1. Hari kuburwayo obwire buce ngu Yesu afe ni enki eki yagambire omushuma owabire amuri aha rubaju? (Luka 23:39-43)

 YESU n’abashuma babiri ababire bamuri aha rubaju bakaba bine obusaasi bwingi ahabw’okuhurira ku bari hihi kufa. (Luk 23:32, 33) Abo bashuma bombi bakaba bari kujuma Yesu, obwe rero bakaba batari abegi beye. (Mat 27:44; Mar 15:32) Konka omwe omuri bo akahinduka. Akagambira Yesu ati: “Ku oriyija omu bukama bawe oyije kunyijuka.” Yesu na we akamugarukamu ati: “Buzimazima ninkugambira erizoba nti: Noyija kuba nanye omuri Paradiso.” (Shoma omuri Luka 23:39-43.) Tihariho ekihamya ekiri kwereka ku ogo mushuma yabire yayikirize obutumwa oburi kugamba aha ‘Bukama bw’omu iguri’ obu Yesu yabire naburira. Kandi Yesu taragambire ku ogo mushija yabire arije kuza omu Bukama. (Mat 4:17) Yesu akaba ari kugamba ahari paradiso y’omu nsi y’omu biro by’omu misho. Ahabw’enki turi kubasa kugamba basoya?

2. Ni enki ekiri kwereka ku omushuma owayehanire yabire ari Omuyudaya?

² Ogo mushuma owayehanire nabasa kuba yabire ari Omuyudaya. Akagambira mugenzi weye ati: “Na Ruhanga tori kumutina ahabw’okushushanisa na we orubanja?” (Luk 23:40) Abayudaya bakaba nibaramya Ruhanga omwe, konka abandi bantu b’omu gandi mahanga bakaba nibaramya ba ruhanga bingi. (Kur 20:2, 3; 1 Kor 8:5, 6) Kuri abo bashuma babire batwire omu gandi mahanga akaba aramubuze ekibuzo ekiri kugira ngu: “Mbehi iwe tori kutina ba ruhanga?” Kandi Yesu tarabire yatumirwe aha banyamahanga ahobwe akaba yatumirwe “aha ntama z’emiryango ya Isirayeli ezabuzire.” (Mat 15:24) Ruhanga akaba yagambire Abisirayeli ku yabire arije kuzora abafire. Eco omushuma owayehanire nabasa kuba yabire ari kukimanya,  kandi nk’oku ebigambo byeye biri kucereka, akaba nahamya ku Yehova yabire arije kuzora Yesu kugira ngu ategeke omu Bukama bwa Ruhanga. Nambwenu ogo mushija akaba ayine amasiko g’oku Ruhanga yabire arije kumuzora.

3. Ni enki ekiri kubasa kuba cayizire omu bwenge bw’omushuma obu Yesu yagambire paradiso? Shoborora. (Okutandika 2:15)

³ Ahakuba ogo mushuma owayehanire yabire ari Omuyudaya ashemerire kuba yabire ari kumanya ebiri kukwata ahari Adamu na Eva na Paradiso eyi Yehova yabire abatiremu. Obwe rero, ogo mushuma akaba namanya ku Paradiso eyi Yesu yagambire gwabire gurije kuba guri omwanya murungi omu nsi.​—Shoma omu Kutandika 2:15.

4. Ebigambo ebi Yesu yagambire omwe omu bashuma ababire bamuri aha rubaju nibituhiga kukora ki?

⁴ Ebigambo ebi Yesu yagambire ogo mushuma bishemerire kutuma twatekateka aha ku amagara garije kuba gari omuri paradiso. Obwire bw’obusinge bw’omu bugabe bwa Solomoni nibubasa kugira eki bwatwegesa aha bikwatirine na paradiso. Kandi nitwesiga ku Yesu, ori kukira Solomoni, arije kukwatanisa n’abaritegeka na we kugira ngu bahindure insi yona omwanya murungi g’okuturamu. (Mat 12:42) Obwe rero “abo omu zindi ntama” bashemerire kugira ekihika c’okumanya ebi bashemerire kwijuza kugira ngu bije kutura omuri paradiso ebiro byona.​—Yoh 10:16.

5. Ni biha bintu ebi otegerize n’ekihika ebirije kuba biriho omuri paradiso?

⁵ Ni enki ekiri kuhika nikikwija omu bwenge watekateka ahaku amagara garije kuba gari omuri paradiso? Nikibasika ku ori kuhika noreba ahantu harungi ahari nk’omu musiri gwa Edeni. (Kut 2:7-9) Nobasa kuhika ori kwijuka obuhanuzi bwa Mika oburi kugamba ku abahereza ba Ruhanga barije kusitama “omu nsi y’omuzabibu gwebo n’omutini gwebo.” (Mik 4:3, 4) Nambwenu nobasa kutekateka aha biraganiso bya Bibuli ebiri kugamba ku harije kuba hariho ebyokurya byingi. (Zab 72:16; Isa 65:21, 22) N’iwe nobasa kwereba ori omu musiri murungi ositami aha meza eriho ebyokurya binuzire munonga. Nobasa kutekateka hariho akayaga karungi kandi ori kuhurira nakahoho karungi k’ebimuri. Nambwenu nobasa kuhurira banywani bawe n’abanyabuzare bawe bari kusheka harimu n’abazokire mushemerirwe munonga. Ebyo byona ti ebiroto. Hatariho okubanganisa, ebyo byona nibyija kubaho omu nsi. Konka omuri paradiso nihija kuba hariyo n’emirimo y’okukora.

6. Ni enki eki turije kukora omuri paradiso? (Reba ekishushani.)

⁶ Yehova akatuhanga ngu tushemerererwe emirimo yitu. (Mub 2:24) Nitwija kuba twine byingi by’okukora namunonga omu butegeki  bwa Kristo bw’emyaka rukumi. Abarije kurokoka okubonabona kwingi n’abandi bantu abarije kuzoka, nibija kuba bari kwetenga ebijwaro, ebyokurya n’aho kutura. Kugira ngu twije kutunga eyo migisha nikija kutushaba kukoresa amani! Nk’oku Adamu na Eva bahangirwe ngu bahingire eka yabo, nitwija kuba twine omugisha g’okuhinga omunsi. Nambwenu tekateka oku turije kushemerererwa kwegesa abantu abari kurenga za miliyoni abarizoka batari kumanya byingi ahari Yehova n’aha kigendererwa ceye kandi tukakwasa n’abandi babesigwa ababireho mbere ya Yesu kumanya byingi ebiri kukiraho!

7. Ni enki eki turi kwesiga tutari kubanganisa, Kandi shi ahabw’enki?

⁷ Nitubasa kwesiga tutari kubanganisa ku turije kuba twine obusinge, ebintu byona biri ahantebekanisa ndungi, kandi twine ebintu byona ebiri kumara. Ahabw’enki? Ahabw’okuba Yehova akatuha omurozo g’oku Obukama bweye oburije kuba buri kutegekwa n’Omwana weye burije kuba buri. Eco nitukirebera omu nkuru eri kugamba aha butegeki bw’Omugabe Solomoni.

8. Ni bata oku ebigambo ebiri omuri Zaburi ya 37:10, 11, 29 byahikirire Omugabe Dawudi ku yamazire kubihandika? (Reba “Ebibuzo by’abashomi” omuri eyi magazini.)

⁸ Omugabe Dawudi akoresibwe n’omwika oguri kwera akahandika ebiri kukwata aha cabire kirije kubaho obu omugabe w’omwesigwa yabire ari kutegeka. (Shoma omuri Zaburi ya 37:10, 11, 29.) Nitukira kushomera abandi ebiri omuri Zaburi ya 37:11 twaba turi kubagambira ebiri kukwata ahari paradiso. Eco nitukikora ahakuba Yesu akagamba ebyo bigambo ahari toku yeye y’aha rushozi ari kwereka ku birije kuhikirira omu biro by’omu misho. (Mat 5:5) Konka nambwenu ebigambo bya Dawudi bikereka oku amagara gabire garije kuba gari omu Bukama bwa Solomoni. Omu bwire obu Solomoni yabire ari kutegeka ihanga rya Isirayeli abahereza ba Ruhanga bakagira obusinge bwingi kandi batunga ebi bari kwetenga byona omu ihanga “ry’amate n’obwoki.” Ruhanga akaba yabagambire ati:  “Ku muriguma nimukuratira ebi natireho, ryareta obusinge omu nsi . . . , muzanyama kandi tihine ori batinisa.” (Lev 20:24; 26:3, 6) Ebyo biraganiso bikahikirira omu bukama bwa Solomoni. (1 Bus 22:9; 29:26-28) Kandi n’abantu babi bakaba barije kuba batariho. (Zab 37:10) Obwe rero, ebigambo ebiri omuri Zaburi ya 37:10, 11, 29 bikahikirira omu bwire bwa kare kandi nibyija n’okuhikirira omu biro by’omu misho.

9. Ni enki eki omugabekazi wa Sheba yagambire aha bikwatirine n’obutegeki bw’Omugabe Solomoni?

⁹ Omugabekazi wa Sheba akahurira ku Abisirayeli babire bine obusinge omu bwire bw’Obukama bwa Solomoni. Ogo mugabekazi akakora orugendo ruringwa kugira ngu ahike omuri Yerusaremu abyerebere. (1 Bag 10:1) Ku yamazire kureba oku obugabe bwa Solomoni bwabire buri akagamba ati: ‘Nashanga batarangambire n’obu cakuba ekicweka cabyo kimwe ca kabiri. Abashija bawe bahirirwe n’abahereza bawe aba bahirirwe, abemerera obwire bwona omu misho gawe, bakahurira obwenge bwawe!’ (1 Bag 10:6-8) Konka ebyabireho omu bwire bw’obugabe bwa Solomoni bikaba biri omurozo kusha gw’ebi Yehova arije kukorera abantu omu bwire bw’obutegeki bw’Omwana weye Yesu.

10. Ni bata oku Yesu ari kukirira kimwe Solomoni?

¹⁰ Yesu nakira Solomoni omu buryo bwona. Solomoni akaba ari omuntu otahikirire owabire ari kukora enshobe zigumire omu kucwa emanja, kandi ebyo bikaba nibituma abahereza ba Ruhanga bahikwaho n’akabi. Konka Yesu we ni omutegeki ohikirire otari kubasa kukora enshobe. (Luk 1:32; Heb 4:14, 15) Yesu akasinga ebigezo byingi ebi Sitane yamutegire. Kristo akereka ku ataricumura ninga shi ngu akore ekintu ekiri kubasa kukora kubi abu ari kutegeka. Mazima nikitushemeza kugira Omugabe nk’ogwe.

11. Ni baha abarije kukwasa Yesu omu kutegeka?

¹¹ Yesu hamwe n’abantu 144,000 abarije kukwatanisa na bo omu kutegeka, nibija kufa aha bantu kandi bahikirize ekigendererwa eki Yehova ayinire ensi. (Kush 14:1-3) Ahabw’okuba abo bashija n’abakazi barabire omu bigezo bigumire, nibija kuba bari abategeki barungi abari kweta omu mwanya gwitu. Mbwenu shi ni enki eki abo bantu barije kukora?

12. Ni guha murimo ogu Yehova arije kuha abantu 144,000?

¹² Emirimo eyi Yesu n’abarije kutegeka na we barije kukora nekirira kimwe eyi Solomoni yakozire. Ogo Mugabe w’Abisirayeli akaba nategeka abantu b’omu ihanga rimwe kusha. Konka abo abarije kutegeka omu Bukama bwa Ruhanga nibija kufa aha bantu abari kuhika ahari za miriyari b’omu nsi yona. Mazima ogo ni omurimo gw’amani ogu Yehova yahire abantu 144,000!

13. Ni guha murimo g’omutano ogu Yesu n’abarije kutegeka na we barije kuba bine?

¹³ Nk’oku kiri ahari Yesu, abantu 144,000 nibija kuba bari abagabe n’abatambi. (Kush 5:10) Abatambi b’omu bwire bwa Musa ni bo ababire bine omurimo g’okurinda abahereza ba Ruhanga omu buryo bw’omubiri n’omu buryo bw’omwika. Ahabw’okuba ebiragiro byabire ‘biri ekishushani c’ebintu birungi ebyabire nibyenda kwija,’ nitubasa kugamba ku Yesu n’abarije kutegeka na we bine omurimo g’okufa aha bahereza ba Ruhanga omu buryo bw’omubiri n’omu buryo bw’omwika. (Heb 10:1) Tituri kumanya oku Yesu n’abarije kutegekana na we barije kukoringana n’abantu abariba bari omu nsi. Oku Yehova yabitebekanisize kona, nitwesiga tutari kubanganisa ku abantu omuri paradiso barije kutunga obuhabuzi obu bari kwetenga.​—Kush 21:3, 4.

14. Ni kaha kakwate akari ahagati y’ab’“omu zindi ntama” n’“ab’omu busyo buce”?

¹⁴ Yesu akagamba ku abarije kutegeka na we bari “obusyo buce.” (Luk 12:32) Nambwenu akagamba aha gundi mutwe ogu yayesire “abo omu zindi ntama.” Eyo mitwe yombi ni obusyo bumwe. (Yoh 10:16) Omuri obu bwire, eyo mitwe ibiri nekorera hamwe kandi neyija kugumizamu kukorera hamwe omuri paradiso. Konka ab’“obusyo buce” baryatura omu iguru, rero ab’“omu zindi ntama” bashemerererwe kutura omuri paradiso ebiro byona. Konka hariho ebi ab’“omu zindi ntama” bashemerire kukora hati kugira ngu bije kutura omuri paradiso.

15. (a) Ni bata oku “ab’omu zindi ntama” bari kubasa kukoringana ge n’abashukirweho omwika? (b) Ni bata oku turi kubasa kutoreza ecokureberaho ca mwenetata owaza kugura emibazi? (Reba ekishushani)

¹⁵ Omushuma owayehanire akafa atakatungire omugisha g’okwereka ku nasima omu bwijwire ahabw’ebi Kristo yamukorire. Konka itwe “ab’omu zindi ntama” twine oburyo bwingi bw’okwereka ku nitusima ebi Yesu yatukorire. Ecokureberaho: Twine omugisha g’okwereka ku nitumukunda turi korobera abashukirweho omwika. Yesu akagamba ku yabire arije kucwera emanja entama akuratize oku zatwarize abashukirweho omwika. (Mat 25:31-40) Nitubasa kwereka ku turi kushagika abo benishe ba Kristo turi kukora omurimo g’okuburira n’okuhindura abantu abegi tutiremu amani. (Mat 28:18-20) Kugira ngu tuhike ahari eco, tushemerire kukoresa ge ebikoreso ebi twahirwe harimu n’ekitabo Shemerererwa amagara ebiro byona! Yaba otine omwegi owu ori kwegesa Bibuli ahabw’enki otari kwetereraho entego y’okutandikisa abegi ba Bibuli bingi oku ori kubasa?

16. Ni enki eki tushemerire kukora hati kugira ngu twetegure kuba abaturage b’Obukama bwa Ruhanga?

¹⁶ Tituritegereza ngu paradiso eyije, rero ngu tube ni bwo obu twaba abantu abu Yehova ari kwenda. Kwiha hati nitubasa kuba abantu barungi omu bi turi kugamba n’omu bi turi kukora kandi twemanyiza kugira emicwe mirungi. Nambwenu tushemerire kugumizamu kuba abesigwa aha bu twatasine n’aha Bakristo bagenzi bitu. Twakizaho kugendera  aha misinge ya Ruhanga omuri eyi nsi eyijwiremu abantu babi, nikija kutworobera kukikora omuri paradiso. Nambwenu nitubasa kongera obumanyi obu twine n’ebi turi kukora kugira ngu twereke ku twetegwire kutura omuri paradiso. Reba ekicweka ekiri kugira ngu: “Mbehi oyetegwire ‘kuragwa ensi’?” ekiri omuri eyi magazini.

17. Mbehi tushemerire kufa munonga aha bibi ebi twakozire omu bwire bwa kare? Shoborora.

¹⁷ Nambwenu tushemerire kwerinda kwecwera orubanja ahabw’ebibi ebi twakozire omu bwire bwa kare. Titushemerire kukora ebibi oku turi kweyendera ngu ni ahabw’okuba twahibwe ekitambo. (Heb 10:26-31) Konka tushemerire kwesiga tutari kubanganisa ku twayehana tubyihire aha mutima kandi tukahindura emitwarize yitu Yehova arije kutusaasira buzima. (Isa 55:7; Byak 3:19) Yijuka ebigambo ebi Yesu yagambire Abafarisayo ebiri kugira ngu: “Tindizire kweta abahikirire, ahobwe nkija kweta abasisi.” (Mat 9:13) Ekitambo nikibasa kushweka ebibi byitu byona.

18. Ni biha bintu ebi orije kuganira n’omushuma owabire ari aha rubaju rwa Yesu?

¹⁸ Mbehi nobasa kutera akashushani ori omuri paradiso ori kuganira n’omushuma owagambine na Yesu? Hatariho okubanganisa, mwembi nimwija kwereka ku nimusima ahabw’ekitambo ca Yesu. Nobasa n’okwija kumubuza oku byabire biri omu mashaha agu Yesu yaferiremu n’oku yayehurire ahabw’ecokugarukamu eki Yesu yamuhire. Konka nambwenu, na we nabasa kukubuza oku amagara gabire gari omu biro by’aha muheru by’ensi ya Sitane. Mazima nikija kuba kiri kushemeza kwega Ekigambo ca Ruhanga n’omuntu nk’ogwe!​—Efe 4:22-24.

19. Ahabw’enki tutarije kugahaga amagara g’omuri paradiso? (Reba ekishushani c’aha kishembeso.)

¹⁹ Titurije kugahaga amagara g’omuri paradiso. Burijo nitwija kuba twine abantu abu turi kwenda kubugana na bo kandi twine n’ebintu ebi turi kukora. Ekiri kukira byona, burizoba turyaguma kukizaho kumanya Tata witu w’omu iguru kandi tushemerererwe ebi ari kutukorera. Ebi turije kumwegaho tibirije kuhendera, kandi nitwija kwega ebintu byingi ebiri kukwata aha bi yahangire. Oku obwire burije kweyongera, ni ko na rukundo eyi turi kukunda Ruhanga erije kukizaho kweyongera. Mazima twine omugisha ahabw’okuba Yehova na Yesu batuhire ekiraganiso c’okwija kutura omuri paradiso ebiro byona!