1. Ni bata oku turi kuguma “twine obwenge”? (2 Timoteyo 4:5)

 TWABUGANA ebizibu, obwesigwa bwitu ahari Yehova n’ekitongore ceye nibibasa kugezibwa. Ni bata oku turi kubasa kusingura ebyo bizibu? Tushemerire kwerinda kandi tuguma turi misho, turi “kuhamira aha mazima.” (Shoma omuri 2 Timoteyo 4:5.) Twaguma tuturize, tukatecereza ge kandi tukatamu amani kugira ngu turebe ebintu nk’oku Yehova ari kubireba, nikituma twaguma twine obwenge. Twakikora tusyoya, emitecerereze yitu terije kutegekwa n’enyehurira zitu.

2. Ni enki eki twaza kushwijuma omuri eki kicweka?

² Omu kicweka ecabandirize eki, tukareba ebizibu bishatu ebi turi kubasa kubugana aheru y’ekibina. Omuri eki kicweka, twaza kushwijuma ebizibu bishatu ebiri kubasa kuruga omu kibina bikatuma twareka kuhamira ahari Yehova. Ebyo bizibu ni: (1) Omukristo mugenzi witu yatutwariza kubi, (2) twahebwa ekihano, na (3) caba kitugumire kumanyira empinduka nsya z’ekitongore ca Yehova. Ni bata oku turi kubasa kuguma tuturize kandi tukahamira ahari Yehova n’ekitongore ceye twabugana ebyo bizibu?

3. Ni bata oku turi kubasa kutwaza Omukristo mugenzi witu yatutwarize kubi?

³ Mbehi Omukristo mugenzi wawe oyine obujunanizibwa omu kibina yarakutwarize kubi? Ogo mwenetata nabasa kuba yabire atakigenderire. (Rom 3:23; Yak 3:2) Konka eki  yakozire, nikibasa kuba cakugwisize kubi. Nobasa kuba waremirwe kunyama ori kubitecerezaho. Nobasa kuba wabanganisize aha kitongore ca Ruhanga. Oko ni ko Sitane ari kwenda ngu oyehurire. (2Kor 2:11) Ebyo nibibasa kukutanisa na Yehova n’ekitongore ceye. Mbwenu shi mwenetata ninga munyanyazi yakutwariza kubi, ni enki ekirije kukukwasa kuguma oyine obwenge, okerinda kugira emitecerereze mibi?

4. Ni enki ecakwasize Yosefu kuguma ayine obwenge n’obu bamutwarize kubi, kandi shi ni enki eki turi kwegera aha cokureberaho ceye? (Okutandika 50:19-21)

⁴ Guma oyerinde kugubwa kubi munonga. Obu Yosefu yabire acari muto, benishe bakamutwariza kubi. Bakamwanga, kandi bamwe omuri bo bakaba bari kwenda kumwita. (Kut 37:4, 18-22) Bwanyima, bakamuguza omu bugaragwa. Eco kikatuma Yosefu yabugana ebigezo byingi ebyamazire emyaka eri kuhika ahari 13. Yosefu akaba nabasa kubanganisa yaba Yehova acamukunda. Kandi akaba nabasa kutecereza ngu Yehova akamusigaho omuri obwo bwire bugumire. Konka Yosefu taragwirwe kubi munonga. Omu mwanya gw’eco, akaguma aturize. Ku yabire ayine oburyo bw’okwehorera ahari benishe, tarakikozire, ahobwe akabereka rukundo kandi yabasaasira. (Kut 45:4,5) Yosefu akatwaza basyoya ahakuba akaba natecereza ge. Omu mwanya g’okuta omutima aha bizibu ebi yabire ayine, akaguta aha kigendererwa ca Yehova. (Shoma omu Kutandika 50:19-21.) Ebyo nibitwegesa ki? Watwarizibwa kubi, otanyigira Yehova ninga shi ngu otecereze ku yakusigireho. Omu mwanya gw’eco, guma otecereze oku ari kukukwasa kwehanganira ebigezo. Nambwenu, abandi bakutwariza kubi, ogume obasaasire kandi oyijuke ku “rukundo eri kushweka ebibi byingi.”—1Pet 4:8.

5. Ni enki ecakwasize Miqueas kuguma aturize ku bamutwarize kubi?

⁵ Reba ecokureberaho c’omuri obu bwire c’omuzehe w’omuri Amerika y’Amashuma ori kwetwa Miqueas. b Nayijuka obwire obu benetata abine obujunanizibwa bamutwarize kubi. Akagamba ati: “Tinkehuriraga nk’oku nayehurire. Nkatina munonga. Nkaba ntari kubasa kunyama nyekiro, kandinkaba nindira ahabw’okuhurira hatine eki ndi kubasa kubikoraho.” Konka, Miqueasakaguma aturize kandi yagezaho kutegeka enyehurira zeye. Akashaba munonga ari kweshengereza Yehova ngu amuhe omwika gweye oguri kwera kandi amuhe amani g’okwehangana. Nambwenu akarondesa obuhabuzi omu bitabo byitu. Ebyo nibitwegesa ki? Mwenetata ninga munyanyazi yakutwariza kubi, guma oyine obwenge kandi ogezeho kutegeka enyehurira zawe. Nobasa kuba otari kumanya ecatuma ogo muntu yakora ninga shi yagamba ekintu ecakugwisa kubi. Obwe rero, bigambire Yehova omu kushaba, kandi omushabe ngu akukwase kureba ebintu nk’oku ari kubireba. Ku orakikore, nikibasa kukukwasa kusaasira ogo muntu kandi otabika enzika. (Emi 19:11) Yijuka ku Yehova ari kumanya embera zona kandi ku arije kukuha amani g’okwehangana.—2Bus 16:9; Mub 5:8.

6. Ahabw’enki kiri ec’omugasho kureba ekihano nk’ekikorwa ca Yehova ca rukundo? (Abaheburayo 12:5, 6,11)

⁶ Ekihano nikishasha. Konka twata omutima ahari obwo busaasi, nitubasa kutandika kureba eco kihano nk’ecorobize, turi kutecereza ngu caba kitari kwetengesa ninga shi ngu kirengeserize. Eco nikibasa kutuma twaferwa ekintu c’omuhendo, ni okugamba okureba ekihano nk’ekikorwa ca Yehova ca rukundo. (Shoma omu Baheburayo 12:5, 6, 11.) Kandi twayikiriza ngu enyehurira zitu zitutegeke, nituba twaha Sitane omwanya g’okushisha enyehurira zitu. Nayenda ngu twange ekihano kandi ekibi munonga, nayenda ngu twetanise ahari Yehova n’aha kibina. Waba ori kuhebwa  ekihano, ni bata oku ori kubasa kuguma oturize?

7. (a) Nk’oku kiri kwerekwa omu kishushani, ni bata oku Yehova yakoresize Petero ku yayikirize ekihano? (b)Ni enki eki ori kwegera aha cokureberaho ca Petero?

⁷ Yikiriza ekihano kandi okore empinduka. Emirundi erengire ahari gumwe, Yesu akakosora Petero omu misho g’ezindi ntumwa. (Mar 8:33; Luk 22:31-34) Mazima eco kikaba nicentenga obucurezi bwingi! Konka, Petero akaguma ahamire ahari Yesu. Akikiriza ekihano kandi yayegera aha nshobe zeye. Eco kikatuma Yehova yahemba Petero ahabw’okumuhamiraho kandi yamuha endijo mirimo omu kibina. (Yoh 21:15-17; Byak 10:24-33; 1Pet 1:1) Ni enki eki turi kwegera aha cokureberaho ca Petero? Nitugasirwa kandi tugasira abandi twayehuza okushwara okuri kuruga aha kihano, tukikiriza kukosorwa kandi tukakora empinduka. Twakikora tusyoya, Yehova nakizaho kutukoresa kandi tugasira benetata na banyanyazi.

8-9. Ni bata oku Bernardo yayehurire omu kubanza ku yatungire ekihano, konka shi ni enki ecamukwasize kuhindura emitecerereze yeye?

⁸ Reba ebyahikire ahari mwenetata Bernardo w’omuri Mozambique. Akihwa aha murimo g’okuba omuzehe w’ekibina. Ni bata oku Bernardo yayehurire omu kubanza? Akagamba ati: “Nkagubwa kubi ahakuba ntarakunzire ekihano eki nahibwe.” Akaba ayemerize omutima aha ku abandi b’omu kibina babire barije kumureba. Akagira ngu: “Kikantwara obwire kugira ngu ngire emitecerereze mirungi ahari ezo mbera n’okushuba kwesiga Yehova n‘ekitongore ceye.” Ni enki ecakwasize Bernardo kugira emitecerereze mirungi?

⁹ Bernardo akahindura emitecerereze yeye. Akashoborora ati: “Obu nabire ndi omuzehe, nkaba ninshomera abandi omu Baheburayo 12:7 ndi kubakwasa kureba ekihano ca Yehova omu buryo burungi. Nanye nkebuza ngu: ‘Hati ni oha ori kwetenga obwo buhabuzi?’ Ni abahereza ba Yehova bona harimu nanye.” Bwanyima Bernardo akagira entambwe ezi yatera kugira ngu ashube ayesige Yehova  n’ekitongore ceye. Akagira entebekanisa y’okushoma Bibuli n’okutecereza munonga aha bi yashoma. N’obu yabire ayemerize omutima aha ku benetata na banyanyazi babire barije kumureba, akakora na bo omu murimo g’okuburira kandi yaguma ari kwekwatanisa omu nterane. Bwanyima y’obwire, Bernardo akashuba yaba omuzehe w’ekibina. Nka Bernardo, n’iwe waba waratungireho ekihano, oyehuze okushwara oku kiri kureta, oyikirize kukosorwa kandi okore empinduka. c (Emi 8:33; 22:4) Ku orakikore basyoya, noyija kwesiga ku Yehova arije kukuha emigisha ahabw’okuguma omuhamireho kandi ohamire aha kitongore ceye.

10. Ni eha mpinduka y’ekitongore eyagerize Abisirayeli?

¹⁰ Empinduka z’ekitongore nizibasa kugeza obwesigwa bwitu. Twaba tutabire misho, nitubasa kuzikiririza kututanisa na Yehova. Ecokureberaho: Reba oku empinduka ezabireho omu bwire bw’Ebiragiro bya Musa zakwasire aha Bisirayeli. Batakahibwe ebiragiro, abebembezi b’amaka bakaba nibakora emirimo y’abatambi. Bakaba nibombeka amatambiro kandi batambira Yehova ebitambo omu mwanya gw’amaka gabo. (Kut 8:20, 21; 12:7; 26:25; 35:1, 6,7; Yob 1:5) Konka ebiragiro ku byatirweho, abebembezi b’amaka bakaba batacayikirizibwa kukora eyo mirimo. Yehova akataho abatambi ari kubiha omu muryango gwa Aroni ngu bagume bamutambire ebitambo. Ezo mpinduka ku zatandikire, omwebembezi w’eka owabire atari ow’omu muryango gwa Aroni owabire nakora emirimo y’abatambi, akaba nayitwa. d (Lev 17:3-6, 8, 9) Mbwenu shi ni co ecatumire Kora, Datani, Abiramu, n’abandi bategeki 250 bagomera Musa na Aroni? (Kub 16:1-3) Eco tituri kukihamya. Eki turi kumanya ni oku Kora na bagenzi beye baremirwe kuhamira ahari Yehova. Habaho empinduka omu kitongore, ni enki eki oshemerire kukora?

11. Ni enki eki turi kwegera aha cokureberaho c’Abalevi bamwe b’omu muryango gwa Kohati?

¹¹ Shagika empinduka z’ekitongore omu bwijwire. Obu Abisirayeli babire bari omu butayo, Abakohati bakaba bine omurimo g’omutano. Abisirayeli ku babire nibaza kufuruka, bamwe omu b’omu mu muryango gwa Kohati bakaba nibegura eshanduku y’endagano omu misho g’abantu bona. (Kub 3:29, 31; 10:33; Yosh 3:2-4) Mazima ogwe gukaba guri omurimo g’omutano! Konka, ebintu bikahinduka obu Abisirayeli bahikire omu ihanga eryabire ryaraganisibwe. Bakaba batacayetenga kuheka eshanduku y’endagano burijo. Obwe rero omu bwire bw’Omugabe Solomoni, bamwe omu b’omu muryango gwa Kohati bakaba abeshongozi, abarinzi b’amarembo, kandi abandi baba ab’okureberera amaju g’okuhunikamu. (1Bus 6:31-33; 26:1, 24) Tihariho ahari kwereka ku Abakohati bagomire ahabw’okubura omurimo gwabo ogwabire gushambire. Ebyo nibitwegesa ki? Guma oshagike empinduka z’ekitongore ca Yehova n’omutima gwawe gona, harimu n’eziri kubasa kutuma wahindurirwa emirimo. Guma oshemerererwe omurimo gwena ogu wahebwa. Yijuka ku omurimo ogu oyine omu kibina atari ogo oguri kutuma waba ow’omuhendo ahari  Yehova. Yehova nakureba nk’ow’omuhendo wamworobera.—1Sam 15:22.

12. Ni bata oku Zaina yayehurire ku yahindurirwe emirimo yeye y’ahari Beteli?

¹² Reba ecokureberaho ca munyanyazi Zaina owaferirwe omurimo gweye ogu ari kukunda ahabw’empinduka. Akaba omupayoniya w’omutano bwanyima y’okumara emyaka eri kurenga ahari 23 ari kukora ahari Beteli. Akagamba ati: “Ezo mpinduka zikantungura munonga. Nkehurira nk’otine mugasho kandi naguma ndi kwebuza ebi nashobize.” Ekiri kushasha, bamwe omuri benetata na banyanyazi b’omu kibina ceye bakongera aha busaasi bweye bari kumugambira ngu: “Kuri wabire ori kwetengwa, ekitongore caba kitarakwikirize kurugayo.” Zaina akamara obwire ahendekire omutima kandi akaba narira buri kiro. Konka akagira ati: “Tindikirize ngu bitume nabanganisa aha kitongore ca Yehova n’ahari rukundo ya yeye.” Ni enki ecakwasize Zaina kuguma aturize?

13. Ni enki ecakwasize Zaina kusingura enyehurira mbi ezi yabire ayine?

¹³ Zaina akasingura enyehurira zeye. Ni enki ecamukwasize? Akashoma ebicweka by’omu bitabo byitu ebiri kukwata aha mbera zeye. Ekicweka ekiri kugira ngu: “Nobasa kwehanganira okwemereza omutima!” omu Munara g’Omurinzi gw’aha kiro ca 1, 2001, kikamukwasa munonga. Eco kicweka nikishoborora oku omuhandiki wa Bibuli ori kwetwa Mariko yagizire enyehurira nk’ezo obu yahindurirwe emirimo. Zaina akagamba ati: “Ecokureberaho ca Mariko kikankwasa munonga kusingura okwemereza omutima.” Nambwenu Zaina akaguma hihi na banywani beye. Tarayetarwire aha bandi ninga ngu ayesaasibwe. Akerebera oku omwika gwa Yehova guri kukoresa ekitongore ceye kandi ku abari kwebembera ekibina bari kumufaho munonga. Konka nambwenu akerebera ku ekitongore ca Ruhanga kishemerire kukora cona eki kiri kubasa kugira ngu omurimo gwa Yehova gukorwe.

14. Ni ziha mpinduka z’ekitongore ezagumire Vlado, kandi shi ni enki ecamukwasize?

¹⁴ Omuzehe w’ekibina w’emyaka 73 ori kwetwa Vlado w’omuri Siloveniya, kikamugumira obu ekibina ceye cashabirwe kwekwatanisa n’ekindi kibina kandi Enju y’Obukama yabo ekakingwa. Akagambaati: “Nkaba ntari kushoborocerwa enshonga ahabw’enki bakingire eyo Nju y’Obukama  ndungi. Kikanshasha ahakuba ni bwo obu twabire tugihundurize. Ndi omubiji kandi nanye hine ebintu bisya ebi nabire nakozireho. Nambwenu hakabamu ebintu bisya ebyatumire itwe abakuzire catugumira.” Ni enki ecakwasize Vlado kushagika ezo mpinduka? Akashoborora ati: “Okumanyira empinduka nsya z’ekitongore ca Yehova harimu emigisha. Biri kututegurira empinduka z’amani eziri hihi kubaho juba aha.” Mbehi nikikugumira kumanyira empinduka eziri kuretwa n’okubuganisiza hamwe ebibina ninga shi okuhindurirwa emirimo? Guma oyesige ku Yehova ari kumanya enyehurira zawe. Ku orashagike ezo mpinduka kandi okahamira ahari Yehova n’ekitongore ceye, noyija kutunga emigisha myingi.—Zab 18:25.

15. Ni enki eki turi kubasa kukora kugira ngu tugume twine obwenge, twabugana ebizibu omu kibina?

¹⁵ Oku turi kukizaho kuhika hihi n’omuheru gw’egi nsi, ni ko turije kubugana ebizibu omu kibina. Ebyo bizibu nibibasa kutuma twareka kuhamira ahari Yehova. Obwe rero tushemerire kuguma twine obwenge. Omukristo mugenzi wawe yakutwariza kubi, otayikiriza ngu bikugwise kubi munonga. Wahebwa ekihano, otata omutima aha kushwara oku kiri kureta, ahobwe oyikirize kukosorwa, kandi okore empinduka. Kandi omu kibina ca Yehova habamu empinduka zikakukwataho, ozishagike kandi ozorobere.

16. Ni enki eki ori kubasa kukora kugira ngu ogume kwesiga Yehova n’ekitongore ceye?

¹⁶ Nobasa kuguma ori kwesiga Yehova n’ekitongore ceye wagezibwa. Konka kugira ngu okikore, oshemerire kuguma oyine obwenge, ni okugamba kuguma oturize, okutecereza ge n’okureba ebintu nk’oku Yehova ari kubireba. Guma omaririre kweyegesa abantu b’omuri Bibuli abasingwire ebizibu nk’ebyawe kandi otecereze aha ki ori kubasa kubegeraho. Guma oshabe Yehova obuyambi. Kandi otariyetanisa aha kibina. Ku orabikore, tihine eki Sitane arije kukora ngu kikutanisa na Yehova n’ekitongore ceye.—Yak 4:7.