EKICWEKA C’OKWEGA 4
Ahabw’enki tushemerire kwija aha Kijusyo?
‘Mugume mukore musyo okunyijukiraho.’—LUKA 22:19.
ECESHONGORO CA 20 Okahayo Omwana Waawe ow’Omuhendo
EMPINYE *
1-2. (a) Ni ryari obu abantu abamwe bari kwijuka omukundwa wabo owafire? (b) Ni guha mugenzo ogu Yesu yatandikisize omu kiro ecabandize okufa kweye?
ABAKUNDWA bitu n’obu bakuba bamazire emyaka myingi bafire, nitugumizamu kubijuka. Ogo mugenzo g’okubijuka nigutuma twabijukiraho ebintu byingi.
2 Buri mwaka, nitwekwatanisa n’abantu bingi b’omu nsi kugira ngu twijuke okufa k’omuntu omwe owu turi kukunda. (1 Pet 1:8) Nitubuganira hamwe kugira ngu twijuke omuntu owatuferire akatwiha omu kicumuro n’okufa. (Mat 20:28) Yesu akaba nayenda ngu abakurasi beye bagume bari kwijuka orufu rweye. Omu kiro ecabandize okufa kweye akatandikisa Obugenyi bwa Mukama bw’omwebazo rero yaragira ati: ‘Mugume mukore musyo okunyijukiraho.’ *—Luk 22:19.
3. Ni enki eki twaza kushwijuma omuri eki kicweka?
3 Abantu bace abari kwija aha Kijusyo ca Kristo bine amasiko g’okwija kutura omu iguru. Konka nihaba hariho n’abandi bingi abine amasiko g’okwija kutura omu nsi. Omuri eki kicweka, nitwija kushwijuka enshonga ahabw’enki abo bantu b’emiringo ebiri bari kwija aha Kijusyo ekiri kubaho buri mwaka. Nambwenu twaza kushwijuma oku kwekwatanisa omu Kijusyo kiri kutugasira. Reka tutandike turi kushwijuma enshonga eziri kutuma Abakristo abashukirweho omwika bayekwatanisa omu Kijusyo.
EKIRI KUTUMA ABAKRISTO ABASHUKIRWEHO OMWIKA BAYIJA AHA KIJUSYO
4. Ahabw’enki abashukirweho omwika bari kurya aha mugati kandi bakanywa n’ahari vinyo ebiri kukoresibwa omu Kijusyo?
4 Buri mwaka, abashukirweho omwika nibategereza n’ekihika Ekijusyo kugira ngu bacekwatanisemu kandi barye aha bigereraniso. Mbwenu shi ahabw’enki bari kurya aha mugati kandi bakanywa n’ahari vinyo? Kugira ngu tutunge ecokugarukamu, reka tushwijume ecabireho omu kiro ecabandize okufa kwa Yesu. Yesu n’entumwa zeye ku bamazire kurya hamwe pasika, akatandikisa Obugenyi bwa Mukama bw’omwebazo. Akakwata omugati na vinyo yabiha entumwa zeye 11 eziri kwesigwa kandi yazigambira ngu zirye kandi zinywe. Yesu akabagambira endagano ibiri, ni okugamba endagano nsya hamwe n’endagano y’Obukama. * (Luk 22:19, 20, 28-30) Ezo ndagano zikaba ziratume ezo ntumwa hamwe n’abandi bantu bace babona oburyo bw’okuba abagabe n’abatambi omu iguru. (Kush 5:10; 14:1) Abakristo bace abashukirweho omwika abasigireho, * abari omuri ezo ndagano ibiri ni bo abari kurya aha mugati kandi bakanywa n’ahari vinyo aha Kijusyo.
5. Ni enki eki Abakristo abashukirweho omwika bari kumanya aha bikwatirine n’amasiko agu bine?
5 Reba endijo nshonga eri kutuma Abakristo abashukirweho omwika bashemerererwa kwija omu Kijusyo. Obwo bugenyi nibubaha omugisha g’okutekateka aha masiko gabo. Mazima, Yehova akabaha omugisha g’omutano g’okwija kutunga amagara agatari kufa kandi agatari kujunda omu iguru, bakahereza Yehova bari hamwe n’abandi Bakristo abashukirweho omwika 144,000, kandi ekiri kukira byona bakareba omu misho ga Yehova Ruhanga! (1 Kor 15:51-53; 1 Yoh 3:2) Abakristo abashukirweho omwika nibamanya batari kubanganisa ku bayetirwe kutunga eyo migisha. Konka kugira ngu bikirizibwe kuza omu iguru bashemerire kuguma bari abesigwa kuhisya aha kufa kwabo. (2 Tim 4:7, 8) Abashukirweho omwika ku bari kutekateka aha masiko gabo g’okuza omu iguru, nibashemererwa munonga. (Tit 2:13) Konka shi kiri kita ahab’omu “zindi ntama”? (Yoh 10:16) Ni ziha nshonga zimwe eziri kutuma na bo bayekwatanisa omu Kijusyo?
EKIRI KUTUMA AB’OMU ZINDI NTAMA BAYIJA AHA KIJUSYO
6. Ahabw’enki ab’omu zindi ntama bari kwija aha Kijusyo buri mwaka?
6 Ab’omu zindi ntama nibija aha Kijusyo, batari kwenda kukwata aha bigeraniso ahobwe bari endorerezi. Omu mwaka gwa 1938, abine amasiko g’okutura omu nsi baketwa aha Kijusyo aha murundi g’okubanza. Omunara g’Omurinzi gw’aha kiro ca 1, Okwakashatu 1938, gukagamba ngu: “Nikija kuba kihikire kandi kishemire ab’omu zindi ntama baguma omuri ezo nterane bakareba ebiri kubaho. Ni bwo bwire bw’okushemererwa n’abashukirweho omwika.” Nk’oku abari kuba besirwe omu mbaga bari kuba besirwe ngu babe endorerezi kusha, ni ko n’ab’omu zindi ntama na bo bari kuba besirwe kugira ngu babe endorerezi aha Kijusyo.
7. Ni enki eki ab’omu zindi ntama bari kukora baba bahurikize toku y’Ekijusyo?
7 Nk’oku abashukirweho omwika bari kukikora, ab’omu zindi ntama na bo nibatekateka aha masiko gabo. Nibategereza n’ekihika toku y’Ekijusyo ahakuba neba negamba munonga ahari Kristo n’abantu 144,000 abarije kutegeka na we, hamwe n’ebi barije kukorera abantu omu butegeki bw’emyaka 1000. Yesu nayija kwebembera abo bashija abaritegeka na we, rero bahindure ensi yona paradiso kandi bahisye abantu b’abesigwa aha kuhikirira. Mazima ku nikitushemeza kubona abantu bingi munonga bari kwija aha Kijusyo bari endorerezi, bakatekateka aha ku obuhanuzi bw’omuri Bibuli burije kuhikirira nk’obwo omuri Isaya 35:5, 6; 65:21-23; n’omu Kushururwa 21:3, 4? Ku bari kutera akashushani bari omu nsi ensya bo n’abakundwa babo abafire, nikigumya amasiko gabo kandi kituma bamarira kutarireka kuhereza Yehova.—Mat 24:13; Gal 6:9.
8. Ni eha ndijo nshonga eri kutuma ab’omu zindi ntama bayija aha Kijusyo?
8 Reba eyindi nshonga ahabw’enki ab’omu zindi ntama bari kwekwatanisa omu Kijusyo. Nibaba bari kwenda kwereka ku nibakunda abashukirweho omwika kandi ku nibabashagika. Ekigambo ca Ruhanga kikaba cahanwire ku oko kukwatanisa kwabire kurabeho ahagati y’abashukirweho omwika n’abine amasiko g’okwija kutura omu nsi. Bata shi? Reka turebe ebyokureberaho bice.
9. Ni bata oku obuhanuzi oburi omuri Zekariya 8:23 buri kwereka oku ab’omu zindi ntama bari kureba abashukirweho omwika?
9 Shoma omuri Zekariya 8:23. Obu buhanuzi nibwereka oburyo obu ab’omu zindi ntama bari kurebamu abandi benetata na banyanyazi abashukirweho omwika. Ekigambo “Omuyudaya” n’“imwe” nibimanyisa abashukirweho omwika abasigire omu nsi. (Rom 2:28, 29) “Abantu ikumi” abari kuruga omu mahanga ga buri rurimi, nibageranisa ab’omu zindi ntama. Nibakwata aha mukugiro gw’ekanzu y’Omuyudaya bari kwekwatanisa omu kuramya kw’amazima. Obwe rero, oku kiri kurebeka, omu mwebazo gw’aha Kijusyo, ab’omu zindi ntama nibereka ku nibashagika abashukirweho omwika bari kwekwatanisa na bo.
10. Ni enki eki Yehova yakozire kugira ngu ahikirize obuhanuzi oburi omuri Ezekiyeli 37:15-19, 24, 25?
10 Shoma omuri Ezekiyeli 37:15-19, 24, 25. Omu kuhikirira k’obwo buhanuzi, Yehova akabuganisiza hamwe ab’ezindi ntama n’abashukirweho omwika akoresize omurunga g’obumwe. Obwo buhanuzi nibugamba aha nkoni ibiri. Abine amasiko g’okutura omu iguru bari nk’enkoni ya “Yuda” (omuryango ogu abagabe b’omuri Isirayeli babire bari kurugamu), kandi ab’omu zindi ntama bari nk’enkoni ya “Efurayimu.” * Yehova nayija kubuganisiza hamwe eyo mitwe yombi kugira ngu ebe “enkoni emwe.” Eco nikimanyisa ku babire barije kwekwatanisiza hamwe omu kuhereza hamwe bebembirwe n’Omugabe Kristo Yesu. Buri mwaka abashukirweho omwika n’ab’omu zindi ntama nibija omu Kijusyo, batari emitwe ebiri ahobwe bari “obusyo” bumwe obwebembirwe n’“omurisa omwe.”—Yoh 10:16.
11. Ni buha bundi buryo obu ab’omu “zindi ntama” bari kwereka ku nibashagika benishe ba Kristo?
11 Shoma omuri Matayo 25:31-36, 40. “Entama” eziri kugambwa omuri ogu mugani nizigeranisa abantu b’abesigwa abarije kuba bariho omu biro by’aha muheru, bine amasiko g’okwija kutura omu nsi ni okugamba ob’omu zindi ntama. Nibashagika benishe ba Kristo abashukirweho omwika abasigire omu nsi, na munonga bari kubakwasa kuhikiriza omurimo g’okuburira n’okuhindura abantu abegi omu nsi yona.—Mat 24:14; 28:19, 20.
12-13. Ni bata oku ab’omu zindi ntama bari kwereka ku nibashagika benishe ba Kristo?
12 Buri mwaka omu sande eziri kubandiza Ekijusyo, ab’omu zindi ntama nibereka ku nibashagika benishe ba Kristo bari kwekwatanisa omu bwijwire omu kweta abantu aha Kijusyo. (Reba akashanduku akine omutwe oguri kugira ngu: “ Mbehi oyetegwire Ekijusyo?”) Nambwenu nibakora entebekanisa zona kugira ngu Ekijusyo kije kugenda ge omu bibina by’omu nsi yona, n’obu ebibina bimwe biri kuba bitine abari kurya aha bigeraniso. Ab’omu zindi ntama nibashemerererwa kushagika benishe ba Kristo omuri obwo buryo. Nibamanya ku Yesu ari kureba ebi bari kukorera benishe abashukirweho omwika kandi ku ari nkawe owu bari kubikorera.—Mat 25:37-40.
13 Ni ziha zindi nshonga eziri kutuma twena twayija omu Kijusyo, amasiko agu twakuba twine gona?
EKIRI KUTUMA TWENA TWAYIJA AHA KIJUSYO
14. Ni bata oku Yehova na Yesu batwerekire ku nibatukunda munonga?
14 Nibyereka ku nitusima Yehova na Yesu aha bwa rukundo eyi batwerekire. Yehova akatwereka rukundo omu buryo bwingi, konka oburyo bumwe nibukira obundi bwona. Ruhanga witu akatwereka rukundo etarimu okwekunda ari kohereza Omwana weye w’omuhendo, ngu abonabone kandi atufire. (Yoh 3:16) Yesu na we akatwereka rukundo nyingi ari kwikiriza kuhayo amagara geye abyekundire aha bwitu. (Yoh 15:13) Tituri kubasa kubona eco kushashura Yehova na Yesu aha bwa rukundo eyi batwerekire. Konka nitubasa kwereka ku nitubasima turi kukora ebi bari kwenda burizoba omu kubaho kwitu. (Kol 3:15) Kandi nitwekwatanisa aha Kijusyo kugira ngu twijuke rukundo eyi batwerekire, kandi n’itwe tubereke ku nitubakunda.
15. Ahabw’enki abashukirweho omwika n’ab’omu zindi ntama bari kureba ekitambo nk’ec’omuhendo munonga?
15 Nibyereka ku nitureba ekitambo nk’ec’omuhendo munonga. (Mat 20:28) Abashukirweho omwika nibareba ekitambo nk’ec’omuhendo munonga, ahakuba nikituma amasiko gabo gabasika. Ahabw’okuba bari kwikiriza ekitambo ca Yesu, nikituma Yehova yabareba nk’abahikirire kandi abakwata nk’abana beye. (Rom 5:1; 8:15-17, 23) Ab’omu zindi ntama na bo nibereka ku nibasima ahabw’ekitambo. Ahabw’okuba bari kwikiriza ekitambo ca Yesu, nibemerera omu misho ga Ruhanga bine omuntuwomunda otari kubacwera orubanja, kandi nambwenu kituma bagira amasiko g’okwija ‘kuraba omu kubonabona kwingi.’ (Kush 7:13-15) Oburyo bumwe obu abashukirweho omwika n’ab’omu zindi ntama bari kwerekamu ku nibasima aha bw’ekitambo, ni okwija aha Kijusyo buri mwaka.
16. Ni eha ndijo nshonga eri kutuma twayekwatanisa aha Kijusyo?
16 Endijo nshonga eri kutuma twayekwatanisa omu Kijusyo ni okwereka ku nitworobera Yesu. Amasiko gona agu twakuba twine, buri omwe nayorobera ekiragiro eki Yesu yatuhire omu kiro ecabandize okufa kweye. Akagira ati: ‘Mugume mukore musyo okunyijukiraho.’—1 Kor 11:23, 24.
OKU TWENA TURI KUGASIRWA TWAYIJA AHA KIJUSYO
17. Ni bata oku Ekijusyo kiri kutukwasa kuhika hihi ya Yehova?
17 Nikituma twahika hihi ya Yehova. (Yak 4:8) Nk’oku twamara kukireba, Ekijusyo nikituma twatekateka aha masiko agu Yehova yatuhire n’ahari rukundo eyi yatwerekire. (Yer 29:11; 1 Yoh 4:8-10) Ku turi kutekateka aha masiko g’omu biro by’omu misho n’ahari rukundo ya Ruhanga etari kuhwaho, nitukizaho kukunda Yehova kandi obunywani bwitu na we bukizaho kuhama.—Rom 8:38, 39.
18. Okutekateka aha cokureberaho ca Yesu nikituhiga kukora ki?
18 Nikituma twatoreza ecokureberaho ca Yesu. (1 Pet 2:21) Omu biro ebiri kubandiza Ekijusyo, nituta omutima aha nkuru z’omuri Bibuli eziri kugamba aha byabireho omu sande za bwanyima Yesu ari omu nsi, aha kufa kweye, n’aha kuzoka kweye. Bwanyima omu mwebazo gw’Ekijusyo nituhurira toku eri kutwijusya oku Yesu yatukunzire. (Efe 5:2; 1 Yoh 3:16) Ku turi kushoma oburyo obu Yesu yayehireyo kandi tukabutekatekaho nikituma twayenda “kutwaza nk’oku yabire natwaza.”—1 Yoh 2:6.
19. Ni bata oku turi kubasa kuguma omu kukunda kwa Ruhanga?
19 Nikituma twamaririra kuguma omuri rukundo ya Ruhanga. (Yud 20, 21) Nituguma omuri rukundo ya Ruhanga turi kukora cona eki turi kubasa kugira ngu tumworobere, tweze izina ryeye, kandi tushemeze omutima gweye. (Emi 27:11; Mat 6:9; 1 Yoh 5:3) Okwekwatanisa omu Kijusyo nikituma twamaririra kubaho burizoba turi kwereka Yehova ku turi kwenda kuguma omu ‘kukunda kweye ebiro byona.’
20. Ni ziha nshonga z’omugasho eziri kutuma twayija aha Kijusyo?
20 Yaba twine amasiko g’okutura omu iguru ninga ag’okuba omu nsi, twine enshonga eziri kutuma twayija aha Kijusyo. Buri mwaka ku turi kuteranira hamwe ahari eco kiro, nitwijuka orufu rw’omuntu omwe owu turi kukunda munonga, Yesu Kristo. Ekiri kukira byona, nitwijuka ekikorwa ekiri kwereka rukundo kukira ebindi byona ni okugamba rukundo eyi Yehova yatwerekire ari kutuha ekitambo. Omuri ogu mwaka, Ekijusyo nikija kuba omu mwebazo g’Orwakatano, ekiro ca 15 Okwakana, 2022. Nitukunda Yehova n’Omwana weye. Ni yo nshonga aha kwijuka orufu rwa Yesu, hatine ekintu na kimwe ekirije kutuzibira kwija aha Kijusyo.
ECESHONGORO CA 16 Himbisa Ya Ahakuba Atooraine Omwana we
^ par. 5 Twaba twine amasiko g’okutura omu iguru ninga ag’okutura omu nsi erihinduka paradiso, nitureba ku okwekwatanisa omu Kijusyo buri mwaka ari ec’omuhendo. Eki kicweka nikija kutwereka enshonga eziri omu Byahandikirwe ezishemerire kutuma twaza omu Kijusyo n’oku biri kutugasira.
^ par. 2 Ebi bigambo, obumwe nibihindurwamu ngu: “Mugume mubikore muri kunyijuka” (Today’s English Version) ninga shi “Mugume mukore eki nk’ekijusyo cange” (The Jerusalem Bible).
^ par. 4 Kugira ngu omanye byingi aha bikwatirine n’endagano nsya hamwe n’endagano y’Obukama, reba ekicweka ekiri kugira ngu, “Nimwija kuba ‘Obukama bw’abatambi’” omu Munara g’Omurinzi 15, Okwikumi, 2014, p. 15-17.
^ par. 4 EBIGAMBO EBISHOBORWIRWE: Ebigambo abashukirweho omwika abasigireho nibimanyisa Abakristo abashukirweho omwika abacari omu nsi.
^ par. 10 Kugira ngu omanye byingi aha buhanuzi oburi kugamba aha nkoni ibiri oburi omuri Ezekiyeli ekicweka ca 37, reba ekitabo Okuramya kw’amazima kuri kugarurwaho! (Pure Worship of Jehovah—Restored At Last!), p. 130-135, par. 3-17.
