1-2. Shoborora oku emisinge y’omuri Bibuli eri kukizaho kutugirira omugasho embera zitu zahinduka.

 AH’IZOBA ry’obugenyi, omushija n’omukazi nibaba bahurikize ge emisinge y’omuri Bibuli eri kugambwa omuri toku y’obugenyi bwabo. Emisinge y’omu Byahandikirwe eri kugambwa omuri eyo toku neba etari misya ahari bo. Konka hati eyo misinge yaza kukizaho kuba ey’omugasho ahari bo kukira kare hona. Ahabw’enki? Ni ahabw’okuba baza kutandika kuyigenderaho nk’omushija n’omukazi.

² Ni co kimwe omushija n’omukazi b’Abakristo baba abazire. Nibabasa kuba bamazire obwire bari kuhurira za toku eziri kugamba aha by’okurera abana. Konka hati nibwo bwire obu obuhabuzi oburimu buri kubagirira omugasho, ahabw’okuba nibwo bagira omwana w’okurera. Ogo ku ni omurimo gw’amani! Obwe rero embera ku ziri kuhundika, emisinge y’omuri Bibuli etari emwe n’emwe nekizaho kutugirira omugasho. Eyo ni yo nshonga ahabw’enki abahereza ba Yehova bari kushoma Ebyahandikirwe kandi bakabitekatekaho ebiro byona nk’oku abagabe b’Abisirayeri babigambirwe.​—Bir 17:19.

3. Ni enki eki twaza kushwijuma omuri eki kicweka?

³ Imwe bazire mwe, mwine omugisha gw’amani g’okwegesa abana banyu ebiri kukwata ahari Yehova. Konka mushemerire kukora ekiri kukira aha kubegesa ebiri kukwata ahari Ruhanga witu. Mushemerire kukwasa abana banyu kumukunda munonga. Ni enki eki ori kubasa kukora kugira ngu otume abana  bawe bakunda Yehova? Omuri eki kicweka twaza kushwijumamu emisinge ina y’omuri Bibuli eri kubasa kubakwasa nk’abazire. (2 Tim 3:16) Nambwenu twaza kureba oku abazire bamwe bagasirwe ahabw’okugendera aha misinge y’omuri Bibuli.

4. Ni guha musinge oguri kubasa kukwasa abazire kukwasa abana babo kukunda Yehova? (Yakobo 1:5)

⁴ Omusinge g’okubanza: Rondera obuhabuzi ahari Yehova. Shaba Yehova kugira ngu akuhe obwenge bw’okukwasa abana bawe kumukunda. (Shoma omuri Yakobo 1:5.) Ni we muntu oyine obushoborozi bw’okutuha obuhabuzi buhikire. Hariho enshonga nyingi eziri kubituhamiza. Reba ibiri omuri zo. Ey’okubanza: Yehova ni we muzire ori kukira abandi bona. (Zab 36:9) Eya kabiri: Obuhabuzi obu ari kutuha burijo nibutugasira.​—Isa 48:17.

5. (a) Ni buha buhabuzi obu ekitongore ca Yehova kiri kuha abazire? (b) Nk’oku wakireba omuri vidiyo, ni enki eki wayegera aha ku mwenetata Amorim n’omukazi weye barezire abana babo?

⁵ Yehova akoresize Ekigambo ceye n’ekitongore ceye natuha ebyokurya by’omwika ebiri kubasa kukukwasa kurera abana bawe bari kukunda Yehova. (Mat 24:45) Ecokureberaho: Nobasa kutunga obuhabuzi oburi omu bicweka ebyine omutwe oguri kugira ngu “Obuyambi bw’amaka,” ebyarebekire omuri Magazini eri kwetwa Musisimuke! kandi hati nibirebeka aha rubuga rwa jw.org. Nambwenu vidiyo nyingi eziri aha rubuga rwa jw.org nizikwasa abazire kuta omu nkora obuhabuzi bwa Yehova baba bari kurera abana babo. *—Emi 2:4-6.

6. Ni bata oku obuhabuzi bw’ekitongoreca Yehova bwakwasize omushija n’omukazi kurera abana babo kurungi?

⁶ Abazire bingi bakereka ku nibasima ahabw’obuyambi obu ekitongore ca Yehova kiri kubaha. Omuzire ori kwetwa Joe akagamba ngu: “Kurera abana bashatu omu mazima nikiba kitorobi. Nyowe n’omukazi wange burijo nitushaba Yehova kugira ngu atukwase. Kandi tukaba nitukira kuhurira ebicweka na za vidiyo eziri kubasa kutukwasa omu mbera nk’ezo. Burijo tukaba niturondera ahari Yehova obuhabuzi.” Joe  n’omukazi weye bakerebera oku obwo buhabuzi bwabakwasize kurera abana babo bakakizaho kukunda Yehova.

7. Ahabw’enki kiri ec’omugasho munonga abazire kuteraho abana babo ecokureberaho kirungi? (Abaroma 2:21)

⁷ Omusinge gwa 2: Ha abana bawe ecokureberaho kirungi. Abana nibareba ebi abazire bari kukora kandi babatoreza. Konka abazire bona tibahikirire. (Rom 3:23) N’obu kiri kisyo abazire bashemerire kukora cona eki bari kubasa kugira ngu batereho abana babo ecokureberaho kirungi. (Shoma omu Baroma 2:21.) Omuzire omwe akagamba aha bana ari kugira ngu: “Bari nk’omugati waguta omu mizi; nibakwata buri kimwe cona eki babona.” Akongeraho ngu: “Nibatugambira twaba turi kukora ebitari kubugana n’ebi turi kubegesa.” Obwe rero twaba turi kwenda ngu abana bitu bakunde Yehova n’itwe nituba tushemerire kumukunda munonga.

8-9. Ni enki eki wayegera aha bi Andrew na Emma bagambire?

⁸ Hariho oburyo bwingi obu abazire bari kubasa kwegesamu abana babo kukunda Yehova. Reba eki mwenetata oyine emyaka 17 ori kwetwa Andrew yagambire ari kugira ngu: “Burijo abazire bange bakaba nibangambira omugasho gw’eshara. Buri kiro tata akaba nashaba nanye n’omu bwire obu nabire naherize kushaba. Abazire bange bakaba nibakunda kutugambira ngu: ‘Nimubasa kugamba na Yehova obwire bwona obu muri kwenda.’ Ebyo bikankwataho munonga kandi hati ninshaba Yehova mureba nk’omuzire ori kunkunda.” Bazire mwe mugume mwijuke ku rukundo eyi muri kukunda Yehova eri kukwasa abana banyu kumukunda.

⁹ Nambwenu reba ecokureberaho ca Emma. Obu ishe yabasigire, akasiga nyina ayine amabanja mingi. Emma akagamba ati: “Obwire bwingi kikaba nikigumira mama kutunga esente eziri kumara z’okutubisaho, konka akaba nakira kugamba aha ku Yehova ari kufa aha bahereza beye. Eco ninkirebera omu ku ari kubaho ku ari kwesiga ebyo bigambo ebi yagambire. Mama nakora ebiri kubugana n’ebi ari kuburira.” Ebyo nibitwegesa ki? Abazire nibabasa kuba ecokureberaho kirungi aha bana babo n’obu bakuba bari omu mbera zigumire.​—Gal 6:9.

10. Ni ryari obu abazire b’omuri Isirayeli babire bashemerire kuganira n’abana babo ebiri kukwata ahari Yehova? (Ebiragiro 6:6, 7)

¹⁰ Omusinge gwa 3: Ganira n’abana bawe burijo. Yehova akahabura Abisirayeli b’omu bwire bwa kare kwegesa abana babo ebiri kumukwataho burijo. (Shoma omu Biragiro 6:6, 7.) Eco kikaba nikituma batunga omugisha burijo g’okuganira n’abana babo kandi bakabakwasa kukunda Yehova. Omwana w’omwojo w’Omwisirayeli akaba ari kubasa kumara obwire n’ishe bari kuhinga ninga bari kusharura. Rero abana b’abahara bo bakaba bari kumara obwire na ba nyina bari kubakwasa omu mirimo y’omu ka. Abazire n’abana baba bari hamwe nibabasa kuganira aha bintu byingi by’omugasho. Ecokureberaho: Nibabasa kuganira aha mutwarize gwa Yehova g’oburungi kandi bareba oku ari kubakwasa omu ka yabo.

11. Ni ryari obu abazire b’Abakristo bari kukira kuganira n’abana babo?

¹¹ Omuri obu bwire ebintu bikahinduka. Omu mahanga mingi abazire tibari kukira kutunga obwire bw’okuba n’abana babo burizoba. Abazire nibakira kuba bari aha mirimo kandi abana na bo bari aha mashomero. Eco nikituma abazire baganira n’abana babo rimwe na rimwe. (Efe 5:15, 16; Fil 1:10) Nibabugana haba hariho okuramya kw’eka.  Mwenetata ori kwetwa Alexander akagamba ngu: “Tata akaba ari kukira kukora okuramya kw’eka kandi twena tukaba turi kukira kuba turiho. Ku twabire nitumara kwega tukaba nitweganirira.”

12. Ni enki eki omwebembezi w’eka ashemerire kutaho omutima omu kuramya kw’eka?

¹² Waba ori omwebembezi w’eka, ni enki eki ori kubasa kukora ngu okuramya kw’eka kukizeho kushemeza abana bawe? Mbehi timuri kubasa kwegera hamwe ekitabo kisya ekiri kwetwa Shemerererwa amagara ebiro byona! Eco kitabo nikija kutuma kuganira byaborobera. Noba ori kwenda ngu abana bawe bakugambire oku bari kwehurira n’ebi bari kutekateka, obwe rero obwire bw’okuramya kw’eka otabukoresa ori kubahakanisa ninga ori kubahabura. Kandi otanyigira omwana wawe wareba emitekatecere yeye etari kubugana n’Ebyahandikirwe. Ahobwe ogume oshemererwe ahabw’okuba bari kukugambira byona ebi bari kutekateka kandi obahige kukugambira buri kimwe bihire aha mutima. Abana bawe ku bari kukugambira bihire aha mutima nibwo ori kubasa kubakwasa.

13. Ni buha bundi bwire obu abazire bari kubasa kukwasa abana babo kukizaho kugira obunywani burungi na Yehova?

¹³ Bazire mwe, mugume mukore cona eki muri kubasa kugira ngu mutunge obwire burizoba bw’okuganira n’abana banyu oku bari kubasa kukizaho kugira obunywani burungi na Yehova. Toshemerire kutegereza ngu oganire n’omwana wawe ebiri kukwata ahari Yehova waza kumwegesa Bibuli kusha. Reba eki omuzire ori kwetwa Lisa yagambira ari kugira ati: “Tukakwasa abana bitu kumanya ku Yehova ari we owahangire ebintu byona. Ecokureberaho: Embwa yitu yagira eki yakora abana bitu bakasheka nitubagambira ku kiri kwereka ku Yehova ari Ruhanga ori kushemererwa kandi ku n’itwe ari kutuma twashemererwa.”

14. Ahabw’enki kiri ec’omugasho ku abazire bakwasa abana babo kutorana abanywani babo betonzire? (Emigani 13:20)

¹⁴ Omusinge gwa 4: Kwasa abana bawe kugira abanywani barungi. Ekigambo ca Ruhanga nikitushobororera ku abanywani bitu bari kubasa kutugiraho engaruka mbi ninga shi ndungi. (Shoma omu  Migani 13:20.) Bazire mwe, mbehi nimumanya abanywani b’abana banyu? Mbehi okababona ninga mukamarana obwire muri kuganira? Ni enki eki ori kubasa kukora kugira ngu okwase abana bawe kugira abanywani abari kukunda Yehova? (1 Kor 15:33) Nobasa kukikora ori kweta abamwe omu bakuzire omu buryo bw’omwika kugira ngu bekwatanise omu kuramya kw’eka n’omu zindi ntebekanisa zanyu z’eby’omwika.​—Zab 119:63.

15. Ni enki eki abazire bari kubasa kukora kugira ngu bakwasa abana babo kugira abanywani barungi?

¹⁵ Tekateka aha byahikire aha muzire ori kwetwa Tony. Akagamba oku we n’omukazi weye bakwasize abana babo kugira abanywani barungi. Akagamba ati: “Nyowe n’omukazi wange tukaba nitutumira benetata na banyanyazi batari bamwe abatari kwinganisa emyaka kandi abakurire omu mbera ezitari kushushana. Tukaba niturya hamwe kandi tukorera hamwe okuramya kw’eka. Obu ni oburyo burungi bw’okumanya abari kukunda Yehova kandi bakamuhereza bine okushemererwa. Tukaba nitutunga omugisha g’okwakira abareberezi abari kutayayira ebibina, abamishonari n’abandi bakarara owitu. Ebyabahikireho, oku bari kuta amani omu murimo g’okuburira n’oku bari kwehayo ebyo byona bikagira engaruka aha bana bitu kandi byatuma bakizaho kugira obunywani burungi na Yehova.” Bazire mwe mumaririre kukwasa abana banyu kugira abanywani barungi.

16. Mbwenu shi okakora ki omwana wawe ku yakukugambira ngu tari kwenda kuhereza Yehova?

¹⁶ Mbwenu shi bikagenda bita ku wakukora oku ori kubasa kona, konka abana bawe bakakugambira ku batari kwenda kuhereza Yehova? Otahwa amani ngu otekateke ku omurimo gwawe nk’omuzire gukuremire. Twena harimu n’abana, Yehova akatuha ekiconco c’okweshariramu kumuhereza ninga shi kutamuhereza. Omwana wawe yasharamu kureka Yehova otarihwa amasiko ahabw’okuba izoba rimwe nabasa kumugarukira. Yijuka ecokureberaho c’omwana w’ekirara. (Luk 15:11-19, 22-24) Ogo mwana akaza hare y’owabo yakora ebibi byingi, konka  bwanyima yagaruka. Abamwe nibagamba ngu: “Eyo ni enkuru kusha. Konka shi ebyo nibibasa kubaho omu mbera zitu za burijo?” Yego eco nikibaho! Ebyo ni byo ebyahikire aha musigazi ori kwetwa Elie.

17. Ni bata oku ebyahikire ahari Elie byakugaruramu amani?

¹⁷ Elie akagamba aha bazire beye ngu: “Bakakora cona eki bari kubasa kugira ngu bankwase kukunda Yehova n’Ekigambo ceye Bibuli. Konka obu nabire nahika omu myaka y’obunyeto, nkatandika kubagomera.” Elie akatandika kukora ebintu bibi bweshereki kandi yayanga obuyambi bw’eby’omwika obu abazire beye babire nibamuha. Bwanyima y’okuruga omu ka akakora ebibi by’amani. Konka nabwe hine obu yabire naganira na banywani beye ahari Bibuli. Elie akagamba ngu: “Oku nabire ninkizaho kugamba na banywani bange ahari Yehova, ni ko nabire ninkizaho kutekateka aha biri kumukwataho. Mpora mpora embibo z’amazima ezi abazire bange babire bambibiremu zikatandika kukura omu mutima gwange.” Bwanyima y’obwire Elie akagaruka omu mazima. * Tekateka aha ku abazire beye bashemerirwe munonga obu babire nibagezaho kumwegesa ebiri kukwata ahari Yehova acari muto!—2 Tim 3:14, 15.

18. Noreba ota abazire abari kutaho amani gabo ngu begese abana babo kukunda Yehova?

¹⁸ Bazire mwe, mwine omugisha muhango g’okurera abana banyu abarije kurugamu abahereza ba Yehova. (Zab 78:4-6) Eco nikiba kitorobi konka nitubahiga kukora n’amani kugira ngu mukwase abana banyu! Wagumizamu kukora cona eki ori kubasa kugira ngu okwase omwana wawe kukunda Yehova n’okwikiriza ekihano ceye, eco nikija kutuma Yehova yahimbisibwa.​—Efe 6:4.