1. “Obusinge bwa Ruhanga” ni enki, kandi shi ni bata oku buri kutugasira? (Abafilipi 4:6, 7)

 HARIHO obusinge obu egi nsi etari kumanya na kace. Ni “obusinge bwa Ruhanga,” ni okugamba okutuza ahabw’okumanya ku oyine obunywani burungi na Tata w’omu iguru. Twaba twine obwo obusinge bwa Ruhanga, nituhurira turinzirwe. (Shoma omu Bafilipi 4:6, 7.) Nikituma twagira obunywani burungi n’abandi abari kukunda Ruhanga. Kandi nitugira obunywani burungi na “Ruhanga w’obusinge.” (1 Tes 5:23) Twaba turi kumanya Tata witu w’omu iguru, turi kumwesiga, kandi turi kumworobera, obusinge bwa Ruhanga nibutuma tutayemereza omutima twabugana ebizibu bigumire.

2. Ahabw’enki turi kubasa kwesiga ku okutunga obusinge bwa Ruhanga kiri kubasika?

² Mbehi nitubasa kutunga obusinge bwa Ruhanga twaba turi omu bizibu harimu endwara y’ecorezo, ekihikirizi, entambara z’abaturage, ninga shi okuhiganisibwa? Ebyo byona nibibasa kututinisa. Konka, Yesu akaha abakurasi beye obuhabuzi oburi kugira ngu: “Emitima yanyu etarishoberwa n’obu kwakuba okutina.” (Yoh 14:27) Ekirungi ni oku benetata na banyanyazi bari kukuratiza obwo buhabuzi bwa Yesu. Yehova nabakwasa batunga obusinge, n’obu bari kuraba omuri ebyo bigezo bigumire.

3. Ni bata oku ecorezo c’omu ihanga ninga shi omu nsi yona kiri kubasa kushisha obusinge bwitu?

³ Ecorezo c’omu ihanga, ninga shi ec’omu nsi yona, nikibasa kuhindura ebintu byona. Tecereza aha ku KOVIDI-19 yagizire engaruka ahari bingi. Abanyabwenge abacondorize, bakagamba ku abantu abari kurenga kimwe ca kabiri c’abatwire omu nsi  babire bari kuremwa kuhungira omu bwire bw’eco corezo. Eco corezo kikatuma abantu bakizaho kwemereza omutima, kweheba, kunywa amarwa mingi n’ebitaburambwonko, habaho ebizibu by’omu maka, kandi abandi bagezaho kweyahura. Mbwenu shi omu kacweka kanyu haba hariyo ecorezo ni bata oku ori kubasa kucendeza aha kwemereza omutima kandi okatunga obusinge bwa Ruhanga?

4. Ahabw’enki okumanya obuhanuzi bwa Yesu oburi kugamba aha biro by’emperu kiri kutuma twatunga obusinge?

⁴ Yesu akaba yagambire ku omu bwire bw’aha muheru habire harije kubaho endwara z’ebyorezo, “omu myamya myingi.” (Luk 21:11) Ni bata oku kumanya eco kiri kutuma twatunga obusinge? Nikituma tutatungurwa n’endwara z’ebyorezo. Nikituma twayerebera oku ebi Yesu yahanwire biri kuhikirira. Obwe rero, twine enshonga y’okorobera obuhabuzi obu Yesu yahire abariho omuri obu bwire obu turimo, oburi kugira ngu: “Mwerinde mutariyemereza emitima.”​—Mat 24:6.

5. (a) Tukuratize ebiri omu Bafilipi 4:8, 9, ni enki eki tushemerire kushaba omu shara twaba turi omu bwire bw’endwara y’ecorezo? (b) Ni bata oku kuhurikiza Bibuli eyakwasirwe amaraka kiri kubasa kukugasira?

⁵ Endwara y’ecorezo nebasa kutuma twashoberwa kandi twemereza omutima. Eco ni co ecahikire ahari munyanyazi ori kwetwa Desi. b Nyirarume weye, nyinazara na dokita ku bafire omu bwire bumwe ahabw’endwara ya KOVIDI-19, akaba atinire ku na we yabire arije kurwara rero akaturiza nyina owabire okuzire munonga. Nambwenu ecorezo kikatuma yatina oku yabire arije kuferwa omurimo gweye. Obwe rero akebuza oku yabire aragume kutunga esente z’okupangisa enju n’okugura ebyokurya. Ebyo byona bikatuma yayemereza omutima kandi yaremwa n’okuhungira. Konka Desi akaguma ayine obusinge bw’omu mutima. Bata shi? Akashaba Yehova atarabire aha rubaju ngu amukwase kugumizamu kutuza n’okugira emitecerereze mirungi. (Shoma omu Bafilipi 4:8, 9.) Akaba natega Yehova amatu birabire omu kuhurikiza Bibuli eyakwasirwe amaraka. Akagamba ati: “Ago maraka, gakatuma nacendeza aha kwemereza omutima kandi ganyijusya ku Yehova ayine embabazi.”​—Zab 94:19.

6. Ni bata oku okweyegesa Bibuli n’okuza omu nterane birije kukukwasa?

⁶ Mazima endwara y’ecorezo nebasa kushisha entebekanisa yawe, konka otarireka kweyegesa Bibuli n’okuza omu nterane. Enkuru z’ebyabireho eziri omu bitabo byitu na za vidiyo, nizija kukwijusya ku benetata bari kugumizamu bari abesigwa n’obu bari kuraba omu bizibu nk’ebyawe. (1 Pet 5:9) Enterane nizija kutuma ebitekateko byawe byayijuramo ebitekateko by’omuri Bibuli. Nabwenu nizija kutuma watunga oburyo bw’okugumya benetata na banyanyazi kandi na bo bakugumye. (Rom 1:11, 12) Wareba  oku Yehova yayambire abahereza beye ababire barwire, behebire, ninga shi bari bonka, okwikiriza kwawe nikwija kuhama kandi n’iwe nikija kukuyamba.

7. Ni enki eki turi kwegera aha ntumwa Yohana?

⁷ Guma oyehise benetata na banyanyazi. Ecorezo nikibasa kutuma tutabasa kuhikana n’abandi n’obu bakuba benetata na banyanyazi. Omuri obwo bwire nitubasa kwehurira nk’oku entumwa Yohana yabire nayehurira. Akaba ayine amasiko g’okureba munywani weye Gayo amisho aha gandi. (3 Yoh 13, 14) Konka, Yohana akaba ari kumanya ku habire harahweho obwire atari kubona Gayo. Obwe rero Yohana akakora eki yabire ari kubasa, yakahandikira Gayo ebaruha. Caba kitari kukubasikira kutayayira benetata na banyanyazi amisho aha gandi, guma ogezeho kubaterera aha simu, ahari vidiyo, ninga shi obahandikire. Ku oragume hihi y’Abakristo bagenzi bawe, noyija kuhurira orinzirwe kandi oyine obusinge. Guma orondere obuhabuzi aha bazehe wahurira oyemerize omutima munonga, kandi oyikirize obuyambi oburimu rukundo obu barakuhereze.​—Isa 32:1, 2.

8. Ni bata oku ekihikirizi kiri kubasa kushisha obusinge bwawe?

⁸ Yaba warahikirweho n’ekihikirizi c’omwijuro gw’amizi, omusisa ninga shi enkongi y’omuriro, nomanya oku byakugizireho engaruka z’obwire buringwa. Yaba waraferirweho abantu abu ori kukunda, ninga shi obutungi bwawe, nobasa kuba washashire munonga, kituma wayeheba ninga shi ogira n’ekiniga. Eco tikiri kumanyisa ku ori kukunda obutungi ninga shi ku obuzire okwikiriza. Ni ahabw’okuba warabire omu kigezo kigumire, kandi eco nikibasa kutuma abamwe bayehurira kubi. (Yob 1:11) Konka n’obu wakuba ori omu mbera zigumire nobasa kutunga obusinge. Bata shi?

9. Ni bata oku Yesu yatukwasize kwetegura ebihikirizi bigumire?

⁹ Yijuka obuhanuzi bwa Yesu. Itwe tituri nk’abantu bamwe bensi, abari kutecereza ku ebihikirizi bitari kubasa kubahikaho ninga shi ngu bibagireho engaruka. Yesu akagambira abakurasi beye ku “emisisa” n’ebindi bihikirizi birije kweyongera emperu etakizire. (Luk 21:11) Nambwenu akagamba ku habire harije kubaho “okwita ebiragiro,” kikatuma habaho ebintu bibi, ekiri kurebecera aha bugomi, obwitani, n’okweshandarizaho ebisasu ebiriho omuri obu bwire. (Mat 24:12) Yesu taragambire ku kuba abantu bari kuhikwaho n’ebyo bizibu kiri kumanyisa ku Yehova yabasigireho. Abingi omu bahereza ba Yehova b’abesigwa na bo bakahikwaho n’engaruka z’ebihikirizi. (Isa 57:1; 2 Kor 11:25) Yehova tari kutwihiraho ebihikirizi byona omu buryo bw’ecokutangaza, ahobwe natuha amani agu turi kwetenga kugira ngu tugume twine obusinge.

10. Ahabw’enki kwetegura ekihikirizi biri kwereka ku twine okwikiriza? (Emigani 22:3)

¹⁰ Ku turi kwetegura bucari kare oku turije kutwaza twahikwaho n’ekihikirizi, nikija kutukwsa kuguma tuturize. Konka shi okwetegura nikimanyisa ku tutari kwesiga Yehova? Ingaha mazima. Ahobwe twayetegura ekihikirizi nicereka ku turi kwesiga ku ayine amani g’okutufaho. Bata shi? Ekigambo ca Ruhanga nikituhiga kugira obwenge tuketegura ebihikirizi. (Shoma omu Migani 22:3.) Kandi emirundi myingi, ekitongore ca Yehova nikitushaba kwetegura ebihikirizi birabire omu bicweka by’omuri za magazini, omu nterane, n’omu birango. c Mbehi nitwesiga Yehova? Yaba turi kumwesiga, nitwija kukuratiza obwo buhabuzi hati, hatakabireho ebihikirizi.

11. Ni enki eki ori kwegera aha cokureberaho ca Margaret?

 ¹¹ Reba ebyahikire ahari munyanyazi ori kwetwa Margaret. Akaragirwa kuhunga akacweka aku yabire atwiremo ku kabiremo enkongi y’omuriro. Ahakuba abantu babire bari kugezaho kuhunga bari bingi munonga, emihanda ekaba eyijwire, n’emotoka zabura aho kuraba. Iguru rikaba ryijwiremo omwika oguri kwiragura, kandi Margaret akaba abuzire aho kuraba. Konka, akarokoka ahakuba yabire yayetegire bucari kare. Akaba yabikire mapu omu kakapa keye kugira ngu amanye omuhanda ogu ari kubasa kurabamu habaho ekihikirizi. Nambwenu akaba yakoresizeho ogo muhanda kugira ngu agwijuke habaho ekihikirizi. Ahakuba Margaret yayetegwire bucari kare, kikatuma yarokoka.

12. Ahabw’enki turi korobera obuhabuzi bw’eby’okwerinda?

¹² Kugira ngu tubase kuguma turinzirwe kandi tutebekanisibwe ge, abategeki nibabasa kutushaba kuguma omu ka, kuhunga ninga shi kukora ebindi bintu. Abantu bamwe nikibasa kubagumira korobera ebyo biragiro, ninga shi bazarira ahabw’okukunda ebintu byabo. Konka shi ni bata oku Abakristo bashemerire kutwaza? Bibuli netugambira ati: “Ahabwa Mukama mworobere obutegeki bwona obw’abantu, yaba buri obw’omugabe ahakuba ari mukuru, nari obw’abategeki nk’abatirweho ogo.” (1 Pet 2:13, 14) Nambwenu ekitongore ca Ruhanga nikituha obuhabuzi oburi kuturinda. Burijo nibatwijusya kuha abazehe enamba zitu z’esimu eziri aha murembe, kugira ngu babase kutubona habaho ekihikirizi. Mbehi okakikora? Nambwenu nitubasa kutunga obuhabuzi bw’okuguma omu ka, kuhunga, kuza kukwata ebyo kutuyamba, ninga shi oburi kutugambira oku turi kubasa kuyamba abandi. Twayanga korobera obwo buhabuzi, nikibasa kuta amagara gitu omu kabi n’amagara g’abazehe. Yijuka ku abo bashija b’abesigwa batirweho kugira ngu baturinde. (Heb 13:17) Margaret akagamba ati: “Ninyikiriza ntari kubanganisa ku okorobera obuhabuzi bw’abazehe n’ekitongore, ari byo ebyatumire nabasa kukiza amagara gange.”

13. Ni enki ecakwasize Abakristo bingi abarugire omu byabo?

¹³ Benetata na banyanyazi bingi abarugire omu byabo ahabw’ekihikirizi, orutaro, okwekarakasa ninga shi ekindi kizibu, bakakora cona eki babire bari kubasa kugira ngu bagumizemu kugira entebekanisa ndungi  y’ebyomwika. Nk’oku cabiri kiri aha Bakristo b’omu kinyigana c’okubanza abatatine ahabw’okuhiganisibwa, na bo “nibagumizamu kuburira obutumwa burungi bw’ekigambo ca Ruhanga.” (Byak 8:4) Okuburira nikubakwasa kuta omutima aha Bukama omu mwanya g’okuguta aha bizibu ebi bine. Eco nikibakwasa kugumizamui kugira okushemererwa n’obusinge.

14. Ni bata oku okuhiganisibwa kuri kubasa kushisha obusinge bwitu?

¹⁴ Okuhiganisibwa nikubasa kutuma twabura ebintu byingi ebishangirwe, ebiri kubasa kutuma twabura obusinge. Nitushemererwa kandi tuhurira tumazirwe twabuganira hamwe hatine ekiri kututeganisa, tukagira obugabe bw’okuburira kandi tukakora n’ebindi bikorwa by’omwika tutari kutina ngu nitwija kusibwa. Ebyo bintu byona ku biri kwemerera nitubasa kwemereza omutima twebuza ekirije kubaho bwanyuma. Abantu bona nibagira enyehurira nk’ezo. Konka nabwo, tushemerire kwetonda. Yesu akagamba ku okuhiganisibwa kwabire kuri kubasa kuteza ensibo abakurasi beye. (Yoh 16:1, 2) Mbwenu shi tutakora ki kugira ngu tugume twine obusinge n’obu twakuba turi kuhiganisibwa?

15. Ahabw’enki tutashemerire kutina okuhiganisibwa? (Yohana 15:20; 16:33)

¹⁵ Ekigambo ca Ruhanga nikitugambira kiti: “Abamaririre kumara ebiro by’amagara gabo gona omuri Yesu nibatina Ruhanga baryahigwa.” (2 Tim 3:12) Mwenetata ori kwetwa Andrei kikaba nikimugumira kwikiriza ku omurimo gwayemerezibwe omu ihanga ryeye. Akatecereza ati: ‘Eri hanga ririmu Abahamya bingi. Obwe shi abategeki nibabasa kutusiba twena ra?’ Konka eyo mitecerereze ekatuma yakizaho kwemereza omutima. Abandi benetata bakabireka omu mikono ya Yehova tibagezaho kutecereza ku babire bari kubasa kuhonoka eco kigezo. Bakaba bari kumanya ku barije kusibwa, konka tibarabire bari kwemereza omutima nka Andrei. Obwe rero na we akagezaho kugira emitekerereze nkeyo, kandi na we yayesiga Ruhanga. Bwanyima y’obwire buce akahurira yagira obusinge kandi hati ayine okushemererwa n’obu ari kuraba omuri ebyo bizibu. N’itwe eco nikibasa kutuhikaho. Obu Yesu yatugambire ku turi kubasa kuhiganisibwa nambwenu akatugambira ku turi kubasa kuguma turi abesigwa.​—Shoma omuri Yohana 15:20; 16:33.

16. Ni buha buhabuzi obu tushemerire korobera twaba turi kuraba omu kuhiganisibwa?

 ¹⁶ Omurimo gwitu gwayemerezibwa ofisi n’abazehe nibabasa kutuha obuhabuzi. Obwo buhabuzi ni obwo kuturinda, tukaguma turi kutunga ebyokurya by’omwika kandi tukagumizamu kutunga oburyo bw’okuburira oku turi kubasa. Kora cona eki ori kubasa kugira ngu oyorobere obwo buhabuzi obu ori kutunga n’obu wakuba otabucengire. (Yak 3:17) Nambwenu otarigamba amakuru ga benetata na banyanyazi ninga shi ag’ekibina abantu abatashemerire kugamanya.​—Mub 3:7.

17. Nk’oku entumwa z’omukinyigana c’okubanza zakikozire, ni enki eki twamaririra kukora?

¹⁷ Enshonga y’okubanza eri kutuma Sitani yarwanisa abahereza ba Ruhanga ni ahabw’okuba “bari korobera ebiragiro byeye kandi bakahamya ebya Yesu.” (Kush 12:17) Otayikiriza ngu Sitani ninga shi ensi yeye bikutinise. Twagumizamu kuburira n’obu twakuba turi kuhiganisibwa nitutunga obusinge n’okushemererwa. Obu abategeki b’Abayudaya baragirire entumwa z’omukinyigana c’okubanza kwemereza kuburira, abo bashija b’abesigwa bakasharamu korobera Ruhanga. Bakagumizamu kuburira kandi ogo murimo gukatuma batunga okushemererwa. (Byak 5:27-29, 41, 42) Ni amazima, omurimo gwitu gwayemerezibwa nituba tushemerire kugira obwenge twaba turi kukora omurimo g’okuburira. (Mat 10:16) Konka twakora cona ekituri kubasa nitwija kugira obusinge obu turi kutunga ahabw’okushemeza Yehova n’ahabw’okugambira abandi obutumwa oburi kurokora amagara.

18. Ni enki eki tushemerire kwijuka aha bikwatirine n’ahu turi kwiha obusinge obu turi kwetenga?

¹⁸ Nimureke tugumizemu kwesiga tutari kubanganisa ku n’obu twakuba turi kuraba omu bizibu bigumire, turi kubasa kutunga obusinge. Tushemerire kuguma turi kwijuka ku obusinge obu turi kwetenga ari obusinge bwa Ruhanga ni okugamba obusinge obu Yehova wenka ari kubasa kutuha. Gumizamu kumwesiga wahikwaho n’erwara y’ecorezo, ebihikirizi ninga shi okuhiganisibwa. Guma ohamire aha kitongore ceye. Guma otecereze aha migisha eyi orije kutunga omu biro by’omu misho. Ku orakikore basyoya, “Ruhanga w’obusinge nayija kuguma niwe.” (Fil 4:9) Omu kicweka ekiri kukurataho nitwija kushwijuma oku turi kubasa kukwasa Abakristo bagenzi bitu abari kuraba omu bizibu, kugira ngu na bo batunge obusinge bwa Ruhanga.