Mbehi okashoma oyetonzire ebicweka by’omu Munara g’Omurinzi g’omuri ogu mwaka? Mbwenuho, reba yaba ori kubasa kugarukamu ebi bibuzo:

Nitwija kugasirwa tuta twamara obwire bwitu turi kugamba na Yehova, turi kumuhurikiza kandi turi kumutecerezaho?

Nikija kutuma twakora ensharamu ndungi, tube abegesa barungi, okwikiriza kwitu kukizeho kuguma, kandi rukundo eyi turi kumukunda ekizeho kweyongera.​—w22.01, p. 30-31.

Nikija kutugasira kita twayega kwesiga Yehova n’abu yatireho ngu bamwemererere?

Hati ni bwo bwire bw’okwega kwesiga oburyo obu Ruhanga ari kukoramu ebintu, tutabanganisa aha buhabuzi obu abazehe bari kutuha n’ensharamu ezi bari kukora. Okubonabona kwingi ku kuratandike, nitwija kuba twetegwire koroba n’obu twakutunga obuhabuzi obu tatashoborokirwe ninga shi obu turi kureba nk’obutari kukora.​—w22.02, p. 4-6.

Ni enki eki marayika yabire ari kumanyisa obu yagambire Zekariya eby’“etimasi omu ngaro [z’omutegeki] Zerubabeli?” (Zek 4:8-10)

Oko korekwa kukahamiza abahereza ba Ruhanga ku n’obu hekalu yabire eri kurebeka nk’eyorobize yabire ehikire kandi eri nk’oku Yehova yabire ari kwenda.​—w22.03, p. 16-17.

Ni bata oku turi kubasa kuba ‘ecokureberaho omu kugamba’? (1 Tim 4:12)

Tushemerire kugamba omu muringo gw’embabazi kandi gw’ekitinisa omu murimo g’okuburira, tweshongora tubyihire aha mutima, tuguma turi kuhayo ebitecerezo omu nterane, tugambisa amazima kandi tugamba ebiri kombeka abandi, turi kwerinda kubagambaho kubi.​—w22.04, p. 6-9.

Ni bata oku enyamishwa ina (obutegeki) eziri kugambwa omuri Daniyeli ekicweka ca 7 zine akakwate n’enyamishwa eziri kugambwa omu Kushururwa 13:1, 2?

Enyamishwa eri kugambwa omu Kushururwa 13 teri kugeranisa obutegeki bumwe ninga shi obugabe bumwe, nka Roma. Ahobwe negeranisa obutegeki bwona obwategekire abantu kuhisa na hati.​—w22.05, p. 9.

Ni buha buryo bw’omugasho obu turi kubasa kwerekamu ku nitwesiga oburinganiza bwa Ruhanga?

Hagira omuntu owaturahura, akatutwariza kubi ninga shi akatushobeza, nitugezaho kutabika enzika, tureka ebintu omu mikono ya Yehova. Nayija kwihaho ebintu bibi byona ebyaresirwe n’ekibi.​—w22.06, p. 10-11.

Ni enki eki mwenetata ashemerire kwijuka yayebembera abandi omu kushaba omu nterane?

Twahebwa eshara neba etari ey’okuha abagizire ekibina obuhabuzi ninga shi kubahisaho ebirango. Tashemerire kukoresa ebigambo byingi, namunonga aha ntandikiro y’enterane. (Mat 6:7)​—w22.07, p. 24-25.

Ni buha buryo obu ‘abakozire kubi’ barije “kuzocera okucwerwa orubanja? (Yohana 5:29)

Tibarije kucwerwa orubanja hakuratizwe ebibi ebi bakozire bacariho. Ahobwe nibija kucwerwa orubanja, ekiri kumanyisa ku barije kushwijumwa hakuratizwe ebi barikora bamara kuzoka.​—w22.09, p. 18.

Ni kiha kintu ekiri kushemeza eki J. F. Rutherford yakozire aha kiterane ecabire omu Kwamwenda 1922?

Aha kiterane ecaberire omuri Cedar Point, Ohio, omuri Amerika, akatangaza ati: “Muhimbise Omugabe owatandikire kutegeka! Mwine omurimo g’okubigambira abandi. Ni ahabw’eco, mutangaze, mutangaze, mutangaze, Omugabe n’Obukama bweye!”​—w22.10, p. 3-5.

Ni buha buryo bushatu obu Ruhanga ari kutukwasamu kwehangana oburi omuri Isaya ekicweka ca 30?

Eki kicweka nicereka ku (1) ari kututega amatu kandi akagarukamu eshara zitu, (2) ari kutuha obuhabuzi, kandi (3) ari kutuha emigisha omuri obu bwire n’eyi arije kutuha omu biro eby’omu misho.​—w22.11, p. 9.

Ahabw’enki turi kubasa kugamba ku ebigambo ebiri omuri Zaburi ya 37:10, 11, 29 byahikirire omu bwire bwa kare, kandi ku birije n’okuhikirira omu biro by’omu misho?

Ebyo bigambo bya Dawudi nibishoborora embera ezabireho omuri Isirayeli, nk’omu bwire bw’obugabe bwa Solomoni. Yesu akagamba ahari paradiso erije kubaho omu biro by’omu misho kandi yagamba ebigambo ebiri omu runyiriri rwa 11. (Mat 5:5; Luk 23:43)​—w22.12, p. 8-10, .