1. Ni enki ekiri kubasa kutuma twatunga okushemererwa?

 YEHOVA nayenda ngu tushemererwe. Eco nitukimanya ahakuba okushemererwa ni ecana c’omwika gweye oguri kwera. (Gal 5:​22) Ahakuba okugaba kuri kuhisa omugisha okukira okuhebwa, nitutunga okushemererwa twayekwatanisa omu bwijwire omu murimo g’okuburira kandi tukakwasa benetata.—⁠Byak 20:​35.

2-3. (a) Nk’oku biri kugambwa omu Bagalatiya 6:​4, ni biha bintu ebirije kutukwasa kuguma tushemerirwe omu murimo gwa Yehova? (b) Ni enki eki twaza kushwijuma omuri eki kicweka?

² Nk’oku biri kugambwa omu Bagalatiya 6:​4, entumwa Pawulo akagamba ebintu bibiri ebiri kubasa kutuma twaguma tushemerirwe. (Hashome.) Ec’okubanza, entego yitu eshemerire kuba eri ey’okuha Yehova ebirungi byitu ebiri kukira ebindi. Ku turi kumuha ebirungi byitu ebiri kukira ebindi nitushemererwa. (Mat 22:​36-​38) Eca kabiri, tushemerire kwerinda kwegeranisa n’abandi. Amagara agu twakuba twine, obumanyi bwitu, ninga shi obushoborozi bwitu, tushemerire kubisimira Yehova. N’obundi, ni we owatuhire ebintu byona ebi twine. Obwe rero, abandi bagira byingi ebi bahikaho omu murimo g’okuburira kutukira, tushemerire kushemererwa ahakuba nibakoresa ebiconco byabo omu kuhimbisa Yehova hatari okwehimbisa. Obwe rero omu mwanya g’okusingasingana na bo, tushemerire kubegeraho.

³ Omuri eki kicweka, twaza kureba ebiri kutukwasa kwehangana twaba tutacakora byingi omu murimo. Nambwenu twaza kureba oku turi kubasa kukoresa ge ebiconco byona ebi twine n’ebi turi kubasa kwegera aha bandi.

4. Ni ziha mbera eziri kubasa kutucwa entege? Gamba ecokureberaho.

⁴ Kikagumira Abahamya bamwe kumanyira kukora ebintu bice ahabw’emyaka ya za bukuru ninga shi amagara mabi. Eco ni co ecahikire ahari Carol. Akatungaho omugisha g’okuburira ahari kwetengwa obuyambi. Omuri obwo bwire, akaba ayine abegi ba Bibuli 35 kandi akakwasa bingi kwehayo n’okubatizibwa. Buzima Carol akahika ahari byingi! Konka bwanyima akarwara, yaba ow’okuguma omu ka. Carol akagamba ati: “Nimanya ku ntari kubasa kukora nk’ebi abandi bari kukora ahabw’oburwire bwange. Konka ninyehurira nk’otari omwesigwa nka bo. Tindi kubasa kukora cona eki ndi kwenda kandi eco nikimaramu amani.” Carol nayenda kukorera Yehova byona ebi ari kubasa. Buzima eco nitukimusimira! Nitwesiga tutari kubanganisa ku Ruhanga ow’embabazi ari kumusima ahabw’ebi ari kukora.

5. (a) Ni enki eki tushemerire kwijuka twahurira tucwekire entege ahabw’okukora bice? (b) Nk’oku kiri kurebeka omu kishushani, ni bata oku mwenetata yagumizemu kuha Yehova ebirungi kukira ebindi?

⁵ Wahika omu mbera eziri kubasa kutuma wacweka entege ahabw’okukora bice, yebuze ngu, ‘Ni enki eki Yehova ari kunshaba?’ Yehova nayenda ngu okore cona eki ori kubasa. Tekateka ahari eki cokureberaho: Omunyanyazi ori omu myaka ya za 80 nahurira acwekire entege ahakuba atacabasa kukora nk’ebi yabire nakora ari omu myaka ya za 40. Natekateka ngu n’obu ari kukora byona ebi ari kubasa, tibiri kushemeza Yehova. Konka shi ago ni amazima? N’iwe kitekatekeho. Yaba ogu munyanyazi yabire naha Yehova byona ebi ari kubasa omu myaka ya za 40 kandi ari co ari kukora omu myaka ya za 80, eco nikimanyisa ngu takarekaga kuha Yehova ebirungi kukira ebindi. Twatandika kutekateka ku tutari kuha Yehova ebirungi ngu tumushemeze, tushemerire kwijuka ku Yehova ari we ori kumanya ebiri kumushemeza. Twakora cona eki turi kubasa, Yehova nayija kutugambira ngu: “Kazare!”—⁠Geranisa n’ebiri omuri Matayo 25:​20-​23.

6. Ni enki eki turi kubasa kwegera aha cokureberaho ca Maria?

⁶ Nitwija kushemererwa twata omutima aha bi turi kubasa kukora. Reba ecahikire ahari munyanyazi Maria, owabugine oburwire obwatumire yakora bice omu murimo. Omu kubanza akeheba kandi yayehurira nk’otine omugasho. Konka bwanyima akatekateka aha munyanyazi w’omu kibina owabire arwire, rero yagezaho kumukwasa. Maria akagamba ati: “Nkakora entebekanisa y’okuburira na we tukoresize esimu ninga shi amabaruha. Buri kuburira na we nkaba nintaha nshemerirwe kandi ndi kuhurira mazirwe.” N’itwe nitubasa kongera aha kushemererwa kwitu twata omutima aha bi turi kubasa kukora omu mwanya gw’ebi tutari kubasa. Konka shi ni enki eki turi kubasa kukora twaba turi kubasa kukora byingi omu murimo gwa Yehova?

7. Ni buha buhabuzi bw’omugasho obu entumwa Petero yahire Abakristo?

⁷ Omu baruha ya Petero y’okubanza, akahiga benishe ngu bakorese ebiconco ebi bine omu kugumya Abakristo bagenzi babo. Petero akahandika ati: “Nk’oku omuntu wena yahibwe ekiconco, mube ni ko mwabihweresana nk’ababiki barungi ab’embabazi za Ruhanga.” (1 Pet 4:​10) Titushemerire kureka kukoresa ebiconco byitu omu bwijwire ahabw’okutina ngu abandi nibatugirira ihari  ninga ngu nikibacwa entege. Twakikora tusyoya, nituba tutaha Yehova ebirungi kukira ebindi.

8. Tukuratize ebiri omu 1 Bakorinto 4:​6, 7, ahabw’enki tutashemerire kwerata ahabw’eciconco ebi twine?

⁸ N’obu tushemerire kukoresa ebiconco byitu omu bwijwire, tushemerire kwetondo kugira ngu tutayerata aha bandi. (Shoma omu 1 Bakorinto 4:​6, 7.) Ecokureberaho: Nobasa kuba ori kumanya kutandikisa ge abegi ba Bibuli. Toshemerire kureka kukoresa eco kinconco! Konka hariho okukoresa ge ekiconco n’okukikoresa ori kwehimbisa. Reka tugira ngu wamara obwire buce oburire omuntu kandi mwatandika n’okwega Bibuli. Oyine ekihika c’okubigambira ab’omu mutwe gwawe g’okuburira. Ku wabugana ab’omu mutwe gwawe g’okuburira, ondijo munyanyazi yatandika kubagambira oku yagabire Omunara g’Omurinzi. Ogo munyanyazi akagaba magazini, konka iwe watandika kwega n’omuntu Bibuli. Ni enki eki ori kubasa kukora? Nomanya ku ebi oragambe biri kubasa kubagasira, konka nobasa kusharamu kuronda obundi bwire bw’okubibagambira kugira ngu omunyanyazi owagabire magazini atahurira ku akozire busha. Noba watwaza ge. Konka otareka kutandikisa abegi ba Bibuli. Eco ni ekiconco eki oyine; kikorese!

9. Ni bata oku tushemerire kukoresa ebiconco byitu?

⁹ Nimureke tugume twijuke ku obushoborozi bwona obu twine ari ekiconco eki Ruhanga yatuhire. Tushemerire kubikoresa omu kombeka ekibina omu mwanya g’okubikoresa turi kweyereka ku turi barungi. (Fil 2:​3) Ku turi kukoresa amani gitu n’obushoborozi obu twine turi kukora ebi Ruhanga ari kwenda, nitutunga okushemererwa ahakuba tutari kwereka ku nitukira abandi, ahobwe turi kukoresa ebyo biconco omu kuhimbisa Yehova.

10. Ahabw’enki tutashemerire kwegeranisa n’abandi?

¹⁰ Omuntu yaba atetonzire, nabasa kugeranisa amani geye n’obweremwa bw’abandi. Ecokureberaho: Mwenetata nabasa kuba ari kuhereza ge za toku. Eco ni ekiconco ceye. Nabasa kuhurira ari kukira ondijo mwenetata otarikuzihereza ge. Konka n’obu ogo mwenetata atari kuzihereza ge, nabasa kuba ari kukora ge omu kwakira abagenyi, kwegesa abana beye ninga shi ari kuta amani omu murimo g’okuburira. Mazima nikitushemeza munonga ahakuba twine benetata na banyanyazi abine ebiconco byingi kandi abari kubikoresa omu kuhereza Yehova n’okukwasa abandi!

11. Ahabw’enki tushemerire kugezaho kutoreza ecokureberaho ca Yesu?

¹¹ N’obu tutashemerire kwegeranisa n’abandi, nitubasa kugasirwa twayegera aha byokureberaho by’abantu ab’abesigwa. Ecokureberaho kirungi eki turi kubasa kwegeraho ni eca Yesu. N’obu yabire ahikirire, nitubasa kumwegeraho emitwarize mirungi. (1 Pet 2:​21) Oku turi kukizaho kutoreza ecokureberaho ceye, ni ko turi kukizaho kuba abahereza barungi ba Yehova n’okugira eki twahikaho omu murimo g’okurira.

12-13. Ni enki eki turi kubasa kwegera aha Mugabe Dawudi?

¹² Omu Kigambo ca Ruhanga nitushangamu abashija n’abakazi bingi ababire batahikirire, konka abu turi kubasa kutoreza. (Heb 6:​12) Tekateka ahari Dawudi owu Yehova yagizire ngu ari ‘nk’omutima [gweye] oku guri kwenda.’ (Byak 13:​22) Kandi Dawudi akaba atahikirire. Akaba nakora n’ebibi by’amani. Konka na bwo ni ecokureberaho kirungi ahari itwe. Ahabw’enki? Ni ahabw’okuba ku yahibwe obuhabuzi, tararonzire orwekwaso. Omu mwanya gw’eco akikiriza obuhabuzi obu yahibwe kandi yashasha ahabw’ebi yakozire. Kandi eco kikatuma Yehova yamusaasira.—⁠Zab 51:​3, 4, 10-​12.

¹³ Nitubasa kutoreza Dawudi turi kwebuza ngu: ‘Ni bata oku ndi kwakira obuhabuzi? Mbehi nimpika ndi kumanya enshobi zange ninga nindonda orwekwaso? Mbehi nimpika ndi kuta orubanja aha bandi? Mbehi nintamu amani ngu ntagaruka kukora ezo nshobi?’ Nobasa kwebuza ebibuzo nk’ebyo waba ori kushoma ezindi nkuru z’omuri Bibuli z’abashija n’abakazi ababire bari abesigwa. Nibabasa kuba babugine embera nk’ezawe. Konka shi ni eha mitwarize eyi bayerekire? Omu mbera zona, yebuze ngu: ‘Ni enki eki ndi kubasa kukora kugira ngu mbe nk’ogu muhereza wa Yehova w’omwesigwa?’

14. Nitugasirwa tuta twayetegereza Abakristo bagenzi bitu?

¹⁴ Nambwenu nitubasa kugasirwa twayetegereza Abakristo bagenzi bitu abato n’abakuru. Ecokureberaho: Nobasa kutekateka aha Mukristo w’omu kibina cawe ori kugemeserezibwa n’aborwingano, ori kuhiganisibwa ninga shi orwire konka akabyehanganira? Mbehi ayine emitwarize mirungi eyi ori kubasa kutoreza? Watekateka aha cokureberaho ceye, n’iwe nobasa kwega oburyo obu ori kubasa kwehanganiramu ebizibu byawe. Nitushemererwa munonga kuba twine ebyokureberaho nk’ebyo ebi turi kubasa kutoreza!—⁠Heb 13:​7; Yak 1:​2, 3.

15. Ni buha buhabuzi obu entumwa Pawulo yahire oburi kutukwasa kugumizamu kushemerererwa omurimo gwa Yehova?

¹⁵ Kugira ngu tureteho obusinge n’obumwe omu kibina, buri omwe naba ashemerire kukora cona eki ari kubasa. Tekateka aha Bakristo b’omu kinyigana c’okubanza. Bakaba bine ebiconco ebiri kutana. (1 Kor 12:​4, 7-​11) Konka eco kikaba kitari kutuma basingasingana ninga shi ngu becwemu ebicweka. Omu mwanya gw’eco, Pawulo akabahiga kukora ekiri kwetengwa omu ‘kombeka omubiri gwa Kristo.’ Pawulo akahandikira Abefeso ati: ‘Nk’oku zihwerana, buri rugingo rwaba nirukora eki rwahangirwe, oko ni ko omubiri gona gukora gukeyombeka omuri rukundo.’ (Efe 4:​1-3, 11, 12, 16) Bona abakozire eki Pawulo yagambire bakaretaho obusinge n’obumwe. Kandi eyo ni yo mitwarize eyi turi kureba omu kibina omuri obu bwire.

16. Ni enki eki tushemerire kumaririra kukora? (Abaheburayo 6:​10)

¹⁶ Nimureke tumaririre kwerinda kwegeranisa n’abandi. Omu mwanya gw’eco, ogume oyegere ahari Yesu ori kutoreza emitwarize yeye. Guma ogasirwe n’ebyokureberaho by’abahereza ba Yehova by’omuri Bibuli n’ab’omuri obu bwire. Ku oragume kukora cona eki ori kubasa, ogume oyesige otari kubanganisa ngu ‘Yehova totahikirire kwebwa emirimo yawe.’ (Shoma omu Baheburayo 6:​10.) Gumizamu kushemerererwa omurimo gwa Yehova kandi ogume oyijuke ku nakusima ahabw’amani agu ori kutamu ngu omuhimbise.