EKICWEKA C’OKWEGA 2
Yegera ahari murumuna wa Yesu
‘Yakobo, omuhuku wa Ruhanga na Mukama witu Yesu Kristo.’—YAK 1:1.
ECESHONGORO CA 88 Ompabure Emihanda Yaawe
EMPINYE *
1. Shoborora embera z’eka eyi Yakobo yakuriremu?
YAKOBO, murumuna wa Yesu, akakurira omu ka eyemerire ge omu by’omwika. * Abazire beye ari bo, Yosefu na Mariya bakaba nibakunda Yehova munonga kandi bakamuhereza oku babire bari kubasa. Nambwenu Yakobo akaba ayine ogundi mugisha. Mukuru weye akaba arije kuba Mesiya owaraganisibwe. Yakobo akaba ayine omugisha g’okuba omwe omuri eyo ka!
Omu bwire obu Yakobo yamazire na mukuru weye Yesu, akamumanya ge (Reba paragurafu ya 2)
2. Ni ziha nshonga ezi Yakobo yabire ayine z’okuha mukuru weye ekitinisa?
2 Yakobo akaba ayine enshonga nyingi z’okuha mukuru weye ekitinisa. (Mat 13:55) Ecokureberaho: Yesu akaba namanya ge Ebyahandikirwe; nangwa izoba rimwe obu yabire ayine emaka 12, akatangaza abazehe b’omuri Yerusalemu ababire bashomire munonga. (Luk 2:46, 47) Yakobo nabasa kuba yakozire na Yesu omurimo g’okubija. Caba kiri kisyoya, akaba namanya ge mukuru weye. Mwenetata Nathan H. Knorr akaba nakunda kugamba ngu: “Nomanya ge omuntu waba ori kukora na we.” * Obwe rero Yakobo nabasa kuba yagenzire ari kureba oku Yesu yabire ‘nayeyongera kutunga obwenge n’okukura nasimwa Ruhanga n’abantu.’ (Luk 2:52) Nitubasa kutecereza ngu ebyo bikatuma Yakobo yaba omwe omu begi ba Yesu b’okubanza. Konka ti ko byabire.
3. Ni bata oku Yakobo yatwarize obu Yesu yatandikire omurimo gweye omu nsi?
3 Omu bwire obu Yesu yamazire ari kukora omurimo gweye omu nsi, Yakobo tarabire omwegi weye. (Yoh 7:3-5) Kandi Yakobo nabasa kuba yabire ari hamwe n’abandi benishe abagambire ku Yesu “agwire iraro” ninga ashazire. (Mar 3:21) Kandi tihine ekihamya ekiri kwereka ku Yakobo yabire ari hamwe na nyina, Mariya, obu Yesu yabire ari kufera aha kiti c’obusaasi.—Yoh 19:25-27.
4. Ni gaha mashomo agu turayege?
4 Bwanyima, Yakobo akikiriza Yesu kandi yaba omuzehe w’omu kibina c’Abakristo. Omuri eki kicweka, twaza kushwijuma amashomo abiri agu turi kwegera ahari Yakobo: (1) Enshonga ahabw’enki tushemerire kuguma turi abacurezi n’(2) oku turi kubasa kuguma turi abegesa barungi.
GUMA ORI OMUCUREZI NKA YAKOBO
Yakobo akecureza Yesu ku yamazire kumweyoreka, kandi okuruga obwe akaba omwegi wa Kristo w’omwesigwa (Reba paragurafu ya 5-7)
5. Ni bata oku Yakobo yatwarize Yesu ku yamazire kuzoka akamweyoreka?
5 Ni ryari obu Yakobo yabire omukurasi wa Yesu w’omwesigwa? Yesu ku yamazire kuzoka omu bafire, ‘akeyoreka Yakobo, na bwanyima [yayeyereka] entumwa zona.’ (1 Kor 15:7) Yesu ku yamazire kweyereka Yakobo, ni bwo obu yahindukire omukurasi weye. Na we akaba ariho obu entumwa zabire ziri omu kishenge c’ahiguru omuri Yerusalemu zitegerize ekiconco c’omu iguru c’omwika oguri kwera. (Byak 1:13, 14) Bwanyima, Yakobo akatunga omugisha g’okuba omwe omu b’Akakiko k’Abarisa k’omu kinyigana c’okubanza. (Byak 15:6, 13-22; Gal 2:9) Kandi mbere y’omwaka gwa 62 B.Y., akakoresibwa n’omwika oguri kwera yahandikira Abakristo abashukirweho omwika ebaruha. Eyo baruha netugasira twena omuri obu bwire, twaba twine amasiko g’okwija kutura omu iguru ninga omu nsi. (Yak 1:1) Omunyabwenge omu byabireho ori kwetwa Josephus, akagamba ku Yakobo yayisirwe ahabw’ekiragiro c’omutambi mukuru w’Abayudaya ori kwetwa Ananias omuto. Yakobo akagumizamu kuba omwesigwa ahari Yehova kuhisya obu yahendire empaka zeye z’omu nsi.
6. Ni bata oku Yakobo yabire natana n’abebembezi b’amadini b’omu bwire bweye?
6 Yakobo akaba ari omucurezi. Ahabw’enki twagamba basyoya? Reba oku Yakobo yahikire bwanyima akatwaza, orebe n’oku abebembezi b’amadini bo batwarize. Yakobo ku yatungire ekihamya ekitari kubanganisibwaho ekiri kwereka ku Yesu ari Omwana wa Ruhanga, akecureza yakikiriza. Konka abatambi bakuru b’omuri Yerusalemu tibarakikozire. Ecokureberaho: Bakaba batari kubasa kuhakanisa ku Yesu yazorire Lazaro omu bafire. Omu mwanya g’okwikiriza ku Yesu yabire ari entumwa ya Yehova, bakagezaho kwita Yesu na Lazaro. (Yoh 11:53; 12:9-11) Bwanyima Yesu na we ku yazokire omu bafu, bakagezaho n’okubishereka abantu. (Mat 28:11-15) Okwetungura kw’abo bebembezi b’amadini kukatuma bayanga Mesiya.
7. Ahabw’enki tushemerire kwerinda okwetungura?
7 Eki biri kutwegesa: Yerinde kwetungura, kandi oyikirize kwega. Nk’oku endwara eri kubasa kutuma emisi y’omutima yaguma kikaguzibira kutera, ni ko n’okwetungura kuri kubasa kutuma omutima gwitu gw’akamanyiso gwaguma, rero kituma tutayikiriza obuhabuzi bwa Yehova. Abafarisayo bakareka emitima yabo yaguma catuma bayanga ekihamya eki omwika gwa Ruhanga gwaberekire ekiri kwereka ku yabire ari Omwana wa Ruhanga. (Yoh 12:37-40) Eki bakozire kikaba kiri ec’akabi ahakuba kikatuma baferwa n’amagara agatahwaho. (Mat 23:13, 33) Obwe rero, ni ec’omugasho kugumizamu kwikiriza Ekigambo ca Ruhanga n’omwika gweye ngu bihindure emicwe yitu, emitekatecere yitu n’ensharamu zitu! (Yak 3:17) Ahabw’okuba Yakobo yabire ari omucurezi, akikiriza ngu Yehova amwegese. Kandi nk’oku turije kubireba, okwecureza kweye ni ko okwatumire yaba omwegesa murungi.
BA OMWEGESA MURUNGI NKA YAKOBO
8. Ni enki ekirije kutukwasa kuba abegesa barungi?
8 Yakobo akaba atarashomire munonga. Abebembezi b’amadini b’omu bwire bweye, nabo bakaba nibamureba nk’oku babire nibareba entumwa Petero na Yohana nk’‘abantu babisi abategesibwe.’ (Byak 4:13) Konka Yakobo akahinduka omwegesa murungi kandi nitukimanya twashoma ekitabo ekiri kwetererwa izina ryeye. N’itwe nitubasa kuba tutarashomire nka Yakobo. N’obu kirabe kiri kisyoya omwika gwa Yehova n’ebi ari kutwegesa akoresize ekitongore ceye, nibibasa kutukwasa kuba abegesa barungi. Reka tushwijume ecokureberaho ca Yakobo c’okuba omwegesa murungi kandi turebe n’eki turi kubasa kucegeraho.
9. Shoborora oku Yakobo yabire nayegesa?
9 Yakobo tarakoresize ebigambo bigumire ninga shi ngu ashoborore omu buryo obugumire. Eco kikatuma ababire bamuhurikize bamanya ec’okukora n’oku bari kubasa kukikora. Ecokureberaho: Akegesa omu buryo bworobi ku Abakristo batwarizibwa kubi batashemerire kwehorera. Akahandika ati: ‘Abagumisiriza tubeta abahirirwe. Mukahurira aha kugumisiriza kwa Yobu, kandi mwareba eki Mukama yagenderire, oku ayine embabazi nyingi n’okusaasira.’ (Yak 5:11) Wareba ku Yakobo yabire nayegesa akoresize ebyahandikirwe! Akakoresa Ekigambo ca Ruhanga yakwasa ababire bamuhurikize kureba ku Yehova burijo ari kuha ebihembo abari kugumizamu kumubera abesigwa, nk’oku yakikozire ahari Yobu. Eki Yakobo yabire ari kwenda kwegesa kikahurirwa ahabw’okuba yakoresize ebigambo byorobize kandi akabishoborora omu buryo bworobi. Omuri obwo buryo, akereka ku Yehova ari we ori kwegesa, ku atari we.
10. Ni buha buryo bumwe obu turi kubasa kutorezamu Yakobo twaba turi kwegesa?
10 Eki biri kutwegesa: Guma oyorobye ebi ori kwegesa kandi okorese Ekigambo ca Ruhanga. Entego yitu ti eyo okwereka abandi ebi turi kumanya, ahobwe n’eyo kubereka ku Yehova ari kubamanya kandi ku ari kubafaho. (Rom 11:33) Nitubasa kuhika ahari eyo ntego twagumizamu kukoresa ebyahandikirwe burijo. Ecokureberaho: Omu mwanya g’okugambira abegi bitu ba Bibuli eki turi kubasa kukora, tubire turi bo, tushemerire kubakwasa kutekateka aha by’okureberaho by’omuri Bibuli kandi tubakwasa kushoborocerwa oku Yehova ari kutekateka n’enyehurira zeye. Eco nikija kubahiga kushemeza Yehova, omu mwanya g’okutushemeza.
11. Ni biha bizibu ebi abamwe omu Bakristo b’omu bwire bwa Yakobo babire bine, kandi shi ni buha buhabuzi obu yabahire? (Yakobo 5:13-15)
11 Yakobo akaba naringaniza. Omu baruha ya Yakobo nikirebeka ku yabire ari kwehuriza ebizibu ebi Abakristo bagenzi beye babire bari kubugana, kandi akabaha obuhabuzi bw’okubyehanganira. Ecokureberaho: Abakristo bamwe bakaba batari korobera obuhabuzi. (Yak 1:22) Abandi bakaba bari kushorora abagiga. (Yak 2:1-3) Kandi abandi bo kurinda orurimi rwabo kikaba nikibagumira. (Yak 3:8-10) Abo Bakristo bakaba bine ebizibu by’amani, kandi Yakobo tarabehugize. Akaba nahereza obuhabuzi omu muringo gw’embabazi konka atarabire aha rubaju, kandi akahiga ababire batemerire ge mu by’omwika kurondera obuhabuzi aha bazehe.—Shoma omuri Yakobo 5:13-15.
12. Ni bata oku turi kubasa kuguma twine emitekatecere mirungi twaba turi kukwasa abegi bitu ba Bibuli?
12 Eki biri kutwegesa: Guma oringanize konka orebe ebirungi omu bandi. Abantu bingi abu turi kwegesa Bibuli, okukuratiza obuhabuzi bwa Bibuli nikibagumira. (Yak 4:1-4) Nikibasa kubatwara obwire buringwa kugira ngu beyihemu emicwe mibi, rero bagire emicwe mirungi y’Abakristo. Nitubasa kutoreza Yakobo, turi kugira obumanzi bw’okugambira abegi bitu ahu bashemerire kukora empinduka. Nambwenu tushemerire kugumizamu kugira emitekatecere mirungi tukesiga ku Yehova arije kwehisya abantu b’abacurezi kandi abakwase kukora empinduka omu kubaho kwabo.—Yak 4:10.
13. Nk’oku kiri kugambwa omuri Yakobo 3:2, ni enki eki Yakobo yabire ari kumanya?
13 Yakobo akaguma nayetekatekaho ge. Yakobo tarikirize ngu eka eyi yabire nazarwamu n’emirimo eyi yabire ayine bitume yayereba nk’ori kukira abandi. Akaba nayeta Abakristo bagenzi beye, ‘benetata abari kukundwa.’ (Yak 1:16, 19; 2:5) Taragerizeho kwereka abandi ku ari ohikirire. Ahobwe na we akegambaho ari kugira ati: ‘Twena tushobya omuri bingi.’—Shoma omuri Yakobo 3:2, obugambo bw’ahaasi.
14. Ahabw’enki tushemerire kuba twetegwire kwemera enshobi zitu?
14 Eki biri kutwegesa: Guma oyijuke ku twena turi abasisi. Titushemerire kutekateka ngu nitukira abu turi kwegesa. Ahabw’enki? Twayereka abegi bitu ngu itwe tituri kukora enshobe, nibabasa kutecereza ku batarije kubasa kuta omu bikorwa ebi Ruhanga ari kubashaba. Konka twayikiriza ku hine obu kiri kutugumira kukuratiza emisinge ya Bibuli kandi tukabashobororera oku Yehova yatukwasize kusingura ebigezo nikija kubakwasa kuhurira ku na bo bari kubasa kukorera Yehova.
Ebyokureberaho bya Yakobo bikaba byorobi, biri kuhurirwa kandi biri kukora (Reba paragurafu ya 15-16) *
15. Shoborora ebyokureberaho ebi Yakobo yakoresize?
15 Yakobo akakoresa ebyokureberaho ebiri kuhika aha mutima. Hatariho okubanganisa omwika oguri kwera gukamukwasa, konka nambwenu nabasa kuba yayegire aha byokureberaho birungi ebi mukuru weye Yesu yakoresize. Ebyokureberaho ebi Yakobo yakoresize omu baruha yeye, byorobi kandi n’amashomo agarimu gorobi kugahurira.—Shoma omuri Yakobo 3:2-6, 10-12.
16. Ahabw’enki tushemerire kukoresa ebyokureberaho birungi?
16 Eki biri kutwegesa: Guma okorese ebyokureberaho birungi. Wakoresa ebyokureberaho birungi, nibituma ahakuhurikize bashoborocerewa ebi ori kubegesa. Ebyo byokureberaho birungi nibikwasa abakuhurikize kugumizamu kwijuka amashomo g’omugasho g’omuri Bibuli. Yesu akaba nakoresa ebyokureberaho birungi, kandi murumuna weye Yakobo akatoreza ecokureberaho ceye. Reka turebe kimwe omu byokureberaho bya Yakobo kandi turebe n’enshonga ahabw’enki kiri kirungi.
17. Ahabw’enki ecokureberaho ekiri omuri Yakobo 1:22-25 kiri kirungi?
17 Shoma omuri Yakobo 1:22-25. Hariho enshonga ecokureberaho ca Yakobo c’endeberwamu kiri kirungi. Akaba ayine ishomo eri yabire ari kwenda kwegesa: Kugira ngu tugasirwe n’Ekigambo ca Ruhanga tushemerire kukora ebirengire aha kukishoma. Tushemerire kuta omu nkora ebi turi kushoma.Yakobo akakoresa ecokureberaho eki ababire bamuhurikize bari kumanya ge ni okugamba omuntu ori kwerebera omu ndeberwamu. Ni enki eki yabire ari kwenda kwegesa? Ni ec’obushema omuntu kwereba omu ndeberwamu akebonaho oburofwa, konka atagire eki yakora. Omu buryo nk’obwe, ni ec’obushema kushoma ekigambo ca Ruhanga, tukabona ekintu eki tushemerire kuhindura aha mitwarize yitu konka tutagire eki twakikoraho.
18. Ni biha bintu bishatu ebi tushemerire kukora twaba turi kukoresa ebyokureberaho?
18 Twaba turi kukoresa ecokureberaho tushemerire kutoreza Yakobo turi kukora ebi bintu bishatu: (1) Guma orebe yaba ecokureberaho kiri kubugana n’enyegesa yawe. (2) Guma okorese ecokureberaho eki abakuhurikize bari kumanya. (3) Guma oshoborore oku ebiri kugambwa omuri eco cokureberaho biri kubasa kutebwa omu nkora. Caba kiri kukugumira kubona ebyokureberaho birungi guma orebe aha Irangiro ry’ebitabo rya Watch Tower. Wareba ahahandikire ngu “ebyokureberaho,” nobasa kutunga ebyokureberaho byingi ebi ori kubasa kukoresa. Konka, yijuka ku ebyokureberaho biri nka mayikorofoni; nibibasa kutuma enyegesa yawe yacengeka. Obwe rero, ogume ogambe kusha ecokureberaho ekiri kubugana n’enyegesa yawe. Ni amazima, enshonga nkuru y’okuboneza omurimo gwitu g’okuburira, ti okugira ngu twereke ku nitumanya kwegesa, ahobwe ni okugira ngu tukwase abantu bingi kwija omu ka ya Yehova.
19. Ni bata oku turi kubasa kwereka ku nitusima ahabw’eka yitu y’eby’omwika eyi twine?
19 Tituratungire omugisha g’okukurana na Yesu ohikirire, mukuru wa Yakobo, konka twine omugisha g’okuhereza Yehova turi hamwe na benetata na banyanyazi bingi b’omu ka ya Yehova. Nitwereka ku nitubakunda turi kushemererwa na bo, turi kwega na bo, kandi turi kukora na bo omurimo g’okuburira n’okwegesa. Twatamu amani ngu tutoreze ecokureberaho ca Yakobo omu mitwarize yitu, omu bikorwa byitu, n’omu ku turi kwegesa, nituhimbisa Yehova kandi tukwasa abantu bingi kuba banywani ba Tata witu w’omu iguru ori kutukunda.
ECESHONGORO CA 114 “Mugumisirize”
^ par. 5 Yakobo na Yesu bakakurira omu ka emwe. Yakobo akaba namanya ogo mwana wa Ruhanga ohikirire kukiza ondijo muntu wena owabireho omuri obwo bwire. Omuri eki kicweka, twaza kushwijuma eki turi kubasa kwegera aha magara g’ogo mushija w’omucurezi owabire enkingi y’ekibina c’Abakristo b’omu kinyigana c’okubanza n’enyegesa zeye.
^ par. 1 Kugira ngu tworobye ebintu, nitukoresa engambo “Yakobo murumuna wa Yesu” omuri eki kicweka. Akaba ari murumuna wa Yesu kandi oku kiri kurebeka ni we owahandikire ebaruha eri kwetererwa izina ryeye.
^ par. 2 Nathan H. Knorr akaba ari ow’omu Kakiko k’Abarisa. Akahendera empaka zeye z’omu nsi omuri 1977.
^ par. 61 EKISHUSHANI: Yakobo akakoresa ecokureberaho c’omuriro kugira ngu ashoborore akabi k’okukoresa kubi orurimi rwitu.
