1-3. Ni biha bizibu ebiri kubasa kutuma abahereza ba Ruhanga barira?

 NI RYARI obu oheruka kurira? Hine obu turi kurira ahabw’okushemererwa. Konka obwire bwingi niturira ahabw’obusaasi bw’omu mutima. Ecokureberaho: Hine obu turi kurira twaferwa omukundwa witu. Omunyanyazi ori kwetwa Lorilei otwire omuri Amerika, akahandika ati: “Hariho obwire obu ndi kugira obusaasi bwingi ahabw’okufisa muhara wange kandi mpurira hatariho ekintu ekiri kubasa kumpumuriza. Omuri obwo bwire, nkaba ninyebuza yaba ndi kubasa kwehangana.” *

² Nitubasa kurira ahabw’ezindi nshonga. Omupayoniya w’omuri Japan ori kwetwa Hiromi, akagamba ati: “Ninkunda kurira naba mpwiremu amani ahabw’abantu abu ndi kubugana omu murimo g’okuburira. Hine obu ndi kurira, naba ndi kushaba Yehova ngu ankwase kubona omuntu ori kwenda kwega amazima g’omuri Bibuli.”

³ Mbehi n’iwe okaraba omu mbera nk’ezi twagamba aha ruguru? Abingi omuri itwe nituzirabamu. (1 Pet 5:9) Nitwenda ‘kuhereza [Yehova] tushemerirwe,’ konka hine obu turi kubasa kuhereza Yehova twine amarira ahabw’amaganya, ninga shi tuhwiremu amani ahabw’ekigezo nanka ekiri kugeza obwesigwa bwitu ahari Ruhanga. (Zab 6:6; 100:2) Ni enki ekiri kubasa kutukwasa kwehanganira ezo nyehurira mbi?

4. Ni enki eki twaza kushwijuma omuri eki kicweka?

⁴ Nitubasa kwegera byingi aha cokureberaho ca Yesu. Hine obwire obu na we yabire nagira enyehurira zigumire rero kituma ‘yarira.’ (Yoh 11:35; Luk 19:41; 22:44; Heb 5:7) Reka tushwijume obwire obu Yesu yariziremu. Ku turabe nitukikora, nitwija kureba eki biri kutwegesa. Nambwenu nitwija kureba eki turi kubasa kukora kugira ngu twehanganire ebyo bintu ebiri kutuma twarira.

5. Ni enki eki ebiri omuri Yohaana 11:32-36 biri kutwegesa ahari Yesu?

⁵ Omu bwire bw’itumba ry’omu mwaka gwa 32 B.Y., munywani wa Yesu ori kwetwa Lazaro akarwara rero yafa. (Yoh 11:3, 14) Lazaro akaba ayine abanyanyazi babiri ari bo Mariya na Marita, kandi Yesu akaba nakunda munonga ab’omuri eyo ka. Abo banywani beye bakaba bashashire munonga ahabw’okufisa munywani wabo. Lazaro ku yamazire kufa, Yesu akaza omu caro ca Betaniya, ahu Mariya na Marita babire batwire. Marita ku yahurire ngu Yesu arimu nayija, akiruka yaza kumubugana. Tekateka obusaasi obu yabire ayine obu yagambire ngu: ‘Mukama wange, kuri obire ori aha, mwenetata yaba atarafe.’ (Yoh 11:21) Bwanyima y’aho Yesu ku yarebire Mariya n’abandi bari kurira na we ‘akarira.’—Shoma omuri Yohana 11:32-36.

6. Ahabw’enki Yesu yarizire obu Lazaro yabire afire?

⁶ Ahabw’enki Yesu yarizire obwo bwire? Ekitabo kimwe ekiri kushoborora Bibuli (Insight on the Scriptures) kikatanga ec’okugarukamu kiri kugira kiti: “Yesu ku yarebire banywani ba Lazaro ahabw’okufa kweye, kandi na munywani weye Lazaro afire ‘yasinda omutima, yarira.’” * Yesu nabasa kuba yabire ari kutekateka aha busaasi obu munywani weye Lazaro yarabiremu obu yabire arwire n’aha ku Lazaro yayehurire ku yabire natekateka ku yaza kufa. Nambwenu Yesu akarira ahabw’okureba Mariya na Marita bari kurira ahabw’orufu rwa munyanya wabo. N’iwe yaba warafisizeho omunyabuzare wawe ninga munywani wawe, hatariho okubanganisa okatungaho obwo busaasi. Reba amashomo ashatu agu eyo nkuru eri kutwegesa.

7. Amarira agu Yesu yarizire ahabw’abanywani beye nigatwegesa ki ahari Yehova?

⁷ Yehova namanya oku ori kwehurira. Yesu ‘ni we kumurinkana’ kw’Ishe. (Heb 1:3) Okurira kwa Yesu, kukaba nikwereka oku Ishe ari kwehurira. (Yoh 14:9) Yaba ori  kuraba omu busaasi ahabw’okufisa omukundwa wawe, oyesige otari kubanganisa ku Yehova ari kumanya obusaasi obu ori kurabamu kandi na we nashasha n’iwe. Nayenda kukiza omutima gwawe ogwayatikire.—Zab 34:18; 147:3.

8. Ahabw’enki tushemerire kwesiga tutari kubanganisa ku Yesu arije kuzora abakundwa bitu abafire?

⁸ Yesu nayenda kuzora abakundwa bawe abafire. Yesu atakarizire akagambira Marita ati: ‘Munyanyoko nayija kuzoka.’ Marita akesiga ebyo bigambo bya Yesu. (Yoh 11:23-27) Ahabw’okuba Marita yabire ari omuhereza wa Yehova w’omwesigwa, akaba nayijuka okuzoka okwabireho omu bwire bwa kare okwakozirwe n’abahanuzi aribo Eliya na Elisa. (1 Bag 17:17-24; 2 Bag 4:32-37) Nambwenu nabasa kuba yahurire abantu abu Yesu yazorire. (Luk 7:11-15; 8:41, 42, 49-56) N’iwe nobasa kwesiga otari kubanganisa ku orije kushuba kureba abakundwa bawe abafire. Okuba Yesu yazorire Lazaro kandi akahumuriza n’abanywani beye ababire bari omu busaasi, ni ekihamya ekiri kutwereka ku nayendera kimwe kuzora abafire!

9. Ni bata oku ori kubasa kukwasa abafisize, nk’oku Yesu yakikozire? Gamba ecokureberaho.

⁹ Guma oshagike abafisize. Yesu tararizire na Mariya na Marita kusha, ahobwe akabahurikiza kandi yabagumya. N’itwe nitubasa kuba ni co eki twakorera abari kuganya. Omuzehe w’omuri Ositarariya ori kwetwa Dan akagira ati: “Ku namazire kufisa omukazi wange nkaba ninyetenga obuyambi. Benetata abamwe na banyanyazi babo bakaba nibantayayira nyomushana na nyekiro kugira ngu bampumurize. Bakaba nibandeka ndira, kandi eco kikaba kitari kubisa enshoni. Nambwenu bakaba nibampa obuyambi omu bikorwa nk’okoza emotoka yange, kungurira ebyokurya, n’okuntecera obwire obu nabire ndi kuhurira ntari kubasa kubyekorera. Kandi bakaba nibakunda kushaba nanye. Bakanyereka ku ni abanywani aba buzima kandi ku ni benetata ‘abazarirwe kuhwera abantu omu bihikirizi.’”—Emi. 17:17.

10. Shoborora ebintu ebiri kugambwa omuri Luka 19:36-40.

¹⁰ Izoba rimwe, Yesu akahika omuri Yerusalemu aha kiro ca 9 Nisani, omu mwaka gwa 33 B.Y. Ku yahikire hihi n’etawuni abantu bingi bakija ahu yabire ari, bayara ebijwaro byabo omu nkuto, bari kumwakira nk’Omugabe wabo. Mazima, obwo bukaba buri obwire bw’okushemererwa. (Shoma omuri Luka 19:36-40.) Obwe rero, abegi beye bakaba batari kumanya ecabire caza kukurataho. ‘[Yesu] ku yahikire hihi, akareba orurembo, yaruririra.’ Yesu akagamba akabi akabire karije kuhika aha baturage b’omuri Yerusalemu ayine amarira aha misho.—Luk 19:41-44.

11. Ahabw’enki Yesu yaririre abatuturage b’omuri Yerusalemu?

¹¹ Yesu akagira obusaasi bw’omu mutima ahabw’okuba akaba ari kumanya ku n’obu abantu bamwakirire bashemerirwe, omu kubanza babire berekire ku batari kwenda obutumwa burungi bw’Obukama. Eco kikaba kiratume Yerusalemu yacwecerezibwa kandi Abayudaya ababire barahonoke bakaba barije kutwarwa bari enkwatwa. (Luk 21:20-24) Ekiri kushasha, Yesu ku yakigambire abantu bingi bakamwanga. Mbwenu shi ni bata oku abantu b’omu kacweka k’owanyu bari kwakira obutumwa obu ori kubaburira? Mbwenu shi yaba abantu bace ari abari kwakira amazima agu ori kubahisaho, amarira ga Yesu nigakwegesa ki? Reba agandi mashomo ashatu agu turi kwegera aha marira ga Yesu.

12. Amarira agu Yesu yaririre batahi beye nigatwegesa ki ahari Yehova?

 ¹² Yehova nafa aha bantu bona. Amarira ga Yesu nigatwereka ku Yehova ari kufa aha bantu bona. ‘Tari kwenda muntu wena kuhwerecerera, kureka nayenda ngu bona bahike aha kwehana.’ (2 Pet 3:9) Omuri obu bwire nitwereka ku nitukunda batahi bitu turi kwehayo ngu tubaburire obutumwa burungi.—Mat 22:39. *

13-14. Ni bata oku Yesu yayerekire ku ayinire abantu esaasi kandi shi ni bata oku turi kubasa kumutoreza?

¹³ Yesu akaba nakora n’amani omu murimo g’okuburira. Akereka abantu rukundo ari kukoresa omugisha gona ogu yatunga, omu kubegesa. (Luk 19:47, 48) Mbwenu shi ni enki ecamuhigire kukikora? Yesu akabagirira esaasi. Hine obu abantu bingi babire nibenda kuhurira ebigambo bya Yesu, kituma we n’abegi beye ‘batabasa n’okurya.’ (Mar 3:20) Nambwenu, ekiro kimwe akeferereza yarebeka obu omushija omwe yabire ari kwenda kumuhurikiza. (Yoh 3:1, 2) Abingi omu bahurikize Yesu aha murundi g’okubanza tibarabire abegi beye. Konka bona abamuhurikize bakaburirwa omu bwijwire. Omuri obu bwire, n’itwe nitwenda ngu buri omwe atunge omugisha g’okuhurikiza obutumwa burungi. (Byak 10:42) Kugira ngu eco tukihikeho tushemerire kuhindura oburyo obu turi kuburiramu.

¹⁴ Guma obe oyetegwire kukora empinduka. Twaba tutahindwire obwire obu turi kuburiramu, nitubasa kutabona abantu abari kwenda kuhurikiza obutumwa burungi. Omupayoniya ori kwetwa Matilda akagamba ati: “Nyowe n’omushija wange, nituburira abantu omu bwire obutari kushushana. Omu kasheshe nituburira omu myanya y’obushubuzi. Omu ihangwe obu abantu bari kuba batari omu ka nitukoresa akagare. Bwanyima omu mwebazo, nituburira abantu tubashangire omu maka gabo.” Omu bwire bw’okuburira omu mwanya ogu turi kukunda, tushemerire kuba twetegwire kuhindura obwire obu turi kuburiramu kugira ngu tubone abantu bingi oku kiri kubasika. Ku turakikore tusyoya nitwesiga ku Yehova arije kushemererwa.

15. Ni enki ecabireho omu kiro ecabandize okufa kwa Yesu nk’oku kiri kugambwa omuri Luka 22:39-44?

¹⁵ Omu mwebazo gw’aha kiro ca 14, Nisani omu mwaka gwa 33 B.Y., Yesu akaza omu musiri gwa Gestimani. Ku yahikireyo akagambira Yehova ebimuri aha mutima. (Shoma omuri Luka 22:39-44.) Omuri obwo bwire obwabire bugumire ni bwo Yesu ‘yashabire ari kweshengereza munonga narira, natakira’ ishe. (Heb 5:7) Ni enki Yesu yashabire omuri eco kiro ecabandize okufa kweye? Akashaba Yehova ngu amuhe amani ngu agumizemu kumubera omwesigwa kandi akore ebi ari kwenda. Yehova akahurira obusaasi bw’Omwana weye, rero yayohereza marayika w’okumugumya.

16. Ahabw’enki Yesu yabire ayine obusaasi obu yabire ari kushabira omu musiri gwa Gestimani?

¹⁶ Hatariho okubanganisa, ecatumire Yesu yashaba narira omu musiri gwa Getsimani, ni oku abantu babire barije kumureba nk’omusiisi owajuma izina rya Ruhanga. Nambwenu akaba natecereza aha murimo gw’amani ogwabire gumutegerize, ni okugamba okweza izina ry’Ishe. Mbwenu shi yaba n’iwe ori omu mbera zigumire eziri kugeza obwesigwa bwawe ahari Yehova, amarira ga Yesu nigakwegesa ki? Reba agandi mashomo ashatu agu biri kutwegesa.

17. Kuba Yehova yagarukiremu eshara za Yesu ezirugire aha mutima nikitwegesa ki ahari we?

¹⁷ Yehova nahurira okushaba kwawe. Yehova akahurira eshara za Yesu ezirugire aha mutima. Ahabw’enki? Ni ahabw’okuba ecabire cemerize Yesu omutima, ni okugumizamu kuba omwesigwa hamwe n’okweza izina ry’ishe. N’itwe twaba tutire omutima aha kugumizamu kuba omwesigwa ahari Yehova n’okweza izina ryeye, nayija kugarukamu eshara zitu kandi atuhe obuyambi.—Zab 145:18, 19.

18. Ni bata oku Yesu ari nk’omunywani ori kumanya oku turi kwehurira?

¹⁸ Yesu namanya oku ori kwehurira. Twaba twemerize omutima nitushemerererwa kumanya ku hine omunywani witu ori kumanya oku turi kwehurira nangwa owarabire omu bizibu nk’ebyitu. Ogo munywani ni Yesu. Namanya oku omuntu ohwiremu amani kandi ori kwetenga obuyambi ari kwehurira. Namanya oku tuhangirwe  kandi nayija kukora cona ekiri kubasika kugira ngu tutunge obuyambi ahu ‘turabwetengere hona.’ (Heb 4:15, 16) Nk’oku Yesu yayikirize obuyambi bwa marayika owayizire kumuhumuriza omu musiri gwa Gestimani, n’itwe tushemeririre kwikiriza obuyambi obu Yehova ari kutuha akoresize ebitabo, vidiyo, za toku n’obuyambi bw’omuzehe ninga Omukristo okuzire omu by’omwika.

19. Ni enki ekiri kubasa kutuma wagira amani waba ohwiremu amani ahabw’ebigezo ebiri kugeza obwesigwa bwawe ahari Ruhanga? Gamba ecokureberaho.

¹⁹ Yehova nayija kukuha ‘obusinge’ bweye. Ni bata oku Yehova ari kutugumya? Twashaba Ruhanga natuha ‘obusinge bweye, oburengire okwetegereza k’omuntu wena.’ (Fil 4:6, 7) Obusinge bwa Yehova nibutuma twatuza kandi butukwasa kutekateka ge. Eco ni co ecahikire aha munyanyazi ori kwetwa Luz. Akagamba ati: “Ninkunda kuhurira nyine irungu. Hine obu ezo nyehurira ziri kutuma natecereza ku Yehova atari kunkunda. Konka ku kiri kumbaho nimpika ndi kugambira Yehova oku ndi kwehurira. Eshara netuma nagaruka kugira enyehurira ndungi.” Nk’oku cahikire ahari ogo munyanyazi, eshara nebasa kutuma twagira obusinge.

20. Ni gaha mashomo agu twayegera aha marira ga Yesu?

²⁰ Mazima, amarira ga Yesu nigatwegesa amashomo agari kuhumuriza! Twareba ku tushemerire kukwasa abanywani bitu baba bafisize, kandi twareba ku Yehova na Yesu barije kutukwasa twafisa abakundwa bitu. Twahigwa kwereka abandi rukundo n’esaasi turi kubaburira n’okubegesa, ahabw’okuba Ruhanga na Yesu nibereka ogo mutwarize murungi. Nambwenu twareba ku kiri kutuhumuriza kumanya ku Yehova n’omwana weye bari kumanya oku turi kwehurira n’obweremwa bwitu kandi ku barije kutukwasa kwehangana. Nimureke tugumizemu kukuratiza ebi twayega kuhisa obu Yehova arihikiriza ebi ari kuturaganisa ku arije ‘kuragaza amarira gona aha misho gitu’!—Kush 21:4.