HATARIHO okubanganisa nitushemerererwa ebiconco ebi Yehova yatuhire, harimu ekiconco c’okweshariramu kugira ngu tubase kushemerererwa ebyo biconco. Ekiri kushemeza, Bibuli negamba ku vinyo ari ekiconco ekiri kuruga ahari Ruhanga, eri kugira ngu: ‘Obugenyi butecerwa okusheka, na vinyo eretera amagara kushemererwa.’ (Mub 10:19; Zab 104:15) Konka nambwenu nitureba abantu abari kubugana ebizibu ebiri kuretwa n’amarwa. Ekiri kukira ahari eco, abantu bamwe bine emitecerereze eri kutana aha bikwatirine n’amarwa ahabw’emicwe eyi bakuriremu. Mbwenu shi ni eha mitecerereze mirungi eyi Omukristo ashemerire kugira aha bikwatirine n’amarwa?

Ahu twakuba tutwire hona ninga omucwe ogu twakuba twakuriremu oku gwakuba guri kona, twayikiriza kugendera aha misinge ya Ruhanga, tukagira emitecerereze mirungi, kandi tukakora ensharamu ndungi nibitugasira kandi bituma twagira okushemererwa omu kubaho kwitu.

Nk’oku wakirebire, abantu bingi b’omu nsi nibakunda kunywa amarwa emirundi myingi kandi banywa mingi. Abantu abamwe nibanywa amarwa ahabw’okwenda kweshemeza. Abandi nibaganywa bari kwenda kwebwa ebizibu ebi bine. Kandi omu bicweka bimwe, abantu nibanywa amarwa mingi bari kwenda kwereka ku bari abashija ny’abashija.

Konka Abakristo bo, nibebemberwa n’obuhabuzi bw’Omuhangi wabo ori kubakunda aha bikwatirine n’amarwa. Ecokureberaho: Ruhanga natuhabura ari kutugambira engaruka eziri kuruga omu kunywa amarwa mingi. Nitubasa kuba twashomire omu kitabo c’Emigani 23:29-35 ahari kugamba aha musinzi ori kunywa amarwa munonga n’ebizibu ebi ari kubugana. a Daniel omuzehe w’ekibina otwire omuri Buraya, akagamba oku yabire abireho obu yabire atakabire Omukristo ari kugira ngu: “Okunywa amarwa mingi kikaba nikituma nakora ensharamu mbi kandi na hati ku ndi kubyijuka ninshasha.”

Ni bata oku Omukristo ari kubasa kukoresa obushoborozi bweye bw’okweshariramu kandi akerinda engaruka eziri kuruga omu kunywa amarwa mingi? Ibanga ni okwikiriza kuhaburwa n’emisinge ya Ruhanga omu bitecerezo n’omu bikorwa.

Nimureke tushwijume eki Bibuli eri kugamba aha bikwatirine n’amarwa n’enshonga eri kutuma abantu bamwe banywa amarwa.

Ekigambo ca Ruhanga tikiri kuzibira abantu abari kukoresa amarwa omu buryo burungi. Kandi n’obundi Bibuli negamba ku kunywa vinyo kiri kureta okushemererwa. Negamba ngu: ‘Oyerire ebyokurya byawe n’okushemererwa, kandi oyenywere vinyo yawe n’okweruhura.’ (Mub 9:7) Hine obu Yesu yabire nanywa vinyo kandi hine n’abahereza ba Yehova b’abesigwa ababire nibaginywa.—Mat 26:27-29; Luk 7:34; 1 Tim 5:23.

Konka Ekigambo ca Ruhanga nicereka entanisa eri ahagati y’okunywa amarwa n’okusinda. Nikigamba ngu: ‘Mutarisinda vinyo.’ (Efe 5:18) Nambwenu nicereka ku ‘abasinzi batariragwa Bukama bwa Ruhanga.’ (1 Kor 6:10) Obwe rero Yehova nayangira kimwe okunywa amarwa mingi n’okusinda. Omu mwanya g’okugendera aha micwe eyi twakuriremu, tushemerire kugendera aha misinge ya Ruhanga eri kukwata aha marwa.

Abamwe nibabasa kutecereza ku bari kubasa kunywa amarwa mingi konka ku batari kubasa kusinda. Konka eco mazima ni ec’akabi. Ebyahandikirwe nibyereka ge ku abari kuba ‘abahuku b’ebiri kusinza’ biri kubasa kutuma omushija (ninga omukazi) ari kubasa kushishikara omu by’emicwe n’omu by’omwika. (Tit 2:3; Emi 20:1) Yesu na we akagamba ku obusinzi buri kubasa kutuma omuntu  atataha omu nsi ensa ya Ruhanga. (Luk 21:​34-36) Ni enki ekiri kubasa kukwasa Omukristo kwerinda kugwa omu mutego g’okunywa amarwa mingi?

Nikiba kiri ec’akabi omuntu yasharamu kugendera aha mucwe ogu yakuriremu yaza kunywa amarwa. Ni ec’obwenge Abakristo bakoresa obwenge bari kusharamu ebyokurya n’ebyokunywa ebiri kushemeza Yehova. Bibuli netwijusya ngu: ‘Ku murabe nimurya ninga nimunywa ninga nimukora ekintu cona, mukore byona okuhimbisisa Ruhanga.’ (1 Kor 10:31) Nimureke turebe ebibuzo n’emisinge ebi turi kubasa kushwijuma:

Mbehi ninywa amarwa kugira ngu nshemeze abandi? Omu Kuruga 23:2 nihagira ngu: ‘Otarikurata abingi.’ Aha, Yehova akaba ari kurabura Abisirayeli kwerinda kutoreza abantu abatari kumushemeza. Oko kurabura n’itwe nikutukwataho omuri obu bwire. Twayikiririza ab’orwingano rwitu ngu bahindure emitecerereze yitu n’ensharamu zitu aha bikwatirine n’okunywa amarwa, nibibasa kutuma twayehuzya emisinge ya Yehova kandi kituma tutagumizamu kuba banywani beye.—Rom 12:2.

Mbehi ninywa amarwa kugira ngu nyereke ku nyine amani? Omu micwe emwe n’emwe okunywa amarwa emirundi myingi n’okunywa amarwa mingi, ni ebintu ebishangirwe. (1 Pet 4:3) Omu 1 Bakorinto 16:13 nihagira ngu: ‘Mugume nimureba, muhamire omu kwikiriza, murwane mashija, mugume n’amani.’ Mbehi okunywa amarwa ni co ekiri kutuma omuntu yagira amani? Ingaha tiko kiri. Amarwa nigatuma omuntu yagamba kubi, kandi agira ebitecerezo bibi kandi akora n’ebintu bibi. Obwe rero omuntu ku ari kunywa amarwa mingi, tari kugira amani ahobwe nabura amani. Omuri Isaya 28:7 nihagamba ku omuntu w’omusinzi ari kuhabisibwa n’amarwa, kandi eco nikituma yatera ensibo.

Amani aga buzima nigaruga ahari Yehova kandi eco nikitwariramu ‘okuguma turi misho n’okuhama omu by’okwikiriza.’ (Zab 18:32) Obwe rero Omukristo okuzire omu by’omwika naguma ari misho kandi akora ebintu ebiri kumurinda omu buryo bw’omwika. Yesu akereka amani nk’ago obu yabire ari omu nsi kandi abingi bakamuha ekitinisa nk’omushija w’amazima kandi oyine obumanzi.

Mbehi ninywa amarwa kugira ngu nyehuzye ebizibu ebi nyine? Omuhandiki wa Zaburi akahandika  ngu: ‘Ku ntekateka byingi, nayemereza omutima, okuhumuriza kwawe kugwisa ge amagara gange.’ (Zab 94:19) Wahurira ocwekire entege ahabw’ebizibu, guma orondere obuyambi ahari Yehova omu mwanya g’okunywa amarwa. Kugira ngu eco okihikeho oshemerire kushaba Yehova munonga. Nambwenu abingi bakareba ku kiri ec’omugasho kurondera obuyambi ahari banywani babo abakuzire omu kibina. Obwe rero tikirungi kunywa amarwa waba oyine ebizibu ahabw’okuba nikituma omuntu yagira emicwe mibi, kandi akora ebintu bibi. (Hos 4:11) Daniel owu twagambaho, akagamba ngu: “Nkaba nintura ndi kwemereza omutima kandi ndi kwecwera orubanja. Nkaba ninywa amarwa kugira ngu nyeyebwese ebizibu ebi nabire nyine konka bikagumizamu kweyongera kandi kikatuma naferwa abanywani bange kandi nayehurira nk’otine mugasho.” Ni enki ecakwasize Daniel? Akagamba ati: “Nkareba ku nabire ndi kwetenga Yehova atari amarwa. Nkabasa kwehanganira ebizibu ebi nabire nyine, kandi nabisingura.” Ebizibu ebi twakuba turi kurabamu oku byakuba biri kona, tushemerire kwesiga ku Yehova arije kutuha obuyambi.—Fil 4:6, 7; 1 Pet 5:7.

Waba obumwe washaramu kunywa amarwa nobasa kubanza wayebuza ebi bibuzo otakaganywire: ‘Mbehi hariho bamwe omu b’omu ka yange ninga munywani wange owagizire eki yangambira aha ku ndi kunywa amarwa?’ Caba ariko oku kiri, nikiba nikereka ku oyine ekizibu eki iwe otari kumanya. ‘Mbehi ninywa amarwa agari kukira agu nabire ninywa?’ Eco ni co ekiri kwereka omuntu owatandika kubatwa n’amarwa. ‘Mbehi nikingumira kumara obwire buringwa ninga ebiro bice ntanywire amarwa?’ Ku kirabe kiri kisyoya manya ku wabasirwe n’amarwa. Obwe rero noba ori kwetenga n’obuyambi bw’abadokita.

Hariho Abakristo abarugire kimwe aha amarwa, ahabw’engaruka ezi gabagizireho. Abandi bo bakasharamu kugarugaho ahabw’okuba gatari kubanurira. Yaba omwe omuri banywani bawe yasharamu kutanywa amarwa oshemerire kwereka embabazi ori kwerinda kumugema ahabw’ensharamu yeye.

 Ninga nobasa kukoresa obwenge oyeteraho obugarukiro. Omukristo ashemerire kweteraho obugarukiro, aha bikwatirine n’amarwa agu ashemerire kunywa. Ninga shi nabasa kweteraho ebiragiro by’oku ashemerire kuganywa nk’okuganywa rimwe omu sande, ninga aguma kuganywa yamara kurya. Abandi baketeraho obugarukiro bw’emiringo y’amarwa agu bashemerire kunywa nk’ecokureberaho nk’okunywa vinyo ninga amarwa gorobi ayerinda kunywa amarwa agagumire ninga agajwangajwangire. Omuntu yayeteraho obugarukiro bw’amarwa agu aranywe, nikija kumukwasa yagumizamu kuba ni go agu yanywa. Obwe rero Omukristo okuzire omu buryo bw’omwika tashemerire kwitwa nshoni ahabw’ensharamu eyi yakozire.

Okufa aha bandi nayo ni enshonga eyi tushemerire kutecerezaho. Omu Baroma 14:21 nihagira ngu: ‘Ni kirungi okutarya nyama, ninga okunywa vinyo, ninga okukora ekintu cona ekiri kuteza mwene Sho ensibo.’ Ni bata oku turi kubasa kukuratiza obwo buhabuzi? Ni okwereka rukundo ya benetata. Wamanya ku kunywa amarwa kiri kuteza abandi ensibo rukundo eyi ori kukunda abandi nebasa kutuma wareka kuganywa omuri obwo bwire. Wakora eco noba wayereka ku nofa aha bandi kandi okabaha ekitinisa omu mwanya g’okufa aha byawe wenka.—1 Kor 10:24.

Nambwenu gavumenti nebasa kutaho ebiragiro ebiri kukwata aha marwa kandi Omukristo ashemerire kubyorobera. Ebyo biragiro nibibasa kutaho emyaka eyi omuntu ashemerire kunyweraho amarwa ninga bizibira omuntu kunywa amarwa yaba avugire ninga yaza kukoresa endijo mashini.—Rom 13:1-5.

Yehova akatuha obugabe bw’okweshariramu kugira ngu tushemerererwe ebiconco ebi yatuhire. Omuri ebyo biconco harimu ekiconco c’okusharamu ebi tushemerire kurya n’ebi tushemerire kunywa. Nimureke ebi turi kusharamu byereke ku turi kusima aha bw’ekiconco c’okweshariramu eki twine turi kusharamu ebiri kushemeza Tata witu w’omu iguru.