Ntakabagambire ebyakuratireho, rekambagambire oku natandikire omurimo g’obwire bwona.

Nkazarwa omu mwaka gwa 1942 omu kirwa kirungi c’omuri Karibiyani, ekiri kwetwa Kurasawo. Tata ni ow’omuri Suriname, konka akaba yafurukire ahari eco kirwa ahabw’emirimo. Hari kubura emyaka mice ngu nzarwe, akaba ari omu Bahamya b’okubanza ababatizibwe omuri Kurasawo. a Akaba nayega Bibuli n’itwe buri sande, n’obu twabire tutari kwenda kwega. Obu nabire nyine emyaka 14 twena akatufururira omuri Suriname, ahakuba akaba yaza kureberera nyina owabire akuzire.

Ku twahikire omuri Suriname, nkatandika kwekwatanisa n’abanywani abacari bato b’omu kibina, ababire bari kukorera Yehova bine amani. Bakaba nibankiza emyaka mice kandi bariabapayoniya b’obwire bwona. Ku babire nibagamba ebirungi ebi babwine omu murimo g’okuburira,bakaba nibabigamba bashemerirwe munonga aha misho. Bwanyima y’enterane, nyowe na banywani bange, tukaba nitukunda kuganira ahari Bibuli kandi obumwe tuganira turi aheru buri nyekiro. Abo banywani bakatuma namanya eki nabire ndi kwenda; nkaba ninyenda kukorera Yehova. Obwe rero ku nahikize emyaka 16 nkabatizibwa.Bwanyima ku nahikize emyaka 18, nkaba omupayoniya w’obwire bwona.

Amashomo mingi agu nayegire ndi omupayoniya, ni go agankwasize kukora ge omurimo g’obwire bwona. Ecokureberaho: Ishomo ry’okubanza eri nayegire, ni omugasho g’okumanyiza abandi. Obu nabire omupayoniya, omumishonari ori kwetwa Willem van Seijl akanyamba munonga. b Akanyegesa byingi aha ku ndi kubasa kufa aha mirimo y’ekibina. Omuri obwo bwire,  nkaba ntari kumanya ku ndi kwetenga oko kumanyirizibwa munonga. Omu mwaka ogwakuratireho, nkaba omupayoniya w’omutano kandi bwanyima nkatandika kwebembera emitwe y’omu bucweka bwa hare omu ihamba rya Suriname. Ninyesima munonga ahabw’okumanyizibwa oku benetata bampire omu bwire obuhikire! Okuruga obwo, nanye nkatoreza ecokureberaho cabo ndi kumanyiza abandi.

Ishomo rya kabiri eri nayegire, ni okubaho omu buryo bworobize konka butegwire ge. Omuntandikiro ya buri kwezi, nyowe na mugenzi wange w’omupayoniya, tukaba nitusitama tuhandika ebi turije kucenera omu sande ezirakurateho.Bwanyima, omwe omuri itwe akaba natambura orugendo ruringwa aza kugura ebi turi kwetenga. Tukaba tushemerire kukoresa otusente otu ekitongore cabire kiri kutuha, kandi tukoresa ge ebyokurya kugira ngu bimare okwezi kona. Ku habire nihagira ecahwa turi omuri eryo ihamba, kikaba kigumire kubona omuntu ow’okutuyamba. Ninyikiriza ntari kubanganisa ku okwega kubaho omu buryo obworobize konka obutebekanisize ge ncari muto cankwasize kuta omutima aha murimo gwa Yehova omu kubaho kwange kona.

Ishomo rya kashatu eri nayegire niomugasho g’okwegesa abantu omu rurimi rwabo orwabuzarwa. Nkakura ndi kugamba Orudaki, Orujungu, Orupapiyamento n’Orusiranantongo (nambwenu ori kumanywa nk’Orusiranani), oruri kukirakugambwa omuri Suriname. Konka nkarebaabantu b’omuri eryo ihamba bari kwakira ge obutumwa burungi twababurira omu rurimi rwabo. Endimi zimwe zikangumira, nk’Orusaramakani, oru bari kugambira ah’iguru obundi bakashumya. Konka amani agu natireho tigarafire busha. Omu myaka eyakuratireho, nkabasa kwegesa amazima abantu bingi munonga ahakuba nabire ndikugamba orurimi rwabo orwa buzarwa.

Konka nabwo, nkabugana n’ebintu ebiri kunshwaza. Ecokureberaho: Izoba rimwe nkabuza omwegi wa Bibuli omwe ori kugamba Orusaramakani oku ari kwehurira, ahakuba akaba ari kuribwa omu nda. Konka eki namuburizekikaba nikimanyisa yaba ayine enda! Mazima akehurira kubi ahabw’okumubuza eco kibuzo. N’obu nabire ninkora enshobe nk’ezo, nkagumizamu kutaho amani kugira ngu ngambe orurimi rw’abaturage b’omuri teritori yange.

Omu mwaka gwa 1970, nkaba omureberezi ori kutayayira ebibina. Omuri ogo mwaka, nkereka abantu bingi b’omu mitwe y’omu bucweka bwa hare omu ihamba, filimu eyine omutwe oguri kugira ngu: “Ofisi nkuru y’Abahamya ba Yehova.” Kugira ngu mbase kuhika ahari abobantu, nkaba ninyekwatanisa na benetata turaba omu mugera turi omu bwato buringwa, obukozirwe omu kiti. Tukaba nitugenda tupakire moteri y’amashanyarazi, ekitanka kirimu omuzigo,amatara g’ebirahuri, n’ebyoma by’okwerekeraho filimu. Ku twabire nituhikayo, tukaba nitupakurura ebyo byoma, rero tubitwara ahu turayerekere filimu. Konka eki ndi kwijuka munonga, ni oku abantu b’omuri otwo tucweka twa hare babire nibesimira munonga ezo filimu. Nkaba ninshemerererwa munonga kukwasa abandi kwega ebya Yehova n’okumanya ekicweka c’ekitongore ceye ec’omu nsi. Emigisha y’eby’omwika eyi natungire  nekirira kimwe ebizibu ebi nabugine omu murimo gwa Yehova.

N’obu nabire nindeba ebirungi by’okukora ndi nyenka omurimo gwa Yehova, konka nkaba nimpurira ndi kwetenga ow’okukora na we ebiro byona. Obwe rero nkashaba Yehova ntarabire aha rubaju, ngu ampe omukazi owabire ari kubasa kwehanganira ebizibu by’okukorera omurimo g’obwire bwona omuri ago mahamba. Bwanyima y’omwaka gumwe, nkatandika kusigura omunyanyazi ori kwetwa Ethel, owabire ari omupayoniya kandi ayine omwika g’okweferereza. Kwiha Ethel acari muto, akaba nakunda munonga entumwa Pawulo kandi akaba arikwenda kumutoreza ari kwehayo omu kukorera Yehova. Tukatasana omu Kwamwenda 1971 kandi twatandika kukorera hamwe omurimo g’okutayayira ebibina.

Ethel akakurira omu ka etatungire ebintu byingi; obwe rero kukorera omuri ago mahamba kikamworobera. Ecokureberaho: Ku twabire nitwetegura kutayayira ebibina by’omuri agomahamba, tukaba nitupakira ebintu bice. Tukaba nitwogeza ebijwaro omu mugera kandi tuba ni ho twanabira. Nambwenu, tukaba niturya ebyokurya byona ebi batwakiriza, harimu enyama z’ebihangare n’ebyenyanja, ninga shi ekindi kintu cona eki bakwata omu ihamba ninga shi omu migera. Ababire batine amasahani bakaba nibatugaburira aha makoma. Kandi ahu twabire nitushanga batine ebigiko, tukaba niturisa engaro. Nyowe na Ethel tukareba ku ebyo bikorwa by’okweferereza omu murimo gwa Yehova byatumire obunywani bwitu bwaguma, bwaba nk’enyabushatu. (Mub 4:12) Tihine ekintu na kimwe ecabire nikikira ogo murimo gwa Yehova!

Obu twabire turi omu rugendo turi kuruga kutayayira ebibina by’omuri ago mahamba ni bwo ebintu ebi nagambaho omu kutandika byatuhikireho. Obwato ku bwahikire omu mizi rwagati, bukatobera akire kace konka bwahika buri kurugayo. Ekirungi ni oku twabire tujwire  amakoti g’obwerinzi kandi titurarugire omubwato. Konka bwona bukijura amizi. Ebyokurya byona tukabyata, rero ebikoreso ebyabire birimu ebyo byokurya twabikoresa omu kwiha amizi omu bwato.

Ahabw’okuba twabire twayata ebyokurya byitu, tukagenda turi kuroba omu mugera. Konka tihariho eki twakwasire. Obwe rero tukashaba Yehova ngu atuhe ebyokurya by’eryo izoba. Ezo shaha twamara kushaba, mwenetata omwe akarecera orurobo omu mugera, rero yakwata ecenyanja kihango eki twena batano twarire eco kiro tukahaga.

Bwanyima y’emyaka itano nyowe na Ethel turi omu murimo g’okutayayira ebibina, tukatunga ogundi mugisha ogu twabire tutetegwire g’okuba abazire. Ku nahurire ago makuru nkashemererwa, n’obu nabire ntari kumanya oku birije kugenda omu biro eby’omu misho. Nyowe na Etheltukaba nitwenda kuguma omu murimo g’obwire bwona oku byakugenda kona. Omu gwa 1976 tukazara omwojo witu Ethniël. Bwanyimay’emyaka ibiri n’ekicweka tukazara omwana witu wa kabiri ori kwetwa Giovanni.

Ahakuba omuri Suriname habire hari kwetenga obuyambi omuri obwo bwire, ofisi ekanshaba kugumizamu ndi kutayayira ebibina ndi kurera n’abana. Obu abana bitu babire bacari bato, nkaba nintayayira otucweka oturimu ebibinabice. Eco kikaba nikituma namara esande nce ndi kutayayira ebibina rero obundi bwire mbumara ndi omupayoniya w’omutano omu kibina cange. Ethel na batabani bitu bakaba nibanshendekeza naba ntayayire ebibina bya hihi. Konka ku nabire nintayayira ebibina n’omu biterane bya hare omu ihamba, nkaba ningenda nyenka.

Bikaba nibinshaba kwetegura n’okuringaniza kugira ngu mbase kuhikiriza emirimo yona. Nkaba nintamu amani kugira ngu buri sande tukore ecegeso c’eka yitu. Ku nabire nintayayira ebibina bya hare omu ihamba, Ethel ni we owabire nayebembera ecegeso c’eka ari hamwe na batabani bitu. Konka obwire bwingi, tukaba nitukorera ebintu hamwe. Nambwenu nyowe na Ethel tukaba niturondesa obwire bw’okweshemeza n’abana bitu, yakuba emizano ninga okutambatamburamu. Nkaba ninkira kunyama ntinzire kugira ngu ntegure za toku. Kandi ahakuba Ethel, ari omukazi w’omutima ori kugambwa omu Migani 31:15, akaba nayimuka omu kasheshe karekare kugira ngu tubase kushwijumira hamwe ecahandikirwe ca burizoba turi hamwe, kandi tubone  ebyokurya by’akasheshe, rero abana babone kuza ah’ishomero. Mazima ninyesima munonga kuba nyine ogo mukazi ori kweferereza owankwasize munonga kuhikiriza emirimo y’ekibina!

Ahakuba turi abazire, tukataho amani mingi kugira ngu tukwase batabani bitu kukunda Yehova n’omurimo g’okuburira. Tukaba nitwenda ngu batabani bitu basharemu omurimo g’obwire bwona, kandi hatari okubagema ahobwe babyekundire. Burijo tukaba nitubagambira ebirungi ebi twatungire omu murimo g’obwire bwona. Tukaba nitubagambira n’ebizibu ebi twabugine, konka tusindagiriza oku Yehova yatukwasize twena nk’eka. Nambwenu tukaba nitutaho amani kugira ngu batabani bitu bagire abanywani b’Abahamya, abari kuta Yehova omu mwanya g’okubanza omu kubaho kwabo.

Yehova akatuha byona ebi turi kwetenga omu kurera abana bitu. Konka, nanye nkaba nintaho akange. Omurimo g’obupayoniya ogu nakorire omu ihamba ntakatasize gukanyegesa kutegura ebi omuntu ari kuba aracenere omu biro eby’omu misho. Obumwe hine obu twabire nitutaho amani ngu tubone ebi turi kwetenga konkabyanga. Eco ku cabire nikibaho, nkaba ninyesiga ku Yehova arije kutukwatiramu. Ecokureberaho: Omu myaka ya za 1980 n’omu ntandikiro ya za1990, omuri Suriname hakabamu orutaro. Omuri eyo myaka, okubona ebintu by’okubanza by’okutubisaho kikaba kigumire. N’obu cabire kiribasyoya, Yehova akatuha ebi twabire turi kwetenga.—Mat 6:32.

Omu kubaho kwitu kona, Yehova akatufaho kandi yatuma twagira okushemererwa n’okumarwa. Abana bitu bakatubera omugisha, kandi okubarera bakakura bari kuhereza Yehova ni omugisha gw’amani. Twine okushemererwaahakuba bakeshariramu kukorera Yehova omurimo g’obwire bwona omu kubaho kwabo. Ethniël na Giovanni bombi bakega amashomero g’ekitongore kandi hati nibakorera ahari ofisi y’omuri Suriname bari hamwe n’abakazi babo.

Nyowe na Ethel tukuzire munonga, konkanabwe tucakorera Yehova turi abapayoniya b’omutano. Mazima twine byingi by’okukora kandi na hati tinkabwine n’akire k’okuza kwega koga! Konka tihine eki ndi kwefuza. Ku ndi kugarura amisho enyima, ningamba ntari kubanganisa ku ensharamu eyi nakozire ncari muto y’okukorera Yehova omurimo g’obwire bwona ari yonsharamu eri kukira ezindi zona ezi nabire ndakore.