Omuri ezo mbera, ab’omu kibina bashemerire kureba eka eya kare nk’etacariho kandi bakareba eka ensya nk’ehikire. Kugira ngu tubishoborocerwe ge, reka turebe eki Yesu yagambire aha bikwatirine n’okutana n’okushuba kutasya.

Nk’oku biri omuri Matayo 19:​9, Yesu akereka enshonga emwe y’omu Byahandikirwe eri kutuma abari omu bushwere batana. Akagira ati: “Omuntu wena orishenda omukazi weye atamutuzire obushambani, akashwera ondijo aryaba ashambine.” Ebigambo bya Yesu nibyereka (1) ku obushambani ari co kintu kimwe conka eki Bibuli eri kugamba ekiri kubasa kutuma abatasine batana kandi (2) ku omushija ori kutana n’omukazi weye atari kugendera aha nshonga y’omu Byahandikirwe akatasya ondijo ariba ashambine. a

Mbehi ebigambo bya Yesu nibigamba ku omushija yashambana akabinga omukazi weye Ebyahandikirwe biri kumwikiriza kushuba kutasya? Eco tico biri kumanyisa. Omushija yashambana, omukazi nasharamu yaba aramusaasire ninga shi ataramusaasire. Yasharamu kureka kumusaasira kandi bakatana omu biragiro, buri omwe naba ayikirizibwe kuronda ondijo.

Konka nambwenu, omukazi nabasa kugira ecetengo c’okugaruraho eka yeye, rero asharamu kusaasira omushija weye. Konka shi omushija ku yakubyanga rero akashaba ngu batane? Ahakuba omukazi ari kuba ari kwenda kumusaasira ngu bagumizemu obushwere, Ebyahandikirwe tibiri kwikiriza ogo mushija kushuba kutasya. Yagumizamu akatasya ondijo kandi Ebyahandikirwe bitari kumwikiriza, naba yashambana kandi nikituma ekibina camuteraho komiti y’orubanja.—⁠1 Kor 5:​1, 2; 6:​9, 10.

Mbwenu shi ekibina kishemerire kureba kita obushwere bwa kare n’obusya bw’omushija owu Ebyahandikirwe bitari kwikiriza kutasya? Mbwenu shi obushwere bweye bwa kare bucahamire aha Byahandikirwe? Mbehi ogo mukazi naba acabasa kumusaasira ninga namureka? Mbehi tushemerire kureba eyo ka nsya nk’abashambine?

Ab’omu kibina batwire nibareba eka nsya nk’eyo nk’abashambine kasita omukazi otine orubanja ari kuba acariho, atakatahire omu gandi maka ninga shi atariho orubanja rw’obushambani. Konka Yesu taragambire aha muntu otine orubanja obu yagambire aha bikwatirine n’okutana n’okushuba kutasya. Ahobwe akagamba ku omushija ori kutana n’owu batasine kandi Ebyahandikirwe bitari kumwikiriza akatasya ondijo ariba ashambine. Eco nikimanyisa ku okutana n’okushuba kutasya birugirire aha bushambani, biri kumaraho obushwere obwa kare.

Abatasine batana kandi omwe omuri bo akashuba akatasya, okusaasirana n’okureka mugenzi  weye nikiba kitacabasika. Obwe rero ogo mukazi naba atacashuba kutekateka aha kusaasira omushija weye ninga kumureka. Nambwenu, ekibina tikishemerire kureba obushwere obusya nk’obutahikire ngu ni ahabw’okuba otine orubanja acariho, atakaronzire ondijo ninga shi atakakozire ekibi c’obushambani. b

Omu cokureberaho eki twagambaho, omushija akashambana, rero habaho okutana. Konka shi omushija ku yakuba atashambine, akashaba kutana kandi akashuba akatasya ondijo? Kandi shi omushija ku yakuba atashambine mbere y’okutana konka akakikora bwanyima y’okutana kandi akashuba akatasya ondijo kandi omukazi weye ari kwenda kumusaasira? Omuri ebyo byokureberaho byona, okutana n’okushuba kutasya biri kuruga aha bushambani nikituma obushwere obwa kare bwahwaho. Obushwere obusya nibuba bwikirizibwe omu biragiro. Nk’oku biri kugambwa omu Munara g’Omurinzi gw’aha kiro ca 15 Okwikuminakumwe 1979, ahari peji ya 32, “naba yataha omu bushwere busya kandi tari kubasa kubushenya ngu agarure obwa kare; obushwere obwa kare buhahwaho ahabw’okutana, obushambani n’okushuba kutasya.”

Eyo mpinduka teshemerire kutuma twareba obushwere nk’obutari kwera ninga shi ngu butume twareba ku obushambani kitari ekibi c’amani. Omushija ori kutana n’omukazi weye kandi akasya ondijo kandi Ebyahandikirwe bitari kumwikiriza, natererwaho komiti y’orubanja. (Yaba omukazi owija omu bushwere busya ari Omukristo, na we natererwaho komiti y’orubanja ahabw’obushambani.) N’obu abaza omu bushwere busya batashemerire kurebwa nk’abashambani, omushija naba atacayijwize ebiri kushabwa ngu ahebwe emirimo omu kibina kumara emyaka myingi kuhisya obu abandi bariba batacayine ekiniga ahabw’ebi yakozire kandi bari kumuha ekitinisa. Mbere y’okumuha emirimo omu kibina, abazehe nibashwijuma embera ezi omukazi weye wa kare arimu omuri obwo bwire n’ez’abana bato abu yasigireho.—⁠Mal 2:​14-​16.

Kugira ngu Abakristo berinde engaruka eziri kuretwa n’okutana n’okushuba kutasya, bashemerire kuha ekitinisa entebekanisa ya Yehova y’eby’obushwere.—⁠Mub 5:​4, 5; Heb 13:​4.