EKICWEKA C’OKWEGA 18
Oku ori kubasa kweteraho entego kandi okazihikaho
“Ebyo obyezirikire, obe ni byo wataho omutima, bona barebe oku ori kweyongera kugenda omu misho.”—1 TIM 4:15.
ECESHONGORO CA 84 Okwongyera aha Buheereza
EMPINYE a
1. Ni ziha ntego ez’eby’omwika ezi turi kubasa kweteraho?
ITWE Abakristo ab’amazima nitukunda Yehova munonga. Nitwenda ngu ebi turi kumukorera bibe biri birungi kukira ebindi. Twaba turi kwenda kugira eki twahikaho omu murimo gwa Yehova nituba tushemerire kweteraho entego z’eby’omwika nk’okugira emitwarize y’Abakristo, kwega emyoga eri kubasa kutukwasa, n’okuronda oburyo bw’okukwasa abandi. b
2. Ahabw’enki tushemerire kweteraho entego z’eby’omwika kandi tukakora n’amani kugira ngu tuzihikeho?
2 Ahabw’enki tushemerire kugira entunguka omu by’omwika? Entego yitu y’okubanza ni okuhimbisa Tata w’omu iguru owu turi kukunda. Yehova nashemererwa yareba turi kukoresa ebiconco ebi twine n’obushoborozi bwitu kugira ngu tumuhereze omu bwijwire. Nambwenu nitwenda kugira entunguka omu by’omwika ahakuba turi kwenda kukizaho kukwasa benetata na banyanyazi. (1 Tes 4:9, 10) Emyaka yona eyi twakuba tumazire omu mazima, nituba tushemerire kuguma kugira entunguka z’eby’omwika. Reka turebe oku turi kubasa kukikora.
3. Ni enki eki entumwa Pawulo yahigire Timoteyo kukora? (1 Timoteyo 4:12-16)
3 Obu entumwa Pawulo yahandikire Timoteyo ebaruha, ogo musigazi akaba ari omuzehe omanyirire. Konka nabwe Pawulo akamuhiga kugumizamu kugira entunguka omu by’omwika. (Shoma 1 Timoteyo 4:12-16.) Wayetegereza ebigambo bya Pawulo, noreba ku yabire ari kwenda ngu Timoteyo agire entunguka omu miringo ibiri: Okugira emitwarize y’Abakristo nka rukundo, okwikiriza, okugira omutima ogushemire n’okweyongera omu kushomera Ebyahandikirwe omu misho ga bona n’okuburira n’okwegesa. Twaza kureba oku ecokureberaho ca Timoteyo kiri kubasa kutukwasa kweteraho entego eziringanire, n’oku kiri kubasa kutukwasa kukizaho kukura omu by’omwika. Nambwenu twaza kushwijuma oburyo bumwe obu turi kubasa kongera aha murimo gwitu g’okuburira.
GIRA EMITWARIZE Y’ABAKRISTO
4. Tukuratize ebiri omu Bafilipi 2:19-22, ni enki ecatumire Timoteyo yakizaho kukora byingi omu murimo gwa Yehova?
4 Ni eki ecatumire Timoteyo yakizaho kukora byingi omu murimo gwa Yehova? Ni emitwarize mirungi y’Abakristo eyi yabire ayine. (Shoma omu Bafilipi 2:19-22.) Ebigambo ebi Pawulo yakoresize ari kushoborora Timoteyo, nibyereka ku yabire ari omucurezi, ari omwesigwa, ari kukora n’amani kandi ari kugasira abandi. Akaba nakunda benishe kandi ari kubafaho munonga. Eco kikatuma Pawulo yakunda Timoteyo, kandi yamwesiga yamuha n’emirimo y’amani. (1 Kor 4:17) Ni co kimwe, Yehova nakizaho kutukunda kandi tugasira ekibina twakizaho kugira emitwarize eyi ari kukunda.—Zab 25:9; 138:6.
Ronda omutwarize gw’Abakristo ogu ori kwenda kukizaho kugira (Reba paragurafu ya 5-6)
5. (a) Ni bata oku ori kubasa kumanya omutwarize oguri kubasa kukizaho kugira? (b) Nk’oku ori kukireba aha kishushani, ni enki eki omunyanyazi ocari muto yakora kugira ngu akizeho kwereka abandi embabazi?
5 Torana entego ezi ori kubasa kweteraho. Shaba kandi otekateke ahu ori kubasa kukizaho kugira entunguka. Torana omutwarize gumwe ogu ori kwenda kukizaho kugira. Ecokureberaho: Nobasa kuba ori kwenda kwega kukizaho kwereka embabazi ninga shi kugira ecetengo c’okukwasa benetata na banyanya.Ninga shi nobasa kuba ori kwenda kukizaho kugira obusinge n’abandi kandi obasaasire. Nobasa kurondera obuyambi ahari munywani wawe owu ori kwesiga akugambira eki ori kubasa kuhindura.?—Emi 27:6.
6. Ni enki eki ori kubasa kukora kugira ngu ohike aha ntego yawe y’okugira omutwarize nanka?
6 Kora n’amani kugira ngu ohike aha ntego yawe. Ni bata oku ori kubasa kukikora? Oburyo bumwe ni okwega oyetonzire aha mutwarize ogu ori kwenda kugira. Reka tugire ngu noyenda kukizaho kusaasira abandi. Nobasa kutandika ori kushoma kandi otekateka aha nkuru z’omuri Bibuli ez’abasaasire abandi bihire aha mutima n’ez’abayangire kubasaasira. Tekateka aha cokureberaho ca Yesu. Akasaasira abandi abyihire aha mutima. (Luk 7:47, 48) Nambwenu akaba nayehuzya enshobi zabo kandi areba ebi bari kubasa kukora. Ekiri kutana n’eco, Abafarisayo b’omu bwire bwa Yesu “bakaba nibagaya abandi.” (Luk 18:9) Wamara kutekateka ahari ebyo byokureberaho yebuze ngu: ‘Ni enki eki ndi kureba omu bandi? Ni eha mitwarize yabo eyi nshemerire kutaho omutima? Yaba kiri kukugumira kusaasira omuntu, gezaho kuhandika emitwarize yeye mirungi. Rero bwanyima oyebuze ngu: ‘Ni bata oku Yesu ari kureba ogu muntu? Mbehi nayija kumusaasira?’ Ku turakikora tusyoya, nikija kutukwasa kuhindura emitekatecere yitu. Omu kubanza nikibasa kutwetengesa kutaho amani kugira ngu tusaasire omuntu otugwisize kubi. Konka ku turi kugumizamu kugezaho kukikora nituhika aho tusaasira tubyihire aha mutima.
YEGA OMWOGA G’OMUGASHO
Shaba kwega oku ori kubasa kufa aha Nju yanyu y’Obukama (Reba paragurafu ya 7) e
7. Nk’oku biri kugambwa omu Migani 22:29, ni bata oku Yehova ari kukoresa abakozi abari kumanya emyoga omuri obu bwire?
7 Endijo ntego eyi ori kubasa kweteraho ni okwega omwoga g’omugasho. Tekateka aha bakozi bingi abari kwetengwa ngu bombeke amaju ga Beteli, enju z’ebiterane n’Enju z’Obukama. Abingi omuri abo bakozi bakega eyo myoga bari kukora na benetata abamanyirire. Nk’oku kiri kurebeka aha kishushani, benetata na banyanyazi bari kwega emyoga kugira ngu bafe aha nju z’ebiterane n’aha Nju z’Obukama. Omuri obu buryo ninga shi obundi, Yehova Ruhanga, “Mukama otahwaho,” na Kristo Yesu, “Omugabe w’abagabe,” bari kukoresa abakozi nk’abo omu kuhikiriza ebintu by’omugasho. (1 Tim 1:17; 6:15; shoma omu Migani 22:29.) N’itwe nitwenda kukora n’amani turi kukoresa emyoga yitu omu kuhimbisa Yehova omu mwanya g’okwehimbisa.—Yoh 8:54.
8. Ni bata oku ori kubasa kusharamu omwoga ogu ori kubasa kwega?
8 Torana entego eyi ori kubasa kuhikaho. Ni guha mwoga ogu ori kubasa kwega? Nobasa kubuza abazehe b’omu kibina canyu ninga omureberezi ori kutayayira ebibina bakugambira omwoga ogu ori kubasa kukizaho kwega. Ku barakugambire ngu oboneze oburyo bwawe bw’okwegesa, obabuze oku ori kubasa kukikora. Rero bwanyima ogire eki wakora kugira ngu obihikeho. Ni bata oku ori kubasa kukikora?
9. Ni enki eki ori kubasa kukora kugira ngu ohike aha ntego yawe y’okwega omwoga?
9 Gira eki wakora kugira ngu ohike aha ntego yawe. Reka tugire ngu noyenda kukizaho kugira entunguka omu ku ori kwegesa. Noba oshemerire kweyegesa oyetonzire akatabo akari kugira ngu Yemanyize okushoma n’okwegesa. Waba oyine toku omu nterane za rwagati y’esande, nobasa kubuza mwenetata omanyirire kugira ngu ogihereze ahurikize, rero omushabe akugambire ahu ori kubasa kuboneza. Tamu amani kugira ngu abandi batakureba nk’omwegesa murungi kusha, ahobwe bakurebe nk’omukozi ori kukora n’amani kandi w’omwesigwa.—Emi 21:5; 2 Kor 8:22.
10. Gamba ecokureberaho ekiri kwereka oku turi kubasa kongera obumanyi aha mwoga
10 Reka tugire ngu aha mwoga ogu ori kwenda kwega hariho ebintu ebiri kukugumira kukora? Eco kitakumara amani! Mwenetata ori kwetwa Garry kushoma ge kikaba nikimugumira. Nayijuka oku cabire nikimukora kubi ku yabire nashoma kubi omu nterane. Konka akagumizamu kutaho amani kugira ngu abe omushomi murungi. Hati akagamba ku obumanyi obu yatungire buri kumukwasa kuha za toku omu Nju y’Obukama, omu biterane n’omu biterane bihango!
11. Nka Timoteyo, ni enki ekirije kutukwasa kutunga endijo mirimo?
11 Mbehi Timoteyo akakizaho kuba omwegesa murungi? Bibuli teri kukigamba. Konka hatariho kubanganisa, Timoteyo akagumizamu kugira entunguka omu kuhikiriza omurimo gweye ahabw’okukuratiza obuhabuzi bwa Pawulo. (2 Tim 3:10) N’itwe ku turakizeho kongera obumanyi nitwija kutunga endijo mirimo.
GUMA ORONDE OBURYO BW’OKUHEREZA ABANDI
12. Ni bata oku turi kugasirwa twahereza abandi?
12 Twena nitugasirwa omu bi abandi bari kukora. Twaba turi ah’irwariro nitushemererwa abazehe abari kukora omuri Komiti eri kukwasa abarwire ninga ab’omu mutwe oguri kutayayira abarwire bija kututayayira. Kandi twaba twine ekizibu omu mbera zitu za burijo nitushemererwa omuzehe yatuhurikiza ayetonzire kandi akatuhumuriza.Twaba turi kwetenga ow’okugenda na we omu murimo g’okuburira, nitushemererwa omupayoniya omanyirire yagenda n’itwe kwegesa omwegi wa Bibuli kandi akatuha obuhabuzi. Abo benetata na banyanyazi bona nikibashemeza kutuyamba. N’itwe nitubasa kutunga oko kushemererwa twaba twetegwire kukwasa benetata. Yesu akagira ngu: “Okugaba nikuhisa omugisha okukira okuhebwa”. (Byak 20:35) Mbwenu shi yaba ori kwenda kukorera Yehova byingi omuri obu buryo ninga shi obundi, ni enki ekirije kukukwasa kuhika aha ntego yawe?
13. Ni enki eki tushemerire kwijuka twaba turi kweteraho entego?
13 Yerinde kweteraho entego eyi otari kubasa kuhikaho. Ecokureberaho: Nobasa kuba ori kwenda kukora byingi omu kibina. Konka nikibasa kukugumira kumanya oku ori kubasa kuhika ahari eyo ntego yawe n’obwire obu kiri kubasa kutwara kugira ngu ogihikeho. Obwe rero torana ge entego eyi ori kwenda kuhikaho. Nobasa kugihandika kandi ohandika n’oku ori kubasa kugihikaho.
14. Ahabw’enki tutashemerire kugumya ebintu twaba turi kweteraho entego?
14 Nambwenu titushemerire kugumisa ebintu twaba turi kweteraho entego. Ahabw’enki? Ni ahabw’okuba tituri kubasa kutegeka ebiri kutubaho. Ecokureberaho: Entumwa Pawulo akatandikaho ekibina kisya omu tawuni ya Tesalonika. Kandi hatariho okubanganisa, nabasa kuba yabire ayine entego y’okugumayo kugira ngu akwase abo Bakristo basya. Konka abantu bakamuhiganisa bamugema kuruga omuri eyo tawuni. (Byak 17:1-5, 10) Kuri Pawulo yagumireyo akaba araretere benishe ebizibu. Konka Pawulo tarahwire amani. Omu mwanya gw’eco akagira eki yakora kugira ngu abuganise n’embera. Bwanyima akoherezayo Timoteyo kugira ngu akwase abo Bakristo basya kugira entunguka omu by’omwika. (1 Tes 3:1-3) Mazima, ab’omuri Tesalonika bakashemererwa munonga ku barebire Timoteyo ayetegwire kuza kuyamba ahari kwetengwa obuyambi.
15. Ni bata oku entego zitu ziri kubasa kuhinduka embera zitu zahinduka? Shoborora.
15 Nitubasa kwegera aha byahikire ahari Pawulo ari omuri Tesalonika. Nitubasa kweteraho entego, konka embera zitu zihinduka tutazihikeho. (Mub 9:11) Caba ni ko kiri, nobasa kweteraho endijo ntego eyi ori kubasa kuhikaho. Eco ni co Ted n’omukazi weye Hiedi bakozire. Omwe omuri bo ku yarwire bakaruga ahari Beteli. Konka rukundo eyi binire Yehova ekabahiga kuronda obundi buryo bw’okukora byingi omu murimo gwa Yehova. Omu kubanza bakaba abapayoniya b’obwire bwona. Bwanyima bakaba abapayoniya b’omutano, kandi Ted yamanyizibwa kugira ngu abe ori kuza omu mwanya g’omureberezi ori kutayayira ebibina. Bwanyima emyaka eri kushabwa abareberezi abari kutayayira ebibina ekahinduka. Ted na Hiedi bakashanga batacabasa kukorera Yehova omuri ogo murimo. N’obu eco cabashashire, bakamanya ku bari kubasa kuhereza Yehova omu bundi buryo. Ted akagira ngu: “Tukega ku turi kubasa kuhereza Yehova omu buryo obutari bumwe.”
16. Ni enki eki twayegera omu Bagalatiya 6:4?
16 Tituri kubasa kutegeka buri kintu ekiri kutubaho omu kubaho kwitu. Obwe rero, titushemerire kutekateka ngu turi ab’omugasho ahari Yehova ahabw’obujunanizibwa obu twine ninga shi ngu twegeranise n’abandi. Hiedi akashoborora ngu: “Obusinge bwawe nibucendera wageranisa embera z’abandi n’ezawe.” (Shoma omu Bagalatiya 6:4.) Nogasirwa waronda oburyo obu ori kubasa kukwasamu abandi n’okuhereza Yehova. c
17. Ni enki eki ori kushabwa kugira ngu otunge endijo mirimo omu kibina?
17 Noyija kukora byingi omu murimo gwa Yehova ku orayorobye embera kandi okerinda amabanja agatari kwetengesa. Yetereho entego ezorobi ezirije kukukwasa kuhika aha ntego z’obwire buringwa. Ecokureberaho: Yaba entego yawe y’obwire buringwa ari okuba omupayoniya w’obwire bwona, nobasa kutandika kuba omupayoniya w’omuyambi buri kwezi? Yaba entego yawe ari okuba omuhereza w’ekibina, nobasa kumara obwire buringwa omu murimo g’okuburira, ori kutayayira abarwire n’abakuzire b’omu kibina canyu? Obumanyi obu oratunge nibwija kutuma wagira endijo mirimo omu biro by’omu misho. Maririra kukora ge omurimo gona ogu wahebwa.—Rom 12:11.
Torana entego eyi ori kubasa kuhikaho (Reba paragurafu ya 18) f
18. Nk’oku wakireba aha kishushani, ni enki eki turi kwegera aha cokureberaho ca munyanyazi Beverley?
18 Emyaka eyi twine teri kutuzibira kweteraho entego n’okuzihikaho. Tekateka aha cokureberaho c’omunyanyazi okuzire ori kwetwa Beverley oyine emyaka 75. Akaba ayine oburwire bw’amani obwabire nibutuma kutambura camugumira. Konka akaba ayine ekihika c’okwekwatanisa omu bwijwire omuri kampeyini y’okweta abantu aha kijusyo. Obwe rero aketeraho eyo ntego. Biverley ku yahikire aha ntego yeye kikamushemeza munonga. Ahabw’amani agu yatireho kikahiga abandi kwejumbira kimwe omu murimo g’okuburira. Yehova nareba emirimo eyi benetata na banyanyazi abakuzire bari kukora nk’ey’omugasho, n’obu bakuba bari kukora bice.—Zab 71:17, 18.
19. Ni ziha ntego ezi turi kubasa kweteraho?
19 Yetereho entego ezi ori kubasa kuhikaho. Gira emitwarize erije kukukwasa kuhimbisa Yehova. Yega emyoga erije kukukwasa kukora byingi omu kitongore ca Yehova. Ronda oburyo obu ori kubasa kuherezamu beneteta na banyanyazi omu bwijwire. dNka Timoteyo, Yehova nayija kukuha emigisha, bona barebe oku “ori kwiyongera kugenda omu misho.”—1 Tim 4:15.
ECESHONGORO CA 38 Naija Kukugumya
a Timoteyo akaba ari omuburizi omanyirire kuburira obutumwa burungi. Konka nabwe entumwa Pawulo akamuhiga kugumizamu kugira entunguka omu by’omwika. Okukuratiza obuhabuzi obu Pawulo yamuhire kikatuma yakora byingi omu murimo gwa Yehova kandi yakwasa benetata na banyanyazi. Mbehi n’iwe noba oyetegwire kukora byingi omu murimo gwa Yehova n’okukwasa benetata na banyanyazi nk’oku Timoteyo yakikozire? Hatariho kubanganisa n’iwe ni ko ori. Ni ziha ntego ezirije kukwasa kukihikaho kandi shi ni enki ekirije kukwasa kweteraho entego kandi okazihikaho?
b EBIGAMBO EBISHOBORWIRWE: Entego z’eby’omwika ni ekintu cona eki turi kubasa kutaho amani ngu tukihikeho kugira ngu tubase kuhereza Yehova omu bwijwire kandi tumushemeze.
c Reba ekicweka ekiri kugira ngu: “Okuhereza ahari kwetengwa obuyambi” omu kitabo Abari kukora ebi Yehova ari kwenda, ekicweka ca 10, pararagurafu ya 6-9.
d Reba ishomo rya 60, eriri kugira ngu, “Gumizamu kugira entunguka,” omu kitabo Shemerererwa amagara ebiro byona!
