Abantu abari kushoma eyo nkuru batetonzire nibahika bari kwebuza eco kibuzo. Konka harimu abantu babiri abari kwetwa ba Mefibosheti, kandi okushwijuma eyo nkuru nikibasa kutwegesa byingi.

Omugabe Sawulo akaba ayine abasigazi mushanju n’abahara babiri. Omwojo wa Sawulo enfura akaba nayetwa Yonatani. Bwanyima Sawulo akazara na Rizipa enshoreke yeye, omwojo ori kwetwa Mefibosheti. Ekiri kutangaza ni oku Yonatani na we yabire ayine omwana ori kwetwa Mefibosheti. Obwe rero, Omugabe Sawulo akaba ayine omwojo, n’omwijukuru abari kwetwa ba Mefibosheti.

Izoba rimwe, Omugabe Sawulo akarwanisa Abagibeyoni ababire batwire omu Bisirayeli yayenda kubamaraho. Oku kiri kurebeka abingi akabita. Eyo ekaba eri enshobi y’amani. Ahabw’enki? Ni ahabw’okuba omu bwire bwa Yoshuwa, abakuru b’Abisirayeli bakaba bakozire endagano y’obusinge n’Abagibeyoni.—Yos 9:3-27.

Eyo ndagano ekaba ecayine omugasho omu bwire bw’Omugabe Sawulo. Konka, Sawulo akehuzya eyo ndagano yayenda kumaraho Abagibeyoni. Eyo nshobi, ekatuma Sawulo n’ab’omu ka yeye bagibwaho orubanja rw’eshagama. (2 Sam 21:1) Bwanyima, Dawudi akija kuba omugabe. Abagibeyoni abarokokire bakamugambira ahari ako kabi akabahikireho. Dawudi akababuza empongano eyi babire bari kwenda ahari eco kikorwa kibi eki Sawulo yakozire, kugira ngu Yehova ataguma kuta orubanja rw’eshagama aha Bisirayeli. Omu mwanya g’okugira ngu Abagibeyoni bashabe esente, bakashaba ngu abojo mushanju ba Sawulo bitwe. (Kub 35:30, 31) Dawudi akakibikiririza.—2 Sam 21:2-6.

Omuri obwo bwire, Sawulo na Yonatani bakaba bagwire aha rugamba, konka mutabani wa Yonatani ori kwetwa Mefibosheti akaba acariho. Akaba yakozire butandu acari omwana, catuma yamugara; kandi oku kiri kurebeka tarayekwatanisize omu kikorwa c’ishenkuru c’okwita Abagibeyoni. Dawudi akaba yakorine na Yonatani endagano y’okutakorera kubi oruzaro rweye, harimu na mutabani wa Yonatani ori kwetwa Mefibosheti. (1 Sam 18:1; 20:42) Eyo nkuru negira ngu: “Omugabe [Dawudi] yarokora Mefibosheti mwene Yonatani mutabani wa Sawulo, ahabw’endahiro eyi Dawudi na Yonatani mwene Sawulo barahiririne ahari Yehova.”—2 Sam 21:7.

Konka na bwe, Dawudi akikiriza okushaba kw’Abagibeyoni. Akabaha abojo babiri ba Sawulo, harimu omwe ori kwetwa Mefibosheti, kandi yatanga n’abijukuru ba Sawulo batano kugira ngu bitwe. (2 Sam 21:8, 9) Eco kikorwa eki Dawudi yakozire kikatuma yayiha orubanja rw’eshangama aha Bisirayeli.

Eyo ti enkuru kusha, ahobwe eyine ni eki eri kutwegesa. Ekiragiro ca Ruhanga kikaba nikihurirwa ge. Kikaba nikigira ngu: “Abana batariyitwa nibaturwa ba ishe.” (Bir 24:16) Yehova akaba atarayikirize ngu abo bana babiri n’abijukuru batano ba Sawulo bahikweho akabi kuri babire bari mwere. Eco kiragiro kikaba nikigumizamu ngu: “Kureka omuntu wena aryitwa ahabw’ekibi ceye.” Oku kiri kurebeka, abo bana n’abijukuru mushanju ba Sawulo bakitwa ahabw’okuba bayekwatanisize na we omu kumaraho Abagibeyoni. Eco kikatuma abo bojo mushanju bashashura ekibi eki bakozire.

Egi nkuru netwegesa ku omuntu atari kubasa kweshoborora ahabw’ekibi eki akozire ari kugamba ngu abire ari kukuratiza obuhabuzi. Hariho omugani g’obwenge oguri kugira ngu: “Yetegereze ahu ebigeri byawe biri kuraba, obwo nibwo emihanda yawe erihama.”—Emi 4:24-27; Efe 5:15.