Omu ntandikiro y’omwaka gwa 1940, abazire bange bakatandika kwega n’Abahamya ba Yehova. Tibaragumizemu kwega, konka mama we akagumizamu kutunga Omunara g’Omurinzi na Musisimuke! Omu mwaka gwa 1950, hakabaho ekiterane kihango omu tawuni ya New York City, kandi ab’eka yange bakikiriza kuza omuri eco kiterane.

Bwanyima, mwenetata Lawrence Jeffries akatandika kututayayira. Akagezaho ngu ankwase kwega amazima. Omu kubanza, nkaba ntari kwikirizana na we aha ku Abahamya ba Yehova batari kwejwanga omu by’obutegeki n’okuza omu mahe. Nkaba nimugambira ngu, haba hatagizire omuntu n’omwe w’omuri Amerika owaza omu rutaro, abangi bitu nibabasa kukwata ihanga ryitu. Mwenetata  Jeffries akaguma ari kunyehanganira, rero yambuza ngu: “Notekateka ngu abantu bona b’omuri Amerika babire abahereza Ruhanga, rero abangi bakija kubatahirira, akakora ki?” Eki yangambire n’ebindi ebi yangambire bikankwasa kureba ku nabire ntahikire. Kikatuma nayenda kwega amazima g’omuri Bibuli.

Nkaba nimara amashaha mingi ndi kushoma Omunara g’Omurinzi na Musisimuke! ebya kare ebi mama yabire abikire. Bwanyima, nkija kushanga ebi nabire ndi kwega gari amazima, rero nayikiriza ngu mwenetata Jeffries anyegese Bibuli. Nambwenu nkatandika kwekwatanisa omu nterane kosha. Nkakunda ebi nabire ninyega kandi naba omuburizi w’obutumwa burungi. Entego yange ekahinduka ku namanyire ngu “ekiro ca Yehova kiri hihi.” (Zef 1:14) Omu mwanya g’okwega yunivasiti, nkaba ndi kwenda kwegesa abandi amazima g’omuri Bibuli.

Nkamara kwega omuri siniya aha kiro ca 13 Okwamukaga 1956, kandi omu biro bishatu ebyakuratireho, nkabatizibwa omu kiterane c’akacweka. Nkaba ntari kumanya ku nabire ndije kutunga emigisha  myingi ahabw’okweha Yehova, nkega ebiri kumukwataho kandi nkabyegesa abandi.

Bwanyima y’amezi mukaga mbatizibwe, nkaba omupayoniya w’obwire bwona. Akatabo k’Omurimo g’Obukama k’omukw’Ikuminabiri 1956, kakijamu ekicweka ekiri kugira ngu: “Mbehi nobasa kukorera ahari kwetenga obuyambi?” Mazima nkaba ndi kubyenda. Nkaba ndi kwenda kukwasa ahari kwetenga ababurizi b’obutumwa burungi.​—Mat 24:14.

Nkafurukira omuri Edgefield, omuri South Carolina. Ekibina ecabire kiriyo kikaba kirimu ababurizi bana kusha. Obwe rero ku nahikireyo tukaba ababurizi batano. Enterane tukaba nituzikorera omu kishenge c’omu nju ya mwenetata. Buri kwezi nkaba nimara amashaha 100 ndi kuburira. Nkaba mpugire omu kwebembera omurimo g’okuburira n’okutanga za toku omu nterane. Ekiri kushemeza, oku nabire ninkizaho kukora byingi omu kibina, ni ko nabire ndi kwega byingi ebiri kukwata ahari Yehova.

Omukazi omwe owu nabire ndi kwegesa Bibuli akaba ayine omwanya g’okukoreramu emigenzo y’okuzika omuri Johnston, etawuni eyabire eri hihi n’ahu nabire ntwire. Akampa omurimo g’okukora obwire buce ndi kutaha, kandi yatuha n’akaju kace k’okukoreramu enterane.

Mwenetata Jolly Jeffries, mutabani wa mwenetata owanyegesize Bibuli, akafurukira omuri Brooklyn, New York, rero twakorera hamwe obupayoniya. Tukaba nitutura omu kimotoka eki mwenetata yatutirize.

Omuri Amerika y’amashuma omushara gukaba guri muce munonga. Tukaba nitutunga dola ibiri ninga ishatu twakora izoba ryona. Izoba rimwe, nkaba namara kukoresa esente zona ezi nabire nsigize ndi kugura ebyokurya. Ku nashohwire, omushija akampika hihi, yambuza ngu: “Noyenda omurimo? Ninyija kukuha dola emwe buri shaha eyi orakore.” Akampa ebiro bishatu by’okukora ndi kuboneza omwanya ogu babire bari kombekamu. Mazima Yehova ni we owabire ari kunkwasa kutura omuri Edgefield. N’obu nabire ntine esente eziri kumara, nkabasa kuza omu kiterane kihango ecaberire omu tawuni ya New York City omu mwaka gwa 1958.

Ah’izoba rya kabiri ry’ekiterane hakabaho ekintu c’omutano. Nkabugana Ruby Wadlington, owabire ari omupayoniya w’obwire bwona omuri Gallatin, Tennessee. Ahakuba twena twabire turi kwenda kuba abamishonari, tukaza omu nama ya Gileyadi eyaberire aha kiterane. Tukatandika kuhandikirana obutumwa. Bwanyima nkatumirwa omuri Gallatin ngu nze kutanga toku y’abantu bona. Nkakoresa ogo mugisha kugira ngu nshabe ogo munyanyazi ngu ayije kumbera omukazi. Nkafurukira omu kibina ca ba Ruby, kandi twatasana omu mwaka gwa 1959.

Obu nabire nyine emyaka 23, nkaba omuhereza w’ekibina (erizoba ni omubuganisa w’akakiko k’abazehe) omuri Gallatin. Charles Thompson ni bwo yabire yaba omureberezi ori kutayayira ebibina obu yatayayire ekibina kitu. Akaba ayine ebintu byingi ebi ari kumanya, konka akaba nambuza eki ndi  kutekateka aha bi benetata baceniire, n’oku abandi bareberezi babire nibafa aha kibina. Nkamwegeraho ku kiri kirungi kubuza kandi nkamanya ebihamya byona mbere y’okukora ensharamu.

Omu Kwakatano 1964, nketwa kuza kwega Ishomero ry’ababurizi b’Obukama ry’okwezi kumwe eryaberire omuri South Lansing, New York. Benetata ababire bari kwegesa bakatuma nagira ecetengo c’okwega byingi n’okukura omu by’omwika.

Nyowe na Ruby tukatunga obutumwa oburi kutugambira ngu tutandike omurimo g’okutayayira ebibina omu Kokubanza 1965. Akacweka aku twagiremu aha murundi g’okubanza kakaba karimu ebicweka byingi, okuruga Knoxville, Tennessee, kari hihi kuhika omuri Richmond, Virginia. Kakaba karimu ebibina by’omuri North Carolina, Kentucky, na West Virginia. Nkaba ninkorera omu bibina by’abiraguju ahakuba omuri obwo bwire omuri Amerika y’amashuma hakaba harimu okushorora, rero abiraguju bakaba batari kubasa kubugana n’abajungu. Benetata bakaba bari abacene, obwe rero tukega kugaba aha bi twabire twine. Mwenetata owabire amazire obwire bwingi ari omureberezi ori kutayayira ebibina akanyegesa ishomo ry’omugasho ari kungira ngu: “Ba mwenetata. Otariza omu kibina ori kwetwara nk’omukama. Noyija kukwasa ab’omu kibina ku barakurebe nka mwenetata.”

Obu twabire tutayayire ekibina kice kimwe, Ruby akatandika kwega n’omukazi owabire ayine omuhara w’omwaka gumwe. Ruby akaba namwegesa ari kusindika obutumwa bwa imeyili ahakuba omu kibina habaka hatine omuntu n’omwe owabire ari kubasa kumwegesa. Ku twagarukireyo kutayayira ogo mukazi, akatandika kwija omu nterane atari kosha. Abapayoniya b’abanyanyazi ku bamutayayire, bakagumizamu kumwegesa Bibuli. Bwanyima y’emyaka nka 30 omu mwaka gwa 1995, tukaba turi ahari Beteli y’omuri Patterson, omunyanyazi muto yayeyanjurira Ruby. Akaba ari omuhara w’omukazi owu Ruby yayegesize Bibuli. Ogo muhara n’omushija weye bakaba bari abegi b’Ishomero rya 100 erya Gileyadi.

Akacweka ka kabiri aku twatayayire kakaba karimu Florida ya rwagati. Konka ahari obu bwire tukaba turi kwetenga emotoka, obwe rero tukagigura aha kasente kace. Konka omu sande y’okubanza akoma akari kusindika amizi kakaremwa kukora. Tukaba tutine esente z’okukakanikisa. Nketa mwenetata owu natekakatekire ku ari kubasa kutukwasa. Omukozi weye omwe akakanika emotoka kandi taratushebire esente. Akagamba ngu: “Tihine ekintu na kimwe eki ndi kubabanja.” Nambwenu akatuha ekiconco c’esente. Mazima eco kikaba ecokureberaho kirungi ekiri kwereka ku Yehova ari kufa aha bahereza beye. Kikatwijusa omugasho g’okuba efura.

Ku twabire nitutayayira ebibina, tukaba nitucumbika omu maka ga benetata. Kandi eco kikatuma twatunga abanywani bingi. Izoba rimwe, nkaba ndi kuhandika ripoti eri kugamba aha kibina ndi kukoresa ecoma ekiri kutayipinga, konka nasiga ntagimazire. Ku nagarukire nkashanga omwojo w’emyaka ishatu w’omu ka eyi nabire ndi kuturamu yakwasire aha mapesha g’eco coma, rero hazaho ezindi nyuguta. Nkamara emyaka myingi ndi kumunyuzura ahabw’eki yakozire.

Omu mwaka gwa 1971, nkatunga ebaruha eri kungambira ngu ntandike omurimo g’okutayayira amahanga omu tawuni ya New York City. Bikatutungura! Ku twagireyo nkaba nyine emyaka 34 yonka. Benetata bakanyakira ge nk’omureberezi wabo w’okubanza w’omwiraguju.

Ku nabire ndi omureberezi w’ihanga, nkashemerererwa kwegesa ebiri kukwata ahari Yehova buri wikendi omu kiterane c’akacweka. Abareberezi abari kutayayira ebibina bingi bakaba nibankiza obumanyi. Omwe omuri bo akaba yatangire toku y’okubatizibwa aha kubatizibwa kwange. Mwenetata ondijo ori kwetwa. Theodore Jaracz, bwanyima akaza omu Kakiko k’Abarisa. Nambwenu hakaba hariyo abandi benetata bingi abamanyirire ababire bari kukorera ahari Beteli y’omuri Brooklyn. Nkashemererwa munonga ahakuba abareberezi abari kutayayira ebibina n’Ababetelite batumire nahurira nyikikine. Nkerebera ku babire bari abarisa barungi, bine rukundo, bari kugendera aha Kigambo ca Ruhanga kandi bari kushagika ekitongore ca Yehova. Obucurezi bwabo bukatuma kukora ndi omureberezi w’ihanga canyorobera.

Omu mwaka gwa 1974 Akakiko k’Abarisa kakaha emirimo abandi bareberezi abari kutayayira ebibina ngu baze omu murimo g’okutayayira ihanga. Kandi nkashuba naba omureberezi ori kutayayira ebibina, konka ahari ogu murundi nkakorera omuri South Carolina. Ekiri kushemeza, omuri obwo bwire benetata na banyanyazi b’abiraguju n’abajungu b’omu bibina n’omu tucweka bakaba batandikire kwekwatanisa hamwe, kandi eco kikashemeza munonga benetata.

Omu mperu z’omwaka gwa 1976, nkatumwa kuza kukorera omu kacweka k’omuri Georgia, ahagati ya Atlanta na Columbus. Ninyijuka ndi kuha toku y’orufu rw’abana batano abafire bwanyima y’omuntu omwe owayokize eka yabo n’omuriro. Mama wabo akatunga obuhuta, bamutwara ah’irwariro. Benetata na banyanyazi bingi b’Abiraguju n’abajungu bakija ah’irwariro ngu bagumye abo bazire. Nkerebera ku benetata babire bari kukundana munonga. Embabazi nk’ezo nizibasa kukwasa abahereza ba Ruhanga kwehanganira embera zigumire.

Omu mwaka gwa 1977 tukashabwa kuza kukorera ahari Beteli ya Brooklyn obwire buce ngu hagire eki twayambaho. Ku twabire turi hihi kuheza, benetata babiri b’omu Kakiko k’Abarisa tukaganira rero bambuza yaba nyowe na Ruby twabire turi kubasa kukorera ahari Beteli ebiro byona. Tukahika turi kubyikiriza.

Nkamara emyaka 24 ndi kukora omu Kishenge c’omurimo ahu benetata bari kugarukamu ebibuzo bigumire. Akakiko k’Abarisa kakamara emyaka myingi kari kutuha obuhabuzi oburi kubugana n’emisinge ya Bibuli. Obwo buhabuzi bukaguma buri kukoresibwa omu kugarukamu ebibuzo, konka nambwenu bwakoresibwa omu kumanyiza abareberezi abari kutayayira ebibina, abazehe, n’abapayoniya. Eco kikatuma abantu bingi bakura omu by’omwika kandi catuma ekitongore ca Yehova catunguka.

Kwiha omu gwa 1995 kuhika omu gwa 2018, nkatayayira za ofisi nyingi ndi entumwa ya ofisi nkuru, owabire ari kwetwa omureberezi w’ihanga omu bwire bwa kare. Nkaba nimbugana na Komiti za ofisi, abari kukora ahari Beteli n’abamishonari kugira ngu mbagumye omu bizibu ebi babire bari kubugana na byo. Nambwenu ebyokureberaho ebi abo benetata babire nibatuha bikaba nibitugumya. Ecokureberaho: Tukatayayira omuri Rwanda omu 2000. Kikatukora aha mutima kuhurira oku benetata na banyanyazi n’abari kukora ahari Beteli barabire omu bwire obugumire bwa genoside y’omuri 1994. Abingi bakafisa abu babire bari kukunda. N’obu abo benetata babire bari kubugana ebyo bizibu, bakagumizamu bari kwereka okwikiriza, amasiko n’okushemererwa.

Hati turi omu myaka ya za 80. Namara emyaka 20 ndi kukora omuri Komiti ya ofisi y’omuri Amerika. Tindegire yunivasiti, konka nkatunga okwegesa okw’ah’iguru munonga oku Yehova ari kutuha akoresize ekitongore ceye. Kikatuma natunga ebiri kushabwa ngu nyegese abandi amazima g’omuri Bibuli agarije kubakwasa kubaho ebiro byona. (2 Kor 3:5; 2 Tim 2:2) Nkerebera oku obutumwa bw’omuri Bibuli buri kukwasa abantu kugira amagara marungi n’okugira obunywani burungi n’Omuhangi. (Yak 4:8) Nyowe na Ruby nitukora cona eki turi kubasa ngu tugumizemu kuhiga abandi kwereka ku nibasima ahabw’omugisha g’okwegesa abandi ebiri kukwata ahari Yehova n’okubegesa amazima g’omuri Bibuli kandi ni go omugisha oguri kukira eyindi yona ogu omuhereza wa Yehova wena ari kubasa kushemerererwa!