1-2. Ni bata oku ecokureberaho c’entumwa Pawulo kiri kubasa kukwasa abazehe omuri obu bwire?

 ENTUMWA Pawulo akaba nakunda benishe. Akaba nakora n’amani kugira ngu abafeho. (Byak 20:31) Ni yo nshonga Abakristo bagenzi ba Pawulo babire nibamukunda munonga. Izoba rimwe abazehe b’omuri Efeso ku bamanyire ngu tibarigaruka kureba Pawulo, ‘bona bakarira munonga.’ (Byak 20:37) Abazehe abari kukora n’amani na bo nibakunda benetata na banyanyazi kandi nibakora cona eki bari kubasa kugira ngu babakwase. (Fil 2:16, 17) Konka hine obu abazehe bari kubugana ebizibu. Ni enki ekiri kubasa kubakwasa kubisingura?

² Abazehe abari kukora n’amani nibabasa kutoreza ecokureberaho ca Pawulo. (1 Kor 11:1) Akaba atine obushoborozi nk’obwa ba marayika. Pawulo akaba ari omuntu otahikirire kandi hine obu cabire nikimugumira kukora ekirungi. (Rom 7:18-20) Nambwenu, akaba ayine kwehanganira ebizibu ebitari bimwe. Konka Pawulo tararuhire ninga shi ngu abure okushemererwa. Abazehe ku bari kutoreza Pawulo, nibasingura ebizibu ebi bari kubugana kandi batunge okushemererwa bari kuhereza Yehova. Reka turebe oku bari kubasa kukikora.

3. Ni enki eki twaza kushwijuma omuri eki kicweka, kandi shi ni enki ekindi eki twaza kwega?

³ Omuri eki kicweka, twaza kushwijuma ebizibu bina ebi abazehe bari kukunda kubugana: (1) okuringaniza omurimo g’okuburira n’endijo mirimo eyi bine, (2) okuba abarisa, (3) obweremwa bwabo, n’ (4) okutahikirira kw’abandi. Twaza kushwijuma oku Pawulo yasingwire buri kigezo n’oku abazehe bari kubasa kumutoreza.

4. Ahabw’enki hine obu kiri kubasa kugumira abazehe kwebembera omu murimo g’okuburira?

⁴ Enshonga ahabw’enki kiri kubasa kuba ekizibu. Abazehe bine emirimo myingi obariremu n’og’okwebembera omurimo g’okuburira. Ecokureberaho: Abamwe nibakunda kwebembera omu nterane za rwagati y’esande ninga shi omu kwega Bibuli okw’ekibina. Nambwenu noshanga bari kuha n’ezindi za toku. Nibakora n’amani bari kumanyiza abahereza b’ekibina kandi bamara obwire bwabo bari kugaruramu amani benetata na banyanyazi. (1 Pet 5:2) Abazehe abamwe nibayamba omu kombeka n’okuhunduza Amaju g’Obukama. Nambwenu nk’abandi bona b’omu kibina, abazehe na bo nibata omurimo g’okuburira obutumwa burungi omu mwanya g’okubanza.—Mat 28:19, 20.

5. Ni kiha cokureberaho eki Pawulo yatuterireho?

⁵ Eki abazehe bari kwegera ahari Pawulo. Ecakwasize Pawulo kugira eki yahikaho omu murimo g’okuburira kiri omu Bafilipi 1:10, ahari kutuhiga hati: ‘Musime ebiri kukirayo oburungi.’ Pawulo akorobera obwo buhabuzi bweye. Akaba atumirwe kuburira kandi akamara emyaka myingi omurimo g’okuburira guri og’omugasho omu kubaho kweye. Akaburira ‘omu misho ga bona n’aha nju n’enju.’ (Byak 20:20) Taraburire omu bwire bumwe ngu obundi areke kuburira. Akaba nakoresa buri mugisha gona ogu yabire nabona! Ecokureberaho: Obu yabire ategerize banywani beye omuri Asene, akaburira abantu b’amani obutumwa burungi kandi hakarugamu ebirungi. (Byak 17:16, 17, 34) Nambwenu obu Pawulo yabire asibirwe omu nju wenka, akaburira ababire nibamurinda.—Fil 1:13, 14; Byak 28:16-24.

6. Ni enki eki Pawulo yamanyize abandi kukora?

⁶ Pawulo akaba nakoresa ge obwire bweye. Akaba natumira abandi ngu bekwatanise na we omu kuburira. Ecokureberaho: Obu yabire ari omu rugendo rweye rw’okubanza rw’obumishonari, akagenda na Yohana Mako; kandi aha murundi gwa kabiri akagenda na Timoteyo. (Byak 12:25; 16:1-4) Hatariho okubanganisa, Pawulo akegesa abo bashija oku bari kubasa kutebekanisa ekibina, kuba abarisa barungi n’abegesa barungi.—1 Kor 4:17.

7. Ni bata oku abazehe bari kubasa kuta omu nkora ebigambo bya Pawulo ebiri omu Befeso 6:14, 15?

⁷ Ishomo. Abazehe nibabasa kutoreza Pawulo bari kuburira aha nju n’enju kandi bari kuba betegwire kukoresa buri mugisha gona ogu babona omu kuburira. (Shoma omu Befeso 6:14, 15.) Ecokureberaho: Nibabasa kuburira baba bari omu katare ninga shi bari aha mirimo yabo y’okubabisaho. Nambwenu  baba bari kukwasa omu kombeka Amaju g’Obukama nibabasa kuburira abatahi n’abantu abari kubaguza ebikoreso. Nka Pawulo, abazehe nibabasa kumara obwire bwabo omu murimo g’okuburira bari kumanyiza abandi harimu abahereza b’ekibina.

8. Ni enki eki abazehe bari kuba bashemerire kukora obumwe na bumwe?

⁸ Abazehe tibashemerire kuhugira omu mirimo y’ekibina ngu babure obwire bw’okukora omurimo g’okuburira. Kugira ngu baringanize, hine obu bari kubasa kwanga kwikiriza emirimo emwe. Ku bari kukitekatekaho kandi bakashaba, nikituma bamanya ku batashemerire kwikiriza omurimo oguri kubasa kutuma bayehuzya ebintu by’omugasho kukira ebindi. Bimwe omuri ebyo bintu harimu okwebembera okuramya kw’eka buri sande, kwekwatanisa omu murimo g’okuburira omu bwijwire, n’okumanyiza abana babo kuburira. Abamwe nikibagumira kwanga kwikiriza obujunanizibwa bumwe, konka nibabasa kwesiga batari kubanganisa ku Yehova ari kumanya ecetengo cabo c’okuringaniza omu bintu byona.

9. Ni kiha kizibu eki abazehe abari kuba bine byingi by’okukora bari kubugana?

⁹ Enshonga ahabw’enki kiri kubasa kuba ekizibu. Abahereza ba Yehova nibabugana ebizibu byingi. Omuri ebi biro by’aha muheru, twena nitwetenga okuhumurizibwa n’obushagiki. Kandi hine obu bamwe bari kuba nibetenga ow’okubakwasa kureka emize mibi. (1 Tes 5:14) Ni amazima, abazehe tibari kubasa kwihaho ebizibu byona ebi abahereza ba Yehova bari kubugana. N’obu kirabe kiri kisyoya, Yehova nayenda ngu abazehe bakore cona eki bari kubasa kugira ngu bagumye entama zeye kandi bazirinde. Ni bata oku abazehe abari kuba bine byingi by’okukora bari kubasa kubona obwire bw’okukwasa benetata na banyanyazi?

10. Nk’oku biri kugambwa omu 1 Batesalonika 2:7, ni bata oku Pawulo yatwarize abahereza ba Yehova?

¹⁰ Oku abazehe bari kubasa kutoreza Pawulo. Pawulo akaba naronda oburyo bw’okusima benishe n’okubagumya. Abazehe na bo nibatoreza ecokureberaho ca Pawulo bari kutwariza ge abahereza ba Yehova. (Shoma omu 1 Batesalonika 2:7.) Pawulo akahamiza Abakristo bagenzi beye ku nabakunda kandi ku na Yehova ari kubakunda. (2 Kor 2:4; Efe 2:4, 5) Pawulo akatwariza ab’omu kibina nka banywani beye kandi akaba namara obwire na bo. Akereka ku nabesiga ari kubagambira ebizibu byeye n’obweremwa bweye atari kubashereka. (2 Kor 7:5; 1 Tim 1:15) Konka, Pawulo taratire omutima aha bizibu ebi yabire ayine. Omu mwanya gw’eco, omutima akaguta aha kukwasa benishe.

11. Ahabw’enki Pawulo yahire Abakristo bagenzi beye obuhabuzi?

¹¹ Hine obu Pawulo yabire naha Abakristo  bagenzi beye obuhabuzi. Konka akaba atari kububahereza ahabw’okugubwa kubi. Akabaha obuhabuzi ahakuba akaba nabafaho kandi ari kwenda kubarinda akabi. Akaba nagezaho korobya obuhabuzi kandi afa munonga aha ku burayakirwe. Ecokureberaho: Omu baruha eyi Pawulo yahandikire Abakorinso, akabaha obuhabuzi bw’amani. Bwanyima y’okubahandikira eyo baruha, akabatumaho Tito. Pawulo akaba ari kwenda kumanya oku babire barayakire obuhabuzi oburi omuri eyo baruha. Akashemererwa munonga ku yamanyire ngu bikirize obwo buhabuzi kandi babuta omu bikorwa!—2 Kor 7:6, 7.

12. Ni bata oku abazehe bari kubasa kugumya Abakristo bagenzi babo?

¹² Ishomo. Abazehe nibabasa kutoreza Pawulo bari kumara obwire n’Abakristo bagenzi babo. Oburyo bumwe obu bari kubasa kukikoramu ni okwija kare omu nterane kugira ngu baganire n’abandi bari kubagaruramu amani. Nikitwara obwire buce kugira ngu ogumye mwenetata ninga munyanyazi. (Rom 1:12; Efe 5:16) Omuzehe ori kutoreza Pawulo nagumya Abakristo bagenzi beye akoresize Ekigambo ca Ruhanga kandi abahamiza ku Ruhanga ari kubakunda. Nambwenu, nabereka ku nabakunda. Naronda obwire bw’okuganira na bo burijo kandi aronda ebintu ebi ari kubasa kubasimira. Omuzehe yaha obuhabuzi nibuba bwegamire aha Kigambo ca Ruhanga. Tari kuraba aha rubaju konka natwaza ge ahakuba nafa munonga aha ku abandi bari kwakira ebigambo byeye.—Gal 6:1.

13. Obweremwa bw’omuzehe nibubasa kutuma yayehurira ata?

¹³ Enshonga ahabw’enki kiri kubasa kuba ekizibu. Abazehe tibahikirire. Na bo nibakora enshobi. (Rom 3:23) Hine obu na bo kiri kubagumira kugira emitekatecere eringanire aha bweremwa bwabo. Abamwe nibata omutima aha bweremwa bwabo, kibacwa entege. Abandi tibari kufa aha bweremwa bwabo kituma batakora empinduka.

14. Tukuratize ebiri omu Bafilipi 4:13, ni bata oku obucurezi bwakwasize Pawulo kwehanganira obweremwa bweye?

¹⁴ Oku abazehe bari kubasa kutoreza Pawulo. Pawulo akecureza yamanya ku atari kubasa kusingura obweremwa bweye ahabw’amani geye. Akaba nayetenga amani ga Ruhanga. Omu kubanza, Pawulo akaba nahiganisa Abakristo. Konka bwanyima akamanya enshobi zeye kandi akaba ayetegwire kukora empinduka. (1 Tim 1:12-16) Ahabw’obuyambi bwa Yehova, Pawulo akaba omurisa w’omucurezi, kandi oyine rukundo n’embabazi. Akashasha munonga ahabw’enshobi zeye, konka akesiga ku Yehova yamusaasire omu mwanya g’okuta  omutima aha bweremwa bweye. (Rom 7:21-25) Akaba namanya ku atahikirire. Eco kikatuma yakora n’amani kugira ngu abe Omukristo murungi kandi yayecureza yayesiga ku Yehova yabire arije kumukwasa kuhikiriza omurimo gweye.—1 Kor 9:27; shoma omu Bafilipi 4:13.

15. Ni eha mitekatecere eyi abazehe bashemerire kugira aha bweremwa bwabo?

¹⁵ Ishomo. Abazehe tibari kutoranwa ngu ni ahabw’okuba bahikirire. Na bo Yehova nayenda ngu bikirize enshobi zabo kandi bagezeho kugira emitwarize y’Abakristo. (Efe 4:23, 24) Omuzehe ashemerire kweshwijuma akoresize Ekigambo ca Ruhanga kandi akore empinduka. Ku arakore eco, Yehova nayija kumukwasa kutunga okushemererwa kandi agire eki yahikaho.—Yak 1:25.

16. Ni enki ekiri kubasa kubaho omuzehe yata omutima aha kutahikirira kw’abandi?

¹⁶ Enshonga ahabw’enki kiri kubasa kuba ekizibu. Abazehe nibabasa kumanya okutahikirira kw’ab’omu kibina ahabw’okumara obwire na bo. Baba batetonzire, nibabasa kugubwa kubi, bagambe kubi ninga shi bacwere abandi emanja. Pawulo akarabura Abakristo ku ni co eki Sitani ari kwenda ngu bakore.—2 Kor 2:10, 11.

17. Ni bata oku Pawulo yabire nareba Abakristo bagenzi beye?

¹⁷ Oku abazehe bari kubasa kutoreza Pawulo. Akaba natekateka ebirungi ah’Abakristo bagenzi beye. Akaba namanya enshobi zabo kandi hine obu ebikorwa byabo byabire nibimushasha. Konka nabwe, Pawulo akaba namanya ngu omuntu yakora enshobi tikiri kumanyisa ngu ni mubi. Akaba nakunda benishe kandi ata omutima aha mitwarize yabo mirungi. N’obu cabire nikigumira Abakristo kukora ekihikire, konka akaba namanya ku bine entego ndungi kandi ku bari kwetenga obuyambi.

18. Ni enki eki turi kwegera aha ku Pawulo yatwarize Ewodiya na Suntuke? (Abafilipi 4:1-3)

¹⁸ Tekateka aha ku Pawulo yatwarize abanyanyazi babiri b’omu kibina c’omuri Filipi. (Shoma omu Bafilipi 4:1-3.) Ewodiya na Suntuke nibabasa kuba bagizire obutikirizana ahagati yabo, rero catuma bayangana. Pawulo tarabagarukiremu kubi, ahobwe akata omutima aha mitwarize yabo mirungi. Abo banyanyazi b’abesigwa bakaba bakorire Yehova emyaka myingi. Pawulo akaba namanya ngu Yehova nabakunda munonga. Ahakuba Pawulo yabagizireho emitekatecere mirungi, kikatuma yabahiga ngu bagarukane. Kandi eco kikatuma yaguma ayine okushemererwa kandi yaguma ayine obunywani burungi n’ab’omu kibina.

19. (a) Ni bata oku abazehe bari kubasa kuguma bine emitekatecere mirungi aha Bakristo bagenzi babo? (b) Ni enki eki turi kwegera aha kishushani c’omuzehe ori kuboneza omu Nju y’Obukama?

¹⁹ Ishomo. Imwe bazehe, mugume murebe  emitwarize mirungi omuri benetata na banyanyazi. Bona tibahikirire konka bona bine emitwarize eyi turi kubasa kukunda. (Fil 2:3) Ni amazima, hine obu abazehe bari kuba bashemerire kukwasa mwenetata ninga munyanyazi kuhindura emitekatecere. Konka nk’oku Pawulo yakikozire, abazehe nibaba bashemerire kuta omutima aha mitwarize mirungi yeye. Nibaba bashemerire kuta omutima aha ku ari kukunda Yehova, okwehangana omu kuhereza Yehova n’aha birungi ebi ari kukora. Abazehe abine emitekatecere mirungi nibatuma ab’omu kibina bakundana.

20. Ni bata oku abazehe bari kubasa kugumizamu kugasirwa n’ecokureberaho ca Pawulo?

²⁰ Imwe bazehe, nikija kubagasira mwatoreza ecokureberaho ca Pawulo. Ecokureberaho: Omu irangiro ry’ebitabo bya Watch Tower, nobasa kureba aha mutwe oguri kugira ngu, “Pawulo” rero oze aha katwe kace akari kugira ngu, “ecokureberaho c’abazehe.” Waba ori kushoma ebiri omuri ogo mutwe, yebuze ngu: ‘Ni bata oku ecokureberaho ca Pawulo kiri kubasa kunkwasa kuguma nyine okushemererwa ndi kuhikiriza omurimo gwange g’obuzehe?’

21. Ni enki eki abazehe bari kubasa kuhamya batari kubanganisa?

²¹ Imwe bazehe, mugume mwijuke ku Yehova atari kubashaba ngu mube abahikirire, ahobwe ku ari kubashaba ngu mube abesigwa. (1 Kor 4:2) Yehova akasima Pawulo ahabw’ebi yabire nakora n’oku yabire ari omwesigwa. N’imwe mugume mwesige ku Ruhanga ari kureba ebi muri kukora omu murimo gweye nka bikuru. Yehova tarije “kwebwa emirimo yanyu n’okukunda oku mwayorekire aha izina ryeye obu mwahereza abari kwera kandi abu mukiri kuhereza na hati.”—Heb 6:10.