1-2. (a) Ni biha bibuzo ebi twaza kushwijuma? (b) Ni enki ekiri kwereka ku Yehova ayetegwire kutukwasa?

 YEHOVA natukwasa kwehanganira ebizibu ebi turi kubugana kandi atuma twatunga okushemererwa omu murimo oguri kwera ogu turi kumukorera. Ni buha buryo obu ari kutukwasamu? Kandi shi ni bata oku turi kubasa kugasirwa omu bwijwire n’obwo buyambi obu Yehova ari kutuha? Ebyo bibuzo byaza kugarukwamu omuri eki kicweka. Konka reka tubanze tushwijume eki kibuzo: Mbehi buzima Yehova ayetegwire kutukwasa?

² Ekigambo eki entumwa Pawulo yakoresize omu baruha eyi yahandikire Abaheburayo nikibasa kutukwasa kutunga ecokugarukamu. Pawulo akahandika ati: “Yehova ni we muyambi wange, tinditina; omuntu nabasa kungira ata?” (Heb 13:6) Ekitabo ekiri kushoborora Bibuli nikigamba ku ekigambo “omuyambi” ekiri kukoresibwa omuri oru runyiriri, nikimanyisa omuntu ori kwiruka ari kuza kuyamba ondijo ori kumutakira. Tera akashushani orebe Yehova ari kwiruka ari kuza kuyamba omuntu ori omu bizibu. Hatariho okubanganisa ebyo nibyereka ku Yehova ari kuba ayetegwire kutukwasa kandi ku ayine n’ekihika. Ahakuba Yehova ari kuba ari aha rubaju rwitu nitubasa kwehenganira ebigezo twine okushemererwa.

3. Ni buha buryo bushatu obu Yehova ari kutukwasamu kwehanganira ebigezo kandi tukaguma tushemerirwe?

³ Ni buha buryo bumwe obu Yehova ari kutukwasamu kwehanganira ebigezo kandi tukaguma twine okushemererwa? Kugira ngu tugarukemu eco kibuzo reka tushwijume ebiri omu kitabo ca Isaya. Ahabw’enki? Obuhanuzi bwingi obu Isaya yahanwire nibukwata aha bahereza ba Ruhanga b’omuri obu bwire.  Nambwenu Isaya nashoborora Yehova ari kukoresa ebigambo ebi turi kuhurira omu buryo bworobi. Reka turebe ecokureberaho c’omuri Isaya ekicweka ca 30. Omuri eco kicweka, Isaya nakoresa ebyokureberaho birungi ari kushoborora oku Yehova ari kukwasa abahereza beye: (1) ari kututega amatu kandi akagarukamu eshara zitu, (2) ari kutuha obuhabuzi, kandi (3) ari kutuha emigisha omuri obu bwire n’eyi arije kutuha omu biro eby’omu misho. Reka tushwijume obwo buryo bushatu obu Yehova ari kutukwasamu.

4. (a) Ni enki eki Yehova yagambire Abayudaya b’omu bwire bwa Isaya kandi shi ni enki eki yayikirize kubahikaho? (b) Ni gaha masiko agu Yehova yagambire Abayudaya ab’abesigwa? (Isaya 30:18,19)

⁴ Omu bigambo ebiri kutandika ekicweka ca 30 ca Isaya, Yehova nashoborora Abayudaya nk’“abana abagomi,” abari “kongera ekibi aha kindi.” Nagumizamu ari kugamba ngu: “Ni ihanga eriri kugoma, abojo abari kwanga kuhurira ebiragiro byaYehova.” (Isa 30:1,9) Ahakuba Abisirayeli bayangire kuhurira Isaya akagamba ku Yehova yabire arije kubikiriza ngu bahikweho n’akabi k’amani. (Isa 30:5, 17; Yer 25:8-11) Kandi buzima bakatwarwa omu bukwatwa bwa Babuloni. Konka omuri abo Bayudaya hakaba harimu abesigwa kandi Isaya akaba ayine obutumwa bw’amasiko bw’okubagambira. Akabagambira ku izoba rimwe Yehova yabire arije kubagirira embabazi. (Shoma omuri Isaya 30:18, 19.) Kandi eco ni co ecabireho. Yehova akabiha omu bukwatwa, konka okucungurwa kwabo tikurabireho ahonaho. Ebigambo ngu “Yehova aryategereza ngu abagirire embabazi,” nibyereka ku habire harije kubaho obwire buringwa kugira ngu bantu b’abesigwa babase kurokoka. Kandi ni ko cabire ahakuba Abisirayeli bakamara emyaka 70 bari omu bukwatwa bwa Babuloni mbere y’okwikiriza ngu abasigire bagaruke bagaruke omuri Yerusaremu. (Isa 10:21; Yer 29:10) Abisirayeli ku bahikire omu ihanga eryaraganisibwe, omu mwanya g’okurira amarira g’obusaasi bakarira amarira g’okushemererwa.

5. Ni bata oku ebiri omuri Isaya 30:19 biri kutuhumuriza?

⁵ Omuri obu bwire nitubasa kuhumurizibwa n’ebigambo ebiri kugira ngu: “Ku arihurira iraka ry’okutaka kwawe, taribura kukugirira embabazi.” (Isa 30:19) Isaya natuhamiza ku Yehova arije kutuhurikiza ayetonzire twaba turi kumutakira kandi ku arije kutugarukamu juba eshara zitu. Isaya akongeraho ati: “Ku arikuhurira aryakugarukamu.” Ebyo bigambo nibituhamiza ku Tata witu ari kwendera kimwe kukwasa abari kumuhungiraho. Twamanya eco nikitukwasa kwehanganira ebizibu twine okushemererwa.

6. Ni bata oku ebigambo bya Isaya biri kwereka ku Yehova ari kuhurikiza eshara za buri omwe omu bahereza beye?

⁶ Ni riha rindi shomo erikwatirine n’eshara eri turi kwiha omuri orwo runyiriri? Yehova nata omutima aha shara za buri omwe omuri itwe. Ahabw’enki turi kugamba basoya? Omu nyiriri z’okubanza z’omu kicweka ca 30, nihakoresibwamu engambo ngu “itwe,” ahakuba Yehova natugambira twena nk’omutwe gw’abahereza beye. Konka omurunyiriri rwa 19 nihakoresa ekigambo “iwe” ahakuba ari kugambira buri omwe aha kiti ceye. Isaya akahandika ati: “torigaruka kurira”; “taribura kukugirira embabazi”; “aryakugarukamu.” Ahakuba Yehova ari Tata ori kutukunda, tari kubasa kugambira mutabani weye na muhara weye ocwekire entege ngu: “Oshemerire kugira amani nka mwenetata na munyanyazi.” Omu mwanya gw’eco natureba buri omwe aha kiti ceye kandi ahurikiza eshara ya buri omwe.—Zab 116:1; Isa 57:15.

7. Ni bata oku Isaya na Yesu bayerekire omugasho g’okushaba Yehova turi kumweshengereza?

 ⁷ Twahika hihi Yehova omu kushaba tukamugambira buri kizibu cona eki twine nabasa kutugarukamu ari kutuha amani g’okucehanganira. Kandi ekizibu kitu cayanga kurugaho juba oku turi kubyenda nitubasa kugumizamu kushaba Yehova emirundi myingi kugira ngu atuhe amani g’okucehanganira. Eco ni co eki ari kutushaba ngu tukore. Akabigamba omu bigambo bya Isaya ebiri kugira ngu: “Mutamureka ngu ahumure.” (Isa 62:7) Eco nikimanyisa ki? Tushemerire kushaba Yehova turi kumweshengereza nkabatari kumwikiriza ngu ahumure. Ebigambo bya Isaya nibitwijusa ebyokureberaho bya Yesu ebikwatirine n’eshara ebiri omuri Luka 11:8-10, 13. Aho mpaho, Yesu natuhiga kushaba twine “obumanzi” kandi “tugumizamu” kushaba omwika oguri kwera. Nambwenu tushemerire kushaba Yehova obuhabuzi kugira ngu butukwase kukora ensharamu ndungi.

8. Ni bata oku ebigambo by’omuri Isaya 30:20, 21 byahikirire omu bwire bwa kare?

⁸ Shoma omuri Isaya 30:20, 21. Amahe g’Abanyababuloni ku gamazire omwaka gumwe n’ekicweka gehinguririze Yerusalemu, abantu bakahikaho bamanyira kubonabona. Konka tukuratize ebiri aha runyiriri rwa 20 na 21, Yehova akaraganisa Abayudaya ku yabire arije kubarokora bayehana kandi bakahindura emitwarize yabo. Isaya akagamba ku Yehova ari “Omwegesa” wabo mukuru ari kubaraganisa ku Yehova yabire arije kubegesa kumuramya omu buryo obu ari kwemera. Ebyo bigambo bikahikirira obu Abisirayeli barugire omu bukwatwa. Yehova akereka ku ari we mwengesa mukuru w’Abayudaya kandi ku ari we muhabuzi wabo ari kubakwasa kugaruraho okuramya kw’amazima. N’itwe twine omugisha ahakuba Yehova ari we mwegesa witu mukuru omuri obu bwire.

9. Ni buha buryo obu turi kutungamu obuhabuzi bwa Yehova omuri obu bwire?

⁹ Isaya akagumizamu n’engambo eri kushushanisa, yagamba ku turi kwegesibwa na Yehova omu buryo buburi. Ec’okubanza, Isaya akagamba ngu: “Amisho gawe nigija kureba Omwegesa wawe mukuru.” Omuri eco cokureberaho omwegesa ari nk’oyemerire omu misho g’abegi. Twine omugisha g’oku g’okugasirwa n’obuhabuzi bweye omuri obu bwire. Ni bata oku Yehova ari kutuhabura? Nakoresa ekitongore ceye omu kutuhabura. Mazima nitusima ahabw’obuhabuzi bweye oburi kuhurirwa ge obu ekitongore ceye kiri kutuha! Obuhabuzi obu turi kutunga omu nterane,  omu biterane, omu bitabo byitu, ahari tivi ya JW n’omu bundi buryo nibutukwasa kwehangana kandi tuguma twine okushemererwa.

10. Ni buha buryo obu turi kuhuriramu “ekigambo kiri kuturetwa enyima”?

¹⁰ Isaya akahandika oburyo bwa kabiri obu Yehova ari kutuhaburamu ari kugira ati: “Amatu ganyu garyaguma nigahurira ekigambo nikibaretwa enyima.” Aha mpaha, ogo muhanuzi nashoborora ku Yehova ari nk’omwegesa ori enyima y’abegi ori kubereka omuhanda ogu bashemerire kukuratiza. Erizoba nituhurira iraka rya Ruhanga riri kuturetwa enyima. Bata shi? Ekigambo ca Ruhanga kikahandikwa kare munonga tutakabireho. Obwe rero ku turi kushoma Bibuli nituba turi nk’abari kuhurira iraka rya Ruhanga riri kuturetwa enyima.—Isa 51:4.

11. Kugira ngu twehangane twine okushemererwa ni biha bintu ebi tushemerire kukora kandi ahabw’enki?

¹¹ Ni bata oku turi kubasa kugasirwa omu bwijwire n’obuhabuzi obu Yehova ari kutuha birabire omu kitongore ceye n’Ekigambo ceye? Isaya akagamba ebintu bibiri. Ecokubanza, akagamba ngu: “Ogu ni go muhanda.” Ecakabiri, akagamba ngu: “Mube ni go mwatora.” (Isa 30:21) Okumanya omuhanda tikiri kumara. Nambwenu nituba tushemerire n’okugugenderamu. Yehova nakoresa Ekigambo ceye kandi akitushobororera birabire omu kitongore ceye, rero tumanya ebi ari kutushaba. Nambwenu nitwega oku turi kubasa kuta omu bikorwa ebi turi kwega. Obwe rero kugira ngu twehangane twine okushemererwa omu murimo gwa Yehova, tushemerire kukora ebyo bintu byombi. Twakikora ni bwo Yehova arije kutuha emigisha.

12. Tukuratize ebiri omuri Isaya 30:23-26, ni bata oku Yehova ari kuha abahereza beye emigisha?

¹² Shoma omuri Isaya 30:23-26. Ni bata oku obwo buhanuzi bwahikirire aha Bayudaya abagarukire barugire omu bukwatwa?Bakatunga emigisha myingi y’omu buryo bw’omubiri n’omu buryo bw’omwika. Yehova akaha abahereza beye abarugire omu bukwatwa ebyokurya byingi by’omubiri. Konka ekiri kukira byona ni oku yabahire ebyokurya byingi by’omwika oku okuramya kw’amazima kwagenzire kuri kugarurwaho. Emigisha eyi abahereza ba Ruhanga batungire omuri obwo bwire ekaba nekirira kimwe ekintu cona eki babire batungireho. Nk’oku biri kurebeka omu runyiriri rwa 26, Yehova akabajwisiriza omushana mwingi. (Isa 60:2) Emigisha ya Yehova ekakwasa abahereza beye kugumizamu kumukorera bine okushemererwa n’amani g’omu nda “ahabw’embera ndungi z’omu mutima.”—Isa 65:14.

13. Ni bata oku obuhanuzi bw’okugarurwaho k’okuramya kw’amazima bwahikirire omuri obu bwire?

 ¹³ Mbehi obuhanuzi oburi kugamba aha kugarurwaho k’okuramya kw’amazima nibutukwataho omuri obu bwire? Yego buzima! Bata shi? Kwiha omu gwa 1919 B.Y., abantu abari kubarirwa omuri za miriyoni bakihwa omu bukwatwa bwa Babuloni orurembo rukuru, ni okugamba amadini gona g’ebishuba. Bakatwarwa omu mwanya murungi munonga kukira ihanga eri Ruhanga yabire araganisize Abisirayeli. Bakatwarwa omuri paradiso y’eby’omwika. (Isa 51:3; 66:8) Eyo paradiso y’eby’omwika ni enki?

14. Paradiso y’eby’omwika ni enki, kandi shi ni baha abari kugituramu omuri obu bwire? (Reba ekigambo ekishoborwirwe.)

¹⁴ Kwiha omuri 1919 B.Y., Abakristo abashukirweho omwika batwire omuri paradiso y’eby’omwika. b Oku hari kugenda nihahwaho obwire abine amasiko g’okutura omu nsi, ni okugamba ab’“ezindi ntama” na bo bakagenda bari kutura omuri eyo paradiso y’eby’omwika, kandi na bo bashemerererwa emigisha ya Yehova myingi.—Yoh 10:16; Isa 25:6; 65:13.

15. Paradiso y’eby’omwika eri nkahe?

¹⁵ Mbwenu shi eyo paradiso y’eby’omwika eri nkahe? Abahereza ba Yehova nibashangwa hona omu nsi. Obwe rero paradiso y’eby’omwika eyi batwiremu eri omu nsi yona. Erizoba ahu twakuba tutwire hona nitubasa kuba omuri eyo paradiso y’eby’omwika, tufa kuba turi kushagika okuramya kw’amazima.

16. Ni enki eki tushemerire kukora kugira ngu tugumizemu kureba oburungi bwa paradiso y’eby’omwika?

¹⁶ Kugira ngu tugume omuri paradiso y’eby’omwika, ekintu kimwe eki tushemerire kukora ni okuguma turi kwereka ku nitusima ahabw’ekibina c’Abakristo c’omunsi yona. Ni bata oku turi kubasa kukikora? Nitubasa kukikora turi kufa aha birungi by’abatwire omuri eyo paradiso y’eby’omwika tutari kufa aha kutahikirira kwabo. (Yoh 17:20, 21) Ahambw’enki eco kiri ec’omugasho? Reba eki cokureberaho. Twena nitushemerererwa kureba ebiti birungi by’omu misiri ebitari kushushana. Ni co kimwe, paradiso y’eby’omwika erimu ebibina ebirimu abantu abatari kushushana  abari kugeranisibwa n’ebyo biti. (Isa 44:4; 61:3) Tushemerire kukora cona eki turi kubasa kugira ngu tute omutima aha burungi bw’ogo “musiri” omu mwanya g’okuguta aha nshobe za buri “kiti” cona ekiri hihi n’itwe. Titushemerire kwikiriza ngu okutahikirira kwitu ninga shi okw’abandi b’omu kibina bitume tutareba oburungi bw’Abakristo b’omu kibina abine obumwe omu nsi yona.

17. Ni enki eki buri omwe ari kubasa kukora kugira ngu arinde obumwe bw’ekibina?

¹⁷ Ni enki eki buri omwe ari kubasa kukora kugira ngu arinde obwo bumwe? Ni okuba abantu abari kuretaho obusinge. (Mat 5:9; Rom 12:18) Burijo twatera entabwe y’okuretaho obusinge ahagati yitu n’abandi omu kibina nituba turi kongera aha burungi bwa paradiso y’eby’omwika. Nituguma turi kwijuka ku Yehova ari we owaresire buri muntu wena omuri eyo paradiso y’eby’omwika kugira ngu amuramye. (Yoh 6:44) Tecereza oku Yehova ari kushemererwa yareba oku turi kutaho amani kugira ngu turinde obusinge n’obumwe bw’abo bahereza beye b’omuhendo!—Isa 26:3; Hag 2:7.

18. Ni enki eki tushemerire kuguma turi kutekerezaho kandi ahabw’enki?

¹⁸ Ni bata oku turi kubasa kugasirwa omu bwijwire n’emigisha eyi Ruhanga ari kuha abahereza beye? Tushemerire kutecereza munonga aha bi turikwega omu Kigambo ca Ruhanga n’omu bitabo byitu ebyegamire ahari Bibuli. Kweyegesa ebyo bitabo kandi tukabitecerezaho nibyija kutukwasa kugira emicwe y’Abakristo erije kutuma twayereka ab’omu kibina rukundo erimu esaasi. (Rom 12:10) Ku turi kutecereza aha migisha eyi twine hati nikigumya obunywani bwitu na Yehova. Kandi twatekateka aha migisha eyi Yehova ari kuturaganisa omu biro by’omu misho, nikija kutuma twagira amani g’okumukorera ebiro byona. Ebyo byona nibyija kutuma twakorera Yehova tushemerirwe.

19. (a) Tukuratize ebiri omuri Isaya 30:18, ni enki eki turi kwesiga tutari kubanganisa? (b) Ni enki ekirije kutukwasa kwehangana twine okushemererwa?

¹⁹ Yehova nayija kuturwanirira ari kucwekereza eyi nsi mbi. (Isa 30:18) Nitwesiga tutari kubanganisa ku Yehova “Ruhanga w’oburinganiza” atarije kwikiriza ngu ensi ya Sitane egumeho ebiro byona. (Isa 25:9) Tutegerize n’ekihika izoba Yehova eri arirokoreraho abahereza beye. Konka obwo bwire butakahikire, nimureke tumaririre kwereka ku nitusima ahabw’omugisha g’okushaba, kweyegesa Ekigambo ca Ruhanga, okukita omu bikorwa, n’okutecereza aha migisha eyi ari kutuha. Ku turakikore tusyoya, Yehova nayija kutukwasa kumuramya turi kwehangana kandi twine okushemererwa.