1. Ebitekateko byitu nibikwata bita aha mitwarize yitu?

 N’OBU hakuba hahwire emyaka mice ninga myingi tubatizibwe, twena nituba turi kwenda kugira emitwarize eyi Yehova ari kukunda. Kugira ngu tuhike ahari eco, tushemerire kurinda emitekatecere yitu. Ahabw’enki? Ahakuba oku turi kutwaza nibyereka ebi turi kutekateka. Yaba turi kutekateka aha byetengo by’omubiri burijo, nitwija kugamba ninga tukora ebintu bibi. (Efe 4:17-19) Ekiri kutana n’eco, twaba turi kwijuza omu bwenge bwitu ebitekateko birungi, nitwija kugamba ninga shi tukora ebintu ebiri kushemeza Tata w’omu iguru Yehova.—Gal 5:16.

2. Ni biha bibuzo ebi twaza kushwijuma omuri eki kicweka?

² Nk’oku twabyegire omu kicweka ecabandize eki, tituri kubasa kwiha ebitekateko bibi byona omu bwenge bwitu. Konka nitubasa kusharamu kutakora ebiri kubugana n’ebyo bitekateko. Mbere y’okubatizibwa tushemerire kureka kugamba ninga kukora ebintu ebi Yehova ari kwanga. Eco ni co kintu c’okubanza kandi kikuru omu kujura omuntu owa kare. Konka nambwenu kugira ngu tushemeze Yehova, tushemerire korobera ekiragiro ekiri kugira ngu: ‘Mujware omuntu omusya.’ (Kol 3:10) Omuri eki kicweka, twaza kugarukamu ebi bibuzo: “Omuntu omusya” naba ari ata? Ni bata oku turi kubasa kujwara omuntu omusya kandi tukaguma tumujwire?

3. Tukuratize ebiri omu Bagalatiya 5:22, 23, okuba “omuntu omusya,” nikimanyisa ki kandi shi ni bata oku omuntu ari kubasa kumujwara?

³ Okuba “omuntu omusya” ni okugira emitekatecere n’ebikorwa ebiri kubugana n’emitwarize ya Yehova. Omuntu  nabasa kujwara omuntu omusya ari kwereka ebyana by’omwika oguri kwera gwa Ruhanga, kandi ayikiriza ngu ogo mwika gwebembere ebitekateko byeye, enyehurira zeye, n’ebikorwa byeye. (Shoma omu Bagalatiya 5:22, 23.) Ecokureberaho: Nakunda Yehova n’abahereza beye. (Mat 22:36-39) Naba ayine okushemererwa n’obu yakuba ayine ebizibu. (Yak 1:2-4) Nakunda okuretaho obusinge. (Mat 5:9) Nagumizamu kwehangana n’okwereka embabazi yaba ayine eki ari kufa n’abandi. (Kol 3:13) Nakunda ebirungi kandi abikora. (Luk 6:35) Ebikorwa byeye nibyereka ku ari kuba ayine okwikiriza kuhamire ahari Ishe w’omu iguru. (Yak 2:18) Nagumizamu kutuza kandi agumizamu kwerinda yagezibwa.—1 Kor 9:25, 27; Tit 3:2.

4. Ahabw’enki tushemerire kugira emitwarize eri omu Bagalatiya 5:22, 23 n’omu bindi bicweka bya Bibuli kugira ngu tujware omuntu omusya? Shoborora

⁴ Kugira ngu tujware omuntu omusya, tushemerire kugira emitwarize eri omu Bagalatiya 5:22, 23 n’omu bindi bicweka bya Bibuli. * Eyo mitwarize ti nk’ebijwaro ebi turi kujwara ngu bwanyima tubijure. Emwe omuri eyo mitwarize, neshangwa omu yindi. Ecokureberaho: Waba nokunda mutahi wawe noyija kumwehanganira n’okumugirira embabazi. Kandi kugira ngu tukore ge, tushemerire kuba abacurezi kandi tukerinda.

5. Okugira ‘emitekatecere nk’eya Kristo’ nikimanyisa ki, kandi shi ahabw’enki tushemerire kwega ebiri kumukwataho? (1 Abakorinto 2:16)

⁵ Shoma omu 1 Bakorinto 2:16. Kugira ngu tujware omuntu omusya, tushemerire kugira ‘emitekatecere nk’eya Kristo.’ Eco nikimanyisa ku tushemerire kwega oku Yesu ari kutekateka, rero tukamutoreza. Yesu akereka ebyana by’omwika gwa Ruhanga omu bwijwire. Kandi akereka emitwarize ya Yehova omu bwijwire. (Heb 1:3) Oku turi kukizaho kutekateka nka Yesu, ni ko turije kukora nkawe kandi tugire eki twahikaho omu kutoreza emitwarize yeye.—Fil 2:5.

6. Ni biha bintu ebi tushemerire kugumizamu kwijuka twaba nitugezaho kujwara omuntu omusya?

⁶ Mbehi kutoreza ecokureberaho ca Yesu, nikibasika? Nitubasa kutekateka ngu: ‘Yesu ahikirire. Tindikubasa kumutoreza!’ Waba ori kwehurira osyo, yijuka ebi bintu. Ec’okubanza: Tukahangwa omu muringo nk’ogwa  Yehova na Yesu. Obwe rero, nobasa kusharamu kubatoreza, kandi ogira eki wahikaho. (Kut 1:26) Ecakabiri: Omwika oguri kwera ni go mani agari kukira agandi omu iguru n’omu nsi. Nigubasa kutuma wahika aha bintu ebi otari kubasa kuhikaho iwe ahabwawe. Ecakashatu: Yehova tari kutushaba kwereka ebyana by’omwika omu bwijwire nk’omuntu ohikirire. Akatuteraho emyaka 1,000 eyi abine amasiko g’okwija kutura omu nsi barije kubamu abahikirire. (Kush 20:1-3) Eki Yehova ari kutushaba hati, ni okumuha ebirungi kukira ebindi kandi tukamwesiga kugira ngu atukwase.

7. Ni enki eki twaza kushwijuma?

⁷ Mbwenu shi obwe, ni bata oku turi kubasa kutoreza Yesu? Twaza kushwijuma ebintu bina ebiri kwereka ebyana by’omwika gwa Ruhanga. Ahari buri kintu, nitwija kureba oku turi kubasa kutoreza Yesu aha ku yayerekire eyo mitwarize. Ku turabe nitukikora, nitwija kushwijuma ebibuzo ebiri kubasa kutukwasa kugira ngu tujware omuntu omusya.

8. Ni bata oku Yesu yayerekire rukundo?

⁸ Rukundo nyingi eyi Yesu ari kukunda Yehova ekatuma yakorera Ishe kandi yatufera. (Yoh 14:31; 15:13) Oku Yesu yabireho obu yabire acari omu nsi ni byo byayerekire ku nakunda abantu munonga. Burizoba akaba nayereka ku nakunda abantu ari kubagirira embabazi, n’obu yabire ari kuhiganisibwa. Oburyo bw’okubanza obu yayerekiremu ku nakunda abantu ni okubegesa ebikwatirine n’Obukama bwa Ruhanga. (Luk 4:43, 44) Nambwenu Yesu akereka ku nakunda Ruhanga n’abantu ari kubakunda rukundo etarimu okwekunda, obu yayikirize kubonabona n’okufera omu mikono y’abasiisi. Eco kikatuma twena yatwigurira omuhanda g’okwija kutunga amagara agatahwaho.

9. Ni bata oku turi kubasa kutoreza Yesu omu ku turi kwereka rukundo?

⁹ Tukeha Tata witu w’omu iguru kandi twabatizibwa ahabw’okuba turi kumukunda. Obwe rero, nka Yesu, tushemerire kwereka Yehova ku nitumukunda turi kutwariza ge abantu. Entumwa Yohana akahandika ati: “Otakunda mugenzi weye owu ari kureba, takabasa kukunda Ruhanga owu atakarebaga.” (1 Yoh 4:20) Nitubasa kwebuza ngu: ‘Mbehi nkatandika kongera rukundo eyi ndi kukunda abantu? Mbehi ninyereka rukundo omu ku ndi kutwariza abandi n’obu bakuba bari kuntwariza kubi? Mbehi rukundo netuma nakoresa obwire bwange n’obutungi bwange, omu kukwasa abandi kumanya ebiri kukwata ahari Yehova? Mbehi ninkikora mbyihire aha mutima n’obu abantu bingi bakuba batari kunsima ninga shi bari kumpiganisa? Mbehi nimbasa kuronda oburyo obu ndi kubasa kongeramu oku ndi kukora omurimo g’okuburira?’—Efe 5:15, 16.

10. Ni bata oku Yesu yabire ari omuntu ori kuretaho obusinge?

¹⁰ Yesu akaba ari omuntu ori kuretaho obusinge. N’obu abantu batwarize Yesu kubi tarabashashwire ebibi. Konka bikaba nibishoborora byingi. Akaba ow’okubanza omu kuretaho obusinge kandi yahiga n’abandi kweramura. Ecokureberaho: Akabegesa ku bashemerire kweramura na benishe baba bari kwenda ngu Yehova ayikirize okuramya kwabo. (Mat 5:9, 23, 24) Nambwenu, akakwasa entumwa emirundi myingi ngu zireke kwetombita ziri kwebuza omukuru omuri zo.—Luk 9:46-48; 22:24-27.

11. Ni bata oku turi kubasa kuba abantu abari kuretaho obusinge?

¹¹ Kugira ngu tube abantu abari kuretaho obusinge, tushemerire kukora ekirengire aha kwerinda kugira obutikirizana n’abandi.  Tushemerire kuba ab’okubanza omu kuretaho obusinge, kandi tuhiga benetata na banyanyazi kweramura. (Fil 4:2, 3; Yak 3:17, 18) Nitubasa kwebuza ebi bibuzo: ‘Ni enki eki nyetegwire kweferereza kugira ngu ndeteho obusinge? Mbehi mwenetata ninga munyanyazi yanshasha, nimubikira enzika? Mbehi nintegereza ngu mugenzi wange abe ni we owabanza kuretaho obusinge, ninga nimba ow’okubanza, n’obu mugenzi wange yakuba ari kureba hatariho ekizibu? Mbehi byaba bitari okwejwanga, nimpiga abine obutikirizana kuretaho obusinge?’

12. Ni bata oku Yesu yayerekire embabazi?

¹² Yesu akaba ari omunyambabazi. (Mat 11:28-30) Akaba nayereka abandi embabazi ari kuba omuntu murungi kandi afa aha bi abandi bari kwetenga omu mwanya g’okubanza n’obu yakuba ari omu mbera zigumire. Ecokureberaho: Obu omunyafoyenikekazi yamushabire ngu amukirize omwana, akabanza yamwangira, konka ku yarebire ayine okwikiriza kugumire akamukiriza omwana. (Mat 15:22-28) N’obu Yesu yabire ari omunyambabazi eco kikaba kitari kumuzibira kuha abantu obuhabuzi. Hine obu yabire nahabura banywani beye, na byo biba oburyo bw’okubereka embabazi. Ecokureberaho: Obu Petero yagerizeho kuzibira Yesu kukora ebi Yehova ari kwenda, akamuha obuhabuzi omu misho g’abandi begi. (Mar 8:32, 33) Tarabire ari kwenda kwisa enshoni Petero, ahobwe akaba ari kwenda kumurabura n’okurabura abandi begi. Ni amazima eco kihano kikashasha Petero, konka kikamukwasa.

13. Ni bata oku turi kubasa kwereka embabazi ezihikire? 

¹³ Hine obu turi kuba tushemerire kwereka banywani bitu embabazi, turi kubagambisa amazima. Guma otoreze Yesu, ori kuha obuhabuzi obwegamire aha Kigambo ca Ruhanga. Guma oyecureze. Guma oyesige banywani bawe, kandi oyesige ku abari kukunda Yehova barije kwikiriza obuhabuzi bwawe. Yebuze ebi bibuzo: ‘Mbehi nareba munywani wange ari kukora ebintu bibi ningira obumanzi bw’okumurabura? Mbehi naza kuha obuhabuzi, ningamba omu muringo gw’embabazi, ninga ningamba kubi? Ni enki ekiri kutuma nayenda kutanga obwo buhabuzi? Mbehi nimuha obwo buhabuzi ahakuba angwisize kubi, ninga nimbumuha aha bwa rukundo?’

14. Ni bata oku Yesu yayerekire obufura?

¹⁴ Yesu akaba namanya ekirungi kandi akikora. Yesu akaba nakunda Ishe, ni yo nshonga burijo yabire nakora ekishemire kandi ayine entego ndungi. Omugasho g’obufura nitugumanya twareba oku biri kugasira abandi. Ni omucwe oguri kurebecera omu bikorwa ebi turi kukora turi kuyamba abandi. Okumanya kukora ekirungi conka, tikiri kumara; tushemerire kukora ekirungi kandi twine n’entego ndungi. Omuntu nabasa kwebuza ngu: ‘Mbehi nikibasika kukora ekintu kirungi oyine entego mbi?’ Yego, nikibasika. Ecokureberaho: Yesu akagamba aha bantu abari kuyamba abacene konka bakora cona ekiri kubasika kugira ngu abandi bamanye ebiconco ebi babaha. Ebyo bikorwa by’obufura bikaba bitine mugasho omu misho ga Yehova.—Mat 6:1-4.

15. Ni bata oku turi kubasa kuba abantu barungi?

¹⁵ Nitubasa kuba abantu barungi twakora ekintu kirungi tubyihire aha mutima. Obwe rero, nobasa kwebuza ngu: ‘Mbehi nimanya ekintu kirungi eki nshemerire kukora, konka nyetonda kugira ngu nkikore omu buryo obuhikire? Ni enki ekiri kumpiga kukora ebintu birungi?’

16. Ni enki eki tushemerire kukora burizoba, kandi ahabw’enki?

¹⁶ Nimureke tugumizemu kwijuka ku okujwara omuntu omusya kitari kuhendera twamara kubatizibwa. Tushemerire kugumizamu kurinda eco kijwaro kitu kirungi eki turi kuba twamara kujwara. Eco nitubasa kukikora turi kurondesa burijo oburyo bw’okwereka ebyana by’omwika gwa Ruhanga. Ahabw’enki? Ahabw’okuba Yehova ni Ruhanga ori kukora, kandi omwika gweye ni amani agari kutuma twagira eki twahikaho. (Kut 1:2) Obwe rero, ecana cona c’omwika gwa Ruhanga nikituma twagira eki twakora. Ecokureberaho: Omwegi Yakobo akahandika ati: “Okwikiriza okutine kukora kuba kufire.” (Yak 2:26) Obwe rero, n’ebindi byana by’omwika gwa Ruhanga nibyija kutuma twagira eki twakora. Burijo ku turagume kubyereka, nituba turi kwereka ku omwika gwa Ruhanga guri kutukoreramu.

17. Tushemerire kukora ki obumwe twaremwa kwereka abandi ebyana by’omwika?

¹⁷ Abakristo abamazire obwire babatizibwe na bo hine obu bari kuremwa kwereka ebyana by’omwika. Konka ekintu c’omugasho, ni okutahwa amani. Reka turebe eki cokureberaho. Mbehi ekijwaro cawe kirungi kicwekire, okahika ori kukinaga? Ingaha. Oku kiri kurebeka okahika nokibazira. Kandi na bwanyima nogumizamu kukikwata ge. Omu buryo nk’obwe, obumwe waremwa kwereka omuntu embabazi, kumwehanganira, ninga kumwereka rukundo, otahwa amani. Wayecureza okamushaba embabazi, n’oba ori nk’owabazira ahacwekire kandi noba wagaruraho obusinge ahagati yanyu. Kandi nikituma wayerinda kugaruka kukora eyo nshobi.

18. Ni enki eki turi kubasa kwesiga tutari kubanganisa?

¹⁸ Mazima nitusima ahabw’okuba twine ecokureberaho kirungi ca Yesu! Oku turakizeho kutoreza emetekatecere yeye n’ebikorwa byeye, ni ko n’okukora nka we kirije kutworobera. Kandi oku turakizeho kukora nka Yesu, ni ko turakizeho n’okujwara omuntu omusya. Omuri eki kicweka twayegamu oburyo buna obu turi kubasa kwerekamu ebyana by’omwika gwa Ruhanga. Nitukuhiga ngu okwate obwire orebe obundi buryo obu ori kubasa kwerekamu ebyana by’omwika kandi oyeshwijume orebe ahu wahika ori kubyereka. Noyija kubona ebicweka byingi ebiri kukigambaho omu Kitabo c’okucondorezamu c’Abahamya ba Yehova ahahandikire ngu: “Oku Abakristo bashemerire kubaho” aha katwe kace akari kugamba ngu: “Ebyana by’omwika.” Yesige otari kubanganisa ku watamu amani Yehova arije kukukwasa kujwara omuntu omusya kandi okaguma omujwire.