1. Ahabw’enki turi kwetenga obwenge oburi kuruga ahari Ruhanga? (Emigani 4:7)

 YABA wakozireho ensharamu y’omugasho munonga, hatariho okubanganisa okashaba obwenge oyine entego ndungi. (Yak 1:5) Omugabe Solomoni akahandika ati: “Obwenge ni ekintu kikuru.” (Shoma omu Migani 4:7.) Konka, Solomoni akaba atari kugamba obwenge obushangirwe. Akaba ari kugamba obwenge oburi kuruga ahari Yehova Ruhanga. (Mig 2:6) Mbehi obwenge obu Ruhanga ari kutuha nibubasa kutukwasa kwehanganira ebizibu ebi turi kubugana omuri obu bwire? Nibutukwasa, nk’oku twaza kukireba omuri eki kicweka.

2. Ni buha buryo oburi kubasa kutukwasa kukizaho kuba abanyabwenge?

² Oburyo bumwe obu turi kubasa kubamu abanyabwenge ni okwega obuhabuzi bw’abashija babiri ababire bari abanyabwenge munonga kandi tukabuta omu nkora. Ow’okubanza owu twaza kushwijuma ni Solomoni. Bibuli negira ngu: “Ruhanga yaha Solomoni obwenge n’okwetegereza ebitakarebwaga.” (1 Bag 4:29) Owakabiri owu twaza kushwijuma ni Yesu owabire ayine obwenge bwingi munonga. (Mat 12:42) Obuhanuzi bukaba bwagambire ahari Yesu buri kugira ngu: “Omwika gwa Yehova guryaguma ahari we, agire obwenge bwa Ruhanga n’okwetegereza.”​—Isa 11:2.

3. Ni enki eki twaza kushwijuma omuri eki kicweka?

³ Obwenge obu Ruhanga yahire Solomoni na Yesu nibutukwasa omu bintu byingi. Omuri eki kicweka, twaza kushwijuma bishatu omuri byo: Oku tushemerire kuringaniza ahaby’esente, aha murimo n’itwe aha bwitu.

4. Ni bata oku embera za Solomoni zabire nizitana n’eza Yesu?

⁴ Solomoni akaba ari omugiga munonga, kandi akaba atwire omu nju ebonire munonga. (1 Bag 10:7, 14, 15) Konka Yesu we akaba ayine ebintu bice kandi atine enju y’okuturamu. (Mat 8:20) Konka bombi, bakaba nibaringaniza ahaby’obutungi ahabw’okuba obwenge bwabo bukaba niburuga ahantu hamwe, ni okugamba ahari Yehova Ruhanga.

5. Ni bata oku Solomoni yabire nareba eby’esente?

⁵ Solomoni akagamba ku esente ziri “obweshereko.” (Mub 7:12) Twaba twine esente nituba turi kubasa kutunga ebi turi kwetenga n’ebintu bimwe na bimwe ebi turi kwenda. Konka n’obu Solomoni yabire ari omugiga akareba ku hariho ekindi kintu c’omugasho munonga okukira esente. Ecokureberaho: Akahandika ati: “Izina rirungi ni ery’okwetengwa munonga okukira itungo ryingi.” (Emi 22:1) Nambwenu Solomoni akareba ku abantu abari kukunda esente munonga bari kugira okushemererwa kuce. (Mub 5:10, 12) Akaturabura ngu tutareba ku esente ari co kintu c’omugasho munonga okukira ebindi.​—Emi 23:4, 5.

6. Ni eha mitekatecere eringanire eyi Yesu yabire ayine aha bikwatirine n’eby’obutungi? (Matayo 6:31-33)

⁶ Yesu akaba ayine emitekatecere eringanire ahaby’obugiga. Akaba nakunda kurya n’okunywa. (Luka 19:2, 6, 7) Izoba rimwe, akakora ecokutangaza ceye c’okubanza ari kukora vinyo enuzire. (Yoh 2:10, 11) Kandi ah’izoba eri yaferireho, akaba ajwire ekanzu ebonire munonga. (Yoh 19:23, 24) Konka Yesu kaba ayine emitekatecere eringanire ahaby’obutungi. Akagambira abakurasi beye ngu: “Tihariho omuntu ori kubasa kuhereza abakama babiri . . . Timuri kubabasa kuhereza Ruhanga n’eby’obutungi.” (Mat 6:24) Yesu akatwegesa ngu twata eby’Obukama omu mwanya g’okubanza, Yehova nayija kutuha ebi turi kwetenga.​—Shoma omuri Matayo 6:31-33.

7. Ni bata oku mwenetata yagasirwe ahabw’okureba eby’esente omu buryo oburinganire?

 ⁷ Benetata na banyanyazi bingi bakagasirwa ahabw’okuta omu nkora obuhabuzi oburi kukwata ahaby’esente. Reba ecokureberaho ca mwenetata ocari wenka ori kwetwa Daniel. Akagamba ati: “Omu myaka yange y’obunyeto, nkasharamu kuta ebintu by’omwika omu mwanya g’okubanza.” Ahakuba Daniel yayorobize embera zeye, akakoresa obwire bweye omu kukwasa omu by’ebihikirizi n’ahari Beteli. Daniel akongeraho ati: “Kuri ntaratire eby’Obukama omu mwanya g’okubanza nkaba ndije kugira esente nyingi. Konka shi esente zikaba ziratume nagira abanywani abu nyine? Mbwenu shi nkaba ndayihe nkahe okushemererwa oku nyine hati, ahabw’okuba natire eby’obukama omu mwanya g’okubanza? Tihariho esente ezi ndi kubasa kutunga, eziri kwingana n’emigisha eyi Yehova yampire.” Eco nicereka ge ku turi kugasirwa twata omutima ahaby’Obukama omu mwanya g’okuguta aha sente.

8. Ni enki ekiri kutuhamiza ku Solomoni yabire nareba ebikwatirine n’omurimo omu buryo oburinganire? (Omuburizi 5:18, 19)

⁸ Solomoni akagamba ku okushemererwa okuri kuruga omu kukora n’amani ari “ekiconco ca Ruhanga.” (Shoma omu Muburizi 5:18, 19.) Akahandika ati: “Omu kufa kubi okw’emiringo yona habamu omugasho.” (Emi 14:23) Solomoni akaba namanya ku ebyo bigambo biri amazima. Akaba nakora n’amani! Akaba yayombekire amaju, kandi yabyire emizituni n’ebimuri. (1 Bag 9:19; Mub 2:4-6) Nambwenu, akombeka amatawuni. Eyo ekaba eri emirimo y’amani kandi hatariho okubanganisa, eyo mirimo yona ekamushemeza. Konka Solomoni akaba atari kureba ku ebyo bintu byonka ari byo ebiri kutuma yashemererwa. Nambwenu akekwatanisa omu bikorwa by’omwika. Ecokureberaho: Akebembera emirimo y’okombeka hekalu ya Yehova eyamazire emyaka mushanju eri kombekwa! (1 Bag 6:38; 9:1) Bwanyima y’okwekwatanisa omuri eyo mirimo yona, akerebera ku okukorera Yehova ari go murimo oguri kukira endijo yona. Akahandika ati: “Oku ni ko kuhendera ebigambo; ahabw’okuba byona bikahurirwa. Tina Ruhanga, oyorobere ebiragiro byeye.”​—Mub 12:13.

9. Ni bata oku Yesu yabire nata omurimo gweye omu mwanya gwago?

⁹ Yesu akaba nakora n’amani. Obu yabire acari muto omu nsi, akaba ari omubiji. (Mak 6:3) Hatariho okubanganisa, abazire beye bakaba nibashemererwa bareba oku yabire ari kubakwasa kutunga eby’okubisaho eka yabo mpango. Ahakuba Yesu yabire ahikirire, n’ebi yabire nakora bikaba bihikirire kandi abantu bakaba nibabikunda. Yesu akaba nakunda omurimo gweye munonga. Konka, n’obu yabire nakunda omurimo gweye, akaba nataho obwire bw’okukora omurimo gwa Yehova. (Yoh 7:15) Ahabw’okuba yabire ari omukozi w’obwire bwona, bwanyima akarabura ababire bamuhurikize ngu: “Mutarihendecera ebyokurya ebiri kuhwaho, kureka ebyokurya ebiri kugumaho okuhisya aha magara agatahwaho.” (Yoh 6:27) Kandi omuri toku ya Yesu y’aha rushozi akagamba ngu: “Mwebikire itungo omu iguru.”​—Mat 6:20.

10. Ni biha bizibu ebi abamwe bari kubugana aha mirimo yabo?

¹⁰ Obwenge oburi kuruga ahari Ruhanga nibutukwasa kuringaniza omu bikwatirine n’omurimo. Ahabw’okuba turi Abakristo, tukegesibwa “kukora n’amani emirimo mirungi.”  (Efe 4:28) Bakama bitu nibareba oku turi abesigwa n’oku turi kukora n’amani aha mirimo, kandi eco nikibasa kutuma batureba nk’ab’omugasho. Eco nikibasa kutuma twakora amashaha mingi kugira ngu abakama bitu bagire emitekatecere mirungi aha Bahamya ba Yehova. Konka nikibasa kutuma tutatunga obwire oburi kumara bw’okuba hamwe n’ab’omu maka gitu n’okukora ebikorwa by’omwika. Tushemerire kukora empinduka kugira ngu tutunge obwire oburi kumara bw’okukora ebintu by’omugasho okukira ebindi.

11. Ni bata oku mwenetata omwe yayegire kureba omurimo omu buryo oburinganire?

¹¹ Mwenetata ocari muto ori kwetwa William akerebera omugasho g’okuta omurimo omu mwanya gwago. William akagamba aha muzehe w’ekibina owu yabire nakorera ati: “[Ogu mwenetata] akaba nakora n’amani kandi ayine obunywani burungi na ba kasitoma beye ahabw’okubakira ge. Konka omu mwebazo, nareka omurimo gweye, rero akoresa obwire bweye n’amani geye omu kufa aha b’omu ka yeye omu by’omwika. Eco kikaba nikituma yashemererwa munonga!” *

12. Ni bata oku Solomoni yayerekire ku yabire naringaniza, kandi shi ni bata oku yayizire kuhinduka?

¹² Obu Solomoni yabire acahereza Yehova omu bwesigwa, akaba nayereba omu buryo oburinganire. Ahakuba yabire acari muto, akaba namanya ahu obushoborozi bweye buri kugarukira kandi ayikiriza obuhabuzi bwa Yehova. (1 Bag 3:7-9) Kandi obu Solomoni yabire acatandika kutegeka, akaba nayerinda akabi akari kuruga omu kwetungura. Akahandika ati: “Amaryo gakuratwa okucwecerera, n’omutima oguri kwetungura gukuratwa okugwa.” (Emi 16:18) Konka ekiri kushasha, Solomoni akaremwa kukuratiza obwo buhabuzi bweye. Obu yabire ari  Omugabe, akatandika kwetungura, yaremwa kukuratiza obuhabuzi bwa Ruhanga. Ecokureberaho: Kimwe omu biragiro kikaba nikigamba ku abagabe b’Abisirayeli babire batashemerire kutasya abakazi bingi, kugira ngu omutima gwabo gutahinduka bakaruga ahari Yehova. (Bir 17:17) Solomoni akatasya abakazi 700 n’enshorece 300 kandi abingi omuri bo bakaba bari abapagani! (1 Bag 11:1-3) Oku kiri kurebeka, Solomoni akaba nareba hatarimu “akabi kona.” Konka obwire bukahika, Solomoni yahikwaho n’engaruka z’oku atarorobire Yehova.​—1 Bag 11:9-13.

13. Ni enki eki turi kwegera aha cokureberaho ca Yesu c’okuba omucurezi?

¹³ Yesu na we akaba nayereba omu buryo oburinganire kandi ayecureza. Yesu atakizire omu nsi, akakora byingi omu murimo gwa Yehova. Birabire ahari Yesu, “ebintu byona bikahangwa eby’omu iguru n’eby’omu nsi.” (Kol 1:16) Aha kubatizibwa kwa Yesu, akijuka ebi yakozire obu yabire acari n’Ishe. (Mat 3:16; Yoh 17:5) Konka eco tikiratumire Yesu yayetungura. Omu mwanya gw’eco, akaba atari kwereba nka murungi kukira abandi. Akagambira abegi beye ku “atarizire kuherezibwa, kureka okuhereza abandi, n’okuhayo amagara geye okucungura bingi.” (Mat 20:28) Kandi akereka ku ari kwecureza ari kugamba ku ebintu ebi ari kukora atari kubikora ahabweye wenka. (Yoh 5:19) Mazima Yesu akaba ari omucurezi! Yesu akatuteraho ecokureberaho kirungi eki tushemerire kutoreza.

14. Ni enki eki turi kubasa kwegera ahari Yesu aha bikwatirine n’okwegiraho emitekatecere mirungi?

¹⁴ Yesu akegesa abakurasi beye ku babire bashemerire kwereba omu buryo oburinganire. Izoba rimwe, akabagambira ngu: “N’ishoki ry’aha mitwe yanyu ribazirwe ryona.” (Mat 10:30) Ebyo bigambo nibituhumuriza na munonga twatandika kwegiraho emitekatecere mibi. Eco nikimanyisa ku turi ab’omugasho omu misho ga Tata witu w’omu iguru. Yaba Yehova ari kutwikiririza kumuramya kandi ari kureba ku tushemerire kutunga amagara agatahwaho, eco titushemerire kukibanganisaho.

15. (a) Ni eha mitekatecere eringanire eyi Omunara g’Omurinzi gwagambireho? (b) Nk’oku biri kurebeka aha kishushushani c’ahari peji ya 24, twayetekatekaho munonga, ni eha migisha eyi turije kuferwa?

 ¹⁵ Omu myaka 15 ehwire, Omunara g’Omurinzi gukagamba aha ku tushemerire kwegiraho emitekatecere eringanire. Gukagamba ngu: “Mazima, titushemerire kwetekatekaho munonga ngu kitume twayetungura, ninga ngu twetekatekeho kubi kitume twacweka entege. Omu mwanya gw’eco, tushemerire kwegiraho emitekatecere mirungi, ni okugamba kumanya ku hine ahu twine amani n’obweremwa. Omunyanyazi omwe akakishoborora ati: ‘Ti inye muntu mubi owarabireho, kandi tinye muntu murungi owarabireho. Hine ahu nyine amani mace, n’ahu nyine obweremwa, kandi ni ko abantu bona bahangirwe.’” * Mbehi tiwareba enshonga ahabw’enki tushemerire kwegiraho emitekatecere eringanire?

16. Ahabw’enki Yehova ari kutuha obuhabuzi?

¹⁶ Yehova natuha obuhabuzi akoresize Ekigambo ceye. Natukunda kandi nayenda ngu tushemererwe. (Isa 48:17, 18) Ensharamu emwe eri kubasa kutukwasa kushemererwa, ni okuta ebya Yehova omu mwanya g’okubanza omu kubaho kwitu. Twakikora tusyo, nitwerinda ebizibu ebiri kuhika aha batari kuringaniza eby’esente, omurimo na bo ahabwabo. Nimureke twena tumarire kugira obwenge n’okushemeza omutima gwa Yehova!—Emi 23:15.