1. Ni ziha mbera zigumire ezi Dawudi yayeshangiremu?

 DAWUDI akaba ari kuhunzya amagara geye. Sawulo, omugabe wa Isirayeli w’amani, akaba amaririre kumwita. Izoba rimwe Dawudi akabura ebyokurya, rero yaza omu tawuni ya Nobu, yayecureza yashaba emigati itano. (1 Sam 21:1, 3) Bwanyima, we n’amahe geye, bakahungira omu byina by’omu nkiri. (1 Sam 22:1) Mbwenu shi ni bata oku Dawudi yayeshangire omuri ezo mbera?

2. Ni bata oku Sawulo yayetire omu kabi? (1 Samweli 23:16, 17)

² Sawulo akagirira Dawudi ihari ryingi ahabw’okuba yabire ari kumanywa kandi ari kusinga entaro nyingi. Nambwenu, Sawulo akaba namanya ku obugomi bweye bwatumire Yehova yamwiha aha bugabe bwa Isirayeli kandi ku yatorine Dawudi okuza omu mwanya gweye. (Shoma omuri 1 Samweli 23:16, 17.) Konka ahabw’okuba Sawulo yabire acari omugabe wa Isirayeli, akaba ayine amahe mingi n’abantu bingi abari kumushagika, ni yo nshonga Dawudi yahungize amagara geye. Mbwenu shi Sawulo akaba natecereza ngu nabasa kwemereza Ruhanga omu kuhikiriza entego eyi yabire ayine y’okuta Dawudi aha ngoma? (Isa 55:11) Bibuli teri kukigambaho, konka eki tutari kubanganisaho ni eki: Sawulo akaba ari kweta omu kabi. Abari kurwanisa Ruhanga burijo tibari kubasa kusingura!

3. Ni bata oku Dawudi yabire nayehurira n’obu yabire ari omu mbera zigumire?

³ Dawudi akaba atari kwetungura. Ti we owashaziremu kuba omugabe wa Isirayeli. Yehova ni we owamutorine. (1 Sam 16:1, 12, 13) Eco kikatuma Sawulo yamureba nk’omwangi weye. Konka Dawudi tararucwerire Yehova ahabw’ebizibu ebi yarabiremu; kandi taratongine ahabw’ebyokurya bice ebi yabire ayine n’okutura omu byina by’orukiri. Omu  mwanya gw’eco, obu yabire ayesherekire omuri ebyo byina ni bwo ari kubasa kuba yahandikire eco ceshongoro kirungi c’okuhimbisa Yehova ekirimu ebigambo by’ecahandikirwe kikuru, ekiri kugira ngu: ‘Abasherura Yehova, tibariburirwa kirungi cona.’—Zab 34:10.

4. Ni biha bibuzo ebi twaza kushwijuma, kandi ahabw’enki kiri ec’omugasho kubishwijuma?

⁴ Abahereza ba Yehova bingi omuri obu bwire, noshanga batine ebyokurya ebiri kumara n’ebindi ebi bari kwetenga. * Eco na munonga kikabaho omuri obu bwire bwa Korona. Kandi ebizibu nibyija kweyongera oku turi kugenda turi kutaha omu ‘kubonabona kwingi.’ (Mat 24:21) Obwe rero, reka tushwijume ebi bibuzo bina: Ni buha buryo obu Dawudi ‘ataraburirwe kirungi cona’? Ahabw’enki tushemerire kumarwa n’ebi twine? Ahabw’enki tushemerire kwesiga ku Yehova arije kutufaho? Kandi shi ni bata oku turi kubasa kwetegura hati ebiro eby’omu misho?

5-6. Ni bata oku omuri Zaburi ya 23:1-6 hari kutukwasa kushoborocerwa eki Dawudi yabire ari kwenda kumanyisa obu yagambire ku abahereza ba Ruhanga ‘batariburirwa kirungi cona’?

⁵ Ni enki eki Dawudi yabire nayenda kumanyisa obu yagambire ngu abahereza ba Yehova ‘tibariburirwa kirungi cona’? Nitubasa kukishoborocerwa twashwijuma ebigambo ebiri kushusha nk’ebyo ebiri omuri Zaburi ya 23. (Shoma omuri Zaburi ya 23:1-6.) Dawudi natandika eyo zaburi n’ebigambo ebiri kugira ngu: ‘Yehova ni we murisa wange, tindicena kintu cona.’ Omu zindi nyiriri, Dawudi akagamba ebintu ebyine omugasho, ni okugamba emigisha eyi yatungire ahabw’okwikiriza ngu Yehova abe Omurisa weye. Yehova akebembera Dawudi ‘omu mihanda y’okuhikirira,’ kandi yamuha obuyambi obu ari kwetenga omu bwire burungi n’omu bwire bubi. Dawudi akaba namanya ku n’obu yabire ari omu ‘irisizo ry’obunyasi buto’ rya Yehova yabire atarabure kuhikwaho n’ebizibu. Hine obu yabire nahurira ahwiremu amani, ahurira ari nk’ori kugenda  ‘omu ruhanga rw’ekibunda c’okufa’ kandi agira n’abangi. Konka ahakuba Yehova yabire ari Omurisa wa Dawudi, ‘taratinire kabi kona.’

⁶ Obwe rero hati twatunga ecokugarukamu c’ekibuzo ekiri kugira ngu: Ni bata oku Dawudi ‘ataraburirwe kirungi cona’? Dawudi tarabuzire kirungi cona c’omu buryo bw’omwika. Okushemererwa kweye kukaba kutegamire aha butungi. Akaba namarwa n’ebi Yehova yabire ari kumuha. Eki yabire nareba nk’ec’omugasho ni emigisha hamwe n’oburinzi ebi Ruhanga yabire namuha.

7. Tukuratize ebiri omuri Luka 21:20-24, ni kiha kizibu eki Abakristo b’omu kinyigana c’okubanza ababire batwire omuri Buyudaya babugine?

⁷ Ebigambo bya Dawudi nibitukwasa kumanya omugasho g’okugira emitekatecere eringanire aha bintu ebi twine. Nitubasa kushemerererwa ebi twine, konka ti byo ebi tushemerire kutaho omutima omu kubaho kwitu. Eco ni co kintu c’omugasho eki Abakriso b’omu kinyigana c’okubanza ababire batwire omuri Buyudaya babire bashemerire kumanya. (Shoma omuri Luka 21:20-24.) Yesu akaba yabarabwire ku obwire bwabire burije kuhika Yerusalemu ‘ekehinguririzibwa engabo.’ Eco ku cabire kirabeho, bakaba bashemerire ‘kuhungira aha nshozi.’ Oku kuhunga kwabo kukaba kurakize amagara gabo, konka bakaba barije kuferwa ebintu byabo. Hahwire emyaka myingi Omunara g’Omurinzi gugambire guti: “Bakasiga emisiri yabo n’amaju gabo, kandi tihine kintu na kimwe ec’omu nju zabo eki batwire. Ahabw’okuba babire bari kwesiga oburinzi n’obuyambi bya Yehova, bakata okumuramya omu mwanya g’okubanza okukira ekindi kintu cona.”

8. Ni riha shomo ry’omugasho eri turi kwegera aha byahikire aha Bakristo b’omu kinyigana c’okubanza ababire batwire omuri Buyudaya?

⁸ Ni riha shomo ry’omugasho eri turi kwegera aha byahikire aha Bakristo b’omu kinyigana c’okubanza ababire batwire omuri Buyudaya? Omunara g’Omurinzi ogu twaba tugambireho gukagira ngu: “Emitekatecere yitu aha bikwatirine n’ebintu ebi twine neyija kugezibwa; mbehi ni byo ebi turi kureba nk’eby’omugasho, ninga okujunwa oku Ruhanga arituha ahabw’okugumizamu turi abesigwa ni ko okwine omugasho? Mazima, kugira ngu twije kurokoka nikija kutushaba kuraba omu bizibu n’okweyima ebintu bimwe na bimwe. Tushemerire kuba twetegwire kukora cona ekiri kubasika, kandi tukatoreza Abakristo b’omu kinyigana c’okubanza abahungire bakaruga omuri Buyudaya.” *

9. Ni bata oku obuhabuzi obu entumwa Pawulo yahire Abaheburayo buri kukugumya?

⁹ Tecereza aha bizibu ebi abo Bakristo bona babire bine ahabw’okusiga ebintu byona enyima bakatandika busya? Bakaba nibetenga okwikiriza kugira ngu besige ku Yehova yabire arije kubafaho aha bi bari kwetenga. Konka bakaba bine ec’okubayamba. Hari kuburayo emyaka itano ngu Abaroma bagote Yerusalemu, entumwa Pawulo akaha Abaheburayo obuhabuzi bw’omugasho ari kubagambira ati: ‘Mutarigira omutima oguri kukunda empiha, ebi mwine bibe ni byo byabamara; ahakuba we akagira ati: Tindikusigaho, kandi tindikuhemukaho na kace. Ni co turi kugambira, tutari kubanganisa, tuti: Mukama ni we muhwezi wange, Tinditina; Omuntu nabasa kungira ata?’” (Heb 13:5, 6) Hatariho okubanganisa, abayorobire obuhabuzi bwa Pawulo mbere y’okutahirirwa n’Abaroma kikaborobera kubaho omu buryo bworobi. Nibabasa kuba babire bari kwesiga batari kubanganisa ku Yehova yabire arije kubaha ebi babire bari kwetenga. Ebigambo bya  Pawulo nibituhamiza ku n’itwe Yehova arije kutufaho.

10. Ni riha ibanga eri Pawulo yatugambire?

¹⁰ Pawulo akaha Timoteyo obuhabuzi nk’obwe, kandi n’itwe nibutukwataho. Akahandika ati: ‘Ku turabe twine ebyokurya n’eby’okujwara, ebyo bigume bitumare.’ (1 Tim 6:8) Mbwenu shi ebyo nibimanyisa ngu tituri kubasa kurya ebyokurya birungi, kutura omu mwanya murungi, ninga shi obumwe tukagura ebijwaro bisya? Eco ti co eki Pawulo yabire ari kumanyisa. Pawulo akaba namanyisa ngu tushemerire kumarwa n’ebi twine. (Fil 4:12) Obwo ni bwo ‘buryo’ ninga ibanga eri Pawulo yabire ari kukoresa. Ekintu c’omuhendo eki twine ni obunywani bwitu na Ruhanga, ti ebintu ebi tutungire.—Hab 3:17, 18.

11. Ni enki eki turi kwegera aha bigambo ebi Musa yagambire Abisirayeli aha bikwatirine n’okumarwa?

¹¹ Oku Yehova ari kureba ebi turi kwetenga n’oku turi kubireba bibibasa kutana. Reba ebi Musa yagambire Abisirayeli bwanyima y’okumara emyaka 40 bari omu butayo: ‘Yehova Ruhanga wawe akakuha omugisha omu mirimo yona ey’emikono yawe, yamanya engendo zawe ez’omuri obu [butayo] buhango; kandi emyaka egi yona makumi ana Yehova Ruhanga wawe agumire n’iwe, otine ki obuzire.’ (Bir 2:7) Omuri eyo myaka 40, Yehova akabaha manu y’okurya. Ebijwaro ebi bayihire omuri Misiri tibiracwekire. (Bir 8:3, 4) N’obu Abisirayeli bamwe babire bari kubasa kubireba nk’ebitari kumara, Musa akabijusya ku babire bine byona ebi babire bari kwetenga. Yehova nayija kushemererwa ku turabe abantu  abari kumarwa, ni okugamba okushemerererwa bice ebi twine tukabireba nk’omugisha kandi tukabimusimira.

12. Ni enki ekiri kwereka ku Dawudi yabire ari kwesiga Yehova omu mwanya g’okweyesiga?

¹² Dawudi akaba namanya ku Yehova ari omwesigwa kandi ku nafa aha bari kumukunda. N’obu amagara ga Dawudi gabire gari omu kabi obu yayeshongwire zaburi ya 34, okwikiriza kweye kukatuma yareba Marayika wa Yehova amwehinguririze n’ihema (Zab 34:7) Dawudi nabasa kuba yabire ari kugeranisa marayika wa Yehova n’omusirikare ori kukambika ahantu, akaguma nareba ategerize omwangi. N’obu Dawudi yabire ari omurwani rugambwa kandi Yehova amuraganisize obugabe, taresigire obushoborozi bweye bw’okurecera amabare n’okurwanisa rurara omu kusingura abangi beye. (1 Sam 16:13; 24:12) Akaguma atire amisho ahari Ruhanga kandi yayesiga ku marayika wa Yehova ari ‘kujuna abari kumutina.’ Ni amazima, tituri kubasa kutunga oburinzi omu buryo bw’ecokutangaza omuri obu bwire. Konka nitumanya ku omuntu ori kwesiga Yehova atari kubasa kuhikwaho n’akabi k’ebiro byona.

13. Gogi wa Magogi ku aritutahirira, ahabw’enki turije kurebeka nk’ebyokurya ebihire, konka shi ni buha bwesige obu twine? (Reba ekishushani c’aha kishembeso.)

¹³ N’obu turi kwesiga oburinzi bwa Yehova, juba aha nibwija kugezibwa. Obu Gogi wa Magogi aritahirira abahereza ba Ruhanga, amagara gitu nigija kuba gari omu kabi. Nitwija kuba turi kwetenga kwesiga ku Yehova arije kuturinda. Ago mahanga ku garitutahirira, nitwija kuba turi nk’entama ezitine burinzi bwona. (Ezk 38:10-12) Nitwija kuba tutine ebirwaniso kandi tutaregire eby’okurwana. Ago mahanga nigija kutureba nk’ebyokurya ebihire. Tibarije kureba eki itwe turi kureba ahabw’okwikiriza ni okugamba ba marayika bingi abarigota abahereza ba Ruhanga kugira ngu babarwanirire. Bakabireba bata shi? Tibine okwikiriza. Mazima nibija kutungurwa ku barireba amahe g’omu iguru gayija kuturwanirira!—Kush 19:11, 14, 15.

14. Ni enki eki turi kubasa kukora hati kugira ngu twetegure ebiro by’omu misho?

¹⁴ Ni enki eki turi kubasa kukora hati ngu twetegure ebiribaho omu biro by’omu misho? Ecokubanza, tushemerire kugira emitekatecere eringanire aha bintu ebi twine kandi tuguma turi kwijuka ku hine obu turibisiga enyima byona. Nambwenu tushemerire kumarwa n’ebi twine kandi tutunga okushemererwa ahabw’obunywani obu twine na Yehova. Oku turi kukizaho kumanya Ruhanga ni ko turi kukizaho kwesiga ku arije kuturinda obu Gogi wa Magogi arije kuba ari kututahirira.

15. Ni biha bintu ebyabire ahari Dawudi acari muto ebyamuhamize ku Yehova yabire ataramuhemukeho?

¹⁵ Reba ekindi ecakwasize Dawudi obu yabire ari omu bigezo kandi ekiri kubasa kutukwasa n’itwe. Dawudi akagamba ati: ‘Nimuroze, murebe Yehova ku ari murungi! Ori [kumuhungiraho] wena ayine omugisha.’ (Zab 34:8) Ebyo bigambo nibyereka enshonga ahabw’enki Dawudi yabire nayesiga obuyambi bwa Yehova. Dawudi burijo akaba nayesiga obuyambi bwa Yehova kandi Yehova taramuhemukire. Obu Dawudi yabire acari muto akaza kurwana n’omushija w’amani owabire ari kwetwa Goliyati, rero yamugambira ati: ‘Erizoba Yehova nakuhayo omu mikono yange.’ (1 Sam 17:46) Bwanyima y’ebyo, Dawudi akaza kukorera  omugabe Sawulo, owagerizeho emirundi myingi kumwita. Konka, ‘Yehova akaba ari hamwe na’ Dawudi. (1 Sam 18:12) Ahakuba Dawudi yabwine oku Yehova yamukwasize omu bwire bwa kare, akaba nayesiga ku yabire arije kumukwasa n’omuri ebyo bizibu.

16. Ni bata oku turi kubasa kuroza oburungi bwa Yehova?

¹⁶ Oku turi kukizaho kwesiga obuhabuzi bwa Yehova hati, ni ko turi kukizaho kwesiga obushoborozi bweye bw’okutujuna omu biro by’omu misho. Nitwetenga okwikiriza n’obwende kugira ngu twegamire ahari Yehova twaba turi kushaba omukoresa witu obwire bw’akahumuro kugira ngu tuze omu kiterane c’akacweka ninga omu kiterane kihango, ninga shi turi kumushaba ngu atwongerere obwire tubase kuza omu nterane zitu kandi tumare obwire buringwa omu murimo g’okuburira. Reka tugire ngu omukoresa witu yabyanga kandi yatubinga aha murimo. Mbehi nitwija kwesiga ku Yehova atarije kutusigaho kandi ku arije kugumizamu kutuha ebi turi kwetenga? (Heb 13:5) Abingi abari omu murimo g’obwire bwona bakerebera oku Yehova yabayambire na munonga obu babire bari kwetenga obuyambi bweye. Mazima, Yehova ni omwesigwa.

17. Ecahandikirwe c’omwaka gwa 2022 ni kiha, kandi shi ni ahabw’enki kizire omu bwire obuhikire?

¹⁷ Ahabw’okuba Yehova ari aha rubaju rwitu titushemerire kutina ebirije kubaho omu biro by’omu misho. Ruhanga witu taritusigaho ku turagumizemu kuta ebi ari kwenda omu mwanya g’okubanza omu kubaho kwitu. Kugira ngu tugumizemu kwijuka ku tushemerire kwetegura hati embera ezigumire eziri kwenda kubaho, n’okwesiga ku Yehova ataritusigaho, Akakiko k’abarisa kakatorana ecahandikirwe c’omwaka gwa 2022 c’omuri Zaburi ya 34:10. Nikigira ngu: ‘Abasherura Yehova tibariburirwa kirungi cona.’