1. Ahabw’enki tutashemerire kutangara twareba obwesigwa butari omu nsi?

 ABANTU b’omuri egi nsi eri kutegekwa na Sitane tibari kumanya owu bashemerire kwesiga. Bakunzire kuhemukirwa n’emitwarize y’abashubuzi, bategeki, n’abebembezi b’amadini. Eco nikibasa kutuma batayesiga banywani babo, abu baturine na bo n’ab’omu maka gabo. Eco tikiri kututangaza. Bibuli ekaba yakigambire ngu: “Omu biro by’aha mperu . . . , abantu baryaba . . . abatari kwesigwa, . . . abari kubehereran, . . . abari kurebyana.” Omu bindi bigambo, abantu bakaba barije kugira emitwarize nk’eya Sitane ruhanga w’egi nsi otari kwesigwa.​—2 Tim 3:1-4; 2 Kor 4:4.

2. (a) Ni baha abu turi kubasa kwesigira kimwe? (b) Ni enki eki abamwe bari kubasa kwebuza?

² Konka itwe Abakristo nitumanya ku tushemerire kwesigira kimwe Yehova. (Yer 17:7, 8) Nitwesiga tutari kubanganisa ku natukunda kandi ku ‘atarije kusigaho’ banywani beye. (Zab 9:10) Nambwenu nitubasa kwesiga Kristo Yesu ahakuba akahayo amagara geye ahabw’itu. (1 Pet 3:18) Nambwenu nitubasa kwesiga Bibuli ahakuba tukareba ku ari kubasa kutuha obuhabuzi bw’omugasho. (2 Tim 3:16, 17) Nituhamiza kimwe ku turi kubasa kwesiga Yehova, Yesu, na Bibuli. Konka bamwe nibabasa kwebuza yaba bari kubasa kuguma bari kwesiga benetata na banyanyazi omu kibina. Caba kiri kisyoya, ahabw’enki tushemerire kubesiga?

3. Ni guha mugisha g’omutano ogu twine? (Mariko 10:29, 30)

³ Yehova akatutorana ngu tube omu muryango gweye g’omu nsi yona gw’abari kumuramya. Mazima ogo ni omugisha g’omutano kandi nigutugasira munonga! (Shoma omuri Mariko 10:29, 30.) Omu nsi yona, twine benetata na banyanyazi abari kukunda Yehova nk’itwe kandi abari kutaho amani ngu  bagendere aha misinge yeye. Orurimi rwitu, emicwe yitu n’emijwarire yitu nebasa kuba etari kushushana, konka nituhurira twabahika hihi n’obu twakubugana aha murundi g’okubanza. Namunonga nitushemerererwa kuba na bo omu kuhimbisa n’okuramya Tata witu w’omu iguru ori kutukunda.​—Zab 133:1.

4. Ahabw’enki tuceniire benetata na banyanyazi?

⁴ Tushemerire kuguma twine obumwe na benetata na banyanyazi kukira obundi bwire bwona. Obumwe nibatukwasa omu bizibu ebi twine. (Rom 15:1; Gal 6:2) Nambwenu nibatukwasa kuguma twine amani omu mirimo gwa Yehova n’okuguma tuhamire omu by’omwika. (1 Tes 5:11; Heb 10:23-25) Tecereza oku tukabire turi kwehurira tubire tutine oburinzi bw’ekibina ekiri kutukwasa kurwanisa abangi bitu, ni okugamba Sitane n’ensi yeye mbi. Juba aha Sitane n’abu ari kukoresa nibija kutahikirira abahereza ba Ruhanga. Tecereza oku kirije kuba kiri kushemeza kuba twine benetata na banyanyazi bari aha rubaju rwitu!

5. Ahabw’enki obumwe kiri kugumira bamwe kwesiga benetata na banyanyazi?

⁵ Konka, abamwe nikibagumire kwesiga benetata na banyanyazi bona ngu ni ahabw’okuba omuntu omwe yabahemukire akata amabanga gabo ninga shi akaremwa kuhikiriza eki yabaraganisize. Nambwenu omwe omu kibina nabasa kuba yamukorire ekintu ecamushashire munonga. Ebintu nk’ebyo ku biri kubaho, nikibasa kutugumire kwesiga abandi. Mbwenu shi, ni enki ekiri kubasa kutukwasa kwesiga Abakristo bagenzi bitu?

6. Ni bata oku rukundo eri kubasa kutukwasa kwesiga abandi? (1 Abakorinto 13:4-8)

⁶ Rukundo netukwasa kwesiga abandi. Omu Bakorinto y’okubanza ekicweka ca 13 nihagamba ebintu byingi ebiri kukwata ahari rukundo  ebiri kutukwasa kukizaho kwesiga abandi. (Shoma omu 1 Bakorinto 13:4-8.) Ecokureberaho: Orunyiriri rwa 4 nirugamba ku “rukundo eri kwehangana kandi ekagira embabazi.” Yehova natwehanganira twamucumuraho. Obwe rero n’itwe nitubasa kwehanganira benetata bagamba ninga bakatukorera ekintu ekiri kutugwisa kubi ninga kikatushasha. Orunyiriri rwa 5 nirwongeraho ruti: “[Rukundo] terahuka kugubwa kubi, tetecereza kibi aha muntu.” Tituri “kubikira abandi enzika,” obundi turi kwijuka ebintu bibi ebi batukorire kare. Omu Muburizi 7:9 nihatugambira ku “tutashemerire kurahuka kugira ekiniga.” Mazima nikitugasira twata omu bikorwa ebitambo ebiri omu Befeso 4:26 ahari kugira ngu: “Izoba rireke kurenga mukine ekiniga”!

7. Ni bata oku ebigambo ebiri omuri Matayo 7:1-5 biri kutukwasa kwesiga abandi?

⁷ Nambwenu nitubasa kwesiga benetata na banyanyazi twabareba nk’oku Yehova ari kubareba. Ruhanga nabakunda kandi tari kwijuka kwijuka ebicumuro ebi bamukorire. N’itwe tushemerire kumutoreza. (Zab 130:3) Omu mwanya g’okuta omutima aha nshobe zabo, tushemerire kutaho amani kugira ngu tugute aha mitwarize yabo mirungi n’aha bintu birungi ebi bari kubasa kukora. (Shoma omuri Matayo 7:1-5.) Nitwesiga ku nibaba bari kwenda kukora ebirungi ahakuba rukundo “neyemera byona.” (1 Kor 13:7) Ebi bigambo tibiri kumanyisa ngu Yehova nayenda ngu twesige abandi nk’empumi, ahobwe nayenda ngu tubesige ahakuba na bo bari abesigwa. *

8. Ni bata oku ori kubasa kwemanyiza kwesiga benetata?

⁸ Nitwenda ngu abandi batwesige konka nikitwara obwire. Nitubasa kukora ki ngu twesige benetata na banyanyazi? Guma ogezeho kubamanya ge. Guma oganire na bo mwaba muri omu nterane. Guma otebekanise kukora na bo omurimo g’okuburira. Guma obehanganire kandi obahereze oburyo bw’okwereka ku bari abesigwa. Omu kubanza, nobasa kusharamu kutagambira omuntu owu ori kwenda kumanya ebintu byona ebiri kukukwataho. Obunywani bwanyu bwayeyongera kuguma, nobasa kuhurira ori kubasa kumugambira enyehurira zawe zona. (Luk 16:10) Konka shi nobasa kukora ki ogo mwenetata ninga munyanyazi yakuhemukira akata amabanga gawe? Otarahuka kumaraho obunywani bwanyu, ahobwe oreke habanze hahwaho obwire. Kandi otayikiriza ngu ebikorwa bya mwenetata omwe bitume otashuba kwesiga abandi benetata na banyanyazi. Reka tushwijume ebyokureberaho by’abahereza ba Yehova abagumire bari kwesiga abandi n’obu abandi babahemukire.

9. (a) Ni bata oku Hana yagumire ari kwesiga entebekanisa ya Yehova n’obu ababire bemererire Yehova babire bari kukora enshobe? (b) Ebyahikire ahari Hana byakwegesa ki aha bikwatirine n’okwesiga entebekanisa za Yehova? (Reba ekishushani.)

⁹ Mbehi hine obu wahemukirwe n’emitwarize ya mwenetata oyine obujunanizibwa? Caba ari ko kiri, nobasa kugasirwa washwijuma ecokureberaho ca Hana. Obwo bwire, Omutambi mukuru Eli ni we owabire nayebembera okuramya Yehova omuri Isirayeli. Konka eka yeye ekaba etari ecokureberaho kirungi. Batabani beye ababire bari abatambi, burijo bakaba nibakora ebiri kwisa enshoni, eby’obushambani, konka ishe tihine ekintu kihango eki yabikozireho. Yehova tarahikire ari kwiha Eli aha kuba omutambi mukuru.  Konka nabwe, Hana tararekire korobera entebekanisa ya Ruhanga ari kwanga kuramiza omu ihema obu Eli yabire ari omutambi mukuru. Eli ku yarebire Hana ari kushaba ayine obusaasi, akahika ari kutekateka ngu asinzire. Omu mwanya gwa Eli kumanya ebi ogo mukazi ari kurabamu, akahika ari kumucwera orubanja. (1 Sam 1:12-16) N’obu cabire kiri kisyo, Hana akaba yaraganisize ku yazara omwana w’omwojo yabire arije kumuhayo ngu akore omu ihema ry’okubuganiramu ari kurebererwa na Eli. (1 Sam 1:11) Mbwenu shi batabani ba Eli bakaba bashemerire kuhanwa? Yego. Yehova akabahana mu bwire obuhikire. (1 Sam 4:17) Bwanyima, Ruhanga akahemba Hana ari kumuha omwana w’omwojo, Samweli.​—1 Sam 1:17-20.

10. Ni bata oku Omugabe Dawudi yagumire ari kwesiga abandi n’obu bamuhemukire?

¹⁰ Mbehi omunywani wawe wa hihi yarakuhemukire? Caba ari ko kiri, tecereza aha byahikire aha Mugabe Dawudi. Omwe omuri banywani beye akaba ari Ahisofeli. Konka mutabani wa Dawudi ori kwetwa Abusolomu ku yayenzire kwegarurira obugabe bw’ishe Dawudi, Ahisofeli akekwatanisa na we. Mazima eco nikibasa kuba cashashire munonga Dawudi kuferwa obushagiki bwa mutabani weye n’owu yabire ari kweta munywani weye! Konka Dawudi tarikirize ngu eco kitume yareka kwesiga abandi banywani beye. Akagumizamu kwesiga ondijo munywani weye w’omwesigwa ori kwetwa Hushayi owayangire kwekwatanisa n’abagomi. Dawudi akaba ahikire kumwesiga. Hushayi akereka ku ari omunywani murungi, kuhika n’aha kuta amagara geye omu kabi kugira ngu akwase Dawudi.​—2 Sam 17:1-16.

11. Ni buha buryo obu omuhereza wa Nabali yayerekire ku nayesiga abandi?

¹¹ Nambwenu reba ecokureberaho c’omwe omu bahereza ba Nabali. Dawudi n’abashija beye bakaba barinzire abahereza b’Omwisirayeli w’omugiga ori kwetwa Nabali. Bwanyima Dawudi akashaba Nabali owabire ari omugiga ngu amuhe ebyokurya we n’abashija beye byona ebi yabire ari kubasa. Nabali ku yayangire kubibaha, Dawudi akitwa ekiniga munonga, rero yasharamu kwita abashija bona b’omu ka ya Nabali. Omuhereza weye akahika ari kubigambira Abigayili omukazi wa Nabali.  Ahakuba ogo muhereza yabire ari ow’omu ka ya Nabali, akaba namanya ku Abagayili yabire ari kubasa kukiza amagara geye. Omu mwanya g’okwegendera akahunga, akesiga ku Abigayili yabire arije kutereza eco kizibu. Akaba ayine obwesige omuri ogo mukazi ahakuba akaba namanywa nk’omukazi w’omunyabwenge. Kandi ebyabireho bwanyima nibyereka ku yabire ahikire kumwesiga. Abigayili akakoresa obumanzi ari kugamba na Dawudi ngu atakora eki yabire amaririre kukora. (1 Sam 25:2-35) Akesiga Dawudi yabire arije kusharamu ekirungi.

12. Ni bata oku Yesu yayerekire ku nayesiga abegi beye n’obu babire nibakora enshobe?

¹² Yesu akaba nayesiga abegi beye n’obu babire nibakora enshobe. (Yoh 15:15, 16) Yakobo na Yohana ku bashabire Yesu ngu abate omu mwanya mukuru omu Bukama, tareburize entego ezi babire bine ninga shi ngu abihe omu ntumwa zeye. (Mar 10:35-40) Kandi omu kiro eki Yesu yakwatirwemu, abegi beye bona bakamusigaho. (Mat 26:56) Konka, Yesu tararekire kuguma ari kubesiga. Akaba namanya enshobe zabo, konka akagumizamu “kubakunda kuhisya aha muheru.” (Yoh 13:1) Yesu ku yazokire, akaha abegi beye b’abesigwa 11 omurimo g’omkugasho g’okwebembera omurimo g’okuburira n’okufa aha ntama zeye ez’omuhendo. (Mat 28:19, 20; Yoh 21:15-17) Akaba ayine enshonga y’okwesiga abo bashija ababire batahikirire. Bona bakaguma bari abesigwa okuhisya aha kufa. Mazima, Hana, Dawudi, omuhereza wa Nabali na Abigayili, na Yesu bakatuteraho ecokureberaho kirungi omu kwesiga abantu abatahikirire.

13. Ni kiha kintu ekiri kubasa kutuma catugumire kwesiga abandi?

¹³ Mbehi waresigire mwenetata okamugambira ebintu byawe by’amabanga rero okija kushanga yabigambire abandi? Mazima eco nikishashana munonga. Omunyanyazi omwe akesiga omuzehe w’ekibina yamugambira ekintu ceye c’ibanga. Ah’izoba eryakuratireho, omukazi w’ogo muzehe aketa ogo munyanyazi ari kumugaruramu amani nk’ori kumanya ebi yabire agambire omushija weye. Nikihuririnkana ku ogo munyanyazi atarashubire kwesiga ogo muzehe w’ekibina. Konka ekirungi n’oku ogo munyanyazi yashabire obuyambi. Akaganira n’ondijo muzehe w’ekibina, rero yamukwasa kushuba kwesiga abazehe.

14. Ni enki ecakwasize mwenetata omwe kongera kwesiga abandi?

¹⁴ Mwenetata omwe akamara emyaka myingi ayine obutikirizana n’abazehe babiri abu yabire atari kubasa kwesiga. Konka akatandika kutekateka aha kintu ecagambirwe na mwenetata owu yabire naha ekitinisa munonga yagambire. Ebyo bigambo bigufu konka by’omugasho, bikaba nibigira ngu: “Sitane ni we mwangi witu; ti benetata.” Ogo mwenetata akatecereza ahari ebyo bigambo, kandi yashaba rero bwanyima yagarukana n’abazehe bombi.

15. Ahabw’enki kiri kutwara obwire kugira ngu tushube twesige abandi? Gamba ecokureberaho.

¹⁵ Mbehi waraferirweho obujunanizibwa omu kibina? Mazima eco nikishashana munonga. Grete na mama weye bakaba bari Abahamya b’abesigwa omu bwire bwa Nazi omuri Jamani omu mwaka gwa 1930 obu omurimo gwitu gwabire guzibirwe. Grete akaba nayesimira omurimo gʼokucapira Abakristo bagenzi beye Omunara g’Omurinzi. Konka benetata ku bamanyire ngu ishe nahakanisa amazima, bakwamwihaho ogo murimo batinire ngu ishe akaba arije kurebya ekibina. Eco kizibu conka eki Grete yabugine. Omu rutaro rwa kabiri rw’ensi yona, benetata bakaba batari kubasa kwesiga Grete na mama weye ngu babahe Omunara g’Omurinzi  kandi bakaba nibanga n’okubaramusya babuganira omu muhanda. Mazima eco ku nikishasha. Obusaasi bukarenga Grete munonga kandi akagamba ku yamazire obwire buringwa atasaasire abo benetata n’okubesiga. Konka ku hahwireho obwire, akamanya ku Yehova yabasaasire, kandi na we ku yabire ashemerire kubasaasira. *

16. Ahabw’enki tushemerire kusingura ebizibu byona ebiri kuturemesa kwesiga abandi?

¹⁶ Ku orabe warabugine ekintu nk’eco ekiri kushasha, taho amani kugira ngu oshube oyesige benetata. Nikija kwetenga obwire, konka amani agu orateho nigija kurugamu ebirungi. Ecokureberaho: Waba wararireho ebyokurya ebirimu oburogo, nobasa kuguma ori kwegendesereza aha byokurya ebi orarye. Konka, eco tikiri kubasa kutuma wareka kurya. Ni co kimwe, titushemerire kwikiriza ngu omuntu omwe owatuhemukire atume tutashuba kwesiga benetata na banyanyazi abu turi kumanya ku bazirwe batahikirire. Twashuba kwesiga abandi, nitwija kushemererwa kandi tute omutima aha bi turi kubasa kukora kugira ngu omu kibina habemu abantu abari kwesigwa.

17. Ni guha mugasho g’okwesiga abandi, kandi shi ni enki eki turishwijuma omu kicweka ekiri kukurataho?

¹⁷ Omu nsi eri kutegekwa na Sitane tiharimu obwesigwa, konka rukundo eyi turi kukundana netuma twayesigana. Obwo bwesigwa nibutuma twatunga okushemererwa n’obumwe hati, kandi nibwija kuturinda omu bizibu ebi turije kubugana omu biro by’omu misho. Kandi shi ku hakuba hine owakuhemukire, kandi okahurira otacamwesiga? Guma orebe enshonga nk’oku Yehova arikuzireba, ote omu bikorwa emisinge y’omuri Bibuli, okizeho kukunda benetata na banyanyazi kandi ogezeho kwegera aha byokureberaho by’omuri Bibuli. Nitubasa kusingura enyehurira mbi ezi twine ahabw’okuhemukirwa kandi tushube twesige abandi. Ku turakikore, nitwija kushemererwa emigisha y’okugira abanywani abatari kubarwa ‘abari kukira abu turi kuzarwa na bo.’ (Emi 18:24) Konka, obwesigwa nibutwariramu ebintu bibiri. Omu kicweka ekiri kukurataho, nitwija kushwijuma eki turi kubasa kukora kugira ngu benetata na banyanyazi batwesige.