1. Twashwijuma ecokureberaho ca Aburahamu, ni kiha kibuzo eki turi kubasa kwebuza?

 N’OBU abantu bingi bari kumanya Aburahamu, abingi omuri bo tibari kumumanyaho ebintu byingi. Konka, iwe nomanya byingi ahari Aburahamu. Ecokureberaho: nomanya ku Aburahamu ari kwetwa ‘shwenkuru wa bona abine okwikiriza.’ (Rom 4:11) Nobasa kwebuza ngu: ‘Mbehi nimbasa kutoreza Aburahamu nyereka okwikiriza nk’oku yabire ayine?’ Yego mazima nikibasika.

2. Ahabw’enki kiri ec’omugasho kushwijuma ecokureberaho ca Aburahamu? (Yakobo 2:22, 23)

² Oburyo bumwe obu turi kubasa kutorezamu ecokureberaho ca Aburahamu ni okwega ecokureberaho ceye. Ahabw’ekiragiro ca Ruhanga, Aburahamu akafurukira omu ihanga rya hare yaza kutura omu mahema omu bwire bw’emyaka myingi kandi akikiriza no kutamba omwana weye owu yabire ari kukunda Isaka. Ebyo bintu byona ebi yakozire bikaba nibyereka ku yabire ayine okwikiriza kugumire. Ahabw’okwikiriza kweye n’emirimo yeye mirungi, Yehova akamwikiriza kandi yaba munywani weye. (Shoma omuri Yakobo 2:22, 23.) Yehova nayenda ngu twena harimu n’iwe tutunge eyo migisha. Ni yo shonga eyi twaza kushwijuma oku omu Baroma ekicweka ca 4 n’omuri Yakobo ekicweka ca 2 hari kugamba ahari Aburahamu. Ebyo bicweka byombi nibigamba ebintu by’omugasho ebiri kukwata ahari Aburahamu.

3. Ni ruha runyiriri rw’omuri Bibuli oru Pawulo na Yakobo bayihiremu ebi bahandikire?

³ Pawulo na Yakobo, bombi bakagamba aha bigambo ebiri omu Kutandika 15:6, ahari kugamba ngu: ‘[Aburahamu] akikiriza Yehova, Yehova yakimubarira kuba ohikirire.’ Yehova nareba omuntu nk’ohikirire yaba nakora ebintu ebihikire. Mazima nikitangaza kumanya ku omuntu w’omusisi ari kubasa kwetwa ohikirire  omu misho ga Ruhanga! Hatariho okubanganisa, n’iwe ni co eki ori kwenda kandi nikibasika. Kugira ngu turebe oku kiri kubasika, tushemerire kubanza kureba eki Aburahamu yakozire kugira ngu kibasike.

4. Ahabw’enki abantu bari kutecereza ku batari kubasa kuba abahikirire?

⁴ Omu baruha eyi Pawulo yahandikire Abaroma, akagamba ku twena turi abasiisi. (Rom 3:23) Mbwenu shi, ni bata oku omuntu ari kubasa kuba ohikirire kandi ayikirizibwa na Ruhanga? Kugira ngu Pawulo akwase Abakristo bona kugarukamu eco kibuzo, akakoresa ecokureberaho ca Aburahamu.

5. Ni enki ecatumire Yehova yayeta Aburahamu ohikirire? (Abaroma 4:2-4)

⁵ Yehova aketa Aburahamu ohikirire obu yabire atwire omu ihanga rya Kanani. Ahabw’enki Yehova yayesire Aburahamu ohikirire? Mbehi ni ahabw’okuba Aburahamu yabire nayorobera ebiragiro bya Yehova omu bwijwire? Ingaha mazima. (Rom 4:13) Ebiragiro bikahebwa ihanga rya Isirayeli hahwire emyaka eri kurenga 400 Ruhanga agambire Aburahamu ku ari ohikirire. Mbwenu shi ni enki eki Yehova yagendireho ari kweta Aburahamu ohikirire? Yehova akereka esaasi Aburahamu yamweta ohikirire ahabw’okwikiriza kweye.—Shoma omu Baroma 4:2-4.

6. Ahabw’enki Yehova ari kubasa kureba abantu b’abasiisi nk’abahikirire?

⁶ Pawulo akongera yagamba ku omuntu oyine okwikiriza, ‘okwikiriza kweye kuri kumubarirwa okuba ohikirire.’ (Rom 4:5) Pawulo akongeraho ati: ‘Nk’oku Dawudi na we yagambire aha mugisha oguhebwa omuntu owu Ruhanga abarira okuhikirira, okutari habw’okukora emirimo, ati: Bine omugisha abasaasirwe eby’okushisha byabo, n’ebibi byabo bikashwekwa. Ayine omugisha omuntu owu Mukama ataribarira kibi.’ (Rom 4:6-8; Zab 32:1, 2) Ruhanga nayehanganira kandi ashweka ebibi by’abantu abari kumwikiriza. Nabasaasira omu bwijwire kandi tari kushuba kwijuka enshobe zabo. Nareba buri muntu nk’omwesigwa kandi amubaraho okuhikirira ahabw’okwikiriza kweye.

7. Ahabw’enki turi kubasa kugamba ku abahereza ba Ruhanga b’omu bwire bwa kare babire abahikirire?

⁷ N’obu Aburahamu, Dawudi n’abandi bahereza ba Ruhanga bayesirwe abahikirire, na bo bakaba bari abasiisi. Konka ahabw’okwikiriza, Ruhanga akabareba nk’abesigwa, namunonga yabagereranisa n’abantu ababire batari kumuramya. (Efe 2:12) Nk’oku Pawulo yabigambire omu baruha eyi yahandikire Abaroma, akereka ku okwikiriza ari ekintu c’omugasho ekiri kubasa kutukwasa kuba banywani ba Ruhanga. Okwikiriza ni ko okwakwasize Aburahamu na Dawudi, kandi n’itwe nikubasa kutukwasa.

8-9. Ni eha mitecerereze mibi eyi abantu bari kukunda kugira aha bi Pawulo na Yakobo bahandikire, kandi shi ahabw’enki?

⁸ Omu myaka myingi ehwire, ababebembezi b’amadini bingi bakaganira ahu okwikiriza kuri kubuganira n’emirimo. Bamwe omu begesa b’amadini bakagamba ku omuntu ashemerire kubanza kwikiriza Mukama witu Yesu Kristo kugira ngu abase kwija kujunwa. N’iwe nobasa kuba wahurireho ebigambo ebiri kugira ngu: “Yikiriza Yesu ojunwe.” Hine n’obu abebembezi b’amadini bari kugarukamu ebigambo bya Pawulo ebiri kugira ngu: ‘Ruhanga abarira okuhikirira okutari ahabw’okukora emirimo.’ (Rom 4:6) Konka abandi nibagamba ku ori kubasa kujunwa waza kutayayira emyamya eri kurebwa nk’eri kwera, oza kuramiza omu kanisa, kandi okora n’ebindi bikorwa birungi ebi omu kanisa bari kukushaba. Eco nibabasa n’okukihamya bakoresize ebigambo ebiri omuri  Yakobo 2:24 ahari kugira ngu: ‘Omuntu ayihwaho orubanja ahabw’okukora atari ahabw’okwikiriza konka.’

⁹ Ebyo bitecerezo bikatuma bamwe omu bahandiki b’abanyamadini bagamba ku Pawulo yabire atari kwirizingana na Yakobo aha bikwatirine n’okwikiriza n’emirimo. Abo banyamadini nibabasa kugamba ku Pawulo yabire ari kwikiriza ku omuntu ari kubasa kwetwa ohikirire ahabw’okwikiriza atari ahabw’emirimo, omu bwire obu Yakobo we yabire ari kwikiriza ku emirimo ari yo eri kubasa kutuma omuntu yaba ohikirire omu misho ga Ruhanga. Hine omunyedini owagambire ati: “Yakobo akaba atari kumanya eshonga eyatumire Pawulo yagamba ku omuntu ari kuba nayetenga okwikiriza kusha kugira ngu ayetwe ohikirire ku atari emirimo.” Konka Yehova ni we owahumekire Pawulo na Yakobo ngu bahandike byona ebi bahandikire. (2 Tim 3:16) Obwe rero, ebigambo byabo hine ekindi eki biri kumanyisa. Tushemerire kubanza twamanya ebindi ebi bahandikire omu mabaruha gabo kugira ngu tubishoborocerwe ge.

10. Ni eha mirimo Pawulo yabire ari kugambaho? (Abaroma 3:21, 28) eyi (Nambwenu reba ekishushani.)

¹⁰ Ni eha ‘mirimo’ eyi Pawulo yabire ari ari kugamba omu Baroma ekicweka ca 3 na 4? Ecokubanza akaba ari kugamba aha mirimo y’ebiragiro ni okugamba ebiragiro bya Musa ebi yahibwe aha mushozi gwa Sinayi. (Shoma omu Baroma 3:21, 28.) Nikirebeka ku omu bwire bwa Pawulo habire hariho Abakristo abu cabire kicagumira kukuratiziza ebiragiro bya Musa n’okukora ebikorwa ebyabire nibishabwa n’ebyo biragiro. Obwe rero, Pawulo akakoresa ecokureberaho ca Aburahamu kugira ngu ayereke ku omuntu atari kuba nashabwa kukuratiza ebiragiro bya Musa kugira ngu abe ohikirire omu misho ga Ruhanga. Ahobwe tushemerire kugira okwikiriza. Obwe rero eco nikitugaruramu amani ahakuba okumanya eco nikituma twayesiga  ku turi kubasa kuba abahikirire omu misho ga Ruhanga. Eco nikimanyisa ku twayikiriza Ruhanga na Kristo omu bwijwire, turi kubasa kwetwa abahikirire.

11. Ni eha mirimo eyi Yakobo yabire ari kwenda kumanyisa?

¹¹ Konka nambwenu, ‘emirimo’ eri kugambwa omuri Yakobo ekicweka ca 2 ti ‘emirimo y’ebiragiro’ eyi Pawulo yagambireho. Yakobo akagamba aha mirimo ninga shi ebikorwa ebi Abakristo bari kuba bashemerire kukora omu kubaho kwabo. Eyo mirimo ni yo eri kwereka ku Omukristo ari kwikiriza Ruhanga ninga atari kumwikiriza. Reka turebe ebyokureberaho bibiri ebi Yakobo yakoresize.

12. Ni bata oku Yakobo yashoborwire akakwate akari ahagati y’okwikiriza n’emirimo? (Nambwenu reba ekishushani.)

¹² Omu cokureberaho c’okubanza, Yakobo akagamba aha bi Abakristo bari kuba bashemerire kukora kugira ngu berinde kushorora omu kubaho kwabo. Akegesa eryo shomo akoresize ecokureberaho c’omuntu ori kwereka ekitinisa omugiga, konka areba omucene nk’omuntu otine mugasho. Yakobo akereka ku ogo muntu ari kubasa kurebeka nk’oyine okwikiriza, konka nambwenu emirimo yeye eyereka ku atakwine. (Yak 2:1-5, 9) Omu cokureberaho ca kabiri, Yakobo akagamba aha muntu ori kureba mwenishe ninga shi munyanyazi atine eco kujwara ninga ebyokurya konka akanga kumuyamba. N’obu ogo muntu ari kubasa kurebeka nk’oyine okwikiriza, ebikorwa byeye nibiba biri kwereka ku atakwine. Nk’oku Yakobo yabihandikire ‘okwikiriza konka okutine kukora nikuba kufire.’—Yak 2:14-17.

13. Ni kiha cokureraho eki Yakobo yakoresize ekiri kwereka ku turi kuba tushemerire kugira okwikiriza konka nambwenu tukakora ebikorwa birungi? (Yakobo 2:25, 26)

¹³ Yakobo akagamba ku Rahabu ari ecokureberaho kirungi aha bikwatirine n’okugira  okwikiriza okwine emirimo. (Shoma omuri Yakobo 2:25, 26.) Rahabu akaba yahurire ebiri kukwata ahari Yehova kandi yamanya n’oku Yehova yabire ari kushagika Abisirayeli. (Yos 2:9-11) Akereka ku yabire ayine okwikiriza omu bikorwa ari kushereka entasi ibiri. Eco kikatuma ogo mukazi owabire atahikirire, yayetwa ohikirire nk’oku byagenzire ahari Aburahamu. Ecokureberaho eki yatuterireho nicereka omugasho g’okugira okwikiriza okwine emirimo.

14. Ni bata oku ebi Pawulo na Yakobo bahandikire biri kwikirizingana?

¹⁴ Obwe rero abahandiki babiri ba Bibuli Pawulo na Yakobo, bakagamba aha bikwatirine n’okwikiriza n’emirimo omu buryo bubiri konka oburi kutana. Pawulo akaba ari kugambira Abakristo b’Abayudaya ku batari kubasa kuba abahikirire omu misho ga Yehova ahabw’okukora emirimo eyabire eri kugambwa omu biragiro bya Musa kusha. Konka Yakobo we, akaba ari kusindagiriza ku Abakristo twena tushemerire kwereka okwikiriza turi kukorera abandi ebirungi.

15. Ni buha buryo bumwe obu turi kubasa kwerekamu okwikiriza birabire omu bi turi kukora? (Nambwenu reba ekishushani.)

¹⁵ Yehova tari kutushaba ngu yaba turi kwenda kuba abahikirire omu misho geye tukore ebintu ebiri kushushana ge n’ebi Aburahamu yabire nakora. Ni amazima, hariho oburyo bwingi obu turi kubasa kwerekamu ku twine okwikiriza birabire omu bikorwa. Nitubasa kwakira abasya omu kibina, tuyamba benetata na banyanyazi omu bi bari kwetenga, kandi tukorera ab’omu maka gitu ebirungi. Ebyo nibishemeza Yehova kandi nibyija kutuma yatuha emigisha. (Rom 15:7; 1 Tim 5:4, 8; 1 Yoh 3:18) Omurimo oguri kukira endijo ogu turi kubasa kwekwatanisamu tukereka ku twine okwikiriza, ni okuburira abandi obutumwa burungi tutiremu amani.  (1 Tim 4:16) Twena nitubasa kwereka ku twine okwikiriza turi kukora ebintu ebiri kwereka ku turi kwesiga ku ebiraganiso bya Yehova birije kuhikirira kandi ku emihanda yeye ari yo ehikire. Eco ku turakikore, nitwija kwesiga tutari kubanganisa ku Ruhanga arije kutureba nk’abahikirire kandi kandi nayija kutweta banywani beye.

16. Ni gaha masiko agu Aburahamu yabire ayine kandi shi ni enki eki yabire ari kwikiriza?

¹⁶ Omu Baroma ekicweka ca 4 nihereka erindi shomo eri turi kubasa kwegera ahari Aburahamu aha bikwatirine n’amasiko. Yehova akaraganisa ku amahanga mingi gabire garahebwe omugisha birabire ahari Aburahamu. Gezaho kutecereza oku eco kiraganiso catumire Aburahamu yagira amasiko! (Kut 12:3; 15:5; 17:4; Rom 4:17) Konka, Aburahamu akahisa emyaka 100 kandi na Sara yahisa emyaka 90, batakazire omwana. Tukuratize oku abantu bari kureba ebintu, kikaba kitari kubasika ku Aburahamu na Sara bakuzara abana. Mazima eco kikaba kiri ekigezo ahara Aburahamu. ‘Konka akikiriza yagira amasiko omu bwire obu yakugahwiremu, ngu aryaba shwenkuru w’amahanga mingi.’ (Rom 4:18, 19) Kandi akikiriza atari kubanganisa ngu amasiko geye nigija kuhikirira. Akija kuzara Isaka, kandi na we akaba ayine amasiko nk’ag’ishe.—Rom 4:20-22.

17. Nitumanya tuta ku turi kubasa kubarwaho okuhikirira nk’abanywani ba Ruhanga?

¹⁷ N’itwe Ruhanga nabasa kutwikiriza kandi tuba abahikirire omu misho geye nk’abanywani beye. Eco ni co eki Pawulo yasindagirize obu yahandikire ngu: ‘Tikiramuhandikirweho wenka, ngu kikamubarirwaho kuba ohikirire [Aburahamu], kureka ahabwitu n’itwe abaribarirwa okuhikirira, itwe abari kwikiriza Ogo owazorire Yesu.’ (Rom 4:23, 24) Kimwe na Aburahamu, n’itwe nitwetenga kwikiriza Yehova, tukora emirimo mirungi kandi twikiriza tutari kubanganisa ku ebi yaraganisize birije kuhikirira. Pawulo akagumizamu ari kushoborora ebikwatirine n’amasiko gitu omu Baroma ekicweka ca 5, kandi ebyo ni byo ebi turije kushijwuma omu kicweka ekiri kukurataho.