1921—Hahwire emyaka igana

ZAANA

Omunara g’Omurinzi gw’aha kiro 1 Okokubanza 1921, gukaba gurimu ekibuzo ekiri kubuza abegi ngu: “Ni guha murimo mukuru ogu tushemerire kutaho omutima omuri ogu mwaka?” Omu cokugarukamu, bakagamba aha bigambo by’omuri Isaaya 61:1, 2, ahari kugamba aha murimo g’okuburira. Nihagira ngu: ‘[Yehova] anshukireho [omwika] kuretera aboro ebigambo birungi, kurangira abantu omwaka gwa [Yehova] ogw’embabazi, n’izoba eri Ruhanga witu arihoreraho enzigu.’

ABABURIZI ABABIRE BATINE BWOBA

Kugira ngu abegi ba Bibuli babase kukora omurimo g’okuburira bakaba bashemerire kutagira obwoba. Bakaba bashemerire kuburira ‘aboro ebigambo birungi’ ‘n’izoba eri Ruhanga witu arihoreraho enzigu’ ababi.

Mwenetata J. H. Hoskin, owabire atwire omuri Kanada, akaba naburira atine bwoba n’obu babire nibamuhiganisa. Omu mwaka gwa 1921, akabugana omuburizi w’Omumetodisiti. Mwenetata Hoskin akatandika ekiganiro ari kumugambira ngu: “Nitubasa kuganira aha Byahandikirwe ebi turi kwikirizanaho, rero twabugana ebi tutari kwikirizanaho nitubireka, twegumirizanamu obunywani.” Konka ebyo bikaba bitari kubasika. Mwenetata Hoskin akagamba ati: “Tukaganiraho obudakika buce yahika ari kusindika orwigi n’amani, nagira ngu ekirahure c’orwigi carugamu.”

Ogo muntu akagamba ari kuyomba ati: “Ahabw’enki otari kuza kuronda abapagani ngu obe ni bo wayegesa?” Mwenetata Hoskin taramugarukiremu; konka ku yarugireyo akagenda. Akatekateka ngu, ‘naba ndi kumanya ku ndi kuganira n’Omukristo na ho ni omupagani!’

Aha izoba eryakuratireho, ogo muburizi ku yaburire omu kanisa yeye akagamba ebintu bibi ahari Hoskin. Mwenetata Hoskin akagamba ati: “Akagambira abakurasi beye ku omu banyabishuba abizire omuri eyo tawuni ari inye munyabishuba w’amani, kandi ku nshemerire kwitwa.” Konka eco tikiratumire yayemereza omurimo g’okuburira kandi akagira ebi yahikaho. Akagamba ati: “Kikanshemeza munonga kuburira omuri ako kacweka. Bamwe omu bantu bakagamba bati: ‘Ori omukozi wa Ruhanga!’ Kandi bambuza yaba hine ebintu ebi ndi kwetenga ebi bari kubasa kunyambamu.”

BAKABA NIBEGESA BIBULI

Kugira ngu abegi ba Bibuli bakwase abantu kushoborocerwa Bibuli, bakaba nibacapa ebibuzo by’omuri Bibuli n’ebyo kugarukamu byabyo omuri magazini eyi turi kweta Musisimuke! Hakaba harimu ebibuzo by’abacari bato ebi abazire babo babire nibaganira na bo. Abazire bakaba nibabuza abana babo ebibuzo babarondera ebyokugarukamu omuri Bibuli. Bimwe omu bibuzo ebyabire nibyegesa enyegesa z’omugasho z’omuri Bibuli, ni nk’ekiri kugira ngu “Ni ebitabo bingahe ebiri omuri Bibuli?” Ebindi bibuzo ebyabire nibitebekanisa abacari bato kuburira batine bwoba, harimu nk’ecabire kiri kugira ngu: “Mbehi Abakristo ab’amazima bashemerira kwetegura kuhiganisibwa?”

N’ababire bari kumanya byingi omuri Bbuli bakaba bine ebibuzo n’ebyokugarukamu byabyo. Bikakwasa bingi ababishomire, konka akatabo kitu aku turi kweta Musisimuke! omuri obu bwire, k’aha kiro 21 Okwikuminabiri 1921, kakagamba ku ebyo byona byabire birije kwemerera. Ahabw’enki habireho ezo mpinduka?

HAKASHOHORA EKITABO KISYA!

The book The Harp of God

Ekitabo ekiri kukwasa abegi abasya ba Bibuli

Akakadi akariho ebibuzo

Benetata ababire bari kwebembera bakamanya ku abegi abasya babire bashemerire kwega Bibuli omu bundi buryo obusya. Obwe rero bakashohoza ekitabo ekiri kukwasa abasya kwega Bibuli omu Kwikuminakumwe 1921. Abayakirire eco kitabo, nambwenu bakatebwa omu ishomero eriri kucegesa. Eco kikaba nikikwasa abantu kumanya ekigenderwa ca Ruhanga, c’oku arije kuha abantu amagara agatahwaho. Ni bata oku eyi ntebekanisa yabire eri kukora?

Omuntu ku yabire nayikiriza eco kitabo akaba nahebwa akakadi kariho ekicweka kice eki arishoma. Omu sande eyabire nekurataho akaba natunga akakadi akabire kariho ebibuzo ebi yabire nayija kushoma. Ako kakadi kakaba nikahendera kari kugamba aha bicweka ebi omuntu arishoma omu sande erikurataho.

Buri isande ikumi n’ibiri, ekibina ekiri hihi y’omwegi kikaba nikimuha akandi kakadi. Ababire bakuzire, ninga ababire batari kubasa kuza aha nju n’enju, na bo bakaba nibabasindikira otukadi. Ecokureberaho: Anna K. Gardner, w’omuri Millvale, Pennsylvania, omuri Amerika, akagamaba ati: “Ekitabo ecabire kiri kukwasa abegi abasya ku cashohwire, omwegi wange ori kwetwa Thayle owabire otari kubasa kutambura, akatunga emirimo ahakuba akaba nayohereza otukadi tw’ebibuzo buri sande.” Omuntu ku yabire nahendera eryo ishomero, mwenetata omwe akaba namutayayira kugira ngu amwegese byingi omuri Bibuli.

Thayle Gardner ari omu kagare

OMURIMO OGU TWABIRE TWAZA KUTUNGA

Aha nuheru g’omwaka 1921, mwenetata J. F. Rutherford akoherereza ebibina byona amabaruha. Akabahandikira ku Ababurizi b’Obukama bakwasize abantu bingi omuri ogo mwaka kukiza endijo myaka myingi eyabandize ogo. Akongeraho ati: “Tucayine byingi by’okukora. Muhige n’abandi bije tukwatanise omuri ogu murimo murungi.” Ebihamya nibyereka ku abegi ba Bibuli bayorobire obwo buhabuzi. Omu mwaka gwa 1922 bakakora omurimo g’okuburira obutumwa bw’Obukama kukiza kare hona.

Abanywani ababire Abatine Bwoba

Abegi ba Bibuli bakerekana rukundo bari kuyambayambana. Nk’oku eyi nkuru yaza kubigamba, bakaba bari abanywani abatine bwoba ‘abazarirwe okuhwera abantu omu bihikirizi.’—Enf 17:17.

Aha Rwakabiri, aha kiro ca 31 Okwakatano, 1921, omushija w’omwiraguju w’omu tawuni ya Tulsa, Oklahoma, omuri Amerika, akasibwa ahakuba bakaba bari kumushinja ngu atahirire omukazi w’omujungu. Bwanyima, abashija b’abajungu abari kurenga 1,000 bakarwana n’abiraguju. Eyo mirwano ekahika ahu abiraguju babire batwire bari bingi omu kacweka akari kwetwa Greenwood; eco kikatuma amaju g’obushubuzi agari kurenga ahari 1,400 gayokibwa kandi ebyabire birimu babyiba. Ripoti ekagamba ku abantu abari kuhika ahari 36 bafire, konka abari kurenga omuri 300 bakahutara.

Mwenetata owabire ari kwetwa Richard J. Hill, omwegi wa Bibuli w’omwiraguju owabire atwire omuri Greenwood, akagamba ebyabireho ari kugira ngu: “Omuri eco kiro c’emirwano, tukaba twineho amashomo gitu ga Bibuli nka burijo. Ku twaherize kwega, tukahurira oruyombo omu tawuni. Tukaza kunyama bacayomba.” Orwakashatu omu kasheshe, aha kiro ca 1 Okwamukaga embera zikakizaho kuba mbi munonga. “Abantu bamwe bakija rero bagamba ngu yaba turi kwenda oburinzi tushemerire kuhungira omu maju ga gavumenti agabire gari omu tawuni.” Obwe rero, mwenetata Hill n’omukazi weye n’abana beye batano bakahungira omuri ago maju. Omuri ago maju, abiraguju abari kuhika aha 3,000 n’abakazi babo bakaba barinzirwe n’abasikare, abu gavumenti yabire eyoherize ngu bemereze emirwano.

Bwanyima y’obwire buce, mwenetata w’omujungu ori kwetwa Arthur Claus, akakora ensharamu eri kwereka obumanzi. Nagira ngu: “Ku nahurire ngu abantu b’omu tawuni ya Greenwood bari kwiba kandi bari kosya amaju, nkasharamu kuzayo kugira ngu ndebe oku benetata bari.”

Arthur Claus ari kukoresa ekitabo ekiri kukwasa abegi abasya ba Bibuli akegesa ishomero ririmo abana 14

Ku yahikire aha nju ya Hill, akabona omutahi w’omujungu owabire ayine embunda. Ogo mutahi, owabire ari munywani wa mwenetata Hill, akagira ngu Arthur nawe ni omwe omu babire bari kurwana. Akahika ari kuyomba ari kugira ngu: “Ahabw’enki oyijire kunuya?”

Mwenetata Arthur akagamba ati: “Akangambira ngu ku ndabe ntamushobororire ge ecandeta, nahika ari kundasha. Nkamugambira ku ndi munywani wa mwenetata Hill kandi nabire nshangirwe ninyija omu ka oweye.” Arthur n’ogo mutahi bakabasa kurinda abintu ebyabire bisigire.

Ku hahwireho akire kace, Arthur akamanya ku mwenetata Hill n’eka yeye babire bari omu maju ga gavumenti omu tawuni. Arthur bakamugambira ku abiraguju babire batari kubasa kuba omuri ago maju batine oruhusya rw’omukuru w’amahe omuri eyo tawuni, owabire ari kwetwa, General Barrett. Arthur akagira ati: “Kuza kugamba n’ogo mukuru w’amahe gukuba guri omurimo gugumire munonga. Ku namugambire ku ndi kwenda kutwara eyo ka, akambuza ngu: ‘Noyija kubasa kubarinda kandi obahe ebi bari kwetenga?’ Nkahika ndi kumugarukamu ngu yego.”

Arthur ku yamazire kuhebwa oruhusya akaza omu tawuni ahu ago maju gabire gombekire. Akarwereka omukuru w’etawuni rero yamugira ati: “Ni kirungi kuba omutegeki w’amahe ari we okuhire oruhusya! Nomanya ku ni iwe omuntu w’okubanza owayikirizibwa kwiha omuntu hanuya erizoba?” Mwenetata Arthur n’ogo mukuru w’amahe bakahika nibabona mwenetata Hill n’ab’omu ka yeye. Bakahika nibaza omu modoka ya Arthur rero yabatwara omu ka.

Mwenetata Claus akarinda mwenetata Hill n’ab’omu ka yeye. Ecokureberaho ceye c’okutagira obwoba, kikagira engaruka aha bandi. Arthur akagamba ati: “Omutahi owankwasize kurinda ebintu bya Hill kikatuma yakizaho kuha ekitina Abahamya ba Yehova. Kandi abantu bingi bakatandika kukunda amazima ahakuba bakerebera ku Abahamya ba Yehova batari kwebaganisamu ahabw’ibara ry’oruhu, kandi ku twine obumwe ahakuba twena twayehire Ruhanga.”

OMUNARA G’OMURINZI—OG’OKWEGA