1. Ni eha nsharamu y’omugasho eyi abantu bona bashemerire kukora?

 ABANTU b’omuri obu bwire bine ensharamu y’omugasho y’okukora. Mbehi nibija kushagika Yehova Ruhanga omutegeki w’iguru n’ensi ninga nibija kushagika omwangi weye ari we Sitane? Omuntu tari kubasa kukwata aha mbaju zombi. Ensharamu yona eyi barakore neyija kukwata aha magara gabo g’omu biro by’omu misho. (Mat 25:31-33, 46) Omu “kubonabona kwingi,” nibija kutebwaho akamanyiso k’okurokoka ninga shi ak’okucwecerezibwa.​—Kush 7:14; 14:9-11; Ezk 9:4, 6.

2. (a) Ebiri omu Baheburayo 10:35-39 nibituhiga kukora ki? (b) Ni bata oku ekitabo c’Okushururwa kiri kubasa kutukwasa?

² Shoma omu Baheburayo 10:35-39. Waba washaziremu kushagika obutegeki bwa Yehova, mazima okakora ensharamu ndungi. Hati oyine ekihika c’okukwasa abandi kukora ensharamu ndungi. Kandi nobasa kukora ebiri omu kitabo c’Okushururwa kugira ngu obakwase. Eco kitabo c’omutano nikigamba ebirije kuba aha bangi ba Yehova, konka nambwenu kigamba aha migisha eyi arije kuha abari kuguma bari abesigwa aha butegeki bweye. Tushemerire kwega ago mashomo g’omugasho tubitireho omutima. Ku turakikore, nitwija kutunga amani g’okugumizamu turi kuhereza Yehova. Nambwenu nitwija kukoresa ebi twayega turi kukwasa abandi kukora ensharamu ndungi n’okugihamiraho.

3. Ni enki eki twaza kushwijuma omuri eki kicweka?

³ Omuri eki kicweka, twaza kushwijuma ebi bibuzo: Ni eha migisha ebikirwe abari kushagika obutegeki bwa Ruhanga? Kandi shi ni enki ekirije kuhika aha bari kushagika enyamishwa eri kutukura eri kugambwa omu kitabo c’Okushururwa?

4. Ni baha abu entumwa Yohana yarebire bari na Yesu omu iguru?

⁴ Entumwa Yohana akorekwa emitwe ibiri y’abari kushagika obutegeki bwa Yehova kandi batunga ekihembo c’amagara agatahwaho. Omutwe g’okubanza gukaba gurimu abantu 144,000. (Kush 7:4) Bakihwa omu nsi kugira ngu baze kutegeka na Yesu omu Bukama bw’omu iguru. Nibija kukwatanisa na we omu kutegeka ensi. (Kush 5:9, 10; 14:3, 4) Yohana akabareba omu korekwa bemerire na Yesu aha mushozi gwa Sayuni omu iguru.​—Kush 14:1.

5. Ni enki ekirije kuhika aha bashukirweho omwika abasigireho omu nsi?

⁵ Hahwaho ebinyigana byingi, abantu bingi ab’okubarirwa omu 144,000 bari kutoranwa. (Luk 12:32; Rom 8:17) Konka Yohana akagambirwa ku abantu bace ari bo abariba ‘basigireho’ hanuya omu nsi omu biro by’emperu. Abariba ‘basigireho’ nibija kutebwaho akamanyiso kabo ak’aha muheru mbere y’okubonabona kwingi akari kwereka ku Yehova ari kubikiriza. (Kush 7:2, 3; 12:17) Bwanyima kace y’okubonabona kwingi kwatandika, abasigireho nibija kutwarwa omu iguru bashange abariba bafire bari abesigwa kugira ngu bijuze 144,000. Bwanyima nibija kutandika kutegeka bari na Yesu omu Bukama bwa Ruhanga.​—Mat 24:31; Kush 5:9, 10.

6-7. (a) Ni guha mutwe ogundi ogu Yohana yabwine kandi shi ni enki eki turi kugumanyaho? (b) Ahabw’enki ab’omu mitwe yombi twena tushemerire kutegereza n’ekihika okuhikirira kw’ebiri omu Kushururwa ekicweka ca 7?

⁶ Yohana ku yamazire kureba abashukirweho omwika, akareba “omutwe muhango gw’abantu.” Ogo mutwe gukaba gutari nka bariya 144,000, ahakuba go gukaba gutari kubasa kubarwa. (Kush 7:9, 10) Ni enki eki turi kubamanyaho? Yohana akagambirwa ati: “Aba ni bo abarugire omu kubonabona kwingi, bakoza ebijwaro byabo omu shagama y’Omwana gw’entama, bikera.” (Kush 7:14) Ab’omu mutwe muhango gw’abantu ku bariheza kurokoka “okubonabona kwingi,” nibija kutura omu nsi kandi batunge emigisha myingi.​—Zab 37:9-11, 27-29; Emi 2:21, 22; Kush 7:16, 17.

⁷ Yaba twine amasiko g’okutura omu iguru ninga shi omu nsi, twena tushemerire kugira ekihika c’okureba ebiri omu Kushururwa ekicweka ca 7 biri kuhikirira. Mazima obwo nibwija kuba buri obwire oburi kushemeza abahereza ba Ruhanga ab’omu mitwe yombi! Nitwija kushemererwa ahakuba twashaziremu kushagika obutegeki bwa Ruhanga. Ni enki ekindi eki ekitabo c’Okushururwa kiri kutugambira aha bikwatirine n’okubonabona kwingi?​—Mat 24:21.

8. Ni bata oku okubonabona kwingi kuritandika, kandi shi abantu bingi nibija kutwaza bata?

⁸ Nk’oku twabirebire omu kicweka ekiri kubandiriza eki, obutegeki obw’omu nsi nibwija kuhindukirana Babuloni orurembo orukuru, ni okugamba amadini gona ag’ekishuba. (Kush 17:16, 17) Eyo ni yo eriba entandikiro y’okubonabona kwingi. Mbwenu shi eco nikija kutuma abantu bingi basya bija omu kuramya Yehova? Ingaha. Ekiri kutana n’eco, omu Kushururwa ekicweka ca 6 nihagamba ku omuri obwo bwire obugumire, abantu abatari kuramya Yehova barije kurondera oburinzi aha bategeki n’omu by’obushubuzi bw’egi nsi ebiri kugeranisibwa n’emishozi. Ahakuba abo bantu batarije kushagika Obukama bwa Ruhanga, Yehova nayija kubareba nk’abangi beye.​—Luk 11:23; Kush 6:15-17.

9. Ni bata oku abahereza ba Yehova barije kutana n’abandi omu kubonabona kwingi, kandi shi ni enki ekirije kurugamu?

 ⁹ Mazima, abahereza ba Yehova b’abesigwa nibija kuba bari kutana n’abandi omuri obwo bwire obugumire bw’okubonabona kwingi. Nambwenu ni bo abarije kuba bari abahereza ba Yehova Ruhanga omu nsi kandi tibarije kushagika “enyamishwa.” (Kush 13:14-17) Ahakuba barije kuguma bari abesigwa ahari Yehova, abari kumurwanisa nibija kubitirwa ekiniga kingi. Nikija kutuma amahanga ageterine gatahirira abahereza ba Ruhanga omu nsi yona. Eco Bibuli neceta okutahirira kwa Gogi owa Magogi.​—Ezk 38:14-16.

10. Nk’oku biri kugambwa omu Kushururwa 19:19-21, ni enki eki Yehova arije kukora aha kutahirirwa kw’abahereza beye?

¹⁰ Ni enki eki Yehova arije kukora ahari oko kutahirira? Natugambira ati: “Ekiniga cange kiryayimuka.” (Ezk 38:18, 21-23) Omu Kushururwa ekicweka ca 19 nihagamba ebiribaho bwanyima. Yehova nayija kutuma Omwana weye kugira ngu arwanirire abahereza beye kandi asingure abangi babo. Yesu aryarwana orwo rugamba ari hamwe n’“amahe g’omu iguru,” ni okugamba ba marayika b’abesigwa n’abantu 144,000. (Kush 17:14; 19:11-15) Ni enki ekiribaho ahari orwo rugamba? Abantu bona n’ebitongore byona ebiri kurwanisa Yehova nibyija kucwecerezibwa kimwe!—Shoma omu Kushururwa 19:19-21.

11. Ni kiha kiro kikuru ekiribaho nk’oku ekitabo c’Okushururwa kiri kuhendera kiri kugamba?

¹¹ Tecereza oku abantu ab’abesigwa barije kwehurira bamara kuhonoka orutaro oru Yehova aricwecererezamu abangi beye! Obwo ku nibwija kuba buri obwire oburi kushemeza! N’obu omu iguru haribayo okushemererwa Babuloni orurembo orukuru ku ruricwecerezibwa, hariho ekindi kintu ekirituma habaho okushemererwa kwingi. (Kush 19:1-3) Ni ekiro kikuru ekiri kugambwa aha kuhendera kw’ekitabo c’Okushururwa, ni okugamba “obugenyi bw’Omwana gw’entama.”​—Kush 19:6-9.

12. Nk’oku biri kugambwa omu Kushururwa 21:1, 2, ni ryari obu obugenyi bw’Omwana gw’entama buriberaho?

¹² Obwo bugenyi buryabaho ryari? Abantu 144,000 bona nibija kuba bagire omu iguru mbere y’orutaro rwa Haramagedoni. Konka, obwo ti bwo obwire obu obugenyi bw’Omwana gw’entama buriberaho. (Shoma omu Kushururwa 21:1, 2.) Obugenyi bw’Omwana gw’entama buryabaho bwanyima y’orutaro rwa Haramagedoni obu abangi ba Ruhanga bona bariba bamazirweho.​—Zab 45:3, 4, 13-17.

13. Obugenyi bw’Omwana gw’entama nibwija kumanyisa ki aha baribwekwatanisamu?

¹³ Obugenyi bw’Omwana gw’entama nibwija kumanyisa ki aha baribwekwatanisamu? Nk’oku obugenyi obushangirwe buri kubuganisa omushija n’omukazi, ni ko n’obu bugenyi bw’akamanyiso buribuganisa Omugabe ari we Yesu Kristo n’“omugenyi” weye, ari bo abantu 144,000. Eco kiryatuma Yesu Kristo n’abantu 144,000 batandika kutegeka ensi okumara emyaka 1,000.​—Kush 20:6.

14-15. Ni enki eki omu Kushururwa ekicweka ca 21 hari kugeranisa n’abantu 144,000? (Reba ekishushani c’aha kishembeso.)

¹⁴ Nambwenu, omu Kushururwa ekicweka ca 21 nihageranisa abantu 144,000 n’orurembo rurungi munonga orurikwetwa “Yerusalemu orusya.” (Kush 21:2, 9) Orwo rurembo rukaba ruri aha misinge 12 ezihandikireho  amazina “g’entumwa 12 ez’Omwana gw’entama.” Ahabw’enki eco cashemize Yohana? Ni ahabw’okuba yarebire izina ryeye na ryo rihandikire ahari eyo misinge. Mazima akatunga omugisha g’omutano!—Kush 21:10-14; Efe 2:20.

¹⁵ Orwo rurembo rw’akamanyiso tiruri nk’ezindi ndembo. Rukaba rwine emihanda y’ezabu ndungi, amarembo 12 g’amabare ga kristalo, ebisika n’emisinge bikozirwe n’amabare g’obuguzi bwingi kandi rupimirwe ge. (Kush 21:15-21) Konka hine ecabire kiri kuburamu! Yetegereze ekindi eki Yohana ari kutugambira: “Omuri orwo rurembo tindarebiremu hekalu, ahakuba Yehova Ruhanga Owobushoborozibwona n’Omwana gw’entama ni bo hekalu yarwo. Orurembo orwo tirwetenga izoba ninga okwezi kurwakira, ahakuba ekitinisa ca Ruhanga ni go mushana gwarwo.” (Kush 21:22, 23) Bona abari kubarirwa omuri Yerusalemu orusya nibija kutura na Yehova kandi bamurebe. (Heb 7:27; Kush 22:3, 4) Yehova na Yesu ni bo hekalu y’orwo rurembo.

16. Ni enki ekirihika aha bantu omu bwire bw’emyaka rukumi Obukama bwa Ruhanga buri kutegeka?

¹⁶ Abashukirweho omwika nibashemererwa ku bari kutecereza ahari orwo rurembo. Konka abine amasiko g’okutura omu nsi na bo nibarushemerererwa. Omu bwire bw’emyaka rukumi obu Obukama bwa Ruhanga buriba buri kutegeka, orurembo orusya Yerusalemu nirwija kuturetera emigisha myingi. Yohana akareba eyo migisha eri kugenda nk’“omugera gw’amizi g’amagara.” Kandi aha rubaju rw’ogo mugera harimu “ebiti by’amagara” ebiri kwera amababi “ag’okutambira amahanga.” (Kush 22:1, 2) Obwo bwire abantu bona abariba bariho nibija kugasirwa n’ebyo birungi. Mporampora abantu bona abari korobera Ruhanga nibija kuba abahikirire. Endwara, obusaasi n’okurira byona nibyija kuba bitakiriho.​—Kush 21:3-5.

17. Nk’oku omu Kushururwa 20:11-13 hari kugamba, ni baha abarije kutunga emigisha omu myaka rukumi?

¹⁷ Ni baha abarije kutunga eyo migisha? Ab’okubanza n’ab’omu mutwe muhango abarirokoka Haramagedoni, hamwe n’abana abarizarwa omu nsi ensya. Konka omu Kushururwa ekicweka ca 20 na ho nihaturaganisa ku abafire barije kuzoka. (Shoma omu Kushururwa 20:11-13.) “Abahikirire” abafire omu bwire bwa kare n’“abatahikirire”  abataratungire oburyo bw’okwega ebiri kukwata ahari Yehova, bona nibija kuzocera hanuya omu nsi. (Byak 24:15; Yoh 5:28, 29) Mbwenu shi eco nikimanyisa ngu abantu bona baryazocera hanuya omu nsi omu bwire bw’emyaka rukumi? Ingaha. Abantu bona abari kwanga kukorera Yehova omuri obu bwire, bafa tibarizoka. Bakaba bine omugisha, konka bayereka ku batari kwenda kutura omuri Paradiso omu nsi.​—Mat 25:46; 2 Tes 1:9; Kush 17:8; 20:15.

18. Embera ziryaba ziri zita aha muheru gw’emyaka 1,000?

¹⁸ Aha muheru gw’emyaka 1,000, abantu bona abariba bari omu nsi baryaba bahikire aha kuhikirira. Tihine oriba acahikwaho n’engaruka z’ekibi ca Adamu. (Rom 5:12) Omuceno ogwaresirwe n’ekibi ca Adamu nigwija kuba gutacariho. Ni yo nshonga aha muheru gw’emyaka 1,000 abariba bari omu nsi bariba “abahurire,” ni okugamba abahikirire.​—Kush 20:5.

19. Ahabw’enki ekigezo c’aha muheru kiribaho?

¹⁹ Nitumanya ku Yesu yayangirire Sitane obu yamugerize. Akagumizamu kuba omwesigwa ahari Yehova. Konka shi abantu bona abariba bahikirire nibija kuguma bari abesigwa Sitane ku aribageza aha murundi ogw’aha muheru? Buri omwe ni we oriyeshariramu kuguma ari omwesigwa ahari Yehova, Sitane ku arikomororwa aha muheru gw’emyaka 1,000. (Kush 20:7) Abariguma bari abesigwa ahari eco kigezo c’aha muheru nibija kutunga ekiconco c’amagara agatahwaho kandi batunge obugabe obwijwire. (Rom 8:21) Abarije kugoma nibija kucwecerezibwa na Sitane na ba dayimoni.​—Kush 20:8-10.

20. Noyehurira ota bwanyima y’okushwijuma obuhanuzi oburi kushemeza oburi omu kitabo c’Okushururwa?

²⁰ Noyehurira ota bwanyima y’okushwijuma obuhanuzi oburi kushemeza oburi omu kitabo c’Okushururwa? Mbehi tikiri kukushemeza kwereba omuri obu buhanuzi bw’omutano? Mbehi ticatuma wagira ekihika c’okweta abandi ngu na bo bije omu kuramya okw’amazima? (Kush 22:17) Obu twamara kushwijuma ebi bintu ebyatukora aha mutima, nitubasa kugamba ebigambo nk’eby’entumwa Yohana owagizire ati: “Amina! Ija, Mukama witu Yesu.”​—Kush 22:20.