1. Ahabw’enki Aburahamu yagumizemu kugira amasiko ku arije kuzara omwana?

 YEHOVA akaraganisa Aburahamu ku yabire arazare omwana kandi ku amahanga g’omu nsi gabire garihebwa omugisha birabire ahari we. (Kut 15:5; 22:18) Ahabw’okuba Aburahamu yabire ayine okwikiriza kugumire ahari Ruhanga, akaba ari kwikiriza atari kubanganisa ku ebiraganiso bya Ruhanga birije kuhikirira. N’obu cabire kiri kisyo Aburahamu akahisa emyaka 100 kandi omukazi weye yahisa 90, ogo mushija n’omukazi babesigwa batakazire omwana. (Kut 21:1-7) Konka Bibuli negamba ngu: ‘Aburahamu ogo akikiriza, yagira amasiko omu bwire obu yakugahweriremu, ngu aryaba ishenkuru w’amahanga mingi, nk’oku cagambirwe.’ (Rom 4:18) Kandi nitumanya ku ebi Aburahamu yabire ategerize byahikirire. Akazara omwana w’omwojo ori kwetwa Isaka owu yabire amazire obwire buringwa ategerize. Mbehi ni enki ecabire kiri kuhamiza Aburahamu ku Yehova yabire arije kuhikiriza ekiraganiso ceye?

2. Ahabw’enki Aburahamu yabire ari kwikiriza atari kubanganisa ku ekiraganiso ca Yehova cabire kirije kuhikirira?

² Obunywani obu Aburahamu yabire ayinine na Yehova ni bwo obwabire buri kutuma yamanyira kimwe ngu eki Ruhanga yamuragagisize nabasa kukikora. (Rom 4:21) Yehova akasima Aburahamu kandi yamweta omuntu ohikirire ahabw’okwikiriza kweye. (Yak 2:23) Nk’oku biri kurebeka omu Baroma 4:18, Aburahamu akaba ayine okwikiriza kandi akaba ayine n’amasiko. Reka tushwijume eki Pawulo yagambire aha bikwatirine n’amasiko nk’oku biri kurebeka omu Baroma ekicweka ca 5.

3. Ni enki eki Pawulo ari kutushobororera aha bikwatirine n’amasiko?

³ Pawulo akashoborora enshonga ahabw’enki turi kuhamya ku ‘amasiko gitu gatari kutwisa nshoni.’ (Rom 5:5) Nambwenu akatukwasa kushoborocerwa oku amasiko gitu gari kubasa kweyongera. Ku turabe turi kushwijuma ebi Pawulo yagambire ebiri  omu Baroma 5:1-5, ogume ori kutecereza aha ku biri kubasa kukukwataho. Ku orakikore noyija kwerebera oku amasiko gawe gari kubasa kukizaho kweyongera oku obwire buri kuhwa. Eki kicweka nambwenu nikija kutukwasa kumanya oku turi kubasa kuhamya amasiko gitu gakeyongera kukira agu twine hati. Reka tubanze tushwijume amasiko aga buzima agu Pawulo yagambire ku gatari kutwisa nshoni.

4. Ni enki eki omu Baroma 5:1, 2 hari kugamba?

⁴ Shoma omu Baroma 5:1, 2. Ebyo bigambo Pawulo akabihandikira ekibina c’omuri Roma. Benetata na banyanyazi b’omuri eco kibina bakaba bayegire ebiri kukwata ahari Yehova na Yesu, bayereka okwikiriza kandi baba Abakristo. Obwe rero Ruhanga akabeta ‘abahikirire ahabw’okwikiriza’ kandi yabatorana akoresize omwika oguri kwera. Mazima bakahebwa amasiko aga buzima.

5. Ni gaha masiko agu abashukirweho omwika bine?

⁵ Bwanyima Pawulo akahandikira Abakristo abashukirweho omwika b’omuri Efeso, ari kubagambira aha bikwatirine n’amasiko agu Ruhanga yabahire. Ago masiko gakaba nigatwariramu ‘okutunga omugabane oguri kwera.’ (Efe 1:18) Nambwenu Pawulo akagambira Abakolosayi ahu babire barije kutungira ekihembo cabo. Pawulo akagamba ku ari ‘amasiko agu babire babikirwe g’omu iguru.’ (Kol 1:4, 5) Amasiko g’Abakristo abashukirweho omwika nigamanyisa ku barije kuzocera kutunga amagara agatahwaho omu iguru ahu barije kutegekana na Kristo.—1 Tes 4:13-17; Kush 20:6.

6. Ni enki eki mwenetata omwe owashukirweho omwika yagambire aha bikwatirine n’amasiko geye?

⁶ Abakristo abashukirweho omwika nibesimira ago masiko. Omwe omuri abo ni mwenetata Frederick Franz, owagambire oku ari kwehurira ahabw’amasiko agu ayine ari kugira ati: “Amasiko gitu ni aga buzima, nigija kuhikirira obu ow’aha muheru omu bantu 144,000 b’omu busyo buce arihebwa eki yaraganisibwe.” Bwanyima y’okukorera Ruhanga omu bwesigwa omu bwire  bw’emyaka myingi, omu mwaka gwa 1991 mwenetata Franz akagamba ati: “Na hati amasiko gitu tucagareba nk’ag’omuhendo munonga . . . . Oku turi kukizaho kugategereza ni ko turi kukizaho kugesiga. Tushemerire kugategereza n’obu byakutushaba kugategereza emyaka myingi. Nitwesimira amasiko gitu kukira oku twabire turi kugesimira omu bwire bwa kare.”

7-8. Ni gaha masiko agu abahereza ba Yehova bingi bine? (Abaroma 8:20, 21)

⁷ Abingi omu bahereza ba Yehova b’omuri obu bwire bine amasiko agari kutana nago. Ni amasiko agu Aburahamu yabire ayine g’okwija kutunga amagara agatahwaho omu nsi twebembirwe na Yesu n’Obukama bwa Ruhanga. (Heb 11:8-10, 13) Pawulo akagamba aha birungi by’okutegereza ahari obo abine ago masiko. (Shoma omu Baroma 8:20, 21.) Obu wayegire ebiraganiso by’omuri Bibuli by’omu biro by’omu misho aha murundi g’okubanza, ni kiha eki wahurire oshemerire kutegereza n’ekihika? Mbehi ni ekiri kugamba ku izoba rimwe orije kuba omuntu ohikirire kandi otashuba kukora enshobe? Ninga okesimira kumanya ku abantu ab’ori kukunda abafire barije kuzoka omuri paradiso omu nsi? Ahakuba Ruhanga yatuhire ago masiko, oyine ebintu byingi ebi oyinire amasiko.

⁸ Yaba twine amasiko g’okwija kutunga amagara agatahwaho omu iguru ninga omu nsi, amasiko gitu aga buzima nigatuma twatunga okushemererwa. Kandi kwesimira ago masiko nikituma gakizaho kweyongera. Ebi Pawulo yakuratizeho ari kuhandika nibishoborora oku eco kiri kubasika. Nimureke tushwijume oku biri kukwata aha masiko gitu. Kukikora nibyija kutuma twayesiga tutari kubanganisa ku ago masiko gitu garije kugumizamu kweyongera kandi ku gatarije kutwisa enshoni.

9-10. Nk’oku ecokureberaho ca Pawulo kiri kubyereka, ni enki eki Abakristo bashemerire kumanya? (Abaroma 5:3) (Nambwenu reba ekishushani.)

⁹ Shoma omu Baroma 5:3. Mbehi wareba ku obusaasi buri omu bintu ebiri kutuma amasiko gitu gayeyongera? Eco nikibasa kututangaza.  Omu c’amazima, Abakristo bona nibaraba omu busaasi. Tecereza aha cokureberaho ca Pawulo. Akagambira Abatesalonika ati: ‘Ahakuba tukabamanyisa kare tukiri owanyu, ku turi ab’okubonabonesibwa; kandi ni ko cabire.’ (1 Tes 3:4) Kandi akahandikira n’Abakorinto ngu: ‘Benetata, tituri kwenda ngu mutamanya okubonabona okwatubireho . . . Catuma twahwa amasiko ku tutararokoke.’—2 Kor 1:8; 11:23-27.

¹⁰ Abakristo b’omuri obu bwire na bo nibahikwaho n’ebizibu nk’ebyo. (2 Tim 3:12) Mbehi n’iwe nibikuhikaho? Mbehi n’iwe nohiganisibwa ahabw’okwikiriza Yesu n’okumukuratira? Banywani bawe n’abanyabuzare bawe nibabasa kukushecerera. Nibabasa kukukorera ninga shi bakugambira ebigambo bibi. Mbehi okugumizamu kuba omwesigwa aha murimo gwawe kikakuretera ebizibu? (Heb 13:18) Mbehi okahiganisibwa na gavumenti ahabw’okuba ori kugambira abandi amasiko agu oyine? Pawulo akagamba ku tushemerire kugumizamu kushemererwa oku ebizibu ebi twine byakuba biri kona. Ahabw’enki?

11. Ahabw’enki tushemerire kumaririra kwehanganira ekigezo cona eki twakubugana?

¹¹ Nitubasa kwehanganira okubonabona twine okushemererwa ahakuba nitumanya ku biri kutuma twagira endijo mitwarize mirungi. Nk’oku omu Baroma 5:3 hari kubigamba, ‘omu busaasi niharugamu okugumisiriza.’ Ahabw’okuba Abakristo bona turije kubugana obusaasi, tushemerire kugumisiriza. Tushemerire kumaririra kwehangana oku ebizibu ebi twakubugana na byo byakuba biri kona. Eco ni co conka ekirije kutuma twareba okuhikirira kw’amasiko agu twine. Tituri kwenda kuba nk’abantu abu Yesu yabire ari kutecerezaho obu yagambire aha mbibo ezi babibire aha rukiri. Omu kubanza bakikiriza Ekigambo ca Ruhanga bashemerirwe konka ‘ku bahikire omu busaasi n’omu kuhiganisibwa’, cabateza ensibo. (Mat 13:5, 6, 20, 21) Ni mazima okuhiganisibwa ninga shi okuraba omu bigezo ti ekintu c’okwesimira. Konka nitugasirwa twabyehanganira kandi tukagumizamu kukorera Yehova. Bata shi?

12. Ni bata oku turi kugasirwa twayehanganira ebigezo?

¹² Entumwa Yakobo akereka ebirungi ebiri kuruga omu kwehanganira ebigezo. Akahandika ati: ‘Mureke okugumisiriza kuhisye omurimo gwako, n’imwe mubone kuba abahikire omuri byona, mutine ki mubuzirweho.’ (Yak 1:2-4) Obwe rero Yakobo akagamba ku okwehangana biri kubasa kugira eki byatushaba kukora ninga bitushaba kugira entego. Mbwenu shi ni guha murimo ogu okwehangana kuri kubasa kuhikiriza? Nikubasa kukukwasa kugira eyi mitwarize omu bwijwire nk’okutegereza, okwikiriza, n’okwesiga Ruhanga. Konka hariho ekindi kintu eki turi kutunga ahabw’okwehangana.

13-14. Ni biha birungi ebiri kuruga omu kugumizamu kwehangana, kandi shi ni bata oku ebyo biri kukwata aha masiko gitu? (Abaroma 5:4)

¹³ Shoma omu Baroma 5:4. Pawulo akagamba ku omu kwehangana hari kurugamu ‘okuhamibwa.’ Okwehangana kwawe nikutuma Yehova yakwikiriza. Eco tikiri kumanyisa ku Yehova ari kushemererwa yareba ori kubugana ebigezo ninga ebizibu. Eki Yehova ari kwesimira ni iwe. Okwehangana kwawe niko kuri kutuma wahamibwa. Mazima nikitugaruramu amani kumanya ku twayehangana biri kutuma Yehova yashemererwa!—Zab 5:12.

¹⁴ Yijuka ku Aburahamu yayehanganire ebigezo omu bwesigwa kandi ku byatumire Yehova yamwikiriza. Yehova akamureba nka munywani weye kandi yamweta ohikirire. (Kut 15:6; Rom 4:13, 22) N’itwe Yehova nabasa kutweta banywani beye. Ruhanga tari kutwikiriza agendire aha mirimo eyi turi kumukorera ninga aha bujunanizibwa obu twine. Nikishemeza Yehova twagumizamu kuba abesigwa n’obu twakuba turi kuraba omu bizibu. Emyaka eyi twakuba twine yona, embera ezi twakuba turi mu oku zakuba ziri  kona ninga obushoborozi obu twakuba twine oku bwakuba buri kwingana kona, twena nitubasa kwehangana. Mbehi hine ekigezo eki oyine omuri obu bwire konka ogumizamu kuba omwesigwa ahari Yehova? Caba kiriho ogume oyijuke ngu eco nikishemeza Yehova. Twamanya ku eco kiri kutuma Ruhanga yatwikiriza, amasiko agu twine g’ebiraganiso byeye nigakizaho kweyongera.

15. Ni enki ekindi eki Pawulo yagambire, kandi shi ni enki eki abamwe bari kubasa kwebuza?

¹⁵ Nk’oku Pawulo yakigambire nitushemeza Yehova twagumizamu kuba abesigwa kandi tukehanganira ebigezo. Reba ebigambo ebi Pawulo yakuratizeho ari kugira ati: ‘Omu kuhamibwa harugamu amasiko, kandi amasiko tigisa nshoni.’ (Rom 5:4, 5) Ebyo nibibasa kutangaza abantu bamwe. Ahabw’enki? Ni ahabw’okuba nk’oku tubirebire omu Baroma 5:2, Pawulo akagamba ku Abakristo b’omuri Roma babire bine amasiko, ni okugamba amasiko g’‘okureba ekitinisa ca Ruhanga.’ Obwe rero abamwe nibabasa kwebuza ngu: ‘Yaba abo Bakristo babire bine amasiko ahabw’enki Pawulo yabibahandikire?’

16. Ni bata oku amasiko g’omuntu gari kubasa kweyongera? (Nambwenu reba ekishushani.)

¹⁶ Nitubasa kushoborocerwa ebi Pawulo yabire ari kwenda kumanyisa, twaguma kwijuka ku amasiko ari ekintu ekiri kweyongera. Ecokureberaho: Mbehi noyijuka obu wahurire amasiko agari kutangaza agari omu Kigambo ca Ruhanga aha murundi g’okubanza? Obwo bwire nobasa kuba watecerize ku ekitecerezo c’okwija kubaho ebiro byona omuri paradiso ari kirungi konka ku kitarije kubasika. Konka oku wagenzire nomanya Yehova n’ebiraganiso by’omuri Bibuli, okikiriza otari kubanganisa ku ago masiko garije kuhikirira.

17. Ni bata oku amasiko gawe gari kukizaho kweyongera wamara kweha Yehova kandi okabatizibwa?

¹⁷ Na mbwanyima y’okubatizibwa, amasiko gawe gakagenda gari kweyongera oku wakirizeho kumanya byingi n’oku wagenzire ori kukura omu buryo bw’omwika (Heb 5:13–6:1) Obwe  rero ni bwo obu wakirizeho kwesiga amasiko agu oyine, kandi okerebera ku ebiri kugambwa omu Baroma 5:2-4 biri amazima. Okabugana ebigezo byingi konka wabyehanganira kandi wamanya ku biri kushemeza Ruhanga. Ahabw’okuba ori kumanya ku Ruhanga ari kukukunda kandi ku ari kukusima, amasiko agu oyine gakeyongera kukira oku gabire gari omu kubanza. Hati ni aga buzima ahari iwe. Nigakukwataho omu bi ori kukora byona. Eco nikimanyisa ku gari kukwata aha ku ori kukoresa amagara gawe, oku ori kutwariza ab’omu ka yawe, oku ori kukora ensharamu n’oku ori kukoresa obwire bwawe.

18. Ni kiha kihamya eki Yehova yatuhire?

¹⁸ Bwanyima Pawulo akongeraho ekindi kintu c’omugasho ekikwatirine n’amasiko, ekiri kweyongeraho twaheza kusimwa na Ruhanga. Natuhamiza ku amasiko gitu garije kuhikirizibwa. Ahabw’enki turi kubasa kwesiga eco? Pawulo akahumecerwa yayongeraho eki kihamya ekiri kuruga ahari Ruhanga ari kugira ati: ‘Amasiko tigisa nshoni, ahabw’okuba okukunda kwa Ruhanga kushukirwe omu mitima yitu omwika oguri kwera ogu twahirwe.’ (Rom 5:5) Mazima oyine enshonga ndungi y’okuhamya amasiko agu Yehova yakuhire.

19. Ni enki eki ori kubasa kwesiga otari kubanganisa aha bikwatirine n’amasiko agu oyine?

¹⁹ Shuba otecereze aha kiraganiso eki Yehova yahire Aburahamu, oku yabire ari kumwikiriza, n’aha ku yabire ari kumureba nka munywani weye. Ebi Aburahamu yabire ayineho amasiko bikahikirira. Bibuli negamba ngu: ‘Ni ko Aburahamu yahibwe asyo eki yaraganisibwe, ku yaherize kugumisiriza obutaruha.’ (Heb 6:15; 11:9, 18; Rom 4:20-22) Taracwekire entege. Nobasa kwesiga otari kubanganisa ku wagumizamu kuba omwesigwa orije kutunga emigisha ahabw’amasiko agu oyine. Amasiko agu oyine ni aga buzima; nigija kukuretera okushemererwa kandi tigarije kukwisa enshoni! (Rom 12:12) Pawulo akahandika ati: ‘Ruhanga Mukama w’amasiko abijuze okushemererwa kona n’obusinge omu kwikiriza, amasiko ganyu gakanyisibwe amani g’omwika oguri kwera.’—Rom 15:13.