1. Ahabw’enki Yesu yashabire ngu Yehova arinde abakurasi beye?

 OMU kiro ecabandize orufu rwa Yesu, hine ekintu c’omutano eki yashabire Ishe ow’omu iguru. Akashaba Yehova ngu arinde abakurasi beye. (Yoh 17:15, 20) Ni amazima, burijo Yehova akaba nafa aha bahereza beye kandi abarinda. Konka Yesu akaba namanya ku Sitane yabire arije kuhiganisa abakurasi beye. Nambwenu Yesu akaba namanya ku babire baceniire obuyambi bwa Yehova kugira ngu basingure ebitero bya Sitane.

2. Tukuratize ebiri omuri Zaburi ya 33:18-20, ahabw’enki tutashemerire kutina ebizibu ebi turi kubugana?

² Egi nsi ya Sitane netuma Abakristo bingi babugana ebizibu byingi. Nitubugana ebizibu ebiri kutucwa entege kandi bikageza obwesigwa bwitu ahari Yehova. Konka nk’oku twaza kukireba omuri eki kicweka, tihine ekintu na kimwe ekishemerire kututinisa. Yehova naturinda, nareba ebizibu ebi turi kubugana kandi naba ayetegwire kutuha obuyambi obu turi kwetenga kugira ngu tubyehanganire. Reka tushwijume ebyokureberaho bibiri by’omuri Bibuli ebiri kwereka ku Yehova “ari kurinda abari kumutina.”​—Shoma omuri Zaburi ya 33:18-20.

3. Ni ryari obu turi kubasa kwehurira turi twenka?

³ N’obu turi omu muryango muhango gw’abahereza ba Yehova, obumwe hine obu turi kuhurira turi twenka. Ecokureberaho: Abacari bato nibabasa kuhurira bari bonka baba nibashoborora okwikiriza kwabo ah’ishomero ninga bafurukira omu kibina kisya. Abamwe omuri itwe, nitubasa kushasha ninga shi tugira enyehurira mbi, turi kutekateka ku turije kwehanganira ezo nyehurira turi twenka. Nitubasa kutinda kugambira abandi enyehurira ezi twine ahakuba tutinire ngu tibarije kutucenga. Kandi obumwe hine obu turi kubasa kwebuza yaba hine ori kutufaho. Enshonga yona eyakutuma twahurira turi twenka  nebasa kutuma twayemereza omutima kandi tuhurira tutine masiko. Yehova tari kwenda ngu twehurire tusyoya. Ahabw’enki?

4. Ahabw’enki omuhanuzi Eliya yagambire ngu: “Ni inye nsigireho”?

⁴ Reba ecokureberaho c’omushija w’omwesigwa ori kwetwa Eliya. Yezebeli akaba amaririre kumwita, obwe rero akamara emyaka eri kurenga 40 ari kuhunzya amagara geye. (1 Bag 19:1-9) Bwanyima, akeshereka omu kina c’omu rukiri yatakira Yehova ari kugira ati: “Ni inye [muhanuzi] osigireho.” (1 Bag 19:10) Omu ihanga hakaba hasigireho abandi bahanuzi. Obadiya akaba yabasize kukiza abandi bahanuzi 100 kugira ngu Yezebeli atabita. (1 Bag 18:7, 13) Mbwenu shi, ahabw’enki Eliya yabire ari kuhurira ari wenka? Mbehi akaba natecereza ngu abahanuzi abu Obadiya yakirize bona bakafa? Mbehi akahurira ari wenka ahakuba abandi babire batekwatanisize na we omu kuhereza Yehova bwanyima y’ekigezo ca Bayali aha mushozi gwa Karumeri? Mbehi akatecereza ku hatine owabire ari kumanya akabi aku arimu, ninga shi ku habire hatine ori kumufaho? Eyi nkuru teri kushoborora omu bwijwire enyehurira zona za Eliya. Konka eki turi kumanya ni oku Yehova yabire ari kumanya enshonga eyatumire Eliya yayehurira ari wenka kandi akaba namanya n’oku aramukwase.

5. Ni bata oku Yehova yahamize Eliya ku yabire atari wenka?

⁵ Yehova akakwasa Eliya omu buryo bwingi. Akikiririza Eliya kugamba ebimuri aha mutima byona. Akabuza Eliya emirundi ebiri ati: “Nokora ki aha?” (1 Bag 19:9, 13) Buri murundi ogu Yehova yaburize Eliya, akamuhurikiza ari kumugambira ebimuri aha mutima byona. Yehova akahumuriza Eliya ari kumwereka ku ariho kandi yamwereka n’amani geye. Nambwenu, Yehova akahamiza Eliya ku habire hariho abandi bahanuzi bagenzi beye bingi. (1 Bag 19:11, 12, 18) Hatariho okubanganisa, Eliya akahurira yaruhuka bwanyima y’okugambira Yehova ebimuri aha mutima byona kandi akahurira oku yamugarukamu. Yehova akaha Eliya endijo mirimo myingi y’omugasho. Akamushaba ngu ateho Hazayeli abe omugabe wa Siriya, Yehu ngu abe omugabe wa Isirayeli kandi na Elisa ngu abe omuhanuzi. (1 Bag 19:15, 16) Omuri obwo buryo Yehova  akakwasa Eliya kuguma ari kutekateka ebintu birungi. Nambwenu Ruhanga akaha Eliya ow’okukora na we ari we Elisa. Ni enki eki ori kubasa kukora kugira ngu otunge obuyambi bwa Yehova waba ori kuhurira ori wenka?

6. Ni enki eki ori kubasa kushaba waba ori kuhurira ori wenka? (Zaburi 62:8)

⁶ Yehova nakweta ngu omushabe. Nareba embera ezi ori kurabamu, kandi nakuhamiza ku arije kukuhurikiza waba ori kumushaba. (1 Tes 5:17) Nashemerererwa kuhurira abahereza beye abari kumushaba. (Emi 15:8) Ni enki eki ori kubasa kushaba waba ori kuhurira ori wenka? Gambira Yehova ebikuri aha mutima byona nk’oku Eliya yakikozire. (Shoma omuri Zaburi ya 62:8.) Mugambire ebizibu byawe n’oku biri kutuma wayehurira. Guma ogambire Yehova akukwase kwehanganira enyehuirira zawe. Ecokureberaho: Wahurira ori wenka kandi oyine obwoba bw’okuburira ah’ishomero, guma oshabe Yehova akuhe obumanzi bw’okweshoborora ge. Nobasa n’okumushaba obwenge bw’okushoborora enyikiriza zawe omu magezi. (Luk 21:14, 15) Waba ori kurwana n’enyehurira mbi, guma oshabe Yehova kugira ngu akuhe obumanzi bw’okukiganiraho n’Omukristo okuzire omu by’omwika. Nobasa kushaba Yehova ngu akwase owu orabigambire ayije kukuhurikiza. Wagambira Yehova ebikuri aha mutima byona, okareba oku ari kugarukamu eshara zawe kandi okikiriza obuyambi bw’abandi, torije kuhurira ori wenka.

7. Ni enki eki wayegera aha cokureberaho ca Mauricio?

⁷ Twena Yehova akatuha omurimo murungi g’okukora. Nobasa kwesiga ku ari kureba byona ebi ori kukora omu kibina n’omu murimo g’okuburira kandi ku nabyesiimira. (Zab 110:3) Ni bata oku kuhugira omuri ogu murimo kiri kukukwasa waba ori kuhurira ori wenka? Reba ecokureberaho ca mwenetata ocari muto ori kwetwa Mauricio. b Bwanyima y’obwire buce Mauricio abatizibwe, omwe omuri banywani beye ba hihi akacweka antege yatandika kuruga omu mazima mporampora. Mauricio akagamba ati: “Ku narebire yaruga omu mazima, nanye nkahurira nacweka entege. Nkaba ninyebuza yaba nanye nabire ndije kugumizamu kuhikiriza eki nabire ndaganisize Yehova ndi kumweha, nkaguma omu muryango gweye. Nkahurira ndi nyenka, kandi natecereza ku hatine ori kubasa kucenga enyehurira zange.” Ni enki ecakwasize Mauricio? Akagamba ati: “Nkongera aha murimo gwange g’okuburira. Eco kikankwasa kutetecerezaho n’okuguma ndi kutecereza aha nyehurira mbi zange. Nkatunga okushemererwa kandi tinashuba kuhurira ndi nyenka obu nabire ndi n’abandi omu murimo g’okuburira.” N’obu twakuba tutabasize kuburira  n’abandi turi hamwe, nitubasa kuburira na bo turi kukoresa amabaruha n’esimu. Ni enki ekindi ecakwasize Mauricio? Akongeraho ati: “Nambwenu nkaguma mpugiire omu mirimo y’ekibina. Ninta omutima aha kutegurira ebiganiro n’okubitanga. Eyo mirimo ekatuma nahurira Yehova n’abandi bari kundeba nk’ow’omugasho.”

8. Ebigezo ebi turi kubugana nibituma twayehurira tuta?

⁸ Nituba twetegwire kubugana ebigezo omuri obu bwire bw’aha muheru. (2 Tim 3:1) Konka, nitutangara ebizibu ebi turi kubugana ku biri kututungura. Nitubasa kubugana embera mbi z’eby’akasente, turwara endwara mbi, ninga shi tufisa omuntu owu turi kukunda. Omuri obwo bwire nitubasa kuhurira tucwekire entege ninga shi twehebire, namunonga twabugana ebigezo ebikuratine, ninga shi byona bikatugwera omurundi gumwe. Konka yijuka ku Yehova ari kuturinda kandi ahabw’obuyambi bweye nitwija kuraba omu bigeze byona.

9. Gamba bimwe omu bigezo ebi Yobu yabugine.

⁹ Tecereza oku Yehova yakwasize omushija w’omwesigwa Yobu. Yobu akabugana ebigezo ebikuratine omu bwire buce. Ah’izoba rimwe, akagambirwa ku amatungo geye gona gayibwa kandi ku agandi gayitwa, nambwenu yagambirwa ku abahereza beye n’abana beye abu yabire ari kukunda bafa. (Yob 1:13-19) Omu bwire obu Yobu yabire ari kucura, akarwara endwara mbi kandi eri kumushasha. (Yob 2:7) Embera ezi yabire arimu zikaba ziri mbi, rero yagamba ati: “Amagara gange ngatamirwe; Tincayenda kugumaho.”​—Yob 7:16.

10. Ni bata oku Yehova yakwasize Yobu kwehanganira ebigezo? (Reba ekishushani c’aha kishembeso.)

¹⁰ Yehova akaba ari kurinda Yobu. Ahakuba Yehova yabire ari kukunda Yobu, akamuha byona ebi yabire acenire kugira ngu abase kusingura ebigezo. Yehova akagamba na Yobu ari kumwijusa obwenge bweye obutine bugarukiro na rukundo eyi ari kukunda ebyahangirwe byeye. Akagamba aha nyamishwa nyingi eziri kutangaza. (Yob 38:1, 2; 39:9, 13, 19, 27; 40:15; 41:1, 2) Nambwenu Yehova akakoresa omushija muto ori kwetwa Elihu kugira ngu agaruremu Yobu amani. Elihu akahamiza Yobu ku burijo Yehova ari kuhemba abahereza beye ahabw’okwehangana kwabo. Konka nambwenu, Yehova akatuma Elihu yaha Yobu obuhabuzi oburimu rukundo. Elihu akakwasa Yobu kwetekatekaho munonga ari kumwijusya ku ebyahangirwe bya Yehova biri bice munonga obigeranisize na Yehova. (Yob 37:14) Nambwenu Yehova akaha Yobu omurimo, ni okugamba okushabira banywani beye bashatu ababire bacumwire. (Yob 42:8-10) Ni bata oku Yehova ari kutukwasa omuri obu bwire twaba turi kubugana ebigezo bigumire?

11. Ni bata oku Bibuli eri kutuhumuriza twaba turi kuraba omu bigezo?

¹¹ Yehova tari kugamba n’itwe butunu nk’oku yabire ari kugamba na Yobu, konka nagamba n’itwe birabire aha Kigambo ceye, Bibuli. (Rom 15:4) Natugumya ari kutuha amasiko. Reba bimwe omu bi Bibuli eri kugamba ebiri kubasa kutugumya twaba turi kuraba omu bigezo. Omu Byahandikirwe, Yehova natuhamiza ku hatine ekintu na kimwe ekiri kubasa “kututanisa n’okukunda [kweye].” (Rom 8:38, 39) Nambwenu natuhamiza ku ari “hihi na bona abari kumutakira” omu kushaba. (Zab 145:18) Yehova natugambira ngu twamwesiga, nitwija kwehanganira ebigezo kandi tutunge okushemererwa n’obu twakuba turi kubonabona. (1 Kor 10:13; Yak 1:2, 12) Nambwenu Ekigambo ca Ruhanga nikitwijusa ku ebigezo ebi turi  kubugana biri eby’akire kace obigeranisize n’ekihembo c’amagara agatahwaho eki arije kutuha. (2 Kor 4:16-18) Yehova naturaganisa ku arije kwihaho obukomoko bw’ebizibu byitu byona, ari we Sitane Omuregi na bona abari kutoreza emihanda yeye mibi. (Zab 37:10) Mbehi wayijuka ebindi ebi Bibuli eri kugamba ebiri kubasa kukukwasa kwehanganira ebigezo ebi orije kubugana omu biro by’omu misho?

12. Ni enki eki Yehova ari kwenda ngu tukore twaba turi kwenda ngu Ekigambo ceye kitugasire omu bwijwire?

¹² Yehova nayenda ngu tugume tukwate obwire bw’okweyegesa Bibuli burijo n’okutekateka aha bi twashoma. Twata ebi turi kwega omu bikorwa, okwikiriza kwitu nikukizaho kuhama kandi tukizeho kuhika hihi ya Tata witu ow’omu iguru. Eco nikituha amani g’okwehanganira ebigezo. Nambwenu Yehova naha omwika gweye oguri kwera abari kwesiga Ekigambo ceye. Kandi ogo mwika gweye nigubasa kutuha “amani agari kukirira kimwe” kugira ngu gatukwase kwehanganira buri kigezo cona eki twakubugana.​—2 Kor 4:7-10.

13. Ni bata oku ebyokurya by’omwika ebi “omwambari w’omwesigwa kandi ow’omunyabwenge” ari kutegura biri kutukwasa kwehanganira ebigezo?

¹³ Ahabw’obuyambi bwa Yehova, “omwambari w’omwesigwa kandi w’omunyabwenge” akatuha ebicweka byingi, za vidiyo, n’emiziki ebiri kubasa kutukwasa kugumya okwikiriza kwitu n’okuguma turi misho omu by’omwika. (Mat 24:45) Tushemerire kukoresa ge ebyo bintu ebi turi kuhebwa omu bwire obuhikire. Omunyanyazi w’omuri Amerika juba aha akereka ku nasiima ahabw’ebyo byokurya by’omwika. Akagamba ati: “Omu myaka 40 yona eyi namara ndi kukorera Yehova, nkabugana ebizibu ebiri kugeza obwesigwa bwange.” Akabugana ebigezo ebikuratine; ishenkuru akitwa na butandu n’omuduriva owabire ari kuvuga asinzire, abazire beye bona bayitwa n’endwara mbi kandi na we akarwara kansa emirundi ibiri. Ni enki ecamukwasize kwehangana? Akashoborora ati: “Yehova akaguma ari kumfaho. Ebyokurya by’omwika ebi yagumire ari kumpa birabire aha mwambari w’omwesigwa kandi ow’omunyabwenge bikankwasa kwehangana. Bikatuma nayehurira nk’oku Yobu yayehurire obu yagambire ati: ‘Kuhisya obu ndifa, tindireka kuguma ndi omwesigwa!’”​—Yob 27:5.

14. Ni bata oku Yehova ari kukoresa Abakristo bagenzi bitu kugira ngu batukwase kwehanganira ebigezo ebi turi kurabamu? (1 Abatesalonika 4:9)

¹⁴ Yehova akatumanyiza kukundana n’okuhumurizana omu bwire bw’ebigezo. (2 Kor 1:3, 4; shoma omu 1 Batesalonika 4:9.) Benetata  na banyanyazi nibatoreza Elihu bari kutukwasa kuguma turi abesigwa twabugana ebigezo. (Byak 14:22) Ecokureberaho: Reba oku ekibina ca Diane camuhumurize kandi kikamukwasa kuguma ahamire omu by’omwika omu bwire obu omushija weye yabire arwire munonga. Akagamba ati: “Bikaba bingumire. Konka nkerebera omukono gwa Yehova na rukundo yeye omuri obwo bwire bugumire. Ekibina kitu kikaba cetegwire kutukwasa. Bakatutayayira, batuterera amasimu, kandi batuhobera, rero catukwasa kwehangana. Ahakuba ntari kubasa kuvuga, benetata na banyanyazi bakaguma bari kututwara omu nterana n’omu murimo g’okuburira ku nabire ndi kubasa.” Mazima ni omugisha kuba turi omu ka ya benetata na banyanyazi omu nsi yona erimu abantu abari kukundana!

15. Ahabw’enki turi kwesiga tutari kubanganisa ku turije kwehanganira ebigezo?

¹⁵ Twena nitwija kubugana ebigezo ebitari bimwe. Konka, nk’oku twabyega, titurije kusingura ebyo bigezo aha bwitu. Yehova ari nk’omuzire oyine rukundo, nayija kuguma ari kuturinda. Naba aturi aha rubaju, ayetegwire kuhurira eshara zitu. (Isa 43:2) Nitwesiga tutari kubanganisa ku turije kwehanganira ebigezo ahakuba akatuha byona ebi turi kwetenga ngu bitukwase kwehangana. Akatuha omugisha g’okushaba, Bibuli, ebyokurya by’omwika byingi n’omuryango gwa benetata abari kukundana kandi abari kutukwasa omu bwire bw’ebigezo.

16. Ni enki eki turi kubasa kukora kugira ngu Yehova agume ari kuturinda?

¹⁶ Mazima ni omugisha gw’amani kuba twine Tata ow’omu iguru ori kuturinda! “Emitima yitu nemushemerererwa.” (Zab 33:21) Nitubasa kwereka Yehova ku nitumusiima ahabw’okutufaho turi kukoresa ebintu byona ebi yatuhire ngu bitukwase kwehangana. Nambwenu tushemerire kukora ogwitu kugira ngu Ruhanga agume ari kuturinda. Omu bindi bigambo, twagumizamu kukora cona eki turi kubasa ngu tworobere Yehova kandi tukore ebiri kumushemeza, nayija kuguma ari kuturinda ebiro byona!—1 Pet 3:12.