 133:1.

16. Tukuratize ebiri omu Bakolosayi 4:3, 18, ni bata oku turi kubasa kukwasa benetata na banyanyazi abari kuhiganisibwa?

¹⁶ Benetata na banyanyazi bingi nibahereza Yehova n’obu za gavumenti ziri kubahiganisa. Abamwe omuri abo basibirwe ahabw’okwikiriza kwabo. Nitubasa kubashabira bo n’ab’omu  maka gabo, kandi tushabira n’abari kwikiriza kweta omu kabi kugira abo benetata babone ebi bari kwetenga omu by’omwika, omu by’omubiri n’omu by’ebiragiro. c (Shoma omu Bakolosayi 4:3, 18.) Otariyebwa ku eshara zawe ziri kukwasa abo benetata na banyanyazi!​—2 Tes 3:1, 2; 1 Tim 2:1, 2.

17. Ni bata oku turi kubasa kwetegura okuhiganisibwa?

¹⁷ Iwe n’abu omu ka yawe nimubasa kwetegura okuhiganisibwa. (Byak 14:22) Konka, mutarigezaho kutecereza aha bintu bibi byona ebiri kubasa kubahikaho. Ahobwe, mugumye obunywani bwanyu na Yehova kandi mukwase n’abana banyu kukikora. Wahurira oyemerize omutima guma ogambire Yehova oku ori kwehurira otari kumushereka. (Zab 62:7, 8) Omu ka, mugume muganire aha nshonga ezishemerire kutuma mwamwesiga. d Wayetegura ekihikirizi, nikija kutumwa wagumizamu kwesiga Yehova kandi abana banyu bagire obumanzi n’obusinge.

18. Ni enki eki tutegerize omu biro by’omu misho?

¹⁸ Obusinge bwa Ruhanga nibutuma twahurira tuturize. (Fil 4:6, 7) Birabire ahari obwo businge, Yehova natuma twayehanganira oburwire, ebihikirizi, n’okuhiganisibwa ebi turi kubugana omuri obu bwire. Nakoresa abazehe abari kutugumya omu by’omwika. Kandi akaha buri omwe omuri itwe omugisha g’okukwasa abandi. Obusinge obu twine omuri obu bwire nibwija kutukwasa kwehanganira ebigezo ebi turije kubugana nagwa n’omu “kubonabona kwingi.” (Mat 24:21) Oku obwo bwire buri kugenda nibuhika, tushemerire kugumizamu kureta obusinge ahagati yitu kandi tukwasa n’abandi kukikora. Konka bwanyima y’ebyo bintu titurishuba kubugana ebintu ebiri kutwemereza omutima. Nitwija kutunga okushemerererwa oku Yehova yaturaganisize, ni okugamba amagara agahikirire kandi gijwiremu obusinge.​—Isa 26:3, 4.