1. Ni bata oku turi kugasirwa twagambira abandi oku twamanyire “amazima”?

 “NI BATA oku wamanyire amazima?” Abantu nibabasa kuba bakuburize eco kibuzo emirundi myingi. Eco ni kimwe omu bibuzo by’okubanza ebi Omukristo ari kutubuza twamanyana. Nitukunda kuhurira oku benetata bamanyire Yehova kandi bakamukunda, kandi n’itwe nitushemerererwa kubagambira oku turi kukunda amazima. (Rom 1:11) Ebiganiro nk’ebyo nibitwijusya oku amazima gari ag’omuhendo ahari itwe. Nambwenu nibituma twamaririra kugumizamu “kugendera omu mazima,” ni okugamba okubaho omu buryo oburi kutuma Yehova yatuha emigisha kandi akatwemera.​—3 Yoh 4.

2. Ni enki eki twaza kushwijuma omuri eki kicweka?

² Omuri eki kicweka, twaza kushwijuma enshonga zimwe eziri kutuma twakunda amazima. Bwanyima nitwija kushwijuma oku turi kubasa kugumizamu kwereka ku nitukunda eco kiconco c’omuhendo. Hatariho okubanganisa, okubishwijuma, nibituma twakizaho kusiima Yehova ahabw’okutureta omu mazima. (Yoh 6:44) Nambwenu nikija kutuma twakizaho kugira ecetengo c’okugambira abandi amazima.

3. Ni eha nshonga eri kukira ezindi eri kutuma twakunda amazima?

³ Hariho enshonga nyingi eziri kutuma twakunda amazima. Ey’omugasho, ni oku turi kukunda Yehova Ruhanga we burugo bw’amazima. Birabire aha Kigambo ceye Bibuli, tukamanya ku ari we Muhangi w’eby’omu iguru n’omu nsi oyine amani, kandi twamanya ku ni Tata ori kutukunda kandi ori kutufaho. (1 Pet 5:7) Nitumanya ku Ruhanga witu ari “Ruhanga ow’okusasiira, otarahuka kugira ekiniga kandi oyijwire embabazi n’amazima.” (Kur 34:6) Yehova nakunda oburinganiza.  (Isa 61:8) Nashasha yareba turi kubonabona, kandi ayetegwire kutwihiraho ebiri kutushasha omu bwire obu yatireho. (Yer 29:11) Eco ku nikituhumuriza! Eyo ni emwe omu nshonga eziri kutuma twakunda Yehova munonga!

4-5. Ahabw’enki entumwa Pawulo yageranisize amasiko gitu n’ekiri kusika obwato?

⁴ Ni eha ndijo nshonga eri kutuma twakunda amazima? Amazima, nigatuma twatunga ebirungi byingi. Reba ecokureberaho. Omuri Bibuli ni ho ahu turi kushanga amasiko gitu g’omu biro by’omu misho. Entumwa Pawulo akashoborora omugasho gw’ago masiko ari kuhandika ati: “Amasiko aga tugine nk’ekiri kusika amagara, nk’amasiko agahamire kandi agatari kubanganisibwaho.” (Heb 6:19) Nk’oku ecoma kiri kusika obwato kikatuma bwaguma buhamire, ni ko n’amasiko gitu g’omuri Bibuli gari kutuma twaguma tuturize twabugana ebigezo omu kubaho kwitu.

⁵ Aha mpaha, Pawulo akaba ari kugamba aha masiko g’Abakristo abashukirweho omwika ag’okwija kutura omu iguru. Konka ebyo bigambo nibireba n’Abakristo abategerize kwija kutura omuri paradiso omu nsi ebiro byona. (Yoh 3:16) Hatariho okubanganisa, okumanya ebiri kukwata aha masiko gitu g’ebiro byona kikatuma amagara gitu gagira ekigendererwa.

6-7. Ni bata oku Yvonne yagasirwe n’okumanya amazima agari kukwata aha biro by’omu misho?

⁶ Reba ebyahikire ahari munyanyazi ori kwetwa Yvonne. Tarakurire omu mazima kandi obu yabire acari omwana akaba natina orufu. Akagarukamu ebi yashomire ebyagumire omu bitekateko byeye ebiri kugira ngu: “Ebya nyensakare tokabimanya.” Akagamba ngu: “Ebyo bigambo bikaba nibituma naremwa kuhungira ahabw’okutecereza ebya nyensakare. Nkatecereza ngu, ‘hashemerire kuba hariho agandi magara.’ ‘Mbwenu shi ahabw’enki ndiho?’ Mazima nkaba ntari kwenda kufa!”

⁷ Bwanyira Yvonne ku yahikire omu myaka y’obunyeto akabugana Abahamya ba Yehova. Akagamba ati: “Nkatandika kuhurira nagira amasiko g’okwija kubaho ebiro byona omuri paradiso omu nsi.” Ni bata oku ogo munyanyazi yagasirwe n’okumanya amazima? Akongeraho ati: “Hati tincarara ndi kureba ahabw’okutina eby’omu biro by’omu misho ninga orufu.” Nikihuririnkana ku hati amazima gari ag’omuhendo ahari Yvonne, kandi hati nashemerererwa kugambira abandi eby’omu biro by’omu misho.​—1 Tim 4:16.

8-9. (a) Omu mugani gwa Yesu, ni bata oku omushija ori kugambwamu yabire nareba obutungi obu yabwine? (b) Iwe noreba ota amazima agu wabwine?

⁸ Nambwenu amazima g’omuri Bibuli garimu obutumwa burungi oburi kugamba aha Bukama bwa Ruhanga. Yesu akagereranisa ago mazima agari kugamba aha Bukama n’obutungi obusherekirwe. Nk’oku biri kugambwa omuri Matayo 13:44, Yesu akagamba ati: “Obukama bw’omu iguru nibushusha nk’ec’obutungi ecasherekirwe omu musiri; bwanyima omuntu ku yakigwireho, na we yakishereka, yagenda, yatunda ebi yabire ayine byona ashemerirwe, yija, yagura omusiri ogo.” Yetegereze ku ogo mushija yabire atari kuronda obwo butungi. Konka ku yabubwine akasiga ebintu byeye byona kugira ngu abubone. Ni amazima, akaguza ebintu byeye byona ebi yabire atungire. Ahabw’enki? Akaba namanya omugasho g’obwo butungi obu yabire yabona. Bukaba nibukira buri kintu cona eki yabire ayine.

⁹ Mbehi n’iwe ni ko ori kwehurira watecereza aha mazima agu wabwine? Hatariho  okubanganisa, n’iwe ni ko ori kugareba! Nitumanya ku hatine ekintu na kimwe eki turi kubasa kugeranisa n’okushemererwa oku twine ahabw’okukorera Yehova hati, hamwe n’amasiko g’okwija kubaho ebiro byona omu bwire bw’Obukama bwa Ruhanga. Omugisha ogu twine g’okugira obunywani na Yehova nigukira ekintu cona eki turi kubasa kweferereza. Nitwesiima munonga ahakuba ‘turi kumushemeza.’​—Kol 1:10.

10-11. Ni enki ecatumire Michael yakora empinduka omu kubaho kweye?

¹⁰ Abingi omuri itwe tukeferereza ebintu byingi kugira ngu Yehova atwemere. Abamwe bakareka emirimo mirungi eyi babire bine omuri egi nsi. Abandi bakareka kukuratira eby’obutungi. Kandi hariho abandi abahindwire oburyo bwabo bw’okubaho bwanyima y’okwega ebiri kukwata ahari Yehova. Eco ni co ecabire ahari Michael. Tarakurire omu mazima. Obu yabire acari muto akega eby’okutera enkonde n’emigere. Akagamba ati: “Nkaba ninshemerererwa kumanyiza omubiri gwange ngu nture nyetegwire kurwana. Nkaba nimpurira ndi ow’akabi.” Konka Michael ku yatandikire kwega Bibuli akamanya oku Yehova ari kureba eby’okurwana n’obugomi. (Zab 11:5) Michael akagambira omushija n’omukazi abamwegesize Bibuli ati: “Tibarangambire na kace ngu ndeke omuzano g’okurwana; bo eki bakozire, bakagumizamu kunyegesa amazima g’omuri Bibuli.”

¹¹ Oku Michael yagenzire ari kwega ebya Yehova, ni ko rukundo eyi ari kukunda Yehova yakirizeho kweyongera. Na munonga ecamukozire aha mutima ni rukundo eyi Yehova ari kukunda abahereza beye. Ku hahwire obwire, Michael akareba ku yabire ashemerire kuhindura emitwarize yeye. Akagamba ati: “Nkaba nimanya ku okureka omuzano gwa karate, ari co kintu ecabire kirije kungumira omu bi nakozireho byona. Konka nambwenu nkamanya ku cabire kirije kushemeza Yehova, kandi namanya ku okumukorera cabire kiri kukira ebintu byona ebi nabire ndi kubasa kweferereza.” Michael akareba amazima agu yamanyire nk’ag’omuhendo kandi eco kikatuma yakora empinduka z’amani omu kubaho kweye.​—Yak 1:25.

12-13. Ni bata oku amazima g’omuri Bibuli gakwasize Mayli?

¹² Bibuli neyereka omugasho gw’amazima, eri kugageranisa n’orumuri oruri kwakira omu mwirima. (Zab 119:105; Efe 5:8) Mayli, w’omuri Azerbaijan, akereka ku nasiima munonga ahabw’amazima agu yamanyire omu Kigambo ca Ruhanga. Akakurira omu ka erimu abantu abatari kwikiriza. Ishe ni omuyisiramu, kandi mama weye ni Omuyudaya. Akagamba ati: “N’obu nabire ntari kuhakanisa ku Ruhanga ariho, nkaba ninyebuza ebibuzo byingi. Nkaba ninyebuza ngu, ‘Ahabw’enki Ruhanga yahangire abantu kandi shi ahabw’enki omuntu ari kubonabona omu kubaho kweye kona, rero bwanyima akokibwa omu muriro ogutari kurara?’ Ahabw’okuba abantu bona babire bari kugamba ku ebintu byona biri kubaho ahabw’okukunda kwa Ruhanga, nkaba ninyebuza ngu, ‘hona shi Ruhanga owahangire abantu nashemerererwa kureba bari kubonabona?’”

¹³ Mayli akaagumizamu kurondesa ebyokugarukamu by’ebibuzo byeye. Obwire bukahika yayikiriza kwega Bibuli kandi yayija omu mazima. Akagamba ati: “Enyegesa za Bibuli eziri kuhuririnkana zikatuma naba omuntu oyine okushemererwa. Enyegesa z’omu Kigambo ca Ruhanga ezi nabwine zikatuma nagira obusinge bw’omu mutima.” Kimwe na Mayli, twena nituhimbisa Yehova,  ‘owatwesire akatwiha omu mwirima akatuta omu mushana oguri kutangaza munonga.’​—1 Pet 2:9.

14. Tukakora ki ngu tukizeho kukunda amazima? (Nambwenu reba akashanduku akari kugira ngu “ Ebindi bintu ebiri kwereka omugasho gw’amazima.”)

¹⁴ Ebyo ni ebyokureberaho bice ebiri kugamba aha mugasho gw’amazima. Kandi hatariho okubanganisa nobasa n’okutecereza aha bindi byingi. Mbehi tori kubasa kubyeyegesaho omu kweyegesa kwawe, okamanya enshonga ahabw’enki tushemerire kukunda amazima? Oku turi kukizaho kukunda amazima ni ko turi kukizaho kubona oburyo bw’okwereka ku nitugakunda.

15. Ni buha buryo obu turi kubasa kwerekamu ku nitukunda amazima?

¹⁵ Nitubasa kwereka ku nitukunda amazima turi kweyegesa Bibuli burijo kandi twega n’ebitabo byitu ebiri kwegesa Bibuli. N’obu twakuba tumazire emyaka myingi omu mazima, burijo nituba twine byingi by’okwega. Omunara ogwashohwire omu kubanza gukagamba guti: “Amazima gari nk’ekimuri ekiri kuba kiri omu kibira kiri conka, kandi cehingurizibwe ekirare kikuzire. Kugira ngu ogabone noba oshemerire  kwetegereza munonga. Waba ori kugenda noba oshemerire kutamu amani kugira ngu ogabone. Otamanya amazima mace ngu orecere aho, ahobwe gezaho kurondesa agandi mazima g’omuri Bibuli.” Okweyegesa ni omurimo ogutorobi, konka nigurugamu ebirungi.

16. Ni buha buryo obu ori kukoresa omu kweyegesa oburi kukugasira? (Emigani 2:4-6)

¹⁶ Twena tiko turi kukunda kushoma n’okwega. Konka Yehova natutumirira “kugumizamu kurondesa” kugira ngu tushoborocerwe amazima. (Shoma omu Migani 2:4-6.) Ku turi kutaho amani, nitugasirwa. Corey akagamba aha kweyegesa Bibuli kweye, yagamba ku ari kweyegesa ari kuta omutima aha runyiriri rumwe rumwe. Akashoborora ati: “Ninshoma buri byahandikirwe by’ahaasi, nshoma ebyahandikirwe ebiri kubuganisa, kandi ncondoza. Okweyegesa omuri obwo buryo nikituma namanya byingi!” Twaba turi kukoresa obwo buryo ninga shi obundi, nitwereka ku nitureba amazima nk’ag’omuhendo, turi kukwata obwire kandi tukataho amani kugira ngu tugeyegese.​—Zab 1:1-3.

17. Okubaho turi kubuganisa n’amazima nikimanyisa ki? (Yakobo 1:25)

¹⁷ Ni amazima nitumanya ku okwega amazima kitari kumara. Kugira ngu tugasirwe omu bwijwire, tushemerire kubuganisa n’ago mazima, ni okugamba okuta omu bikorwa ebi turi kwega. Ku turakikore ni bwo amazima garituretera okushemererwa. (Shoma omuri Yakobo 1:25.) Nitubasa kumanya tuta yaba turi kubaho turi kubuganisa n’amazima? Mwenetata omwe akagamba ku turi kuba tushemerire kweshwijuma kugira ngu tumanye ahu turi kukora ge, n’ahu tushemerire kukora empinduka. Entumwa Pawulo akagamba ngu: “Konka amazima agu tuhikiremu, tube ni go twagenderamu.”​—Fil 3:16.

18. Ahabw’enki turi kukora cona eki turi kubasa ngu “tugendere omu mazima”?

¹⁸ Tekateka aha birungi ebi turi kukunda twakora ekiri kubasika ngu ‘tugendere omu mazima’! Nitubaho tushemerirwe kandi tushemeza Yehova n’Abakristo bagenzi bitu. (Emi 27:11; 3 Yoh 4) Mazima ezo ni zo nshonga eziri kutuma twakunda amazima kandi tukabaho turi kubuganisa na go.