EKICWEKA C’OKWEGA 40
Bingi baryahindurwa babe abahikirire
“Abarihindura bingi bakabareta omu kuhikirira baryayaka nk’enyonyozi okuhisya ryari na ryari.”—DAN 12:3.
ECESHONGORO CA 151 Naija Kweta
EMPINYE *
1. Ni biha bintu ebiri kushemeza ebiribaho aha muheru gw’emyaka rukumi?
KU NIBWIJA kuba buri obwire oburi kushemeza obu okuzoka kuritandika omu nsi omu bwire bw’emyaka rukumi Kristo ari kutegeka! Bona abaferirwe abantu babo abu bari kukunda nibija kugaruka babarebe. Oko ni ko Yehova na we ari kwehurira. (Yob 14:15) Tecereza oku abantu barije kuba bashemerirwe ku barije kuba bari kubugana abakundwa babo abafire. Nk’oku twabyegire omu kicweka ecahwire, “abahikirire” abu amazina gabo gahandikire omu kitabo c’amagara nibija “kuzocera amagara.” (Byak 24:15; Yoh 5:29) Abantu bingi abu turi kukunda na bo nibabasa kwija kuba omu barazoke. * Nambwenu, “abatahikirire,” ni okugamba abafire batakatungire omugisha g’okumanya ebiri kukwata ahari Yehova n’okumuhereza omu bwesigwa, bo nibija “kuzocera okucwerwa orubanja.”
2-3. (a) Nk’oku biri kugambwa omuri Isaya 11:9, 10, ni guha murimo ogurije kukorwa ogutakabagaho? (b) Ni enki eki twaza kushwijuma omuri eki kicweka?
2 Bona abarizoka nibija kuba baceniire kwegesibwa. (Isa 26:9; 61:11) Obwe rero, nihija kubaho entebekanisa y’okwegesa etakabagaho kwiha ensi yabaho. (Shoma omuri Isaya 11:9, 10.) Ahabw’enki? Ni ahabw’okuba abatahikirire abarizoka nibija kuba baceniire kwega ebiri kukwata ahari Yesu Kristo, entebekanisa y’Obukama, ekitambo, n’aha nshonga nkuru eri kukwata ah’izina rya Yehova n’aha butegeki bweye. N’abahikirire nibija kwega oku Yehova yagenzire ari kwegesa abahereza beye ebikwatirine n’ekigendererwa eki ayinire ensi. Bamwe omu bahereza ba Yehova bakafa Bibuli yona etakahandikirwe. Obwe rero, abahikirire n’abatahikirire bona nibija kuba bine byingi by’okwega.
3 Omuri eki kicweka, twaza kushwijuma ebi bibuzo: Omurimo g’okwegesa nigwija kuba guri kutwariramu enki? Oku abantu barije kwakira ebi bariyega nibyija kukwata bita aha ku amazina gabo garije kuhandikwa omu kitabo c’amagara? Ebyokugarukamu by’ebyo bibuzo nibitukwataho n’omuri obu bwire. Nk’oku twaza kukireba, obuhanuzi bumwe oburi kushemeza oburi omu kitabo ca Daniyeli n’omu Kushururwa bwaza kutukwasa kumanya ebirije kubaho obu abafire barije kuzoka. Reka tubanze tushwijume ebintu ebiri kushemeza ebyagambirwe omu buhanuzi bw’omuri Daniyeli 12:1, 2.
“ABAGWEJEGERIRE OMU MUCUCU NIBIJA KUSISIMUKA”
4-5. Omuri Daniyeli 12:1 nihagamba ki aha bwire bw’aha muheru?
4 Shoma omuri Daniyeli 12:1. Ekitabo ca Daniyeli nikigamba aha ku ebintu birungi birigenda biri kukuratana omu bwire bw’aha muheru. Ecokureberaho: Omuri Daniyeli 12:1 nihagamba ku Mikayeli ari we Yesu Kristo, arije “kwimuka arwanirire abahereza ba [Ruhanga].” Ekicweka kimwe c’obwo buhanuzi kikatandika kuhikirira omu mwaka gwa 1914, obu Yesu yayemekirwe ngu abe Omugabe w’Obukama bwa Ruhanga.
5 Konka, Daniyeli akagambirwa ku Yesu yabire arije “kwimuka” omu “bwire bw’obusaasi obutakabagaho okwiha obu ihanga ryabaho okuhisya hati.” Obwo “bwire bw’obusaasi” ni “okubonabona kwingi” okuri kugambwa omuri Matayo 24:21. Yesu nayija kwimuka, ninga shi agire eki yakora kugira ngu arwanirire abahereza ba Ruhanga aha muheru g’obwo bwire bw’obusaasi,’ ni okugamba ahari Haramagedoni. Ekitabo c’Okushururwa nikibagambaho nk’“omutwe muhango gw’abantu abarugire omu kubonabona kwingi.”—Kush 7:9, 14.
6. Ni enki ekiribaho bwanyima y’omutwe muhango gwabantu kurokoka okubonabona kwingi? Shoborora. (Nambwenu reba “Ebibuzo by’abashomi” ebiri kugamba aha kuzoka kutura omu nsi.)
6 Shoma omuri Daniyeli 12:2. Ni enki ekiribaho omutwe muhango gw’abantu ku gurimara kurokoka? Obwo buhanuzi tiburi kugamba aha kuzoka kw’akamanyiso, ni okugamba okugaruka busyaka kw’abahereza ba Ruhanga omu by’omwika okuri kubaho omu bwire bw’aha muheru nk’oku bibire biri omu bitabo byitu. * Omu mwanya gw’eco, ebyo bigambo nibimanyisa okuzoka kw’abafire okurije kubaho omu nsi ensya. Ahabw’enki nitugamba tusyoya? Ekigambo “omucucu” nambwenu nikigambwa omuri Yobu 17:16 kiri kumanyisa “ekituro.” Obwe rero ebiri omuri Daniyeli 12:2 nibimanyisa okuzoka kwenyine okuribaho obwire bw’aha muheru buri kuhendera n’aha muheru gwa Haramagedoni.
7. (a) Ni buha buryo obu bamwe barizocera “amagara agatahwaho”? (b) Ni bata oku oko kuzoka kuri kukira okundi kona?
7 Mbwenu shi ni enki eki ebiri omuri Daniyeli 12:2 biri kumanyisa ku hari kugamba ngu bamwe nibija kuzocera amagara agatahwaho? Nikimanyisa ku abarizoka bakamanya Yehova na Yesu kandi bakagumizamu kubamanya n’okuborobera omu bwire bw’emyaka 1000, barije kutunga amagara agatahwaho. (Yoh 17:3) Oko nikwija kuba kuri okuzoka okuri kukira kwena okwabireho omu bwire bwa kare. (Heb 11:35) Ahabw’enki? Ahabw’okuba abantu abatahikirire abazokire omu bwire bwa kare bakashuba bafa.
8. Ni bata oku bamwe barije “kuzocera okuhemuka n’okugaywa okutahwaho”?
8 Konka bona abarizoka ti ko barije kwikiriza okwegesa oku Yehova ariba atireho. Obuhanuzi bwa Daniyeli nibugamba ku bamwe babire barije kuzocera “okuhemuka n’okugaywa okutarihwaho.” Ahabw’okuba barije kwereka okugoma, amazina gabo tigarije kuhandikwa omu kitabo c’amagara kandi tibarije kutunga amagara agatahwaho. Omu mwanya gw’eco, nibija kucwecerezibwa. Obwe rero ebiri omuri Daniyeli 12:2 nibigamba ebirije kuhika aha barizoka bona ahabw’ebibarikora bwanyima y’okuzoka. * (Kush 20:12) Abamwe nibija kutunga amagara agatahwaho, abandi bagabure.
BINGI BARYAHINDURWA BABE ABAHIKIRIRE
9-10. Ni enki ekindi ekirije kubaho bwanyima y’okubonabona kwingi, kandi shi ni baha abarije “kwaka nk’omushana oguri kwakira omu mwanya”?
9 Shoma omuri Daniyeli 12:3. Ni enki ekindi ekiribaho omu “bwire bw’obusaasi”? Okongera aha biri omuri Daniyeli 12:2, orunyiriri rwa 3 nirugamba aha kintu ekirije kubaho bwanyima y’okubonabona kwingi.
10 Ni baha “abaryayaka nk’omushana oguri kwakira omu mwanya”? ebigambo bya Yesu ebiri omuri Matayo 13:43 nibitukwasa kubamanya. Nibigira ngu: “Obwo abahikirire baryayagayaga nk’izoba omu Bukama bw’Ishe.” Omu bigambo ebyetworwire eki cahandikirwe,Yesu akaba ari kugamba aha “bana b’Obukama,” ni okugamba benetata abashukirweho omwika, abarije kutegeka na we omu Bukama bw’omu iguru. (Mat 13:38) Obwe rero ebiri omuri Daniyeli 12:3 nibigamba aha bashukirweho omwika n’emirimo eyi barije kukora omu bwire bw’obutegeki bw’emyaka rukumi.
Abantu 144,000 nibija kukora na Yesu Kristo omu kwebembera omurimo g’okwegesa ogurije kubaho omu bwire bw’emyaka 1,000 (Reba paragurafu ya 11)
11-12. Ni guha murimo ogu abantu 144,000 barije kukora omu bwire bw’emyaka 1,000?
11 Ni bata oku abashukirweho omwika barije kuhindura abantu bingi bakaba “abahikirire”? Abashukirweho omwika nibija kwekwatanisa na Yesu Kristo omu kutaho entebekanisa y’okwegesa erije kukorwa omu nsi omu myaka 1,000. Abantu 144,000 tibarije kutegeka kusha, ahobwe nibija kukora nk’abatambi. (Kush 1:6; 5:10; 20:6) Obwe rero, nibija kutambira amahanga, ni okugamba ku barije kuhisya abantu aha kuhikirira mporampora. (Kush 22:1, 2; Ezk 47:12) Eco ku nikija kushemeza abashukirweho omwika!
12 Ni baha omuri “bingi” abarije kuhika aha kuhikirira? Omuri abo harimu abarije kuzoka, abarije kuhonoka Haramagedoni n’abana abarizarirwa omu nsi ensya. Aha muheru gw’emyaka 1,000, abarije kuba bari omu nsi bona nibija kuba babire abahikirire. Mbwenu shi ni ryari obu amazina gabo garihandikwa omu kitabo c’amagara ebiro byona?
EKIGEZO C’AHA MUHERU
13-14. Ni enki eki abantu abahikirire bona barije kubanza bayereka mbere y’okutunga amagara agatahwaho?
13 Tushemerire kwijuka ku omuntu kuba ohikirire kitari kumanyisa ku arije kutunga amagara agatahwaho ahonaho. Tecereza ahari Adamu na Eva. Bakaba bahikirire, konka bakaba bashemerire kwereka ku niborobera Yehova Ruhanga mbere y’okutunga amagara agatahwaho. Ekiri kushasha ni oku baremirwe kumworobera.—Rom 5:12.
14 Embera nizija kuba ziri zita aha barije kuba bari omu nsi aha muheru gw’emyaka 1,000? Bona nibija kuba babire abahikirire. Konka shi abo bantu bona abariba bahikirire nibija korobera ebiragiro bya Yehova omu bwijwire ebiro byona? Ninga nibija kuba nka Adamu na Eva ababire bahikirire, konka batagumizemu kuba abesigwa? Ebyo bibuzo biceniire ebyokugarukamu.
15-16. (a) Ni ryari obu abantu bona baritunga omugisha g’okwereka ku bahamire ahari Yehova? (b) Ni enki ekiribaho bwanyima y’ekigezo c’aha muheru?
15 Sitane nayija kusibwa amare 1,000. Omuri obwo bwire, nayija kuba atacahabisa abantu. Konka, aha muheru gwemyaka 1,000, Sitane nayija kukomororwa. Nayija kugezaho kuhabisa abantu abahikirire. Omuri eco kigezo, abantu bona abahikirire abariba bari omu nsi nibija kwereka yaba barahe izina rya Ruhanga ekitinisa n’obutegeki bweye. (Kush 20:7-10) Ebi barije kukora omuri obwo bwire bw’okugezibwa na Sitane nibyija kwereka ku amazina gabo gashemerire kuhandikwa omu kitabo c’amagara ebiro byona.
16 Omubaro gwabantu abatari kumanywa nibija kuba nka Adamu na Eva, bange obutegeki bwa Yehova. Ni enki ekirije kubahikaho? Omu Kushururwa 20:15 nihatugambira hati: “Kandi omuntu wena owu izina ryeye ryabire ritahandikirwe omu kitabo c’amagara, yanagwa omu nyanja y’omuriro.” Mazima, abo bagomi nibija kucwecerezibwa kimwe. Konka abantu bingi abahikirire nibija kuraba omuri eco kigezo c’aha muheru. Amazina gabo go nigija kuhandikwa omu kitabo c’amagara ebiro byona.
AHA BWIRE “BW’AHA MUHERU”
17. Ni enki eki marayika yagambire Daniyeli ecabire nikija kubaho omu bwire obu turimu? (Daniyeli 12:4, 8-10)
17 Ku nikishemeza munonga kutecereza ahari ebyo bintu ebirije kubaho omu biro by’omu misho! Konka, marayika akagambira Daniyeli ebintu by’omugasho ebiri kukwata ahari obu bwire obu turimu, “obwire bw’aha muheru.” (Shoma omuri Daniyeli 12:4, 8-10; 2 Tim 3:1-5) Marayika akagambira Daniyeli ati: “Okumanya kuryayeyongera.” Mazima, abahereza ba Ruhanga bakaba barije kushoborocerwa obuhanuzi bw’omu kitabo ceye omu bwijwire. Marayika akongera yamugambira ku omuri obu bwire “ababi [babire] nibija kweyongera kuba babi kandi ku hatine n’omwe omuri abo babi [owabire] arije kubyetegereza.”
18. Ni enki ekirije kuhika aha babi juba aha?
18 Omuri obu bwire, nikirebeka ababi tibari kuhanwa ahabw’ebibi ebi bari kukora. (Mal 3:14, 15) Konka juba aha, Yesu nayija kucwera orubanja ababi abari kugeranisibwa n’embuzi abatanise n’abarungi abari kugeranisibwa n’entama. (Mat 25:31-33) Ababi tibarirokoka okubonabona kwingi ninga shi ngu batahe omu nsi ensya. Amazina gabo tigarije kuhandikwa omu “kitabo c’ekijusyo ebiri kwijusya” nk’oku biri kugambwa omuri Malaki 3:16.
19. Ni enki eki tushemerire kukora hati, kandi ahabw’enki? (Malaki 3:16-18)
19 Hati ni bwo bwire bw’okwereka omu mitwarize ku tutari omu bantu babi. (Shoma omuri Malaki 3:16-18.) Yehova ariyo narundana abantu abu ari kureba nk’“abantu beye,” ninga itungo ryeye eritorinwe.
Ku nikija kuba kiri kushemeza kureba Daniyeli, abakundwa bitu n’abandi bingi bari kuzocera omu nsi ensya! (Reba paragurafu ya 20)
20. Ni kuha kuraganisa kw’aha muheru oku Yehova yaraganisize Daniyeli, kandi shi ahabw’enki otegerize n’ekihika okuhikirira kwako?
20 Mazima, tutwire omu bwire oburi kushemeza. Konka juba aha hari hihi kubaho ebintu ebiri kutangaza. Juba aha nitwija kureba ababi bari kucwerezibwa. Bwanyima nitwija kureba ekiraganiso kiri kuhikirira eki Yehova yagambire Daniyeli ari kugira ati: “Oryayemerera aha mwanya ogwakuterirweho aha muheru gw’ebyo biro.” (Dan 12:13) Mbehi otegerize obwire obu Daniyeli n’abakundwa bawe bafire barije kuzoka? Caba ari ko kiri, kora cona eki ori kubasa kugira ngu ogume ori omwesigwa ahari Yehova hati, kandi noyija kwesiga otari kubanganisa ku izina ryawe ririje kuguma omu kitabo c’amagara.
ECESHONGORO CA 80 “Roza Oreebe Yehova ku Ari Murungi”
^ Eki kicweka nikituha empinduka ezibire omu ku tubire tushoborokirwe aha bikwatirine n’omurimo muhango g’okwegesa oguri kugambwa omuri Daniyeli 12:2, 3. Twaza kureba ekirije kubaho omuri ogo murimo n’abarije kugwekwatanisamu. Nambwenu twaza kureba oku ogo murimo gurije kutegurira abariba bari omu nsi ekigezo ca bwanyima aha muheru gw’emyaka rukumi Kristo ari kutegeka.
^ Okuzoka nikubasa kwija kutandika n’abo abafire bari abesigwa omu biro by’aha muheru, rero hakurateho ababatangire kufa. Ku kirabe kisyoya, ababireho omu bwire bumwe nibija kutunga omugisha g’okwakira abafire bari kubamanya. Oku biragende kona, Ebyahandikirwe nibigamba ku abari kuzoka kuza omu iguru bari kuba batebekanisibwe ge, kandi nitwesiga ku ari ko biriba n’aha kuzocera kutura omu nsi.—1 Kor 14:33; 15:23.
^ Egi nyegesa nsya nehindura ebiri omu kicweka ca 17 c’ekitabo Yetondere obuhanuzi bwa Daniyeli!, n’omu Munara g’Omurinzi gw’aha kiro ca 1 Okwamushanju, 1987, pp. 21-25.
^ Ekiri kutana n’ebyo, ebigambo “abahikirire” n’“abatahikirire” ebiri omu Byakozirwe 24:15 n’ebigambo “abakozire ge” n’”abakozire kubi” ebiri omuri Yohana 5:29, nibigamba aha bi abarizoka bakozire batakafire.
