EKICWEKA C’OKWEGA 5
Koresa ge obwire bwawe
‘Mumanye oku muri kugenda, mutagenda nk’abatine bwenge, kureka nk’abanyabwenge, mutafisa busha [obwire].’—EFE 5:15, 16.
ECESHONGORO CA 8 Yehova n’Obuhungiro bwaitu
EMPINYE *
1. Ni bata oku turi kubasa kumara obwire na Yehova?
NITUKUNDA kumara obwire n’abantu abu turi kukunda. Omushija n’omukazi abatasine juba nibashemerererwa kuba bari hamwe omu mwebazo. Abacari bato nibashemerererwa kumara obwire na banywani babo. Kandi twena nitushemererwa munonga twamara obwire n’Abakristo bagenzi bitu. Konka ekiri kukira byona, nikitushemeza kumara obwire na Ruhanga witu. Eco nitubasa kukikora turi kumushaba, turi kushoma Ekigambo ceye, kandi tukatekateka aha kigendererwa ceye n’aha mitwarize yeye mirungi. Mazima, obwire obu turi kumara na Yehova ni obw’omutano!—Zab 139:17.
2. Ni biha bizibu ebi turi kubugana?
2 N’obu turi kushemerererwa kumara obwire na Yehova, nitubugana ebizibu. Nitutura tuhugire, kandi eco nikibasa kutuma kukora ebikorwa by’omwika catugumira. Emirimo, okufa aha maka gitu, n’ebindi bikorwa ebi turi kwetenga, nibibasa kututwara obwire bwitu rero tubura n’obwire bw’okushaba, kweyegesa n’okutekateka aha bi twayega.
3. Ni kiha kindi kintu ekiri kubasa kututwarira obwire?
3 Hariho n’ekindi kintu ekiri kubasa kushisha obwire bwitu. Twaba tutabire misho, nitubasa kwikiririza n’ebintu ebitari bibi bitutwarira obwire obu turi kubasa kukoresa omu kugumya obunywani bwitu na Yehova. Ecokureberaho: Ni ec’omugasho munonga kukwata obwire tukeshemeza. Konka twaba tutetonzire eby’okweshemeza nibibasa kututwarira obwire, tusigarana akire kace k’okukora ebikorwa by’omwika. Obwe rero tushemerire kuguma kuta eby’okweshemeza omu mwanya gwabyo.—Emi 25:27; 1 Tim 4:8.
4. Ni enki eki twaza kushwijuma?
4 Omuri eki kicweka, twaza kushwijuma enshonga ahabw’enki tushemerire kuta ebintu by’omugasho omu mwanya gwabyo. Nambwenu nitwija kushwijuma oku turi kubasa kukoresa ge obwire obu turi kumara na Yehova, n’oku turi kugasirwa twakoresa ge obwire bwitu.
TA EBY’OMUGASHO OMU MWANYA G’OKUBANZA
5. Ni bata oku kushwijuma obuhabuzi oburi omu Befeso 5:15-17 biri kubasa kukwasa abacari bato kukora ensharamu ndungi omu kubaho kwabo?
5 Torana omuhanda murungi gw’amagara. Abacari bato nibakira kwebuza aha ku bari kubasa kukoresa kurungi amagara gabo. Abashomesa n’abanyabuzare abatari Abahamya ba Yehova nibabasa kubahiga kwega amashomero g’ekirenga kugira ngu bije kutunga omurimo murungi. Konka, eco nikibasa kubashishira obwire. Konka nambwenu, abazire n’abanywani b’omu kibina nibabasa kubahiga kukoresa obwire bwabo omu murimo gwa Yehova. Mbwenu shi ni enki ekiri kubasa kukwasa Omukristo ocari muto ori kukunda Yehova kukora ensharamu ndungi? Nabasa kugasirwa yashoma omu Befeso 5:15-17 kandi akahatekatekaho. (Hashome.) Yamara kushoma ezo nyiriri nabasa kwebuza ngu: Ebi Yehova ari kukunda ni biha? Ni ziha nsharamu ezi ndi kubasa kukora zikamushemeza? Ni eha nsharamu erije kunkwasa kukoresa kurungi obwire bwange?’ Yijuka ku turi omu biro bibi, kandi ku egi nsi eri kutegekwa na Sitane yaza kurugaho. Ni ec’obwenge kukoresa amagara gitu omu buryo oburi kushemeza Yehova.
6. Ni eha nsharamu eyi Mariya yakozire kandi shi ahabw’enki yabire eri ndungi?
6 Ta eby’omugasho omu mwanya g’okubanza. Obumwe, nituba turi kushabwa kucwamu ahagati y’ebikorwa bibiri ebitine enshonga. Enkuru eri kugamba ahari Yesu obu yagire kutayayira Mariya na Marita nekishoborora ge. Hatariho okubanganisa, Marita akategurira omugenyi Yesu owabire oyizire kubatayayira ebyokurya binuzire. Konka Mariya murumuna wa Marita, akashitama kandi yahurikiza enyegesa za Yesu. N’obu Marita yabire ayine entego ndungi, Mariya we akasharamu omugabane murungi. (Luk 10:38-42.) Oku kiri kurebeka, Mariya nabasa kuba yayebirwe ebyokurya ebi yarire eryo izoba, konka nitubasa kwesiga tutari kubanganisa ku atarayebirwe ebi Yesu yamwegesize. Nk’oku Mariya yashemererirwe kumara obwire bweye na Yesu, n’itwe nitushemerererwa kumara obwire bwitu turi na Yehova. Ni bata oku turi kubasa kukoresa ge obwire bwitu?
KORESA GE OBWIRE BWAWE ORI KUBA HAMWE NA YEHOVA
7. Ahabw’enki tushemerire kukwata obwire tukashaba, tukeyegesa kandi tukatekateka?
7 Guma omanye ku okushaba, okwega, n’okutekateka aha bi twayega ari kimwe omu kuramya kwitu. Ku turi kushaba nituba turi kugamba na Tata witu w’omu iguru ori kutukunda munonga. (Zab 5:7) Ku turi kweyegesa Bibuli nituba turi kuta omu bwenge bwitu ebitekateko bya Ruhanga we burugo bw’obwenge bwona. (Emi 2:1-5) Ku turi kutekateka, nituba turi kushwijuma ge emitwarize ya Yehova mirungi n’ekigendererwa ceye eki ayinire ebyahangirwe byeye byona, kandi tumanya n’oku turi kubasa kukora ebiri kubugana na co. Mbehi nobasa kutekateka aha buryo burungi obu ori kubasa kukoresamu obwire bwawe? Konka shi ni enki eki turi kubasa kukora ngu tukorese ge obwire buce obu twine?
Mbehi tori kubasa kuronda ahantu haturize ahu ori kubasa kweyegesereza? (Reba paragurafu ya 8-9)
8. Ni enki eki wayegera aha ku Yesu yakoresize obwire bweye ari omu butayo?
8 Caba kiri kubasika, ronda ahantu haturize. Reba ecokurebaraho ca Yesu. Yesu atakatandikire omurimo gweye g’okuburira, akamara ebiro 40 ari omu butayo. (Luk 4:1, 2) Omuri ogo mwanya ogwabire guturize, Yesu akaba ari kubasa kushaba Yehova kandi akatekateka aha bi Ishe ari kukunda. Hatariho okubanganisa, ebyo bikatuma yayetegura ebigezo ebi yabire arije kubugana. Ni bata oku ori kubasa kwegera aha cokureberaho ca Yesu? Waba otwire omu ka erimu abantu bingi, kutunga ahantu haturize nikibasa kuba kitorobi. Caba kiri kisyoya nobasa kubona omwanya oguturize aheru y’omu nju. Eco ni co eki Julie ari kukora yaba ari kwenda kumara obwire bweye na Yehova ari kushaba. We n’omushija weye nibatura omu kaju kace omuri Bufaransa, kandi nikiba kigumire kutunga obwire bw’okuba ari wenka atine ekiri kumuhuzya. Julie akagamba ati: “Obwe rero ninza ahu bari kuruhukira burizoba. Kandi ku ndi kuba ndiyo ndi nyenka, nikituma naganira na Yehova.”
9. Ni bata oku Yesu yayerekire ku yabire nata obunywani bweye na Yehova omu mwanya g’okubanza n’obu yabire natura ahugire?
9 Yesu akaba natura ahugire. Obu yabire nakora omurimo gweye g’okuburira, abantu bingi bakaba nibakira kumukurata, kandi abingi omuri bo bakaba nibamutwarira obwire. Izoba rimwe, ‘ab’omu tawuni yona bakateranira aha rwigi kugira ngu bamurebe.’ Konka nabwe, Yesu akaba naronda obwire bwo kugumya obunywani bweye na Yehova. Izoba ritakarengire, akatunga ahantu haturize ahu yabire ari kubasa kuganirira n’Ishe.—Mar 1:32-35.
10-11. Tukuratize ebiri omuri Matayo 26:40, 41, ni buha buhabuzi obu Yesu yahire entumwa zeye omu musiri gwa Getsimani, konka shi ni enki ecabireho?
10 Omu kiro ecabandize okufa kwa Yesu, ahakuba omurimo gweye gwabire guri hihi kuhendera, akaronda omwanya guturize ahu yabire ari kubasa kutekateka kandi akashaba. Ogo mwanya akagubona omu musiri gwa Getsimani. (Mat 26:36) Omuri eco kiro, Yesu akaha abegi beye obuhabuzi oburi kukwata aha kushaba.
11 Reba ecabireho. Ku bahikire omu musiri gwa Getsimani, bukaba bwizire buri nk’ahagati omu kiro. Yesu akashaba entumwa zeye ‘kuguma nizireba’ rero yaza kushaba. (Mat 26:37-39) Konka ku yabire nashaba, bo bakagwejegera. Ku yashangire bagwejegerire, nambwenu akabashaba ‘kuguma nibareba n’okugumizamu kushaba’. (Shoma omuri Matayo 26:40, 41.) Akamanya ku babire bemerize omutima kandi ku babire baruhire. Ahakuba Yesu yabire abinire esaasi akamanya ku babire bine ‘obweremwa bw’omubiri.’ Konka na bwo, emirundi yona eyi Yesu yagire kushaba akagaruka yashanga bahungire omu mwanya g’okushaba.—Mat 26:42-45.
Mbehi tori kubasa kuguma kushaba omu bwire obu ori kuba otaruhire? (Reba paragurafu ya 12)
12. Ni enki eki turi kubasa kukora twaba turuhire ninga twemerize omutima kugira ngu tubase kushaba?
12 Torana obwire burungi. Hine obu turi kuhurira twemerize omutima kandi turuhire kituma twaremwa n’okushaba. Yaba eco carakubireho, tiwe wenka. Ni enki eki ori kubasa kukora? Abantu bingi ababire bine akamanyiro k’okushaba Yehova omu kiro bakashanga kiri kirungi kushaba omu mwebazo obu bari kuba bataruhire munonga. Abandi bo bakashanga oku bari kwekwata baba bari kushaba kiri kubayamba. Konka shi ku wakuba ohwiremu amani ninga shi oyemerize omutima munonga, kikakuzibira kushaba? Gambira Yehova oku ori kwehurira. Nobasa kwesiga ku Tata witu oyine embabazi ari kumanya oku ori kwehurira.—Zab 139:4.
Mbehi tori kubasa kuguma kwerinda kusindika za mesegi na imeri waba ori omu nterane? (Reba paragurafu ya 13-14)
13. Ni bata oku ebyoma by’obwenge biri kubasa kushisha obwire obu turi kumara na Yehova?
13 Yerinde ebiri kubasa kukuhuzya waba ori kushaba. Eshara ti yo yonka eyi turi kubasa kukoresa omu kugumya obunywani bwitu na Yehova. Okweyegesa Ekigambo ca Ruhanga n’okwija omu nterane na byo nibibasa kutukwasa kuhika hihi ya Ruhanga. Mbwenu shi hariho eki ori kubasa kukora kugira ngu okorese ge obwire waba ori kweyegesa ninga shi ori omu nterane? Yebuze ngu: Ni biha bintu ebiri kukunda kundangaza naba ndi omu nterane ninga ndi kweyegesa?’ Mbehi ni za mesegi, abari kunterera, ninga za imeri ezi ndi kwakira aha simu yange ninga aha kindi kikoreso c’obwenge? Abantu bingi omuri obu bwire nibakoresa ebyo bikoreso. Abanyabwenge abamwe bakagamba ngu: “Twaba turi kwega konka esimu eturi aha rubaju nebasa kutuhuzya. Noba otatire omutima aha ki ori kwegaho ahobwe n’oba ogutire ahandi.” Twaba turi omu biterane n’omu biterane bihango nibakunda kutwijusya kuraza ebyoma byitu by’obwenge kugira ngu tutajabiriza abandi. Mbehi tituri kubasa n’okukikora twaba turi twenka kugira ngu ebyo bikoreso bitatuhuzya omu bwire obu turi kuba turi na Yehova?
14. Tukuratize ebiri omu Bafilipi 4:6, 7, ni bata oku Yehova ari kutukwasa kuta omutima aha bi turi kwega?
14 Shaba Yehova kugira ngu akukwase kuta omutima aha bi ori kwega. Waba ori kweyegesa ninga ori omu nterane okareba hariho ebiri kubasa kukuhuzya, shaba Yehova akukwase. Waba oyemerize omutima, nikibasa kukugumira kuta omutima aha bintu by’omwika konka ni co kintu c’omugasho eki oshemerire kukora. Shaba Ruhanga ‘obusinge oburije kurinda omutima gwawe n’ebitekateko byawe’.—Shoma omu Bafilipi 4:6, 7.
OBWIRE OBU TURI KUMARA NA YEHOVA NIBUTUMA TWATUNGA EMIGISHA
15. Ni buha buryo bw’okubanza obu turi kugasirwamu twamara obwire na Yehova?
15 Wakwata obwire okagamba na Yehova, okamuhurikiza kandi okatekateka n’aha biri kumukwataho, noyija kugasirwa. Bata shi? Ecokubanza: Nikija kutuma wakora ensharamu ndungi. Bibuli negamba ku ‘ori kugenda n’abanyabwenge ariba omunyabwenge.’ (Emi 13:20) Obwe rero, wamara obwire ori na Yehova we burugo bw’obwenge ni ko ori kukizaho kuba omunyabwenge. Noyija kukizaho kumanya oku ori kubasa kumushemeza kandi okerinda kukora ensharamu eziri kumushasha.
16. Ni bata oku okumara obwire na Yehova biri kutuma twaba abegesa barungi?
16 Ecakabiri: Noyija kukizaho kuba omwegesa murungi. Twaba turi kwegesa omuntu Bibuli, entego yitu y’okubanza ni okumukwasa kuba munywani wa Yehova. Oku turi kugamba na Tata witu w’omu iguru, ni ko rukundo eyi turi kumukunda eri kweyongera kandi tukakwasa n’abegi bitu bakamukunda. Eco ni co ecabire ahari Yesu. Akaba nagamba ahari Ishe, omu buryo obwabire burakwase abakurusi beye b’abesigwa kukunda Yehova munonga.—Yoh 17:25, 26.
17. Ahabw’enki okushaba n’okweyegesa biri kutukwasa kugumya okwikiriza kwitu?
17 Ecakashatu: Okwikiriza kwawe nikwija kukizaho kuguma. Reba ekiri kubaho washaba Yehova obuhabuzi, kukuhumuriza ninga shi kukukwasa. Wareba oku Yehova ari kugarukamu ezo shara, okwikiriza kwawe nikukizaho kuguma. (1 Yoh 5:15) Ni kiha kindi kintu ekiri kubasa kugumya okwikiriza kwawe. Ni okweyegesa. Kandi ni amazima ahakuba ‘okwiriza nikuruga omu bi turi kuhurira.’ (Rom 10:17) Konka, kugira okwikiriza kugumire nibishaba ebirengire aha kugira obumanyi kusha. Ni enki ekindi eki tushemerire kukora?
18. Gamba ecokureberaho ekiri kwereka enshonga tushemerire kutekateka.
18 Tushemerire kutekateka aha bi turi kwega. Reba ecokureberaho c’omuhandiki wa Zaburi ya 77. Akaba ayemerize omutima ahabw’okutecereza ku we n’Abisirayeli bagenzi beye, Yehova yabire atacabemera. Eco kikatuma yaremwa n’okuhungira. (Orunyiriri rwa 2-8) Ni enki eki yakozire? Akagambira Yehova ati: ‘Ndyatekateka munonga aha murimo gwawe gona.’ (Orunyiriri rwa 12) Ni amazima, ogu muhandiki wa zaburi akaba ari kubasa kutekateka aha bi Yehova yakorire abahereza beye b’omu bwire bwa kare, konka akagumizamu kwebuza ngu: “Ruhanga ayebirwe kugira embabazi? Ayimire embabazi zeye nyingi ahabw’ekiniga?” (Orunyiriri rwa 9) Ogo muhandiki wa zaburi akatekateka aha bikorwa bya Yehova n’oku yayerekire embabazi omu bwire bwa kare. (Orunyiriri rwa 11) Bikamukwasa bita? Ogo muhandiki wa zaburi akesiga atari kubanganisa ku Yehova atarisigaho abehereza beye. (Orunyiriri rwa 15) Omu buryo nk’obwo, okwikiriza kwawe nikwija kuguma watekateka aha bi Yehova yakorire abahereza beye n’aha bi yakukorire iwe aha bwawe.
19. Ni buha buryo obundi obu turi kugasirwamu twamara obwire na Yehova?
19 Ecakana: Ekiri kukira byona, rukundo eyi ori kukunda Yehova neyija kweyongera. Rukundo ni go mucwe oguri kutuhiga korobera Yehova, kweferereza ngu tumushemeze, kandi tukehanganira ebigezo. (Mat 22:37-39; 1 Kor 13:4, 7; 1 Yoh 5:3) Tihariho ekintu c’omuhendo ekiri kukira kukunda Yehova kandi tukamuhika hihi!—Zab 63:1-8.
20. Ni bata oku orije kuguma kukoresa ge obwire obu ori kumara ori na Yehova?
20 Yijuka ku okushaba, okweyegesa, n’okutekateka, ari bimwe omu bikorwa by’okuramya Yehova. Nk’oku Yesu yabire nakikora, guma oronde ahantu haturize ahu ori kubasa kumara obwire ori na Yehova. Guma oyerinde ebiri kubasa kukuhuzya. Guma oshabe Yehova akukwase kukora ebikorwa by’omwika obitireho omutima. Twagumizamu kukoresa kurungi obwire bwitu hati, Yehova nayija kutuha emigisha kandi atuhe amagara agatari kuhwaho omu nsi ensya.—Mar 4:24.
ECESHONGORO CA 28 Okuba Munywani wa Yehova
^ par. 5 Yehova ni munywani witu ori kukira abandi bona. Nituha omuhendo obunywani bwitu na we, kandi nituba turi kwenda ngu tukizeho kumumanya ge. Nikitwara obwire kugira ngu tumanye omuntu. Kandi ni ko oku kiri kuba kiri twaba turi kwenda kugumizamu kugira obunywani burungi na Yehova. Mbehi omuri egi nsi erimu ebiri kubasa kutuhuzya, ni bata oku turi kubasa kukizaho kumara obwire na Tata witu w’omu iguru, kandi shi nikitugasira kita?
