1. Ni kiha kigezo eki Yosefu yabugine, kandi shi ni bata oku yatwarize?

 MUTABANI wa Yakobo ari we Yosefu, akabugana ekigezo kigumire. Omukazi akamugambira ngu ‘babyame hamwe.’ Akaba ari omukazi wa mukama weye ori kwetwa Potifari. Yosefu akamwangira. Omuntu nabasa kwebuza ecakwasize Yosefu kusingura eco kigezo. Potifari akaba atari omu ka. N’obundi, Yosefu akaba ari omugaragwa w’omu ka; obwe rero ogo mukazi akaba ari kubasa kumubonabonesa yayanga kukora ebi yamushaba. Konka nabwe Yosefu akagumizamu ari kumwangira. Ahabw’enki? Akagamba ati: “Mbwenu nimbasa nta kukora ekintu ekiri kwingana kisyoya, n’okucumura ahari Ruhanga?”​—Kut 39:7-12.

2. Ni bata oku Yosefu yamanyire ku obushambani ari ekicumuro ahari Ruhanga?

² Ni bata oku Yosefu yamanyire ku Ruhanga ari kureba obushambani nk’‘ekicumuro c’amani’? Kimwe omu biragiro bya Musa ekiri kugamba ngu “otarishambana” kikaba kitakahandikirwe, na bwanyima y’emyaka magana abiri. (Kur 20:14) Konka nabwe Yosefu akaba ari kumanya ge Yehova aha buryo obu yamanyire n’oku ari kwehurira aha bikwatirine n’obushambani. Ecokureberaho: Yosefu akaba namanya ku Yehova yabire atireho okutasana ngu kube ahagati y’omushija omwe n’omukazi omwe. Kandi nambwenu nabasa kuba yahurire oku Yehova yarinzire nyinenkuruza Sara emirundi ebiri kugira ngu batamukwata aha kafuba. Nambwenu oko ni ko Ruhanga yarinzire omukazi wa Isaka ari we Rebeka. (Kut 2:24; 12:14-20; 20:2-7; 26:6-11) Yosefu ku yatecerize ahari ebyo bintu, akamanya ekishemerire n’ekitashemerire omu misho ga  Ruhanga. Ahakuba Yosefu yabire nakunda Ruhanga, nambwenu akaba nakunda emisinge ya Yehova y’ekirungi n’ekibi kandi akaba amaririre kugigenderamu.

3. Ni enki eki twaza kushwijuma omuri eki kicweka?

³ Mbehi nokunda okuhikirira? Hatariho okubanganisa, nokukunda. Konka twena tituhikirire, kandi twaba tutabire misho, nitubasa kuhinduka ahabw’oku ensi eri kureba okuhikirira. (Isa 5:20; Rom 12:2) Reka tushwijume eki okuhikirira ari co n’oku turi kubasa kugasirwa twakukunda. Bwanyima nitushwijuma ebintu bishatu ebi turi kubasa kukora bikatukwasa kukizaho kukunda emisinge ya Yehova y’ekirungi n’ekibi.

4. Ni eha mitecerereze egwire eyi abantu bingi bine aha bikwatirine n’okuhikirira?

⁴ Abantu ku bari kutecereza aha muntu ohikirire, ekiri kubija omu bitecerezo ni omuntu oyine amaryo, ori kugaya abandi kandi ari kwereba nk’ohikirire kukira abandi. Konka Ruhanga tari kukunda eyo mitwarize na kace. Obu Yesu yabire ari omu nsi, akahakanisa munonga abebembezi b’amadini b’omuri obwo bwire, ahabw’okweteraho emisinge eyabo y’ekirungi n’ekibi. (Mub 7:16; Luk 16:15) Omuntu ohikirire tari kwereba nk’ori kukira abandi.

5. Tukuratize ebi Bibuli eri kugamba, okuhikirira ni enki? Gamba ecokureberaho.

⁵ Okuhikirira ni omucwe murungi. Nikumanyisa okukora ebihikire omu misho ga Yehova Ruhanga. Omuri Bibuli ekigambo “okuhikirira” nikishoborora ekitecerezo c’okubaho turi kugendera aha misinge eri kukira endijo yona, ni okugamba emisinge ya Yehova. Ecokureberaho: Yehova akaba nayenda ngu abashubuzi bakorese “ebipimo bihikire.” (Bir 25:15) Ekigambo c’Oruheburayo ekiri kuhindurwamu ngu “ow’amazima” nikibasa n’okuhindurwamu ngu “ohikirire.” Obwe rero, Omukristo ori kwenda kuba ohikirire omu misho ga Ruhanga ashemerire kuba ow’amazima omu by’obushubuzi byeye byona. Nambwenu omuntu ohikirire nakunda oburinganiza, ayanga kureba ondijo muntu ari kutwarizibwa kubi. Kandi kugira ngu omuntu ohikirire ‘ashemeze Yehova omu bintu byona,’ nata omutima aha ku Yehova ari kureba ensharamu ezi ari kukora.​—Kol 1:10.

6. Ahabw’enki turi kwesiga emisinge ya Yehova y’ekirungi n’ekibi? (Isaya 55:8, 9)

⁶ Bibuli negamba ku Yehova ari we obukomoko bw’okuhikirira. Ni yo nshonga ari kwetwa “obutaho bw’okuhikirira.” (Yer 50:7) Ahabw’okuba Yehova ari we Omuhangi, ni we wenka ori kubasa kututeraho emisinge y’ekirungi n’ekibi. Kandi ahakuba tutahikirire, tituri kubasa kumanya ekirungi n’ekibi, konka ahabw’okuba Yehova we ahikirire, nabimanya. (Emi 14:12; shoma omuri Isaya 55:8, 9.) Konka ahakuba twahangirwe omu kishushani ca Ruhanga nitubasa kubaho turi kugendera aha misinge ya Ruhanga y’okuhikirira. (Kut 1:27) Eco nitushemerererwa kukikora. Rukundo eyi turi kukunda Tata witu netuma twatamu amani kugira ngu tumutoreze.​—Efe 5:1.

7. Ahabw’enki tucenire emisinge y’okugenderaho? Shoborora.

⁷ Nitugasirwa twagendera aha misinge ya Yehova y’ekirungi n’ekibi. Mbehi nomanya enshonga? Tecereza buri kitongore c’eby’obwombeki ceterireho ebipimo ebyaco. Mazima nihabasa kubaho akavuyo kingi. Kandi abadokita bangire kugendera aha misinge y’eby’okuvura, abarwire bamwe nibabasa kufa. Mazima okugendera aha misinge, ni oburinzi. Ni co kimwe, okugendera aha misinge ya Yehova y’ekirungi n’ekibi ni oburinzi.

8. Ni eha migisha eyi Yehova arije kuha abari kukora ebirungi?

 ⁸ Yehova naha emigisha abari kugezaho kugendera aha misinge yeye. Naraganisa ati: “Abahikirire baryahunguria ensi, bagituremu ebiro byona.” (Zab 37:29) Tecereza oku haribaho obumwe, obusinge, n’okushemererwa abantu bona ku barije kugendera aha misinge ya Yehova. Yehova nayenda ngu oshemerererwe eyo migisha. Mazima, buri omwe ayine enshonga eziri kutuma yakunda okuhikirira! Ni enki eki turi kubasa kukora tukakizaho kukunda ogo mucwe? Reka tushwijume ebintu bishatu ebi turi kubasa kukora.

9. Ni enki ekirije kutukwasa kukunda okuhikirira?

⁹ Ekintu ca 1: Kunda Yehova ari we ori kutaho emisinge. Kugira ngu tukunde okuhikirira, tushemerire kukizaho kukunda Yehova ari we ori kutaho emisinge y’ekirungi n’ekibi. Oku turi kukizaho kukunda Yehova, ni ko turi kukizaho kwenda kugendera aha misinge yeye ehikirire. Ecokureberaho: Kuri Adamu na Eva babire nibakunda Yehova, bakaba batarije kumugomera.​—Kut 3:1-6, 16-19.

10. Ni enki eki Aburahamu yakozire kikamukwasa kumanya ge Yehova?

¹⁰ Mazima tituri kwenda kukora enshobi nk’eyi Adamu na Eva bakozire. Eco nitubasa kukikora twagumizamu kwega ebiri kukwata ahari Yehova, tukereka ku nitusiima ahabw’emicwe yeye mirungi, kandi tukagezaho kushoborocerwa emitekatecere yeye. Ku turakikore, rukundo eyi turi kukunda Yehova neyije kukizaho kweyongera. Tecereza ahari Aburahamu. Akaba nakunda Yehova. N’obu cabire kimugumire kushoborocerwa ensharamu za Yehova, nabwo taragomire. Omu mwanya gw’eco, akagezaho kumanya ge Yehova. Ecokureberaho: Ku yamanyire ensharamu ya Yehova y’okucwecereza Sodoma na Gomora, omu kubanza akaba atinire ku Omucwi w’emanja z’ensi yona yabire arije kucwecerereza hamwe abarungi n’ababi. Aburahamu ekecureza, rero yabuza Yehova ebibuzo byingi. Yehova akamwehanganira yamugarukamu. Bwanyima, Aburahamu akija kumanya ku Yehova ari kushwijuma omutima gwa buri muntu kandi ku atari kubasa kuhanira hamwe abarungi n’ababi.​—Kut 18:20-32.

11. Ni bata oku Aburahamu yeyerekire ku nakunda Yehova kandi ku namwesiga?

¹¹ Ekiganiro eki Aburahamu yagizire na Yehova aha bikwatirine n’orurembo rwa Sodoma na Gomora kikamukwataho munonga. Hatariho okubanganisa, kikatuma yakizaho kukunda Ishe n’okumuha ekitinisa kukiza oku yabire nakikora. Bwanyima y’emyaka, obwesigwa bwa Aburahamu ahari Yehova bukagezibwa. Yehova akamushaba ngu amutambire omwana weye owu yabire nakunda munonga. Konka yati Aburahamu akaba namanya ge Ruhanga, obwe taramuburise ebibuzo. Aburahamu akahika nakora ebi Yehova yamushabire. Konka nabwe tecereza aha busaasi obu yagizibe omu mutima, ku yatecerize eby’okutamba omwana weye. Aburahamu ashemerire kuba yatecerize munonga aha bi yabire ayegire ahari Yehova. Akaba namanya ku Yehova yabire atari kubasa kukora ekintu kibi ninga shi ekitarimu rukundo. Tukuratize ebi entumwa Pawulo yagambire, Aburahamu akaba namanya ku Yehova yabire arije kuzora omwana weye owu yabire ari kukunda, Isaka. (Heb 11:17-19) N’obundi Yehova akaba amuraganisize ku Isaka yabire arije kurugwamu ihanga kandi omuri obwo bwire Isaka akaba atine abana. Aburahamu akaba nakunda Yehova, obwe rero akaba nayesiga ku Ishe yabire  arije kukora ekihikire. Okwikiriza kweye kukatuma yayorobera Yehova n’obu cabire kimugumire.​—Kut 22:1-12.

12. Ni bata oku turi kubasa kutoreza Aburahamu? (Zaburi 73:28)

¹² Ni bata oku turi kubasa kutoreza Aburahamu? Nitubasa kumutoreza turi kwega ebiri kukwata ahari Yehova. Ku turakikore basyoya, nitwija kukizaho kuhika hihi ya Yehova kandi tukizeho kumukunda. (Shoma omuri Zaburi ya 73:28.) Omuntuwomunda witu nayija kumanyizibwa kugira ngu abugane n’emitecerereze ya Ruhanga. (Heb 5:14) Eco nikija kutuma twayanga hagira owatugeza ngu tukore ekintu kibi. Titurije n’okutecereza kukora ekintu ekirije kushasha Tata witu kandi kikashisha obunywani obu twine na we. Konka shi ni kiha kindi kintu ekirije kutukwasa kwereka ku nitukunda okuhikirira?

13. Ni bata oku turi kubasa kukuratira okuhikirira? (Emigani 15:9)

¹³ Ekintu ca 2: Guma otemu amani burizoba kugira ngu okizeho kukunda okuhikirira. Nitubasa kongera ahari rukundo eyi turi kukunda emisinge ya Yehova y’okuhikirira nk’oku turi kumanyiza omubiri burizoba kugira ngu gugume. Ogo ni omurimo ogutagumire kukora. Yehova naringaniza kandi tari kubasa kutushaba ebi tutari kubasa kukora. (Zab 103:14) Natuhamiza ku “ari kukunda [omuntu] ori kukuratira okuhikirira.” (Shoma omu Migani 15:9.) Twaba tweterireho entego omu murimo gwa Yehova nitutaho amani mingi kugira ngu tuyihikeho. Ni co kimwe n’okukuratira okuhikirira. Yehova nayija kutukwasa kutunguka mporampora tuhike aha kukunda okuhikirira.​—Zab 84:5, 7.

14. “Ecoma c’okwekingiza omu kifuba c’okuhikirira” ni enki, kandi shi ahabw’enki tukiceniire?

¹⁴ Yehova natwijusa ku okukora eby’okuhikirira kutari omutwaro. (1 Yoh 5:3) Omu mwanya gweco, okuhikirira nikuturinda kandi obwo burinzi ni bwo tucenire burizoba. Yijuka ebijwaro by’omwika ebi entumwa Pawulo yagambireho. (Efe 6:14-18) Ni kiha omuri ebyo bijwaro ecabire  nikirinda omutima g’omusirikare? Ni “ecoma c’okwekingiza omu kifuba c’okuhikirira,” ekiri kugeranisa emisinge ya Yehova ehikirire. Nk’oku ecoma c’okwekingiza omu kifuba cabire nikirinda omutima gwenyine, ni ko n’emisinge ya Yehova y’ekirungi n’ekibi eri kurinda omutima gwawe gw’ekigereraniso, ni okugamba owu ori we omu nda. Obwe rero, taho amani kugira ngu ekijwaro cawe c’eby’omwika kiriho n’ecoma c’okwekingiza omu kifuba!—Emi 4:23.

15. Ni bata oku ori kubasa kujwara ecoma c’okwekingiza omu kifuba?

¹⁵ Ni bata oku ori kubasa kujwara ecoma c’okuhikirira c’okwekingiza omu kifuba? Eco nobasa kukikora ori kukuratiza emisinge ya Yehova omu nsharamu zawe. Waza kusharamu ebi oragambe, omuziki ogu orahurikize, vidiyo ezi orarebe, n’ebitabo ebi orashome, ogume obanze oyebuze ngu: ‘Ni enki eki nshemerire kugaburira omutima gwange? Mbehi eki kintu Yehova nakikiriza? Ninga nikishagika obushambani, obugomi, omururu, n’okwekunda, ebintu ebi Yehova ari kureba nk’ebitahikire?’ (Fil 4:8) Ensharamu zawe ku zirabugane n’ebi Yehova ari kwenda, noyija kuba ori kwikiriza ngu emisinge ya Yehova ehikirire erinde omutima gwawe.

16-17. Ni bata oku ebiri omuri Isaya 48:18 biri kutuhamiza ku turi kubasa kukuratiza emisinge ya Yehova ebiro byona?

¹⁶ Mbehi nohurira otinire ku orije kuremwa kugendera aha misinge ya Yehova y’ekirungi n’ekibi? Tecereza aha cokureberaho eki Yehova ari kukoresa ekiri omuri Isaya 48:18. (Hashome.) Yehova naraganisa ku okuhikirira kwitu kuri kubasa kuba nk’‘emiraba y’enyanja.’ Tecereza oyemerire aha nkombe y’enyanja, ori kureba oku emiraba eri kujabiriza eyo nyanja. Mbehi omuri ako kanya noba otinire yaba eyo miraba izoba rimwe eryayemerera? Ingaha mazima! Nomanya ku emiraba yamazire emyaka myingi eri ahari eyo nyanja kandi ku eragume kwija.

¹⁷ Okuhikirira kwawe na ko nikubasa kuba nk’eyo miraba y’aha nyanja! Bata shi? Waba oyine ensharamu y’okukora, guma otecereze eki Yehova akabire ari kwenda ngu okore. Bwanyima okore eyo nsharamu. N’obu eyo nsharamu yakuba egumire ota, Sho ow’omu iguru burijo nayija kukukwasa kuguma oturize n’okukuratiza emisinge yeye omu kubaho kwawe.​—Isa 40:29-31.

18. Ahabw’enki tushemerire kwerinda kucwera abandi emanja ahabw’emisinge eyi tweterireho?

¹⁸ Ekintu ca 3: Orubanja rurecere Yehova. Twaba turi kugezaho kukuratiza emisinge ya Yehova y’ekirungi n’ekibi, nitwerinda kucwera abandi orubanja ninga shi kwereba nk’abahikirire kukira abandi. Omu mwanya g’okujoga abandi, tukereba nk’abari kubakira tugendire aha misinge eyi tweterireho, tushemerire kwijuka ku Yehova ari we “omucwi w’emanja z’ensi yona.” (Kut 18:25) Yehova taratuhire omurimo g’okucwera abandi emanja. Ahobwe, Yesu akagamba ati: “Mutaricwa orubanja.”​—Mat 7:1. b

19. Ni bata oku Yosefu yayerekire ku nareka Yehova akaba ari we owacwa orubanja?

¹⁹ Reka tushube tutecereze aha cokureberaho c’omushija w’omwesigwa ori kwetwa Yosefu. Akerinda kucwera abandi orubanja, nangwa n’abamutwarize kubi. Benishe bakamujuma, bamuguza kuba omugaragwa, kandi babeha ishe ngu Yosefu akafa.  Bwanyima y’emyaka, Yosefu akashuba yabugana na benishe. Hati Yosefu akaba ari omutegeki oshambire, akaba nabasa kutwariza kubi benishe ari kwehorera enzigu. Benishe bakaba batinire ku yabire arabatwarize basyoya, n’obu babire bashashire ahabw’ebi babire bamukorire. Konka Yosefu akabahamiza ati: “Mutatina; nimugira ngu ndi omu mwanya gwa Ruhanga?” (Kut 37:18-20, 27, 28, 31-35; 50:15-21) Yosefu akecureza, orubanja yarurecera Yehova.

20-21. Ni bata oku turi kubasa kwerinda kwereba nk’abahikirire kukira abandi?

²⁰ Nk’oku Yosefu yakikozire, okucwa emanja nitukirecera Yehova. Ecokureberaho: Tituri kugezaho kumanya entego ezatuma benetata na banyanyazi bakora ekintu nanka. Tituri kubasa kumanya ebiri omu mitima; ‘Yehova [ni we] ari kupima emitima.’ (Emi 16:2) Nakunda abantu bona atarebire ahu bakurire, n’omucwe gwabo. Kandi Yehova natuhiga ngu ‘tushashanuke.’ (2 Kor 6:13) Nitwenda kukunda ab’omu ka yitu y’eby’omwika, kutari okubacwera emanja.

²¹ Nambwenu eco nikimanyisa ku tutarije kucwera abaheru y’ekibina emanja. (1 Tim 2:3, 4) Mbehi waracwerireho orubanja omunyabuzare wawe otari omu mazima, obundi ori kutekateka ngu tarije kwija omu mazima? Mazima eco kikaaba kiri kwereka ku ori kweragira, kandi ku ori kwereba nk’ohikirire kukira abandi. Yehova acahire “abantu bona abari hona” oburyo bw’okwehana. (Byak 17:30) Burijo ogume oyijuke ku okwereba nk’ohikirire kugira abandi nikimanyisa ku otari kukora eby’okuhikirira.

22. Ahabw’enki wamaririra kukunda okuhikirira?

²² Twakunda emisinge ya Yehova y’ekirungi n’ekibi nitutunga okushemererwa kandi tubera abandi ecokureberaho, rero kitume baba banywani bitu kandi bahika hihi ya Ruhanga. Nimureke tugumizemu “kugirira eby’okuhikirira enjara n’iriho.” (Mat 5:6) Yesige otari kubanganisa ku Yehova ari kureba amani agu ori kutaho kandi ku burijo ari kushemerererwa okutunguka kwawe. Obu egi nsi eri kukizaho kukora eby’okutahikirira, otatina! Burijo guma oyijuke ku “Yehova ari kukunda ohikirire.”​—Zab 146:8.