EKICWEKA C’OKWEGA 42
Hamiza kimwe ku wabwine amazima
‘Mugeze byona; muhamire aha kirungi.’—1TES 5:21.
ECESHONGORO CA 142 Okuhamira aha Matsiko Gaitu
EMPINYE *
1. Ahabw’enki abantu bingi bashobirwe?
OMURI obu bwire hariho amadini mingi agari kugamba ku nigaramya Ruhanga omu buryo obu ari kusima. Ni yo nshonga byashobire abantu bingi! Nibebuza yaba amadini gona Ruhanga ari kugasima. Mbehi nitwesiga tutari kubanganisa ku Abahamya ba Yehova bari kwegesa amazima, kandi ku okuramya kwabo ari ko oku Yehova ari kwikiriza? Mbehi nikiba corobi kubona ebyo bihamya? Reka tubishwijume.
2. Ni enki ecahamize entumwa Pawulo ku yabwine amazima? (1 Abatesalonika 1:5)
2 Entumwa Pawulo akaba nayikiriza atari kubanganisa ku yabwine amazima. (Shoma omu 1 Batesalonika 1:5.) Akaba atari kwikiriza ago mazima ngu n’ahakuba gari kumushemeza kusha. Ahobwe, akaba nayeyegesa Ekigambo ca Ruhanga ayetonzire. Akaba nayikiriza ku ‘ebyahandikirwe byona’ byahandikisibwe omwika gwa Ruhanga. (2 Tim 3:16) Ni ebiki ebi Pawulo yayegire? Pawulo akabona ebihamya omu byahandikirwe, ebyabire biri kwereka ku Yesu ari we Mesiya owaraganisibwe, kandi ebyo bihamya abebembezi b’amadini b’Abayudaya bakaba batari kubyikiriza. Abo bebembezi b’amadini b’endyarya bakaba nibagamba ku nibakorera Ruhanga konka bari kukora ebi Ruhanga ari kwanga. (Tit 1:16) Konka Pawulo we akaba atari nka bo, ahakuba akaba atari kuronda omuri Bibuli eby’okwikiriza n’ebitari by’okwikiriza. We akaba ari kwenda kwikiriza no kuta omu nkora ‘ebiri omu Kigambo ca Ruhanga byona.’—Byak 20:27.
3. Mbehi kugira ngu twikirize ku twabwine amazima tushemerire kuba turi kumanya ebyokugarukamu byona by’ebibuzo ebi turi kwebuza? (Nambwenu reba akashanduku akari kugira ngu: “ Emirimo ya Yehova n’ebitekateko byeye, ni byingi tibiri kubasa kubarwa.”)
3 Abamwe nibatekateka ku edini ey’amazima, eri kuba eshemerire kugarukamu ebibuzo byona, harimu n’ebibuzo ebi Bibuli etari kugarukamu. Konka shi ni amazima? Tekateka aha cokureberaho ca Pawulo. Akagambira Abakristo bagenzi beye ngu baroze byona, konka nambwenu yabagambira ku hariho ebintu byingi ebi yabire atashoborokirwe. (1 Tes 5:21) Akahandika ati: ‘Nitumanyaho kace,’ bwanyima akongeraho ati: ‘Nimumanya ngu hati niturebera omu ndeberwamu tutari kuhweza ge.’ (1 Kor 13:9, 12) Pawulo akaba atari kumanya ebintu byona kandi n’itwe ni ko okwe. Konka Pawulo akaba ari kumanya ebiri kukwata aha kigendererwa ca Ruhanga. Bice ebi yabire namanya bikaba nibituma yayikiriza ku yabwine amazima!
4. Ni enki ekiri kubasa kutukwasa kwesiga ku twabwine amazima, kandi shi ni enki eki twaza kushwijuma aha bikwatirine n’Abakristo ab’amazima?
4 Oburyo obumwe oburi kubasa kutuhamiza ku twabwine amazima ni okugeranisa ecokureberaho eki Yesu yatireho ekiri kwereka okuramya kw’amazima, n’ebi Abahamya ba Yehova bari kukora omuri obu bwire. Omuri eki kicweka, twaza kureba oku Abakristo ab’amazima (1) bari kwanga kuramya ebishushani, (2) oku bari kuha ekitinisa izina rya Yehova (3) oku bari kukunda amazima, kandi (4) n’oku bari kukundana babyihire aha mutima.
NITWANGA KURAMYA EBISHUSHANI
5. Ni enki eki turi kubasa kwegera aha cokureberaho ca Yesu aha bikwatirine n’oku yabire ari kuramya Ruhanga omu buryo obuhikire, kandi shi ni bata oku turi kubasa kumutoreza?
5 Ahakuba Yesu yabire ari kukunda Yehova munonga, akaba namushaba burijo obu yabire ari omu iguru n’obu yabire ari omu nsi. (Luka 4:8) Akegesa abakurasi beye kumutoreza. Yesu, ninga abakurasi beye, tibarakoresize ebishushani omu kuramya kwabo. Ahabw’okuba Ruhanga ari Omwika, tihine omuntu ori kubasa kukora ekintu ekiri kushushana na we! (Isa 46:5) Kandi shi Ruhanga nayehurira ata, yareba abantu bakora ebishushani by’abafire kandi bakabiramya? Omu biragiro ikumi bya Musa ekiragiro ca kabiri nikigira ngu: ‘Otaryekorera ekishushani cona ekibizire, n’obu cakuba ekishushani c’ekintu cona ekiri ah’iguru omu iguru, ninga ekiri omu nsi ahaasi otaribyinamira.’ (Kur 20:4, 5) Abantu bona abari kwenda kukora ebi Yehova ari kukunda niborobera ebyo bigambo.
6. Ni kiha cokureberaho c’okuramya eki Abahamya ba Yehova bari kutoreza omuri obu bwire?
6 Abantu abari kwega ebyabireho nibagamba ku Abakristo b’omu kinyigana c’okubanza baramize Ruhanga kusha. Ekitabo kimwe ekiri kugamba aha by’amadini kikagamba ku Abakristo b’omu kinyigana c’okubanza, babire batari kubasa kwikiriza ekitekateko c’okuta ebishushani omu myanya y’okuramizamu. (History of the Christian Church) Omuri obu bwire, Abahamya ba Yehova nibatoreza ecokureberaho c’Abakristo b’omu kinyigana c’okubanza. Tituri kuramya ebishushani by’abantu abafire, ba marayika n’obu yakuba Yesu. Kandi tituri kuramya ebirango by’ihanga. Oku byakugenda kona, tukamaririra korobera ebigambo bya Yesu ebiri kugira ngu: ‘Oramye [Yehova] Ruhanga wawe; obe ni we wahereza wenka.’—Mat 4:10.
7. Ni eha ntanisa eri ahagati y’Abahamya ba Yehova n’agandi madini?
7 Abantu bingi nibaba bari kwenda kuhurira enyegesa z’abakuru b’amadini abari kumanywa munonga. Abo bantu nibabakwata nka ba ruhanga babo. Abantu nijura amaramizo gabo, bagura ebitabo byabo, kandi babaha esente nyingi z’okubashagika. Abamwe omuri abo bantu, nibikiriza ebintu byona ebi abo bashomesa bari kugamba. Abamwe ku bari kureba abebembezi babo, nibashemererwa munonga, oshusha ngu bareba Yesu! Ekiri kutana n’eco, abari kuramya Yehova bo tibari kuramya abantu. N’obu turi kuha ekitinisa abari kutwebembera, nitworobera enyegesa ya Yesu eri kugira ngu: ‘Mwena muri benetata.’ (Mat 23:8-10) Tituri kuramya abantu n’obu bakuba abebembezi b’amadini ninga shi abategeki. Kandi tituri kushagika entego zabo. Omu mwanya gw’eco, tituri kwejwanga omu by’obutegeki kandi nituguma twetanisize aha nsi. Obwe rero, ebyo byona nibituma tutashushana n’agandi madini agari kweyeta ag’Abakristo.—Yohaana 18:36.
NITUHA IZINA RYA YEHOVA EKITINISA
Abakristo abamazima nibashemerererwa kugambira abandi ebiri kukwata ahari Yehova (Reba paragurafu 8-10) *
8. Ni enki ekiri kutuhamiza ku Yehova ari kwenda ngu izina ryeye rihimbisibwe kandi rimanywe n’abantu bingi?
8 Izoba rimwe Yesu akashaba ati: “Tata, himbisa izina ryawe.” Yehova akagarukamu eyo shara n’iraka eriri kuhurirwa ari omu iguru ari kuraganisa ku yabire arije kuhimbisa izina ryeye. (Yoh 12:28) Yesu akahimbisa izina ry’Ishe ari omu murimo g’okuburira. (Yoh 17:26) Obwe rero Abakristo ab’amazima nibareba okuhimbisa izina rya Ruhanga n’okurimanyisa abandi nk’omugisha gw’amani.
9. Ni bata oku Abakristo b’omu kinyigana c’okubanza bayerekire ku nibaha ekitinisa izina rya Ruhanga?
9 Hahwireho obwire buce ekibina c’Abakristo kitandikireho omu kinyigana c’okubanza B.Y., Yehova akatandika ‘kutayayira abanyamahanga, okutorana abantu omuri bo kuba ihanga eriri kwetererwa izina ryeye.’ (Byak 15:14) Abakristo b’omu kinyigana c’okubanza bakaba nibashemerererwa kukoresa izina rya Ruhanga n’okurimanyisa abandi. Bakaba nibakoresa izina rya Ruhanga omu murimo g’okuburira kandi barikoresa bari kuhandika ebitabo by’omuri Bibuli. * Eco ni ekihamya ekiri kwereka ku babire bari abantu abari kwetererwa izina rya Ruhanga.—Byak 2:14, 21.
10. Ni biha bihamya ebiri kwereka ku Abahamya ba Yehova ari abantu abari kwetererwa izina rya Yehova?
10 Mbehi Abahamya ba Yehova ni abantu abari kwetererwa izina rya Yehova. Reka turebe ebihamya ebiri kucereka. Omuri obu bwire abebembezi b’amadini bingi bakakoresa obushoborozi bwabo, omu kutuma abantu batamanya izina rya Ruhanga. Bakaryiha omuri Bibuli zabo kandi bazibira abantu kurikoresa omu maramizo ga bo. * Mbwenu shi ni oha ori kubasa kuhakana ku Abahamya ba Yehova ari bo bantu bonka abari kuha izina rya Yehova ekitinisa? Ni itwe abari kumanyisa abantu izina rya Ruhanga kukira agandi madini gona! Omuri obwo buryo nitukora ebiri kubuganisa n’izina ryitu ari ryo Abahamya ba Yehova. (Isa 43:10-12) Tukashohoza Bibuli z’Obuhinduzi bw’ensi ensya eziri kukoresa izina rya Yehova omu mwanya ogu abandi bahinduzi baryihiremu, eziri kurenga miliyoni 240. Kandi tukashohoza ebitabo ebiri kwegesa Bibuli, omu ndimi eziri kurenga 1000!
NITUKUNDA AMAZIMA
11. Ni bata oku Abakristo b’omu kinyigana c’okubanza bayerekire ku nibakunda amazima?
11 Yesu akaba nakunda amazima agari kukwata ahari Ruhanga n’ebigendererwa byeye. Yesu akereka ku yabire nakunda ago mazima omu bi yabire ari kukora kandi akagamanyisa abandi. (Yoh 18:37) N’abakurasi ba Yesu b’abesigwa bakaba nibakunda amazima. (Yoh 4:23, 24) Nambwenu entumwa Petero akagamba ku Obukristo ari ‘omuhanda gw’amazima.’ (2 Pet 2:2) Ahakuba Abakristo b’omu kinyigana c’okubanza babire bari kukunda amazima, bakanga ebitekateko by’abebembezi b’amadini, emigenzo n’ebitekateko by’abantu ebyabire bitari kubugana n’amazima. (Kol 2:8) N’omuri obu bwire Abakristo ab’amazima nibataho amani, kugira ngu ‘bagagenderemu’ bari kubuganisa enyikiriza zabo n’okubaho kwabo n’emisinge y’omu kigambo ca Yehova.—3 Yoh 3, 4.
12. Ni enki ekiri kubaho abari kutwebembera bareba hine eki tushemerire kuhindura omu nyegesa zitu, kandi ahabw’enki bari kukikora?
12 Abahamya ba Yehova tibari kugamba ku nibamanya byona ebiri omuri Bibuli. Hine obu bari kukora enshobi omu ku bari kushoborora enyegesa z’omuri Bibuli, n’omu ku bari kutebekanisa ekibina. Kandi eco tikishemerire kututangaza. Ebyahandikirwe nibigamba ku abantu bari kugenda nibamanya amazima oku hari kugenda nihahwaho obwire. (Kol 1:9, 10) Yehova namanyisa abantu amazima mporampora, obwe rero tushemerire kwehangana oku omushana gw’amazima guri kukizaho kwaka. (Enf 4:18) Abari kutwebembera ku bari kureba ngu twine kugira eki twahindura omu nyikiriza zitu, nibahika bari kubihindura. Amadini mingi nigahindura omu nyegesa za bo kugira ngu gashemeze abakurasi babo ninga ngu babe ba ruranganwa, konka itwe nituhindura omu nyegesa zitu kugira ngu tukizeho kuhika hihi ya Ruhanga, kandi turamye Yehova nk’oku Yesu yakikozire. (Yak 4:4) Tituri kuhindura omu nyegesa zitu ngu tubuganise n’ebitekateko by’abantu b’omuri egi nsi, ahobwe nitukikora aha kuba turi kushoborocerwa Ebyahandikirwe. Nitukunda amazima!—1 Tes 2:3, 4.
NITUKUNDANA TUBYIHIRE AHA MUTIMA
13. Ni guha mutwarize mukuru ogu Abakristo b’omu kinyigana c’okubanza bayerekire, kandi shi ni bata oku Abahamya ba Yehova bari kugwereka omuri obu bwire?
13 Abakristo b’omu kinyigana c’okubanza bakaba bine emitwarize myingi, konka omutwarize mukuru ogu babire nibamanyirwaho ni ogwa rukundo. Yesu akagamba ati: ‘Ku muriguma nimukundana, nibwo abantu bona baribamanya ku muri abegi bange.’ (Yoh 13:34, 35) N’omuri obu bwire Abahamya ba Yehova omu nsi yona nibakundana, kandi bine obumwe. N’obu turi kuruga omu mahanga agatari kushushana, kandi tutari kushushanisa oruhu n’emicwe, turi eka ya benetata na banyanyazi omu nsi yona. Nitwerebera ebihamya ebiri kwereka ku nitukundana omu nterane n’omu biterane. Ebyo nibituma twayesiga tutari kubanganisa ku Yehova ari kusima okuramya kwitu.
14. Tukuratize ebiri omu Bakolosai 3:12-14, ni buha buryo burungi obu turi kubasa kwerekamu abandi rukundo?
14 Ebyahandikirwe nibituhiga ‘kukundana munonga.’ (1 Pet 4:8) Oburyo bumwe obu turi kwerekamu eyo rukundo ni okusaasira abandi kandi tukaguma kwijuka ku twena tutahikirire. Nambwenu nitubasa kubyereka turi kuba enfura kandi turi kwakira abandi omu kibina nobu bakuba bari kututwariza kubi. (Shoma omu Baefeso 4:32.) Eyo rukundo ni ko kamanyiso akari kwereka ku turi Abakristo ab’amazima.
“OKWIKIRIZA KUMWE”
15. Ni buha bundi buryo obu turi kutorezamu oku Abakristo b’omu kinyigana c’okubanza babire bari kuramya?
15 Hariho obundi buryo obu turi kubasa kutorezamu oku Abakristo b’omu kinyigana c’okubanza babire bari kuramyamu. Ecokureberaho: N’itwe turi nk’Abakristo b’omu kinyigana c’okubanza ahakuba twine abareberezi abari kutayayira ebibina, abazehe n’abahereza. (Fil 1:1; Tit 1:5) Nk’oku Abakristo b’omu kinyigana c’okubanza bakikozire nitworobera ebiragiro bya Yehova by’eby’emibonano n’obushwere, ebikwatirine n’okukoresa eshagama kandi turinda ekibina abasisi abari kwanga kwehana.—Byak 15:28, 29; 1 Kor 5:11-13; 6:9, 10; Heb 13:4.
16. Ni enki eki turi kwegera aha biri omu Baefeso 4:4-6?
16 Ysu akagamba ku abantu bingi babire barije kugamba ku bari abegi beye konka batari ab’amazima. (Mat 7:21-23) Nambwenu ebyahandikirwe bikaba byagambire ku omu biro by’emperu ‘abantu bingi babire barije kuhaba emigenzo y’edini bakahakanisa obushoborozi bwayo.’ (2 Tim 3:1, 5) Konka Bibuli negamba butuni ku hariho “okwikiriza kumwe” ninga shi edini emwe eyi Ruhanga ari kwikiriza.—Shoma omu Baefeso 4:4-6.
17. Ni baha abari kutoreza Yesu omuri obu bwire kandi bakereka ku bari kumanya amazima?
17 Mbwenu shi ni baha abari kuramya Ruhanga omu buryo obu ari kusima omuri obu bwire? Twashwijuma ebihamya. Twareba ecokureberaho eki Yesu yatuterireho ekiri kwereka okuramya kw’amazima n’oku Abakristo b’omu kinyigana c’okubanza babire bari kuramyamu Ruhanga. Hatariho okubanganisa, ni Abahamya ba Yehova. Ku ni omugisha gw’amani kuba turi abahereza ba Yehova kandi turi kumanya amazima agari kumukwataho n’ebigendererwa byeye! Nimureke tugumizemu kuhamira aha mazima.
ECESHONGORO CA 3 Amaani Gaitu, Amatsiko Gaitu, Obwesigye Bwaitu
^ par. 5 Omuri eki kicweka, twaza kureba ecokureberaho eki Yesu yatusigire ekiri kwereka okuramya okw’amazima, kandi turebe n’oku Abakristo b’omu kinyigana c’okubanza bakikuratize. Nambwenu twaza kushwijuma ekihamya ekiri kwereka ku Abahamya ba Yehova ari bo abari kutoreza ecokureberaho eki Yesu yatusigire omuri obu bwire.
^ par. 9 Reba akashanduku akari kugira ngu: “Mbehi Abakristo b’omu kinyigana c’okubanza bakaba nibakoresa izina rya Ruhanga Omunara g’Omurinzi, 1 Okwamushanju, 2010, p. 6.
^ par. 10 Ecokureberaho: Omu mwaka gwa 2008, omukuru w’Abakaturiki Papa Benedict wa 16 akaragira ngu izina rya Ruhanga ritarikoresibwa omuri za kiriziya zabo, omu byeshongoro n’omushara zabo.
^ par. 63 EKISHUSHANI: Ekitongore ca Yehova kikashohoza Bibuli y’obuhinduzi bw’ensi ensya omu ndimi eziri kurenga 200, obwe rero abantu nibabasa kushoma omu ndimi zabo Bibuli eri kukoresa ezina rya Ruhanga.
