OKWEMEREZA omutima ni nk’ekintu ekiri kuremera ekiri omu mutima gwitu. (Emi 12:​25) Mbehi warabonabwine ahabw’okwemereza omutima? Mbehi nohurira ezo nyehurira otari kubasa kuzehanganira? Caba kiri kisyo ti ori wenka. Abingi omuri itwe nitubasa kwetenga obuyambi ahabw’okufisa abu turi kukunda, twahikwaho ebihikirizi, ninga shi ezindi mbera eziri kutukwataho omu buryo bw’omubiri, omu bitekateko n’omu bwenge. Mbwenu shi ni enki ekiri kubasa kutukwasa kwehanganira okwemereza omutima tukagira eki twahikaho? a

Nitubasa kwega byingi aha bikwatirine n’okwehanganira okwemereza omutima twashwijuma ecokureberaho c’Omugabe Dawudi. Akaba naraba omu mbera nyingi zigumire kandi hine obu yabire nahikwaho n’akabi k’okufa. (1 Sam 17:​34, 35; 18:​10, 11) Ni enki ecakwasize Dawudi kwehanganira okwemereza omutima kandi akagira eki yahikaho? Ni bata oku turi kubasa kumutoreza?

Dawudi akabugana ebizibu byingi omu bwire bumwe. Tekateka aha byamubireho obu yabire ari kuhunga Omugabe Sawulo owabire ari kwenda kumwita. Obu Dawudi n’abashija beye barugire aha rugamba bakashanga abangi babo batwire ebintu byabo, bokize amaju gabo kandi batwire n’ab’omu maka gabo, kikabagwisa kubi. Ni bata oku Dawudi yatwarize? “Dawudi n’abu yabire ayine bakimusya amaraka gabo baboroga okuhisya obu bahikire ahu batakibasa kuboroga.” Kandi Dawudi akakizaho kushasha obu abashija abu yabire ari kwesiga bagambire “ngu bamutera amabare.” (1 Sam 30:​1-6) Dawudi akabugana ebizibu bishatu byamani omu bwire bumwe: Ab’omu ka yeye bakaba bari omu kabi, atinire ngu abashija beye nibamwita n’Omugabe Sawulo ari kumuhiga. Tekateka aha ku Dawudi yayehurire!

Ni enki eki Dawudi yakozire bwanyima? Dawudi “akehanuza ahari Yehova Ruhanga weye.” Akakikora ata? Dawudi akaba nakunda kushaba Yehova obuyambi kandi atekateka n’aha ku yamukwasize omu bwire bwa kare. (1 Sam 17:​37; Zab 18:​2, 6) Dawudi akaba namanya ku ari kwetenga obuyambi bwa Yehova ni yo nshonga yaburize Yehova eki ashemerire kukora. Dawudi ku yamazire kutunga obuhabuzi bwa Yehova akahika nabuta omu nkora. Eco kikatuma we n’abashija beye Yehova yabaha omugisha bacungura ebintu byabo hamwe n’ab’omu maka gabo. (1 Sam 30:​7-9, 18, 19) Mbehi wayetegereza ebintu bishatu ebi Dawudi yakozire? Akashaba Yehova obuyambi, yatekateka aha bi Yehova yamukorire omu bwire bwa kare kandi yagira eki yakora. Ni bata oku turi kubasa kutoreza Dawudi? Reka tushwijume ebintu bishatu.

1. Shaba Yehova. Obwire bwona obu turi kuhurira twemerize omutima nituba tushemerire kushaba Yehova obuyambi n’obwenge. Nitubasa kweyihaho omugugu turi kushaba kandi turi kugambira Yehova byona ebituri aha mutima. Ninga shi nitubasa kushabira omu mutima eshara ngufu yaba embera zitari kutwikiririza kugamba. Twarondera obuyambi ahari Yehova nituba twamwereka ku turi kumwesiga nka Dawudi owagizire ati: “Yehova ni orukiri rwange, orugo rwange orugumire, kandi omujuni wange. Ruhanga wange orukiri rwange rugumire oru mpungiramu.”  (Zab 18:​2) Mbehi eshara nebasa kukukwasa? Omunyanyazi w’omupayoniya ori kwetwa Kahlia akagamba ati: “Ku ndi kumara kushaba nimpurira nagira obusinge. Eshara netuma nakizaho kugira emitekatekere nk’eya Yehova kandi etuma nakizaho kumwesiga.” Mazima eshara ni ekiconco eki Yeheva yatuhire ekiri kutukwasa okwehanganira okwemereza omutima.

2. Tekateka aha bi Yehova yakukorire omu bwire bwa kare. Mbehi ku ori kugarura amisho enyima noreba hariho ebintu ebi Yehova yakukorire ebyakukwasize kwehangana? Twatekateka aha ku Yehova yatukwasize n’oku yakwasize abahereza beye b’omu bwire bwa kare nikitugumya kandi kituma twakizaho kumwesiga. (Zab 18:​17-​19) Omuzehe ori kwetwa Joshua akagamba ati: “Hariho ebintu byingi ebi nahandikire ebi Yehova yangarukiremu omu shara. Eco nikinkwasa kwijuka obwire obu nashabire Yehova ekintu ntarabire aha rubaju kandi akampa eki nabire ndi kwetenga.” Mazima ku turi kutekateka aha bi Yehova yatukorire nikituma twakizaho kugira amani g’okwehanganira okwemereza omutima.

3. Gira eki wakora. Mbere y’okugira eki twakora, nitubasa kurondera obuhabuzi omu Kigambo ca Ruhanga. (Zab 19:​7, 11) Abingi bakamanya ku bacondoza aha cahandikirwe ekiri kukwata aha mbera ezi barimu nibamanya oku kiri kubakwasa omuri ezo mbera. Omuzehe ori kwetwa Jarrod akagamba ati: “Okucondoza kukankwasa kureba oku ecahandikirwe kiri kukunkwataho n’okushoborokerwa ebi Yehova ari kwenda ngu nkore, kandi ebyo nibimpika aha mutima bituma nagira eki nakora. Twarondera obuhabuzi omu Byahandikirwe kandi tukagira eki twakora, nikiza kutukwasa kwehanganira okwemereza omutima.

Dawudi akamanya ku ecabire kiramukwase kwehanganira okwemereza omutima ari obuyambi bwa Yehova. Akereka ku nasima ahabw’obuyambi bwa Yehova catuma yagamba ngu: “Ahabw’okuhwerwa na Ruhanga wange nimbasa kuguruka orugo. Ruhanga onzirika amani.” (Zab 18:​29, 32) Nitubasa kureba ebizibu byitu nk’ebigumire. Konka ahabw’obuyambi bwa Yehova nitubasa kubyehanganira! Mazima twaguma kushaba obuyambi ahari Yehova, tukatekateka aha bi yatukorire kandi tukagira eki twakora nikija kutuma twayesiga tutari kubanganisa ku arije kutuha amani n’obwenge ebi turi kwetenga kugira ngu twehanganire okwemereza omutima!