1. Nitumanya tuta ku Yehova ari kwenda ngu tumuhike hihi?

 YEHOVA natweta ngu tumuhike hihi. (Yak 4:8) Nayenda kuba Ruhanga witu, Tata witu kandi munywani witu. Nagarukamu eshara zitu kandi atuyamba omu mbera zigumire. Nambwenu natwegesa kandi aturinda akoresize ekitongore ceye. Konka shi ni enki eki tushemerire kukora kugira ngu tumuhike hihi?

2. Ni bata oku turi kubasa kuhika hihi ya Yehova?

² Nitubasa kuhika hihi ya Yehova turi kumushaba kandi turi kushoma Ekigambo ceye n’okukitecerezaho. Twakikora tusyoya, nitukizaho kumukunda n’okumusima. Nikituhiga kumworobera n’okumuhimbisa kandi ebyo ni byo ebimushemerire. (Kush 4:11) Oku turi kukizaho kumanya Yehova, ni ko turi kukizaho kumwesiga kandi tukakizaho kwesiga ekitongore ceye eki ari kukoresa omu kutukwasa.

3. Ni bata oku Sitane ari kututanisa na Yehova, kandi shi ni enki ekirije kutukwasa kuhamira ahari Ruhanga n’ekitongore ceye? (Zaburi 31:13,14)

³ Sitane nayenda kututanisa na Yehova, namunonga twaba turi kuraba omu bizibu. Ni gaha magezi agu ari kukoresa? Mporampora natuma twareka kwesiga Yehova n’ekitongore ceye. Konka nitubasa kusingura ago magezi geye. Okwikiriza kwitu kwaba kuhamire kandi turi kwesiga Yehova munonga, titurije kumusigaho ninga ngu tusigeho ekitongore ceye.—Shoma omuri Zaburi ya 31:13,14.

4. Ni enki eki twaza kushwijuma omuri eki kicweka?

 ⁴ Omuri eki kicweka, twaza kushwijuma ebizibu bishatu ebiri kubasa kuretwa aheru y’ekibina, kandi buri kizibu nikibasa kutuma twareka kwesiga Yehova n’ekitongore ceye. Ni bata oku ebyo bizibu biri kubasa kututanisa na Yehova? Kandi shi ni enki eki turi kubasa kukora kugira ngu tusingure Sitane?

5. Ni bata oku ebizibu byawe biri kubasa kutuma otagumizamu kwesiga Yehova n’ekitongore ceye?

⁵ Hine obu turi kubugana ebizibu, harimu okuhiganisibwa n’ab’omu maka gitu n’okuferwa emirimo. Ni bata oku ebyo bizibu biri kubasa kutuma twareka kwesiga Yehova n’ekitongore ceye kandi bikatutanisa na we? Twayehanganira ebizibu obwire buringwa, nitubasa kuhurira tutine masiko kandi tucweka entege. Sitane nakoresa ebyo bizibu kugira ngu atume twabanganisa ahari rukundo ya Yehova. Sitane nayenda ngu tutekateke ku Yehova n’ekitongore ceye ari bo abari kutubonabonesa. Ekintu nk’eco kikabaho omu Bisirayeli bamwe obu babire bari omuri Misiri. Omu kubanza bakaba bari kwikiriza ku Yehova yatorine Musa na Aroni kugira ngu babihe omu bugaragwa. (Kur 4:29-31) Konka bwanyima Faraho ku yababonabonesize munonga, bakekwasa Musa na Aroni ahabw’ebizibu byabo bari kubagambira ngu: “Muretire Faraho n’abashija beye kutwangira kimwe, n’okukwata rurara kutwita.” (Kur 5:19-21) Bakekwasa abahereza ba Ruhanga b’abesigwa. Mazima eco nikishasha! Yaba wamara obwire buringwa ori kwehanganira ebizibu, ni enki eki ori kubasa kukora kugira ngu okizeho kwesiga Yehova n’ekitongore ceye?

6. Ni enki eki turi kwegera aha muhanuzi Habakuki aha bikwatirine n’okwehanganira ebizibu? (Habakuki 3:17-19)

⁶ Guma oshuke ebiri omu mutima gwawe byona ahari Yehova kandi omwesige. Omuhanuzi Habakuki akabugana ebizibu byingi. Hine obu yabanganisize yaba Yehova yabire ari kumufaho. Obwe rero akashuka ebiri omu mutima gweye byona ahari Yehova omu kushaba. Akagira ati: “Ayi Yehova, ndyahisa hi okukutakira, okanga kumpurira? Ahabw’enki nondebesa ebitahikire n’eby’itima?” (Hab 1:2,3) Yehova akagarukamu eyo shara y’omuhereza weye w’omwesigwa erugire aha mutima. (Hab 2:2,3) Habakuki ku yamazire kutecereza aha bikorwa bya Yehova by’okurokora, akashuba yatunga okushemererwa. Akesiga atari kubanganisa ku Yehova yabire ari kumufaho kandi ku yabire arije kumukwasa kwehanganira ebigezo. (Shoma omuri Habakuki 3:17-19.) Ebyo nibitwegesa ki? Wabugana ebizibu bigumire, guma oshabe Yehova kandi omugambire oku ori kwehurira. Bwanyima oyesige ku arije kukuha obuyambi obu ori kwetenga. Ku orakikore basyoya, noyija kwesiga ku Yehova arije kukuha amani g’okwehanganira. Kandi ku orarebe oku Yehova ari kukuyamba, noyija kukizaho kumwesiga.

7. Ni enki eki abanyabuzare ba Shirley babire nibamugambira, kandi shi ni enki ecamukwasize kuhamira ahari Yehova?

⁷ Guma ohamire aha ntebekanisa yawe y’eby’omwika. Reba oku eco cakwasize omunyanyazi w’omuri Papua New Guinea ori kwetwa Shirley kwehanganira ebizibu ebi yabugine. b Shirley akakurira omu ka y’abacene kandi hine n’obu cabire nikibagumira kubona ebyokurya. Abanyabuzare bakagezaho kutuma yabanganisa ahari Yehova. Bakaba nibamubuza ngu: “Nokunda kugamba ngu omwika gwa Ruhanga oguri kwera nigukuyamba, konka shi guri kukuyamba? Reba  omu ka yanyu mucari abacene. Ori kushisha obwire ngu ori kuburira.” Shirley akagamba ati: “Nanye nkebuza ngu: ‘Konka shi buzima Ruhanga natufaho?’ Obwe rero nkahika ndi kushaba Yehova kandi namugambira byona ebindi aha mutima. Nkagumizamu kushoma Bibuli n’ebitabo byitu kandi nagumizamu kuburira n’okwekwatanisa omu nterane.” Bwanyima y’obwire buce, akamanya ku buri Yehova yabire ari kufa aha ka yabo. Eka yabo terabuzire ebyokurya kandi bakaba bashemerirwe. Shirley akagamba ati: “Nkareba ku Yehova yabire ari kugarukamu eshara zange.” (1Tim 6:6-8) Wahamira aha ntebekanisa yawe y’eby’omwika, n’iwe torije kwikiriza ngu ebizibu ebi oyine bikutanise na Yehova.

8. Ni enki ekiri kubasa kuhika ahari benetata abari kwebembera omu kitongore ca Yehova?

⁸ Abangi bitu nibakoresa embuga omu kujanjaza ebishuba ebiri kugamba ahari benetata abebembire omu kitongore ca Yehova. (Zab 31:13) Benetata abamwe bakasibwa bari kubarega ngu ni enkozi z’ebibi. Abakristo b’omu kinyigana c’okubanza na bo bakabugana embera nk’ezo obu entumwa Pawulo yabeherirwe kandi akasibwa. Ni bata oku batwarize?

9. Ni bata oku bamwe omu Bakristo b’omu kinyigana c’okubanza batwarize entumwa Pawulo ku yasibirwe?

⁹ Entumwa Pawulo ku yasibirwe omuri Roma, Abakristo bamwe b’omu kinyigana c’okubanza bakareka kumushagika. (2Tim 1:8, 15) Ahabw’enki? Mbehi bakaba bari kushwara ahabw’okuba abantu bingi babire bari kureba Pawulo nk’enkozi yebibi? (2Tim 2:8,9) Ninga bakaba batinire ngu na bo nibabasa kuhiganisibwa? Enshonga oku yakuba eri kona, tecereza oku Pawulo yayehurire. Akaba yayehanganire ebizibu byingi kandi akaba nata amagara geye omu kabi ahabwabo. (Byak 20:18-21; 2Kor 1:8) Tutariba nk’abo abasigireho Pawulo omu bwire obu yabire ari kubetenga munonga! Ni enki eki tushemerire kuguma nitwijuka benetata abari kwebembera bahiganisibwa?

10. Ni enki eki tushemerire kwijuka benetata abari kwebembera bahiganisibwa kandi shi ahabw’enki?

 ¹⁰ Guma oyijuke enshonga ahabw’enki turi kuhiganisibwa n’ori kutuhiganisa. Omu baruha ya kabiri ya Timoteyo 3:12 nihagira hati: “Abamaririre kumara ebiro by’amagara gabo byona omuri Yesu nibatina Ruhanga baryahiigwa.” Obwe rero tikishemerire kututangaza twareba Sitane ari kuba atire omutima aha kutahirira benetata abari kwebembera. Naba ari kwenda ngu bataguma bari abesigwa, rero kitume twatina.—1Pet 5:8.

11. Ni enki turi kwegera aha cokureberaho ca Onesiforo? (2Timoteyo 1:16-18)

¹¹ Gumizamu kushagika benetata abari kwebembera kandi obahamireho. (Shoma omuri 2 Timoteyo 1:16-18.) Omukristo w’omu kinyigana c’okubanza ori kwetwa Onesiforo we akatwaza omu buryo oburi kutana n’obw’abandi obu Pawulo yasibirwe. “Tarisirwe enshoni ahabw’enjegere za [Pawulo].” Omu mwanya gw’eco, Onesiforo akaronda Pawulo, kandi ku yamubwine yarondesa oburyo bw’okumuyambamu. Eco kikata amagara ga Onesiforo omu kabi. Ebyo nibitwegesa ki? Titushemerire kutina ngu kitume twaremwa kushagika benetata abari kuhiganisibwa. Omu mwanya gw’eco, nimureke tugume tubarwanirire kandi tubahe obuyambi obu bari kwetenga. (Emi 17:17) Nibetenga rukundo yitu n’obuyambi bwitu.

12. Ni enki eki turi kwegera ahari benetata na banyanyazi b’omuri Burusiya?

¹² Reba oku benetata na banyanyazi b’omuri Burusiya bakwasize bagenzi babo abari omu kihome. Abamwe ku babire barikucwerwa emanja, benetata na banyanyazi bingi bakaza ah’ishengero kugira ngu babashagike. Ebyo nibitwegesa ki? Benetata abari kwebembera babehererwa, bakasibwa ninga shi bakahiganisibwa, otatina. Guma obashabire, ofe aha b’omu maka gabo, kandi orondese oburyo bw’okubayambamu.—Byak 12:5; 2Kor 1:10,11.

13. Ni bata oku abari kutushecerera bari kubasa kutuma twareka kwesiga Yehova n’ekitongore ceye?

¹³ Abanyabuzare, abu turi kukora na bo ninga shi abu turi kwega na bo nibabasa kutushecerera ahakuba turi kuburira ninga shi ahakuba turi kugendera aha misinge ya Bibuli. (1Pet 4:4) Nibabasa kukugambira ngu: “Ninkukunda iwe aha kiti cawe, konka edini yanyu egumire kandi nekunda kugendera aha bya kare.” Bamwe nibabasa kutugambaho kubi aha ku turi kutwariza omuntu obingirwe omu kibina, bari kugamba ngu: “Obwe shi okwe ni okumukunda?” Ebigambo nk’ebyo nibibasa kutuma twatandika kubanganisa. Nitubasa kwebuza ngu: ‘Konka shi Yehova tari kunshaba ebindengire? Ekitongore ceye tikiri kurengesereza?’ Yaba ori kuraba omu mbera nk’ezo, ni bata oku ri kubasa kuguma ohamire ahari Yehova n‘ekitongore ceye?

14. Ni bata oku tushemerire kutwaza abandi batushecerera ahabw’okugendera aha misinge ya Yehova? (Zaburi 119:50-52)

¹⁴ Guma oyetegwire kugendera aha misinge ya Yehova. Yobu akaba nagendera aha misinge ya Yehova n’obu yabire nashecererwa. Omwe omuri banywani beye babi akamugambira ngu n’obu yakuba atagendire aha misinge ya Ruhanga tari kufayo. (Yob 4:17, 18; 22:3) Konka Yobu akanga kwikiriza ebyo bishuba. Akaba namanya ku emisinge ya Yehova y’ekirungi n’ekibi ehikire, kandi akaba amaririre kuyigenderaho. Tarikirize ngu abandi bashishe obwesigwa bweye. (Yob 27:5,6) Ebyo nibitwegesa ki? Otariyikiriza ngu abari kukushecerera batume wabanganisa aha misinge ya Yehova. Garura amisho enyima otecereze  aha byakubireho. Mbehi torerebire ku emisinge ya Yehova ehikire kandi ku yakugasire? Maririra kushagika ekitongore ca Yehova ekiri kutwegesa kugendera ahari eyo misinge. Ku orakikore, abari kukushecerera tibarije kukutanisa na Yehova.—Shoma omuri Zaburi ya 119:50-52.

15. Ahabw’enki Brizit yabeherirwe?

¹⁵ Reba ebyahikire ahari munyanyazi Brizit w’omuri Indiya. Abanyabuzare beye bakamushecerera ahabw’okwikiriza kweye. Hahwire obwire buce abatizibwe omu gwa 1997, omushija weye otari kwikiriza akaferwa omurimo. Obwe rero akasharamu kufurura Brizit na bahara babo ngu baze kutura n’abazire babo ababire batwire omu ndijo tawuni. Konka Brizit akabugana ebindi bigezo bigumire. Ahakuba omushija weye yabire atine murimo, ni we owabire nakora amashaha mingi kugira ngu abiseho ab’omu ka. Nambwenu, ekibina ca hihi kikaba kiri hare ahari kilomita eziri kuhika ahari 350. Ekiri kushasha, ab’eka y’omushija bakaba nibamuhiganisa ahabw’okwikiriza kweye. Embera zikeyongera kuba mbi, catuma eka ya Brizit yashuba kufuruka. Bwanyima, omushija weye akafa omu buryo obutungurine. Ku hahwireho obwire, omuhara weye na we akitwa kansa ayine emyaka ibiri. Ekiri kushasha munonga ni oku abanyabuzare ba Brizit byona babimutireho. Bakagira ngu kuri atarabire Omuhamya wa Yehova, ebyo bizibu byona bikaba bitarabeho. Konka nabwe, akaguma ari kwesiga Yehova kandi yaguma hihi n’ekitongore ceye.

16. Ni eha migisha eyi Brizit yatungire ahabw’okuhamire ahari Yehova n’ekitongore ceye?

¹⁶ Ahakuba Brizit yabire atwire hare y’ekibina, omureberezi ori kutayayira ebibina akamuhiga kuguma naburira omu kacweka aku atwiremu n’okukora enterane omu ka yeye. Omu kubanza, akahurira atarije kubibasa. Konka akorobera obwo buhabuzi. Akaba naburira abatahi obutumwa burungi, akorera enterane omu ka, kandi agira obwire bw’okwegesa bahara beye omu kuramya kw’eka. Ni enki ecarugiremu? Brizit akegesa abegi ba Bibuli bingi kandi abingi omuri bo  bakabatizibwa. Omu mwaka gwa 2005 akaba omupayoniya w’obwire bwona. Akahebwa emigisha ahaw’okugumizamu kwesiga Yehova n’okuhamira aha kitongore ceye. Bahara beye bari kukorera Yehova omu bwesigwa kandi hati omu kacweka kabo harimu ebibina bibiri! Brizit nayesiga ku Yehova yamuhire amani g’okwehanganira ebizibu ebi yabugine harimu n’okubehererwa n’abanyabuzare.

17. Ni enki eki tushemerire kumaririra kukora?

¹⁷ Sitane nayenda ngu tutecereze ku Yehova atari kutufaho twaba turi omu bizibu kandi ku ekitongore ceya kiri kutuma twakizaho kubonabona. Sitane nayenda ngu tutine twareba benetata abari kwebembera bari kubehererwa, bari kuhiganisibwa ninga shi bari kusibwa. Kandi Sitane nakoresa abasheki kugira ngu batume twabanganisa aha misinge ya Yehova n’ekitongore ceye. Konka, nitumanya ge amagezi ga Sitane kandi tari kubasa kutubiha. (2Kor 2:11) Guma omaririre kwangira kimwe ebyo bishuba bya Sitane kandi ogume ohamire ahari Yehova n’aha kitongore ceye. Yijuka ku Yehova atarikusigaho. (Zab 28:7) Obwe rero, otayikiriza ngu hagire ekintu cona ecakutanisa na Yehova!—Rom 8:35-39.

18. Ni enki eki turije kushwijuma omu kicweka ekiri kukurataho?

¹⁸ Omuri eki kicweka, twashwijuma ebizibu ebi turi kubasa kubugana aheru y’ekibina. Konka obwesigwa bwitu ahari Yehova n’ekitongore ceye nibubasa kugezibwa n’ebizibu ebiri kuruga omu kibina. Ni bata oku turi kubasa kubisingura? Nitwija kubishwijuma omu kicweka ekiri kukurataho.